“Mataupu 13: Galulue Faatasi ma Taitai ma Tagata o le Ekalesia e Faatu le Ekalesia,” Tala’i La’u Talalelei: O Se Taiala e Faasoa Atu ai le Talalelei a Iesu Keriso (2023)

“Mataupu 13,” Tala’i La’u Talalelei

Mataupu 13

Ia Galulue Faatasi ma Taitai ma Tagata o le Ekalesia e Faatu le Ekalesia

Manatunatu i le Mea Lenei

E mafai faapefea ona ou galue faatasi ma taitai ma tagata o le uarota e faatu le Ekalesia?
O a tiutetauave o taitai o siteki ma uarota i le galuega faafaifeautalai?
O le a le mea e tatau ona tupu i le fonotaga faamaopoopo faalevaiaso ma taitai o le uarota?
E mafai faapefea ona ou lagolagoina taitai i le faasoaina atu o le talalelei ma le faamalosia o tagata fou ma tagata ua toe foi mai?

E galulue faatasi faifeautalai ma taitai o le lotoifale ma tagata o le ekalesia e saili tagata e aoao ma taitai atu i latou i le Faaola. Ua tuufaatasia outou e ala i lou alofa mo le Atua ma Ana fanau. O le a Ia faalauteleina au taumafaiga i le tulaga e te galue ai i le lotogatasi ma taitai ma tagata o le ekalesia i le lotoifale. Ia galulue faatasi ma i latou o se vaega taua o au sini ma fuafuaga.

A oo ina e iloa ma alofa i taitai ma tagata o le ekalesia i le lotoifale, o le a e vaaia ni auala e mafai ona e lagolagoina ai i latou i o latou valaauga ma taumafaiga faafaifeautalai. Ofo atu au meaalofa ma taleni i auala e siitia ma faamalosia ai i latou.

Ua faamalamalama mai e lenei mataupu le auala e mafai ona outou galulue ai ma tagata o le ekalesia i le faasoaina atu o le talalelei ma faamalolosia tagata fou ma tagata ua toe foi mai. Mo nisi faamatalaga, tagai mataupu 23 o le Tusitaulima Aoao.

Suesuega a le Tagata Lava Ia pe Faalesoa

Toe iloilo le tala i le liua o le Tupu o Lamonae, lona faletua, ma lona nuu i le Alema 18–19.

O le a le matafaioi a Apiso i lenei liua? O le a se mea e mafai ona ia faia e le mafai e Amona ona fai?
O le a se mea ua e aoaoina mai lana faataitaiga e uiga i tagata o le ekalesia ma faifeautalai o loo galulue faatasi?

Mafaufau i isi faataitaiga nei o tagata o le ekalesia o loo fesoasoani i le galuega faafaifeautalai:

Amoleka (Alema 10:1–11)
Pisila ma Akula (Galuega 18:24–28)
O le fafine Samaria (Ioane 4:5–30, 39–42)

E mafai faapefea ona e uunaia taitai ma tagata o le ekalesia e mulimuli i a latou faataitaiga?

Fausia ni Sootaga ma Taitai ma Tagatanuu o le Lotoifale.

O taitai ma tagata o le Ekalesia i le lotoifale o au paaga i le galuega a le Atua. Fausia ni sootaga e fesoasoani ia te oe e galulue faatasi ai e aumai le talalelei toefuataiina i fanau a le Tama Faalelagi. O nei sootaga e mafai ona faamanuiaina ai oe mo aso o totoe o lou olaga.

Fausia le faatuatuaina ma faauooga faamaoni ma taitai ma tagata o le ekalesia i le lotoifale. Asiasi atu ia i latou ma aoao e uiga i o latou aiga, talaaga, mea e fiafia i ai, ma aafiaga i le Ekalesia. Ia e aafia faamaoni i o latou olaga.

Pe a e asiasi atu, ia faia ma se faamoemoega. Faaali atu o loo e auai ma le naunautai i le galuega o le sailia ma le aoao atu. Faaaloalo i o latou taimi ma taimi faatulagaina.

A e feiloai pe aoao atu le talalelei i o latou aiga, saili e fesoasoani ia i latou e faamalosia lo latou faatuatua. Ia saili ma le agaga tatalo ia mafuta le Agaga ma oe. Faasoa atu ou aafiaga i le galuega faafaifeautalai i la outou eria.

Lagolago Taitai i le Lotoifale i a Latou Matafaioi

O nisi o valaauga faaletaitai e i ai tiutetauave mo le galuega faafaifeautalai. O le malamalama i nei tiutetauave e fesoasoani ia te oe e lagolago ai nei taitai. O faamatalaga nei e mai le mataupu 23 i le Tusitaulima Aoao.

Peresitene o le Siteki: e umia ki o le perisitua i le siteki mo le faasoaina atu o le talalelei ma faamalosia tagata fou ma tagata ua toe foi mai. O ia ma ona fesoasoani e tuu atua le taitaiga aoao mo nei taumafaiga.

Au Epikopo: E galulue ma le au peresitene o le korama a toeaina ma le Au Alofa ao latou taitaia taumafaiga a le uarota e faasoa atu le talalelei ma faamalosia tagata fou ma tagata ua toe foi mai.

O au peresitene o le korama a toeaina ma le Aualofa: E taitaia taumafaiga a le uarota mai lea aso i lea aso e faasoa atu le talalelei ma faamalolosia tagata fou ma tagata ua toe foi mai. Latou te galulue faatasi e taitai nei taumafaiga faatasi ma le aufono a le uarota, i lalo o le faamaopoopoga a le epikopo. Tagai Tusitaulima Aoao, 8.2.3 ma le 9.2.3.

Taitai misiona a le uarota (pe a ua valaauina): Faamaopoopo le galuega a tagata o le uarota ma taitai, faifeautalai a le uarota, ma faifeautalai faamisiona. Afai e le’i valaauina se taitai faamisiona a le uarota, o se tasi o le au peresitene o le korama a toeaina e faatinoina lenei matafaioi. Tagai i le Tusitaulima Aoao, 23.5.3.

Ia fesili soo ia te oe lava ia, “Pe o a’u ea o se faamanuiaga i taitai i le lotoifale?” Atiina a’e se uiga faaalia o le “E mafai faapefea ona ou fesoasoani?”

Suesuega Faalesoa

Faatulaga se taimi e asiasi puupuu ai ma se taitai o le uarota. Fesili atu pe mafai faapefea ona e lagolagoina lelei o ia. Fai ni fuafuaga e faaleleia ai.

Fonotaga Faamaopoopo Faalevaiaso

O le galulue faatasi ma taitai i le lotoifale—e aofia ai taitai o le autalavou—e taua tele i le lotogatasi i au taumafaiga faafaifeautalai. Afai ua tofia se taitai misiona a le uarota, o ia e taitaia fonotaga faamaopoopo faalevaiaso. A leai, o le sui o le au peresitene o le korama a toeaina ua tauaveina lenei matafaioi e taitaia.

I nei fonotaga pupuu ma le vave, e faamaopoopo ai e taitai o le lotoifale ma oe taumafaiga e faasoa atu le talalelei ma faamalolosia tagata fou ma tagata ua toe foi mai (tagai Tusitaulima Aoao, 23.4). E mafai ona faia nei fonotaga faafesagai pe i tekinolosi. O le faamaopoopoga e mafai foi ona tupu i isi auala i le vaiaso, e aofia ai le valaau i le telefoni, tesi, ma imeli.

“O se taumafaiga tuufaatasi ma le taulaiga lea e mafai ai ona fesoasoani tele le fuafuaina ma le setiina o sini a faifeautalai ma le fuafuaina o sini a le uarota po o le paranesi e faataunuu ai le galuega o le faapotopotoina o Isaraelu” (Quentin L. Cook, “Faamoemoega ma le Fuafuaina,” semina faaleautaitai o le misiona, 25 Iuni, 2019).

Saunia mo le Fonotaga Faamaopoopo Faalevaiaso

Lagolago taitai o le uarota e ala i le o mai saunia e auai i le fonotaga faamaopoopo faalevaiaso. A o le’i faia le fonotaga, faaalu se taimi i le taimi o suesuega faalesoa e talanoaina ai pe mafai faapefea ona oulua auai ma le mataalia.

Ia faafou lua faamaumauga i le polokalama o le Tala’i La’u Talalelei ina ia i ai i taitai ni faamatalaga o i ai nei e uiga ia i latou o loo oulua galulue i ai. Saunia e lipoti atu i tofitofiga mai fonotaga ua mavae atu.

Auai i le Fonotaga Faamaopoopo Faalevaiaso

O fonotaga faamaopoopo faalevaiaso ua faamoemoe e taulai atu i manaoga o tagata taitoatasi. I le taimi o le fonotaga, ofo atu pe mafai faapefea ona oulua lagolagoina tagata o le uarota, e aofia ai le autalavou, i le fesoasoani e taulima manaoga o tagata taitoatasi.

O se fonotaga faamaopoopo faalevaiaso e masani ona aofia ai autu nei e fa:

E mafai faapefea ona tatou fesoasoani ia i latou o loo aoaoina? O ni vaega e mafai ona faaaoga mo talanoaga

O ai tagata e mafai ona auai i lesona i lenei vaiaso a sau? O ai o le a valaaulia i latou e auai?
O a luitau mo i latou o loo aoaoina? E mafai faapefea e tagata lotu ona fesoasoani atu?
O a manaoga mo i latou e i ai se aso faatulagaina mo le papatisoga? Pe ua fuafuaina le papatisoga? (Tagai “O Le Sauniga o le Papatisoga” i le mataupu 12.)

E mafai faapefea ona tatou fesoasoani ia i latou o e na papatisoina talu ai nei? O ni vaega e mafai ona faaaoga mo talanoaga:

O ai tagata fou i lo latou tausaga muamua i le avea ai ma tagata o le Ekalesia o loo auai i le sauniga faamanatuga? E mafai faapefea ona tatou fesoasoani i soo se tasi e le o auai mai?
O ai tagata fou o le ekalesia e i ai ni uo i le uarota? E mafai faapefea ona fesoasoani uso ma tuafafine o auaunaga? E mafai faapefea ona fesoasoani korama ma vasega a le autalavou?
O ai tagata fou e i ai se tofiga po o se valaauga?
E mafai faapefea ona tatou fesoasoani i tagata fou o le ekalesia e amata ona sailiili i o latou tuaa ua maliliu ina ia mafai ai ona faatinoina sauniga o le malumalu mo i latou? Pe o i ai i tagata fou se pepa faataga o le malumalu? Afai e lata ane se malumalu, e mafai faapefea ona tatou fesoasoani ia i latou e o i le malumalu e faatino papatisoga mo nei tuaa?
O le fea lesona mai le mataupu 3 e manaomia pea ona toe aoaoina? E faapefea ona auai tagata lotu?
Iloilo le alualu i luma o La’u Ala o Feagaiga mo tagata fou taitoatasi.

E mafai faapefea ona tatou fesoasoani i tagata ua toe foi mai? O ni vaega e mafai ona faaaoga mo talanoaga

O fea aiga e le lolotu uma e mafai ona asiasi ma aoao atu e faifeautalai?
O ai tagata o le ekalesia ua toe foi mai e mafai ona asiasi ma aoao atu e faifeautalai?
O fea tagata ua toe foi mai e i ai ni uo i le uarota ma avanoa talafeagai e auauna atu ai?
E mafai faapefea ona tatou fesoasoani i nei tagata?

E mafai faapefea ona tatou maua nisi tagata e aoao? O ni vaega e mafai ona faaaoga mo talanoaga:

E mafai faapefea ona tatou fesoasoani i tagata taitoatasi, e aofia ai le autalavou, ma aiga e faaaoga mataupu faavae o le alofa, faasoa, ma le valaaulia? (Tagai “Lotogatasi ma Tagata o le Ekalesia” i le mataupu 9.)
E mafai faapefea ona tatou fesoasoani i tagata o le ekalesia, e aofia ai taitai o le Peraimeri, ona valaaulia uo i gaoioiga a le uarota?

Suesuega Faalesoa

Maimoa i le vitio o se fonotaga faamaopoopo faalevaiaso i le Tusitaulima Aoao, 23.4. O le a se mea na e aoaoina e mafai ona e faaaogaina i le isi fonotaga faamaopoopo faalevaiaso? E mafai faapefea ona e saunia lelei e talanoaina manaoga ma fuafua faatasi ma taitai o le uarota? I le isi lua fuafuaga e sosoo ai, faatutu ni sini mo le auala o le a oulua faaleleia ai.

Lagolago le Fuafuaga a le Uarota mo le Faasoaina Atu o le Talalelei

O le aufono a le uarota e fatuina se fuafuaga faigofie mo le faasoaina atu o le talalelei (tagai i le Tusitaulima Aoao, 23.5.6). Ia Faamasani ma lenei fuafuaga. I fonotaga faamaopoopo faalevaiaso, vaavaai mo ni auala e fesoasoani ai i taitai e galulue agai i a latou sini. Ia logoina pea taitai e uiga i mea o loo oulua faia e lagolago ai tagata o le ekalesia i le faasoaina atu o le talalelei.

Afai e valaaulia oulua e auai i se fonotaga a le aufono a le uarota, ia saunia e tuuina atu se faafouga puupuu i le alualu i luma o i latou o loo oulua aoaoina ma soo se tofiga ua oulua mauaina (tagai Tusitaulima Aoao, 29.2.5). Tagai i lenei avanoa o se taimi e fausia ai le talitonuga ma le faatuatuaina o taitai o le uarota.

Fetuunai i Manaoga o le Eria i le Lotoifale

O uarota po o paranesi taitasi e i ai ni manaoga tulaga ese mo oe e fetuunai i ai. E mafai ona e auauna atu i se paranesi laitiiti po o se uarota a talavou nofofua matutua, pe e mafai foi ona e auauna atu i ni uarota se tele. O nisi taitai o le a tele atu o latou poto masani ae itiiti isi. O nisi taitai o le a tele atu le taimi e avanoa ai nai lo isi.

Vaavaai mo ni auala e fesoasoani ai i taitai i le lotoifale. Atonu latou te talosaga atu ia te oe e fesoasoani e lagolago tagata i o latou tofiga faaleauaunaga. Atonu latou te fai atu ia te oe e uunaia tagata fou o le ekalesia e valaaulia a latou uo e auai i le lotu. E mafai ona e tuuina atu ni malamalamaaga taua e uiga i le galuega faafaifeautalai a o aoao e taitai ma tagata o le ekalesia auala e faasoa atu ai le talalelei.

I nofoaga e fou tele ai le Ekalesia, e ono talosagaina oe e taitai o le paranesi e fesoasoani i tagata fou ia malamalama i le ala na faatulagaina ai e le Alii Lana Ekalesia.

O lau galuega ma taitai atonu e eseese i eria eseese, ae o nei gaoioiga uma e taua i le faamanuiaina o tagata taitoatasi ma le faavaeina o le Ekalesia a le Alii.

Fesoasoani i Tagata o le Ekalesia ma Taitai ia Alolofa, Faasoa Atu, ma Valaaulia

Uunaia tagata lotu e faasoa atu ai le talalelei i ni auala e masani ai ma faigofie. Ua ofoina mai e le Tusitaulima Aoao ia faatonuga ma vitio e fesoasoani ai i tagata ma taitai e faia lenei mea e ala i le ola ai i mataupu faavae o le alofa, faasoa atu, ma valaaulia (tagai Tusitaulima Aoao, 23.1.1, 23.1.2, ma le 23.1.3). Ia manatua nei mataupu faavae a o outou galulue faatasi ma taitai.

O le a avea oulua ma se faamanuiaga i taitai a o oulua lagolagoina a latou taumafaiga i lenei galuega. I se isi itu, o le latou faataitaiga o le a fesoasoani i tagata o le ekalesia ia sili atu ona aafia i le faasoaina atu o le talalelei ma faamalolosia tagata fou ma tagata ua toe foi mai.

Tagai i le “Lotogatasi ma Tagata o le Ekalesia” i le mataupu 9 mo manatu e uiga i le lagolagoina o tagata o le ekalesia i a latou taumafaiga e faasoa atu le talalelei.

Suesuega o Tusitusiga Paia

Suesue fuaiupu nei. Na faapefea ona alolofa, faasoa, ma valaaulia le Faaola ma nei soo? O a ni faatinoga e musuia e nei faataitaiga i lau aoaoga? E mafai ona e faasoa atu le talalelei i auala masani ma lelei.

Alofa

Faasoa atu

Valaaulia

O taimi taitasi e te suesue ai, tusifaamaumau mea ua e aoaoina.

Lagolago Taitai i le Lotoifale i le Faamalolosia o Tagata Fou

Pe a papatisoina ma faamauina tagata, e avea i latou ma “nuu faatasi ma le au paia, o le aiga foi o le Atua” (Efeso 2:19; tagai foi 1 Korinito 12:12–27). Galulue ma taitai o le lotoifale e fesoasoani i tagata fou ia “tausia i le afioga lelei a le Atua, faatutumau i latou i le ala sao, …ua na o galuega a Keriso ua faalagolago i ai” (Moronae 6:4).

“E o mai tagata liliu mai i totonu o le Ekalesia ma se naunautai mo le mea ua latou mauaina. E tatau ona tatou galulue vave loa i luga o lena naunautai. E mafai ona fesoasoani faifeautalai e faailoa atu ma faafesootai tagata latou te aoaoina ma tagata fou liliu mai i tagata faamaoni o le ekalesia o e o le a aapa atu ia i latou, faalogo ia i latou, taiala i latou, ma faafeiloai i latou i le lotu a o lei papatisoina i latou. … A o tatou [auauna atu] ia i latou o e ulu atu i le vai o le papatisoga, o le a tatou vaai i le toatele o fanau a le Atua o tumau e oo i le iuga ma maua le ola e faavavau” (Ulisses S. Soares, “Convert Retention,” mission leadership seminar, June 25, 2018).

Fesoasoani i Tagata Fou e Auai i le Sauniga Faamanatuga

Ua ia te oe se matafaioi taua e fesoasoani ai i tagata fou ia auai i le lotu. Galulue ma taitai ina ia mautinoa o loo fesoasoani oe po o tagata o le uarota ia i latou ia auai. O le faailoilo autu o loo faaalia ai le auai o se tagata fou i le sauniga faamanatuga e mafai ona fesoasoani ia te oe ma taitai o le uarota e iloa ai le taimi e ono manaomia ai e ia se faamalosiauga faaopoopo.

O tagata fou o le ekalesia e foliga mai e faaauau pea ona auai i le sauniga faamanatuga ma aai ma feinu i le faamanatuga pe a i ai ni a latou uo i le uarota. Fesoasoani ia latou lagonaina se lagona o le auai, aemaise lava i le taimi o lo latou uluai tausaga o le ola ai i le talalelei. (Tagai i le Mataupu Faavae ma Feagaiga 84:106, 108.)

Toe Aoao atu Lesona i le Mataupu 3

Fesoasoani i tagata fou o le ekalesia ia faaauau pea ona faamalolosia lo latou faatuatua i le Faaola o Iesu Keriso ma Lana talalelei. O upumoni ma mataupu faavae o le talalelei e mauaa loloto atu a o faaauau pea ona aoao tagata fou e ala i le Agaga.

A uma le faamauga, toe aoao atu lesona a faifeautalai. E te taitaia le aoao atu. Peitai, ia galulue faatasi ma taitai o le uarota ina ia auai faifeautalai a le uarota po o isi tagata o le au paia. O le toe aoaoina o lesona i le mataupu 3 o se auala taua lea e fesoasoani ai i tagata fou ia “tausia i le afioga lelei a le Atua” (Moronae 6:4). A o e aoao atu, uunaia tagata fou ina ia tausia tautinoga uma i lesona.

Faitau tusitusiga paia ma tagata fou, aemaise lava le Tusi a Mamona, ma aoao atu mataupu faavae o le talalelei. Fesoasoani ia i latou e faasoa atu le talalelei ia latou uo ma aiga? E tofu tagata fou ma manaoga faapitoa, ma e mafai ona e fesoasoani ia te ia ia lagona le alofagia ma le taliaina.

Lipoti o le Alualu i Luma o le Ala o Feagaiga ma Lo’u Ala o Feagaiga

E i ai i taitai i le lotoifale ni punaoa mo a latou taumafaiga faafaifeautalai e pei lava ona e faia. O se tasi o nei mea o le lipoti o le Alualu i Luma o le Ala o Feagaiga, o loo maua i le polokalama o Meafaigaluega a Tagata o le Ekalesia po o punaoa mo Taitai ma Failautusi. O lenei lipoti e mafai ai e taitai i le lotoifale ona vaai i aafiaga taua e manaomia e se tagata ona alualu ai pea i luma i luga o le ala o feagaiga a o lei papatisoina ma pe a mavae le papatisoga.

O Lo’u Ala o feagaiga o se punaoa e fesoasoani ai i tagata fou o le ekalesia ia “tumau le taula i lo latou faatuatua ia Iesu Keriso ma lagona le i ai i le aiga i le Ekalesia” (O Lo’u Ala o Feagaiga, iv). E folasia atu ai tagata fou i gaoioiga ma avanoa, e pei o talafaasolopito o aiga ma fesoasoani i tuaa ua maliliu ia maua sauniga paia i le malumalu. Uunaia tagata o le ekalesia i le lotoifale e taiala tagata fou e ala i nei aafiaga. Tuu atu le lagolago pe a talosagaina.

Suesuega a le Tagata Lava Ia pe Faalesoa

Suesue Lou Ala o Feagaiga. O le a se mea na e aoaoina e uiga i lau matafaioi i le fesoasoani atu i tagata o le ekalesia e faamalolosia tagata fou liliu mai? E mafai faapefea ona e lagolagoina taumafaiga a le aufono a le uarota? O taimi taitasi e te suesueina ai lenei mataupu, tusifaamaumau mea ua e aoaoina.

Lagolago Taitai i le Lotoifale i le Faamalolosia o Tagata ua Toe Foi Mai

O nisi tagata o le Ekalesia e filifili e le toe auai i le Ekalesia. E taumafai taitai o le lotoifale ma isi tagata o le ekalesia e fausia ni sootaga malolosi ma i latou ma aapa atu ia i latou. Sa fetalai mai le Faaola:

“O tagata faapena ia outou galulue pea i ai; ona tou te le iloa pe o le a latou toe foi mai ma salamo, ma o mai ia te au ma le faamoemoe atoa o le loto, ma o le a ou faamaloloina ai i latou; ma o le a avea outou ma ala e aumai ai le olataga ia te i latou” (3 Nifae 18:32).

Atonu e talosagaina oe e taitai i le lotoifale e fesoasoani i tagata ua toe foi mai e fausia lo latou faatuatua. E masani lava o nei tofiga o le a i ai faatasi ma aiga e le lolotu uma. Mafaufau ma le agaga tatalo pe mafai faapefea ona e valaaulia le Agaga i totonu o aiga o tagata ua toe foi mai a o e aoaoina i latou i mataupu faavae o le talalelei ma valaaulia i latou e faatino. Faaali atu le agaalofa ma le agalelei mo o latou atugaluga.

Pe a faatagaina ai e tulaga, aoao atu le talalelei ia i latou i le aiga o e e le’i papatisoina. O lou alofa ma le lagolago e mafai ona fesoasoani ia i latou e faalolotoina ai lo latou faatuatua ia Keriso ma faateleina ai lo latou manao e osia ma tausia feagaiga.

Galulue faatasi ma taitai i le lotoifale pe a outou galulue ma tagata ua toe foi mai. O nei taumafaiga e mafai ona i ai se aafiaga tumau i tagata taitoatasi ma le aulotu i le lotoifale.

Suesuega o Tusitusiga Paia

O le a le mea na aoao mai e Iesu Keriso e uiga i le fesoasoani atu ia i latou atonu o loo tauivi?

Na aoao atu e Alema ma Amoleka le toatele o e na pauu ese mai le Ekalesia. O le a se mea e mafai ona e aoao mai i o latou aafiaga e uiga i le faamalosia o tagata ua toe foi mai?

Manatu mo le Suesue ma le Faaaogaina

Suesuega Faaletagata Lava Ia

Faaaoga le polokalama Tala’i La’u Talalelei e fai ai ni fuafuaga e talanoa atu ai i tagata fou ma tagata ua toe foi mai o e ua suia o latou olaga ma auai i le lotu. O le a se mea na sili ona fesoasoani ia i latou? I lau api talaaga mo suesuega, tusi ai ou manatu e uiga i o latou aafiaga. O le a se mea ua e aoaoina o le a fesoasoani ia te oe e galulue ai ma i latou o loo e aoaoina i le taimi nei?
Suesue 2 Nifae 31:18–20, Alema 26:1–7, Alema 32:32–43, ma le Moronae 6. Tusi mea ua e aoaoina mai nei fuaiupu i le faamalolosia o tagata fou.

Suesuega Faalesoa ma le Felafolafoaiga Faalesoa

Faitau ma talanoaina le mataupu 23 i le Tusitaulima Aoao. E faapefea ona e lagolagoina taitai o le lotoifale i o latou tiute?
I le taimi o fonotaga faamaopoopo faalevaiaso, fesili i taitai o le uarota pe i ai ni tagata ua toe foi mai i la outou eria latou te mananao e te asiasi i ai i lenei vaiaso. A o e asiasi atu ia i latou, saili e fausia lo latou faatuatua ia Iesu Keriso.
Faailoa mai tagata uma ua papatisoina ma faamauina i le tausaga ua tuanai. Iloilo le faamaumauga o se tasi o i latou ma talanoaina pe mafai faapefea ona outou galulue faatasi ma taitai i le isi fonotaga faamaopoopo faalevaiaso e fesoasoani ai i lenei tagata. Tusi ou manatu ma fautuaga i le polokalama o le Tala’i La’u Talalelei. Toe fai le mea lenei mo tagata uma faatoa liliu mai i la outou eria.

Aufono a le Itu, Konafesi Faalesone, ma le Aufono a Taitai o le Misiona

Valaaulia se epikopo po o se isi taitai o le uarota e talanoa e uiga i le faamalosia o tagata fou ma tagata ua toe foi mai. Fai atu i lenei tagata e faamamafa mai pe mafai faapefea ona fesoasoani faifeautalai.
Talanoaina faataoto o le mamoe na se, le tupe na leiloa, ma le atalii faamaumauoa (tagai Luka 15). Valaaulia faifeautalai e faasoa mai mea ua latou aoaoina ma pe mafai faapefea ona latou faaaogaina i a latou galuega faafaifeautalai.

Taitai Misiona ma Fesoasoani o le Misiona

Galulue ma taitai o le lotoifale e uunaia i latou e fesoasoani i tagata fou:
- Ia faauuina i se tofi o le perisitua (mo alii o le vaitausaga talafeagai).
- Ia tofia o uso o auaunaga (ma tuafafine o auaunaga mo tamaitai).
- Maua se pepa faataga o le malumalu ina ia papatisoina i le malumalu mo o latou tuaa ua maliliu.
- Saunia le igoa o se tuaa ua maliu e ave i le malumalu.
- Ia maua se tofiga po o se valaauga e auauna atu i la latou uarota po o paranesi.
I le galulue faatasi ai ma le peresitene o le siteki, aoao taitai i le lotoifale i le auala e faia ai ni fonotaga faamaopoopo mataalia faalevaiaso.
Ia tulitatao soo i tagata fou e iloa ai poo faapefea mai i latou ma pe faapefea ona fesoasoani atu faifeautalai ma tagata lotu.
Valaaulia tagata fou o le ekalesia e talanoa i faifeautalai ma faamatala atu o latou aafiaga i le Ekalesia.