Paggamit sa Manwal sa Nursery

Mga Manwal sa Primary ug Panahon sa Pagpakigbahin

Ang Klase sa Nursery

Kinsa ang Motambong

Mga bata nga nag-edad og 18 ka bulan pero wala pay 3 anyos inig ka 1 sa Enero mahimong motambong sa nursery sa pagbuot sa ilang mga ginikanan. Duha ka mga titser ang kinahanglang tawagon alang sa kada klase sa nursery. Kon ang mga titser dili bana ug asawa, kinahanglan nga parehong babaye o parehong lalaki. Kining duha ka mga titser kinahanglang anaa sa klase sa tibuok panahon sa Primary.

Katuyoan

Ang katuyoan sa klase sa nursery mao ang paghatag og mahigugmaon, luwas, organisado nga dapit diin madugangan ang pagsabut sa gagmayng mga bata ug gugma alang sa Langitnong Amahan ug ni Jesukristo, makabaton og positibo nga mga kasinatian diha sa Simbahan, ug mobati og kabililhon sa kaugalingon. Ang klase sa nursery mao ang unang kasinatian sa Simbahan diin ang gagmayng mga bata matudloan sa ebanghelyo ug magkaistorya uban sa laing mga bata ug sa mga hamtong.

Pisikal nga Kahimtang

Ang kwarto sa nursery kinahanglang limpyo, malipayon nga lugar, ug madanihon ug anaa sa duol sa kasilyas kon mahimo. Ang kwarto sa nursery mahimong bahinon sa lain-laing mga lugar para kadulaan (nga may karpet o banig, kon mahimo), pagbasa o mga kalihokan, ug pagtudlo sa leksyon. Ang mga dulaan kinahanglang limpyo, dili makadaot, ug maayog kondisyon. Sakasakaon nga dulaanan kinahanglang dili gamiton.

iskedyul sa Oras

Ang klase sa nursery sa kasagaran molungtad og 1 ka oras ug 40 ka minutos. Kining orasa kinahanglang buwagon sa lain-laing mga bahin, ang kada usa maglig-on sa katuyoan sa leksyon.

Paningkamuti sa pagplano ang mga leksyon nga parehag pormat kada semana. Ang mga bata mobatig seguridad kon dunay naandan nga kalihokan ug pamilyar nga pag-ilis sa usa ka kalihokan ngadto sa lain. Ang mosunod nga gisugyot nga pormat mahimong usabusabon sumala sa lokal nga mga panginahanglan:

Pag-abiabi
Oras sa pagdula:	35 ka minutos
Oras sa pagpundok;	10 kaminutos
Oras sa musika:	10 ka minutos
Oras sa snack:	10 ka minutos
Oras sa leskyon:	10 ka minutos
Oras sa kalihokan:	15 ka minutos
Panapos:	10 ka minutos

Ang mga bata nga nursery dili moapil sa panahon sa pagpakigbahin o sa pangbukas o panapos nga mga tulumanon.

Pag-abiabi: Kon mosulod ang mga bata sa klase sa nursery, sugata og timbayaa ang kada usa pinaagi sa pagtawag sa pangalan. Tabangi ang kada bata nga mobati sa imong gugma ug sa gugma sa Langitnong Amahan. Hinay nga musika makamugna og rmahilom, madanihong palibot. Ang mga rekording sa mga kanta gikan sa Songbook sa mga Bata anaa sa audiocassette (52428) ug compact disc (50428).

Oras sa Pagdula: Tuguti ang mga bata nga gawasnon nga magdula sa mga dulaan, mga puzzle, mga litrato, o mga libro. Awhaga ang kada bata sa pagpili og usa lang ka dulaan kada higayon nga magdula ug iuli kini sa saktong lugar sa di pa mopili og lain. Ayaw pugsa ang usa ka bata nga mopahulam kon dili siya gusto. Kadaghanan sa mga bata niining edara dili pa andam nga mopakigbahin sa emosyonal ug sosyal nga paagi. Kinahanglang anaa ka, pero ayaw pag-apilapil sa ilang dula. Pagkahuman sa oras sa pagdula, tabangi ang mga bata nga mohipos sa ilang mga dulaan.

Tukma nga mga kalihokan mahimong himoon niining higayona (tan-awa sa “Mga Kalihokan ug mga Dula alang sa Nursery,” xvi-xvii, pero ang mga bata dili kinahanglang moapil.

Oras sa Pagpundok: Pundoka ang mga bata aron manganta ug mangandam sa pag-ampo. Lista sa posible nga mga kanta sa pag-ampo anaa sa pahina 154 sa Songbook sa mga Bata. Pag-imbitar og bata nga moampo. Tudloi ang mga bata sa paghatag og mubo, simpol nga mga pag-ampo. Tabangi sila kon gikinahanglan. Human sa pag-ampo, imbitara ang mga bata sa pagpakigsulti ug pagtubag sa mga titser ug sa usag usa sa inpormal nga sitwasyon. Ipakita ang gugma, kadasig, ug pagtahud sa imong mga pulong ug mga aksyon. Pagsensitibo ug pagpakamauyunon. Hisguti ang mga panginahanglan ug mga interes sa mga bata. Angay nga mga hilisgutan maglakip sa:

Bag-ong mga kasinatian sa mga kinabuhi sa mga bata, sama sa bag-ong bata nga masuso sa panimalay o pag-outing sa pamilya.
Espesyal nga mga holiday.
Ang kahimtang sa panahon.
Pag-obserbar sa kinaiyahan.
Sosyal nga mga abilidad sama sa pagpaminaw, pagpakigbahin, o pagpakita og maayong pamatasan.
Buhat sa kaayo.

Mga kalihokan nga mga bersikulo, pag -exercise, ug mga kanta mahimo usab nga gamiton niining higayona aron sa pagtabang sa mga bata nga dili magkiat.

Oras sa musika:Ang musika mahimong gamiton sa tibuok klase sa nursery aron adunay malipayon, maabiabihon nga kahimtang, nagtudlo sa mensahe sa ebanghelyo; ug makapahimo sa mga bata nga mobuhat og laing butang (tan-awa sa “Musika diha sa Klasrom sa Nursery,” xx-xxi). Ang mga bata malingaw nga mokanta sa pareho ra nga mga kanta kada semana. Ang mga lider ug mga titser sa nursery kinahanglang adunay kopya sa Songbook sa mga Bata. Ang uban mahimong imbitaron aron sa pagtabang sa musika sa nursery.

Oras sa Snack: I-iskedyul ang oras sa snack aron mahatag ang panginahanglan sa mga bata. Ang kwarta sa snack kinahanglang magagikan sa badyet sa Primary. Tungod kay ang mga bata mag-snack man kada semana sa nursery, ang mga titser kinahanglang mangutana sa mga ginikanan kon duna bay pagkaon nga dili nila gusto nga kan-on sa ilang mga anak (tan-awa sa Tamdanan nga Basahon sa mga Panudlo sa Simbahan, Basahon 2: Mga Lider sa Pagkapari ug Kaabag [1998], 239). Sa dili pa ihatag ang snack, tabangi ang usa ka bata nga mopanalangin sa pagkaon.

Oras sa Leksyon: Ang mga leksyon niini nga manwal gisulat sa lebel sa bata nga nag-edad og tres anyos, pero daghang mga kalihokan nga anaa sa mga leksyon ug sa seksyon sa mga kalihokan sa pagpalambo nga haum sa gagmay nga mga bata. Ang kada leksyon usab adunay seksyon sa “Dugang mga Kalihokan alang sa Gagmay nga mga Bata.” (Hibaloi nga ang gikinahanglan nga mga materyal ug pagpangandam alang sa dugang mga kalihokan wala malista diha sa seksyon sa “Pagpangandam” sa kada leksyon. Ayoha pagbasa ang deskripsyon sa matag kalihokan nga gusto nimong gamiton aron sa pagsiguro nga anaa nimo ang tanan nimong gikinahanglan.)

Mga ehemplo kon unsaon sa paggamit ang mga leksyon niini nga manwal makita sa mga pahina xvii-xx. Kon mogamit kamo og mga leksyon, hinumdumi ang paghunahuna nga mainampoon sa pagsabut ug interes sa mga bata. Ang mga kalihokan kinahanglan nga mubo ug lainlain tungod kay ang mga bata niining edara mubo ra og atensyon. Ang mga bata makat-on pinaagi sa pagsubli, mao nga mahimo nimong balikon ang usa ka kalihokan sa panahon sa leksyon o sa umaabot nga leksyon. Alang sa dugang panabang sa pagtudlo sa gagmay nga mga bata, tan-awa sa “Pagpangandam sa mga Leksyon,” “Pagtudlo sa mga Leksyon,” “Musika diha sa Klasrom,” ug “Mga Biswal nga Tabang” sa mga pahina vii-viii.

Oras sa Kalihokan: Pagpili og mga kalihokan sama sa pagkolor, paghimo og mga butang ginamit ang clay, pagdrama, mga dula, ug uban pa (tan-awa sa “Mga Kalihokan ug mga Dula alang sa Nursery,” xvi-xvii) nga mosuporta sa mensahe sa ebanghelyo, makaawhag og pagpakigbahin, ug makahatag og maanindot nga mga kasinatian. Ayaw kabalaka kon ang gagmay nga mga bata gusto pa nga modula.

Oras sa Panapos: Tabangi ang mga bata nga hipuson ang tanang mga dulaan ug mga materyal, dayon ribyuha ug itingub ang mensahe sa ebanghelyo nga gitudlo diha sa leksyon. Tabangi ang usa ka bata nga mohatag og panapos nga pag-ampo.

Pag-Andam sa Mga Bata Alang sa Nursery

Pipila ka mga semana sa dili pa ang usa ka bata mosulod sa nursery, ang first counselor sa kapangulohan sa Primary kinahanglang mohatag sa mga ginikanan sa bata og kopya sa checklist nga anaa sa pahina xiii ug makigsabut alang sa usa ka miting tali sa mga ginikanan ug sa mga titser sa nursery.

Checklist sa mga ginikanan

Ang usa ka bata tingali mosulod sa unang higayon diha sa nursery nga naghinamhinam o nahadlok, mapahiyumon o maghilak. Ang mga ginikanan dako kaayog mabuhat aron mahimong makalingaw ang kasinatian sa ilang anak diha sa nursery pinaagi sa pag-andam sa bata pagsayo. Kon ang mga bata masayud asa sila paingon ug unsay gipaabut, sa kasagaran ganahan silang motambong. Kadtong kinsa mosulod nga gamay ra o wala pasabtang daan mahadlok ug dili gusto nga mosulod. Andama ang inyong anak nga mosulod sa nursery pinaagi sa paghimo niining mga butang kutob sa mahimo:

Tudloi ang inyong anak mahitungod sa nursery mga duha ka mga semana sa dili pa siya motambong.
Pakigsabut nga makigkita ang imong anak sa mga titser sa nursery mga usa ka semana o duha sa dili pa ang unang higayon nga siya mosulod sa nursery.
Pakigsabut nga makigkita ang pipila ka mga bata sa nursery sa imong anak.
Sa semana sa dili pa mosulod ang imong anak sa nursery, isulti ang positibo nga mga butang bahin sa nursery.
Dad-a ang imong anak ngadto sa kwarto sa nursery mintras wala pay laing tawo
Usa ka adlaw sa dili pa ang klase, pahinumdumi ang imong anak nga ang nursery magsugod ugma.
Sa unang adlaw sa nursery, hatagig dakong panahon ang imong anak nga mag-andam para sa Simbahan. Ayaw pagdalidali.
Ibilin sa balay ang tanang mga dulaan sa imong anak.
Dad-a ang imong anak ngadto sa kasilyas ug atimana ang iyang pagkaon sa dili pa nimo siya dad-on ngadto sa nursery. Ang bata nga ilisan og diaper dad-on ngadto sa ginikanan.
Adto sa nursery sa saktong oras.
Pasaliga ang imong anak nga mobalik ka dayon. Balik sa saktong oras aron sa pagkuha sa imong anak pagkahuman sa nursery.
Kon mahadlok ang imong anak, pabilin diha sa nursery uban niya sa unang pipila ka mga higayon.
Sultihi ang mga titser sa nursery unsa nga klase ang imong tambongan panahon sa nursery aron ilang madala ang imong anak nganha nimo kon dunay problema.
Pahibaloa ang mga titser sa nursery kon ang imong anak adunay dili kasagaran nga problema, sama sa allergy sa pagkaon.
Hisguti ang kasinatian sa nursery uban sa imong anak sa positibo nga paagi. Siguroha ang pagsulti og maayong mga butang mahitungod sa klase ug mga titser sa nursery sa imong anak.
Hinumdumi nga ang gugma ug pailub makapahimo sa nursery nga nindot nga kasinatian sa imong anak.

Palihug ayaw dad-a ang imong anak ngadto sa nursery kon siya aduna sa mosunod nga mga simtoma:

Hilanat
Sip-on
Ubo
Dili kasagaran nga saput o kasuko
Suka-suka
Kalibanga
Katol-katol
Nagtubig nga mata
Kuto
usa ka sakit o impeksyon nga gitambalan og antibiotics sulod na sa miaging 48 ka mga oras.
Klaro nga sakit sa pagkabata nga makatakod:

hangga (pito ka mga adlaw)

tipdas (hangtud nga mawala ang katol-katol)

grabing hilanat (hangtud nga mawala ang katol-katol)

bayuok (hangtud mawala ang paghubag, sa kasagaran pito ka mga adlaw)

kabahung

Kon ang imong anak adunay allergy nga maoy nakaingon sa sip-on, ubo, o katol-katol, palihug pahibaloa ang mga titser nga ang simtoma sa imong anak dili makatakod.

Mga Kinaiya sa Gagmayng Mga Bata

Tun-i ang mosunod nga mga kinaiya sa gagmayng mga bata nga makatabang kanimo nga mas makasabut ngano nga ang mga bata sa inyong klase ingon niana ang kinaiya. Gamita kini nga kahibalo sa pag-andam ug pagtudlo sa mga leksyon ug sa pagpakigsulti sa mga bata. Hinumdumi nga kinatibuk-ang mga sumbanan kini; dili tanang mga bata mouswag sa samang gikusgon o ingon ana ang kinaiya sa samang paagi sa samang edad.

Mental nga Kinaiya sa usa ka Gamay nga Bata

Simpol ug literal nga maghunahuna. Dili makasabut sa malisud nga mga ideya.
Dunay mubo lang nga atensyon (usa ngadto sa tub ka mga minuto).
Kanunay nga mangutana o mohimo og komentaryo nga wala magsubay sa gihisgutan.
Kuryoso kaayo ug sigeg pangutana.
Gusto kaayong makat-on ug mosulay sa bag-ong mga butang.
Malingaw sa pagbalikbalik.
Makahimo og simpol nga mga pagpili.

Pisikal nga Kinaiya sa usa ka Gamayng Bata

Sa kasagaran aktibo kaayo.
Nagpalambo og mga abilidad sa pagmartsa, paglukso, ug pagpakpak.
Dili mahimutang, dali masuko, ug dali kapuyon.
Sayon ra nila ang pagkuha kay sa pag-uli niini.

Sosyal nga mga Kinaiya sa usa ka Gamay nga Bata

Masaligon.
Sa kasagaran malingaw nga magdula nga usa ra.
Sa kasagaran dawo ug ang kaugalingon ray gihunahuna.
Lisud mopahulam sa gidulaan niini.
Pirming makiglalis tungod sa dulaan.

Emosyonal nga mga Kinaiya sa usa ka Gamay nga Bata

Sa kasagaran gustong mopangga ug panggaon.
Pirmeng adunay emosyonal nga paglangi.
Kasagaraan dali rang mohilak.
Mag-usab-usab pirme ang buot

Espirituhanon nga mga Kinaiya sa usa ka Gamay nga Bata

Gusto nga mag-ampo pero nagkinahanglan og tabang.
Makakat-on na sa kahulugan sa pagbinuotan.
Sensitibo sa Espiritu.
Makasabut nga ang Langitnong Amahan ug si Jesus nahigugma kanato.
Makasabut sa sukaranang espirituhanong mga konsepto.

Posibling Mga Problema ug Mga Solusyon Diha sa Nursery

Bisan sa labing maayo nga nursery, ang mga bata matag karon ug unya magpabadlong. Ang mosunod mao ang komon nga mga problema sa kinaiya ug mga sugyot sa pagsulbad niini.

Problema	Posible nga Solusyon
Usa ka ginikanan mosulti kanimo nga ang bata dili gustong mosulod sa nursery. Ang bata mosinggit ug mohilak kon ang ginikanan mosulay sa pagbiya.	Awhaga ang mga ginikanan sa pag-andam sa ilang mga anak alang sa nursery pagsayo (tan-awa sa “Pag-andam sa mga Bata alang sa Nursery,” mga pahina xii. Imbitara ang ginikanan sa pagpabilin hangtud mokalma ug komportable na ang bata. Makatabang tingali ang Pag-imbitar sa ubang mga hamtong sa paggunit sa naghilak nga mga bata aron sila dili mahadlok.
Usa ka bata morag mahadlok nimo o sa ubang mga bata, maglakawlakaw nga walay tumong diha sa nursery, ug dili makigsulti ni bisan kinsa.	Pasensyahi, ayaw pugsa ang bata. Hatagi siyag panahon nga makaila nimo, sa ubang mga bata, ug sa palibot. Matag karon ug unya pasaligi ang bata ug isugyot nga mosulay og usa o duha ka mga kalihokan. Tabangi ang bata nga makaangkon og makalingaw nga eksperyensya sa usa ka butang,
Sa tibuok oras sa nursery, ang usa ka bata manggunit sa imong tiil o mosulay sa pagsabak nimo.	Ang gagmayng mga bata nagkinahanglan og pagpangga ug atensyon. Ang paggunit ug pagpakigsulti sa bata sa makadiyot matag karon ug unya sa kasagaran makatagbaw kaniya. Dayon awhaga ang bata nga moapil sa mga kalihokan sa nursery.
Panahon sa leksyon, pipila ka mga bata mobarug ug mopalayo sa dili pa mahuman ang mga kalihokan.	Alisto gayud ug hibaloi ang mga panginahanglan, mga interes, ug gidugayon sa atensyon sa kada bata. Tan-awa ang mga timailhan sa kalaay o kabalisa aron imong mausab ang kalihokan nga mohaum sa mga interes sa mga bata. Ayaw pugsa ang usa ka bata sa pag-apii sa bisan unsang kalihokan. Kon ang mga bata gustong mobalik sa pagdula sa mga duwaan, tuguti sila.
Usa ka bata dili magsab-saba ug dili maminaw. lyang itulod ug birahon ang mga bata nga naglingkod sa duol.	Ang ikaduha nga titser makagiya sa atensyon sa bata ngadto sa kalihokan nga gihimo sa unang titser. Hatagi ang bata og butang nga magunitan aron siya aktibong moapil sa leksyon o kalihokan.
Pipila ka mga bata mag-away tungod sa usa ka dulaan. Ang usa ka bata mopatid, mosumbag, o mopaak aron di makuha ang dulaan.	Usahay ang mga bata makasulbad sa mga kasungian mismo sa ilang mga kaugalingon, pero kinahanglan nga imong uwangon kon gikinahanglan aron malikayan nga makapasakit sila sa usag usa o makaguba og butang. Mahimong mosugyot ka og mga paagi sa mga bata sa pagsulbad sa ilang problema.
Ang usa ka bata dili magtarung og dula—molabyog sa dulaan, modukdok niini, o molabay niini. Dayon siya modagan ngadto sa laing dapit sa kwarto.	Kinahanglang imong hunungon kini nga kinaiya. Ipasabut ngadto sa bata ngano nga dili mohimo niini; dayon igiya ang bata ngadto sa laing kalihokan.
Usa ka bata magsigeg kuha og dulaan gikan sa butanganan, dili mosugot nga i-uli ang bisan unsang mga dulaan.	Sa hinay pero hugot nga mohisgot pag-usab sa gipaabot nga kinaiya. Ipakita sa bata unsaon sa pag-uli sa dulaan. Awhaga ang matag bata sa pag-uli sa kada dulaan sa dili pa mokuha og lain.
Usa ka bata magsugod sa pagbakho ug mohilak. Kon suwayan nimo sa pag-alam-alam, moingon siya nga, “Di ko ganahan nimo,” ug modagan.	Ang gagmayng mga bata dali rang malinga. Ipakita sa bata ang espesyal nga duwaan ug isugyot nga makalingaw ang pagdula niini. Kon kana dili magsilbi, sulayi ang istorya o libro. Ang pagpahid sa mga mata sa bata usahay makatabang nga mohunong sa paghilak. Kon ang bata magpadayon sa paghilak, dad-a siya ngadto sa ginikanan.
Usa ka bata mangutana, :Kanus-a man moabut akong mama? Kanus-a man ko makauli?”	Pasaligi ang bata nga ang iyang mga ginikanan mobalik. Hisguti ang pipila ka mga butang nga mahitabo sa dili pa ang oras sa pagpauli.

Mga Kalihokan ug Mga Dula Alang sa Nursery

Gamita ang mga kalihokan niini nga seksyon sa imong gusto sa oras sa tingdula sa nursery. Mahimo usab nimong gamiton ang bisan unsang mga kalihokan niini nga seksyon nga mohaum sa usa ka leksyon panahon sa leksyon sa nursery, ug mga kalihokan gikan niini nga leksyon mahimo usab nga gamiton sa oras sa tingdula. Pag-andam og mga kalihokan alang sa mga bata sa oras tingdula, pero ayaw pugsa ang mga bata nga moapil. Ang ubang mga bata mas ganahang magdula sa mga duwaan sa tibuok oras sa tingdula.

Mga Kalihokan sa Art

Mga eksperyensya sa art makalingaw ug makatabang sa mga bata nga makapalambo og pagsalig sa ilang mga kaugalingon, pagkamamugnaon, abilidad sa paglihoklihok sa mga kamot, abilidad sa paggamit sa ilang mga mata ug mga kamot, ug makahibalo sa ilang mga balatian [senses]. Ang art usa usab ka makatagbaw nga paagi sa pagpadayag sa pagkaindibidwal. Gamita ang imong imahinasyon ug pagkamamugnaon sa pagplano og angay nga mga proyekto sa art alang sa imong klase.

Kini nga mga sumbanan makatabang nimo sa pagplano og mga proyekto sa creative art:

Simpol lang nga proyekto.
Pagpangandam. Andama ang tanang gikinahanglang mga materyal ug pagkat-on unsaon sa paghimo sa proyekto sa imong kaugalingon.
Pag-andam sa paghimo og kausaban. Kon ikaw makausab-usab, dili ka maglagot kon ang proyekto wala mahimo sumala sa giplano. Hinumdumi nga ang mga bata sa kasagaran interesado nga moeksperimento sa mga materyal nga imong gihatag nila kay sa paghuman sa usa ka proyekto.
Salig ug pakita og interes sa unsay gibuhat sa mga bata, ug hatagi og sinsero nga pagdayeg.
Lain-laina ang himoonon. Pagplano og mga proyekto nga makahatag og higayon sa mga bata sa paggamit og lain-laing mga materyal ug mga pamaagi sa usa ka semana ngadto sa laing semana
Pagmaalamon. Ang gagmayng mga bata dili kanunay morepresentar og butang sa ilang art. Malingaw lang gyud sila nga moeksperimento sa materyal nga gihatag. Kon gusto kang mokomentaiyo sa trabaho sa bata, ingna “Sultihi ko mahitungod sa imong litrato” imbis mangutana sa, “Unsa man na?
Tabangi siyag gamay. Tabangi kon gikinahanglan pero tuguti ang mga bata nga mohimo sa ilang kaugalingong trabaho.

Magkolor samtang Magtukar ang Musika

Mga materyal nga gikinahanglan: Girekord nga musika o mga intrumento, papel, ug mga krayola o de kolor nga mga lapis.

Patukara ang musika samtang magkolor ang mga bata. Ipakolor nila kon unsay ilang gibati sa musika.

Collage

Ang usa ka collage maoy usa ka litrato nga gihimo pinaagi sa pagpapilit sa mga piraso sa papel, mga litrato, o ubang mga materyal.

Mga materyal nga gikinahanglan: Bisag unsang klase sa materyal mahimong gamiton sa collage, sama sa papel nga pangputos sa gasa, papel nga tisyu, mga sampol sa wallpaper, mga dahon, balas, ug mga produkto sa macaroni. Magkinahanglan ka og glue o papilit ug piraso sa papel o ubang laing butang nga plat (nga kapapitlan sa collage) alang sa matag bata.

Papilia ang mga bata og mga materyal nga ipaplit sa collage. Pahimoa sila kon unsay gusto nila nga desenyo.

Pagtuhog og Macaroni diha sa Lambo

Mga materyal nga gikinahanglan: Dagko nga dili pa luto nga macaroni (o piraso sa straw o bisan unsang materyal nga sayon katuhugan), dako nga lambo o yarn alang sa kada bata, ug glue o wax.

Pagahia ang tumoy sa kada piraso nga lambo o hilo pinaagi sa pagtuslob niini sa glue o wax. Kon mauga na ni, gahi na kini aron mahimong katuhugan. Ibaligtos ang laing tumoy sa lambo aron ang macaroni dili mahulog. Ipatuhog sa mga bata ang macaroni, ug dayon ihigot ang tumoy sa kada usa sa lambo kon mahuman na ang mga bata.

Simpol nga Dulaan nga Dough

Mga materyal nga gikinahanglan:

2 ka tasa nga harina
1 ka tasa nga asin
1 ka kutsara nga vegetable oil
3/4 ka tasa nga tubig
koloring sa pagkaon (opsyonal)

Sagula ang harina ug asin. Idugang ang mantika ug igo-igong tubig aron mahimong pareha sa clay. Dugangig gamayng tubig matag karon ug unya hangtud nga humok na pero dili kaayo pilit. Sagola ug masaha og gamay. (Sa pagkolor sa dulaan nga dough, butangi og koloring sa pagkaon ang tubig sa dili pa kini idugang ngadto sa harina ug asin.)

Himoa ang dulaan nga dough diha sa balay sa dili pa nimo kini gamiton sa nursery, ug tipigi kini sa sudlanan nga adunay hugot nga tabon, kon mahimo. Pagdala og papel (sinaw nga papel mas maayo) nga ihikyad diha sa mga lamesa diin ang mga bata mogamit sa play dough.

Mga Dula ug mga Kalihokan ginamit ang mga Bersikulo

Ang mga bata gustong mobuhat sa mga butang nga maglihok, sama sa simpol nga dula o mga aksyon ngadto sa mga bersikulo o mga kanta. Daghang mga kalihokan ginamit ang mga bersikulo gilakip diha sa mga leksyon, ug ang ubang simpol nga mga dula gihulagway sa ubos. Kon ang mga bata malingaw sa kalihokan, mahimo kining gamiton sa daghang mga higayon sa tibuok tuig, di lang sa mga leksyon diin kini gihisgutan.

Kini nga mga sumbanan makatabang nimo sa pagtudlo sa kalihokan ginamit ang mga bersikulo ngadto sa mga bata:

Sag-uloha ang kalihokan nga ginamit ang mga bersikulo sa imong kaugalingon mismo sa dili pa magsugod ang klase.
Isulti ang mga pulong ug buhata ang mga aksyon alang sa mga bata pag-una, panindota ang aksyon. Dayon imbitara ang mga bata sa pag-apil nimo.
Hinaya lang aron ang mga bata makasabut sa mga pulong ug mga aksyon.
Gamita ang mga biswal nga tabang panagsa aron makatabang sa pagpresentar sa kalihokan ginamit ang mga bersikulo. Ang mga bata mas dunay atensyon ug mas makakat-on kon sila adunay butang nga tan-awon.
Ayawg dugaya ang kalihokan ginamit ang mga bersikulo kon ang mga bata wala na mahimutang. Kon ang kalihokan ginamit ang mga berssikulo taas, mahimong tabangan nimo ang mga bata nga mohimo sa mga aksyon samtang ikaw lang ang mosulti sa mga pulong.

Mga Bersikulo sa Pagkabuotan

Gamita ang mosunod nga mga bersikulo kon ang mga bata wala na mahimutang ug nagkinahanglan og tabang aron magbinuotan. Ang paggamit sa usa niini sa samang panahon kada semana makatabang sa mga bata nga makahibalo kon panahon na alang sa pangbukas o panapos nga pag-ampo. Tabangi ang mga bata nga mosulti sa mga pulong ug mobuhat sa bisan unsa nga mga aksyon ingon nga gisugyot sa mga pulong.

Ibukhad, Kumoa Kini [Mga kamot]

Ibukhad, kumoa kini;
Ibukhad, kumoa kini;
Pakpak hinay.
Ibukhad, kumoa kini;
Ibukhad, kumoa kini;
Ibutang kini sa inyong paa.

Akong Lihok-lihokon ang Akong mga Kamot

Akong uyugon ang akong mga kamot.
Akong tuyukon ang akong mga kamot.
Akong ipakpak ang akong mga kamot.
Akong ipataas ang akong mga kamot,
 Dayon ipaubos kini
Ug ibutang sa akong paa.

Akong pahilumon ang akong mga tiil.
Hunungon nako paglihok ang akong mga tiil.
Magtarung kog lingkod sa akong lingkuranan.
Iyukbo nako ang akong ulo.
Ipiyong nako ang akong mga mata.
Andam na ko sa pag-ampo.

Usahay ako Taas, ug Usahay ako Mubo

Gamita ang mosunod nga bersikulo sa pagduko ug pag -unat kon ang mga bata dugay nang naglingkod ug kinahanglang molihoklihok. Balika kon gikinahanglan.

Usahay ako taas—taas kaayo, taas kaayo (tindog, dayon kinto).

Usahay ako mubo—mubo kaayo, mubo kaayo (duko, dayon duko pa gyud).

Usahay taas, usahay mubo (tindog, dayon duko pag-ayo).

Unsa ako karon? (tindog og duko pag-ayo; pasultiha ang mga bata kon sila taas ba o mubo).

Ang Gamay nga Liso

Sultihi ang mga bata kon unsaon sa pagtanom ang mga liso diha sa yuta, ug tabangi sila nga magpakaaron-ingnon nga ang nagtubo nga mga liso. Sulti, “Magpakaaron-ingnon kita nga gagmayng mga liso” (tikuko o pagluko sama sa bola, ug piyonga ang mga mata). “Ang ad law migawas ug mipainit sa mga liso. Dayon ang ulan mibunok ug miingon, ‘Pagmata, gagmay nga mga liso’” (bukha ang mga mata ug pagsugod sa pagtuyhakaw). “Gawas gikan sa yuta, gagmayng mga liso, aron ikaw motubo” (barug ug ituy-od ang mga bukton ibabaw sa ulo). “Gagmayng mga liso, mitubo ka na nga matahum nga mga bulak [o taas nga mga kahoy].”

Mangadto ta sa Balay ni Lola [o ni Lolo]

Isulti, “Magpakaaron-ingnon nga mangadto sa balay ni Lola [ o ni Lolo]. Una atong isul-ob ang atong mga kupo [o magsinina]” (himoa nga kunohay magsul-ob sa kupo o magsinina). “Manakay na ta sa sakyanan [o sa bus]” (himoa nga kunohay miabli sa pultahan ug nanakay). “O, libaongon kaayo kining dalana” (maglihoklihok nga morag miagi sa libaongon). “Tan-awa, babayan nato ang opisyal sa pulis” (himoa ang pagbabay). “Hapit nata moabut. Ania na ta sa ilang Lola [o Lolo], Ato siyang gakson” (Ipakita nga migakos ni Lola o Lolo).

Pagtabang sa Atong mga Ginikanan

Giyahe ang mga bata sa paghimo og mga aksyon nga nagpakita nga nagtabang sa ilang mga ginikanan. Mahimo kang moingon, “Magpakaaron-ingnon ta nga manilhig sa salog.” Ang mga bata manilhig kunohay sa salog. Mahimo kamong magpadayon sa paghipos sa mga higdaanan, paghugas sa mga bintana, pagpamaspas sa mga abug, pagkahig sa mga dahon, pagguna sa tanaman, paghugas sa sakyanan, o laing mga kalihokan nga angay sa inyong dapit.

Dula sa Pagpaligid sa Bola

Mga materyal nga gikinahanglan: Usa ka bola.

Ang mga bata maglingkod nga semicircle. Ikaw molingkod sa ilang atubangan ug mopaligid sa bola ngadto sa usa ka bata, mosulti sa ngalan sa bata o mangutana og pangutana kalabut sa leksyon. Ang bata mopaligid sa bola balik nganha nimo og mosulti sa imong ngalan o motubag sa pangutana. Siguroha nga mahatagan og turno ang kada bata bisag kausa. Mahimo usab ninyong dulaon kining dulaa nga magbarug, mopaligid sa bola ngadto ug nganhi.

Pagparisparis sa mga Porma

Mga Materyal nga Gikinahanglan: Kinoloran nga papel [coloredpaper], gunting.

Gamita ang kinoloran nga papel aron sa paghimo og dagko nga ginunting ug usa ka gamay nga ginunting sa kada porma nga mosunod: kwadrado, lingin, trayangulo, kasingkasing, octagon, ug oval Ikatag ang mga porma diha sa salog. Ang kada bata magpulipuli sa pagbutang sa gagmay nga mga porma sa ibabaw sa kaparihas nga dagko nga porma. Aron dunay kalainan, paghimo sa mao gihapon nga mga porma sa lain-laing mga kolor sa papel, ug ipaparis sa mga bata pinaagi sa kolor imbis sa porma.

Mga Porma sa Musika

Mga materyal nga gikinahanglan: lain-laing kinoloran nga mga lingin nga gigunting gikan sa kinoloran nga papel o panapton, girekord nga musika o mga instrumento, tape (opsyonal).

l-tape o ibutang ang mga lingin diha sa salog sa dagko nga mga lingin. Palakawlakawa ang mga bata libot sa gawas sa dako nga lingin samtang gipatukar ang musika. Kon mohunong ang musika, ang matag bata mosulti sa mga pangalan sa kolor sa lingin nga iyang gibarugan. Aron dunay kalainan, gamit og lain-laing mga porma ug ipasulti sa mga bata ang ngalan sa kolor ug ang porma.

Pag-itsa sa Beanbag

Mga materyal nga gikinahanglan: Mga beanbag: usa ka kahon, basket, o targetanan (gihimo pinaagi sa paglungag sa litrato sa poster nga gipapilit sa gahi nga materyal)

Ipaitsa sa mga bata ang mga beanbag ngadto sa kahon, basket, o sa targetanan. (Mahimo nimong himoon ang beanbag nga mohaum sa usa ka holiday o leksyon.) Ang mga bata mahimong molabay sa mga beanbag sa mga kahon nga gipatongpatong.

Mga Estatuwa

Mga Materyal nga gikinahanglan: Girekord nga musika, o mga instrumento.

Palakawlakawa ang mga bata libut sa kwarto samtang nagtukar ang musika. Kon mohunong ang musika, ang mga bata mobarug nga morag mga estatuwa. Ang mga bata mahimong molihok pag-usab kon motukar na sad ang musika, pero kinahanglang mohunong sila kon kini mohunong.

Musika Diha sA Klasrom sa Nursery

Ang musika sa klasrom sa nursery makahatag og kaalegre ug mahigugmaong kahimtang, maghimo sa Primary nga malipayong dapit. Ang mga bata nga anaa sa edad nga nursery andam ug gustong makat-on mahitungod sa Langitnong Amahan ug ni Jesukristo, sa ilang mga kaugalingon, ug niining maanindot nga kalibutan. Usa ka importante nga paagi nga makat-on sila mao ang pinaagi sa musika. Ang mga bata malingaw sa musika sa daghang lainlaing paagi. Makakanta sila, makapatukar og instrumento, mosunod sa musika, ug maminaw sa musika. Tan-awa sa “Musika diha sa Klasrom,” pahina vii, alang sa dugang mga komentaryo sa paggamit sa musika sa pagtudlo sa gagmayng mga bata.

Pagkanta

Ang gagmayng mga bata tingali gustong mokanta uban nimo (gagmay kaayong mga bata dili tingali makakanta uban nimo), pero malingaw silang maminaw kanimo nga mokanta ug sa kasagaran makat-on og importanting mga baruganan pinaagi sa mga kanta. Awhaga ang mga bata nga mokanta, pero ayaw kabalaka kon sila dili mokanta. Ang mga bata nga dili makakanta uban nimo mahimong malingaw sa paghimo og simpol nga mga aksyon samtang ikaw nagkanta.

Mahimo nimong gamiton ang mao nga mga kanta kada semana sa imong pagsugod sa kada laing kalihokan. Kon ang mga bata makadungog sa pamilyar nga tono, masayud sila unsa nga kalihokan ang gisugdan. Makausab usab kamo sa mga pulong sa usa ka kanta nga mohaum sa mga sitwasyon o mga kalihokan sa mga bata. Kantaha og makadaghan ang paborito nga mga kanta sa mga bata sa tibuok tuig.

Ang mosunod nga mga kanta gikan sa Songbook sa mga Bata angay gayud nga gamiton diha sa nursery. Gilakip mao ang mga sugyot alang sa mga paagi nga magamit nimo ang mga pulong. Mahimong duna kay laing ideya sa paggamit niini o sa ubang mga kanta diha sa Songbook sa mga Bata aron sila magamit diha sa nursery.

“Malipayon ang Pamilya” [“A Happy Family”] (p. 104) (© 1975 Pioneer Music Press, Inc.). Paghimo og bersikulo mahitungod sa inyong malipayong nursery o Primary. Gamita isip pagtimbaya: “Nakita nako si Susie; nakakita siya nako….”
“Buhata Unsay Akong Gihimo” [Do As I’m Doing] p. 104. Gigamit alang sa paghatag og direksyon: “Paglimpyo sa nursery; sunod, sunod kanako!…” or “Pagpundok alang sa pagkanta….”
“Makalingaw nga Buhaton” [Fun to Do] p. 129
“Nanag-uban Kita” [Here We Are Together] p. 261
“Nagkisiksi Ko” [I Wiggle] p. 271
“Kon Ikaw Malipayon” [If You’re Happy] p. 125
“Akong mga Kamot” [My Hands] p. 273
“Dihay Usa ka Snowman” [Once There Was a Snowman] p. 121 (© 1981 Pioneer Music Press, Inc.). Paghimo og mga bersikulo mahitungod sa ubang mga butang sa kinaiyahan: “Dihay usa ka berde nga kahoy … taas, taas, taas. Sa iyang landong mipahulay ko, … gamay, gamay, gamay.”
“Nangatagak ang Ulan” [Rain Is Falling All Around] p. 117
“Kanta” p. 253. Pulihi ang pulong “kanta” sa linihokan nga: “Lukso, lukso, lukso” o “hop, hop, hop.” Kanta mahitungod sa sinina, mga kolor, o sa kaugalingon: “sapatos, sapatos, sapatos, gusto ko sa akong mga sapatos. Ako kining gisul-ob, sapatos, sapatos, sapatos!”
“Mga pahiyum” p. 128
“Popcorn Popping” p. 118

Mga Instrumento sa Musika

Pangita og simpol nga mga intrumento sa musika nga kadulaan sa mga bata, o paghimo og imoha.

Plawta o trumpeta: Paglungag og pipila ka mga lungag sa kilid sa karton nga tube (sama sa gigamit sa wrapping paper, waxed paper, o mga paper towel). Alang sa nindot nga epekto, i-tape ang cellophane sa usa ka tumoy. Sa pagdula, i-hum o kanta diha sa tube.

Linihaan nga mga Bloke: Pagputol og duha ka piraso nga 1 “-nga gibag-on sa kahoy nga mga 2” ang gilapdon ug 4” ang gitas-on. Pagputol og duha ka gagmay nga piraso, mga 1” x 2 1/2”. Lihai ang bisan unsang hait nga mga ngilit o mga tipak gikan sa bloke. Isentro ang gagmay nga mga bloke diha sa dagko nga mga bloke ug ilansang pag-ayo. Butangi og piraso sa papel de liha sa ubos sa kada bloke. Sa pagdula, ibangga ang mga linihaan nga mga bloke o ikuskus ang mga piraso sa papel de liha sa usag usa.

Tig-uyog: Ibutang ang lugas sa mais o monggos diha sa lata nga walay hait nga mga ngilit, o karton nga sudlanan. Padekorasyuni sa mga bata ang mga sudlanan. I-tape pag-ayo ang ba-ba aron dili kan-on o dulaan ang mga sulod. Sa pagdula, uyuga.

Mga kampanilya: Itahi ang mga kampanilya diha sa piraso sa panapton. Sa pagdula, uyoga.

Pagiihok sunod sa Musika

Mamugnaong pagiihok sunod sa musika makatabang sa mga bata nga mogamit sa enerhiya sa maayong paagi ug sa pagpalambo sa ilang mga abilidad sa paggamit sa ilang mga hunahuna sa mamugnaong paagi. Kanta, patugtuga ang piano o laing instrumento, o gamita ang girekord nga musika alang sa mga bata nga sundon sa pagiihok.

Sa pagpaapil sa mga bata nga maglihok sunod sa musika, ikaw mahimong:

Mogiya sa mga bata sa pagdagan, paglukso, pagtikubo, pagtuyok, pagkinto, pagkamang, paglukso padulong sa laing lugar, o pagsayaw subay sa musika. Papuli-puliha ang mga bata sa paggiya sa mga aksyon sa grupo.
Mopatugtug o mopakanta sa lain-laing mga tempo ug mopadagan ug mopalakaw sa mga bata sumala sa musika.
Mopawarawara sa mga bata sa de kolor nga bandana o papel nga streamer samtang sila maglihok sunod sa musika.
Mogamit sa mga kanta nga dunay aksyon kon dunay kinahanglang usbon alang sa mga bata. Kon ang mga bata naglingkod na og dugaydugay, ang aksyon nga kanta ginamit ang dagko nga mga kaunuran [muscles] ug piskay nga pagiihok maoy angay. Kon nagsige na silag lihok ug kinahanglang pakalmahon, ang aksyon nga kanta ginamit ang gagmay nga mga kaunuran samtang ang mga bata molingkod mahimong epektibo.

Maglisud tingali ang mga bata sa pagconcentrate sa musika kon maminaw lang sila. Dungana ang pagpaminaw uban sa pagkanta, pagiihok, o ubang mga kalihokan, sama sa mosunod nga mga ehemplo:

Pahigdaa ang mga bata sa salog ug papaminawa sa lain-laing klase sa musika. Hisguti kon unsay ilang gibati sa musika. Dayon hangyoa sila sa pagpakita unsay ilang gibati.
Patukara ang musika nga pangmartsa ug pamartsaha ang mga bata libot sa kwarto.
Papakpaka ang mga bata sa ritmo sa musika nga ilang gipaminaw.

Sampol sa Mga Leksyon Nga Magamit

Ang mosunod mao ang mga ehemplo kon sa unsa nga paagi nga ang duha ka mga leksyon niini nga manwal magamit diha sa nursery. Samtang imong ribyuhon ang mga sampol, hibaloi nga:

Ang matag hut-ong sa oras diha sa leksyon nakapokus sa usa ka simpol nga mensahe sa ebanghelyo. Ang mga kalihokan ug musika kinahanglang makatabang sa mga bata nga makasabut sa sukaranang mga baruganan sa ebanghelyo ug mga termino.

Pipila lang ka mga bahin sa orihina! nga leksyon ang napili. Makatabang kini nga ang klase simpol, aktibo, ug angay alang sa mga bata nga anaa sa edad sa nursery.

Ang mga kalihokan nga gipili wala kanunay gamita sa samang han-ay nga makita diha sa orihinal nga leksyon. Ang mga kalihokan sa panahon sa leksyon kinahanglang han-ayon nga labing makatabang nga makasabut ang mga bata nga anaa sa edad sa nursery sa mensahe sa ebanghelyo.

Leksyon 6: Ang Langitnong Amahan ug si Jesus Nahigugma Kanako

Pag-abiabi

Usa ka paagi sa paghimo sa palibot nga reverent alang sa nursery mao ang pagpatukar sa musika nga hinay ug angay alang sa Simbahan. Sa pagtudlo sa mensahe sa ebanghelyo niini nga leksyon, mahimo nimong hatagan ang kada bata og tsapa nga mag-ingon “Ang Langitnong Amahan ug si Jesus Nahigugma Kanako” (tan-awa sa kalihokan sa pagpalambo 6, pahina 17.

Oras sa pagdula

35 ka mga minuto

Sa oras sa pagdula, pangita og mga paagi sa pagtabang sa mga bata nga maghunahuna mahitungod sa Langitnong Amahan ug ni Jesukristo. Pananglit, mahimong imong tudloan ang mga bata nga ang Langitnong Amahan ug si Jesus malipay kon kita magmabination sa usag usa ug nga sila nahigugma kanato pag-ayo. Mahimo usab nimong tabangan ang mga bata nga makahinumdom sa leksyon sa miaging semana pinaagi sa pagpangutana nila, “Kinsa ang Anak sa Langitnong Amahan?”

Oras sa Pagpundok

10 ka mga minuto

Ang oras sa pagpundok mahimo usab nga gamiton sa pag-andam sa mga bata alang sa leksyon. Sugdi pinaagi sa pagkanta og usa ka pag-ampo nga kanta ug tabangi ang usa ka bata nga moampo. Dayon tabangi ang mga bata nga mangandam alang sa leksyon pinaagi sa pagpangutana kanila kinsa ang naghatag kanato niining maanindot nga yuta ug sa ebanghelyo ug sa Simbahan (tan-awa ang pang-atensyon nga kalihokan, pahina 15).

Oras sa Musika

10 ka mga minuto

Ang musika mahimong epektibo kaayo sa pagtabang sa mga bata nga anaa sa edad sa nursery nga makat-on sa mensahe sa ebanghelyo. Pananglit, niini nga leksyon makatabang kamo sa mga bata nga maghunahuna mahitungod sa Langitnong Amahan ug ni Jesus pinaagi sa pagkanta “Nasayud Ko nga ang Akong Amahan Buhi” [I Know my Father Lives] o “Gibati Nako ang Gugma sa Manluluwas” (tan-awa sa kalihokan sa pagpalambo 2, pahina 17. Kon duna pay panahon, ribyuha ang mga kanta sa miaging mga leksyon o kantaha ang pinili nga mga kanta nga gilista sa pahina xx.

Oras sa Snack

10 ka minutos

Bisan og walay kalihokan nga gigamit dinhi aron sa pagpalig-on sa mensahe sa ebanghelyo, pahinumdumi ang mga bata nga ang Langitnong Amahan ug si Jesus nahigugma kanato ug kinahanglan atong silang pasalamatan sa tanan, lakip na sa atong pagkaon. Imbitara ang usa ka bata sa paghatag og panalangin sa pagkaon.

Oras sa Leksyon

10 ka minutos

Kini nga leksyon adunay daghang mga bahin nga mahimong magamit sa pagtabang sa mga bata nga ang edad anaa sa nursery nga makasabut nga ang Langitnong Amahan ug si Jesus nahigugma kanila. Pananglit, mahimo nimong gamiton ang mosunod nga mga bahin gikan sa leksyon 6:

Ang Langitnong Amahan ug si Jesukristo mihatag nato og mga panalangin (pp. 19-20)
Ang Langitnong Amahan ug si Jesukristo nahigugma sa matag usa kanato (p. 21)
Dugang kalihokan 2 (p. 18)
Kalihokan sa pagpalambo 1 (p. 17)

Oras sa Kalihokan

15 ka minutos

Oras sa kalihokan makahatag sa mga bata og kahigayunan nga magmamugnaon ug sa paggamit sa ilang kalagsik. Kon possible, ang mga kalihokan kinahanglang makatabang sa pagpalig-on sa mensahe sa ebanghelyo. Pananglit, mahimo ninyong dulaon ang dula sa pagpaligid sa bola (p. xix), mangutana og mga pangutana sa pagpalig-on sa mensahe sa ebanghelyo.

Oras sa Panapos

10 ka minutos

Gamita ang oras sa panapos sa pagpahinumdom sa mga bata nga ang Langitnong Amahan ug si Jesus nahigugma sa matag usa kanila ug nakaila sa ilang mga pangalan. Ipakigbahin ang inyong mga pagbati sa pagpasalamat sa mga panalangin nga gihatag sa Langitnong Amahan ug ni Jesus kaninyo. Dayon tabangi ang usa ka bata sa paghatag og panapos nga pag-ampo.

Leksyon 10: Mapasalamaton Ako sa mga Kahoy, mga Tanom, ug mga Kabulakan

Pag-abi-abi

Sugata sa pagtimbaya ang matag bata sa iyang pangalan inig sulod nila sa nursery. Sa inyong pagtimbaya kanila, ipaila ang tema sa leksyon pinaagi sa pagsulti nila nga karon ilang makat-unan ang mahitungod sa mga tanom, mga bulak, ug mga kahoy.

Oras sa pagdula

35 ka minutos

Sa oras sa pagdula, andama ang mga bata alang sa leksyon pinaagi sa pagsulti nila mahitungod sa maanindot nga mga butang niini nga kalibutan nga gilalang sa Langitnong Amahan ug ni Jesukristo aron kita malingaw.

Oras sa Pagpundok

10 ka minutos

Kantaha ang pag-ampo nga kanta, dayon tabangi ang usa ka bata nga mag-ampo. Alang niini nga leksyon, mahimo kang magdala og tanom aron makita, mabati, ug masimhot sa mga bata. Dayon isulti ang imong pagpasalamat sa mga tanom, mga bulak, ug mga kahoy (tan-awa sa dugang nga kalihokan 2, pahina 31).

Oras sa Musika

10 ka minutos

Kantaha ang “In the Leafy Treetops” (tan-awa ang dugang mga kalihokan 4, pahina 30). Ang paghimo sa mga aksyon sa kanta makatabang nga dunay malipayong palibot ug makahatag sa mga bata og kausaban sa kalihokan. Kon duna pay panahon, mahimo nimong ribyuhon ang mga kanta sa miaging mga leksyon.

Oras sa Snack

10 ka minutos

Kon possible, sugdi ang oras sa snack uban sa simpol nga kalihokan nga may kalabutan sa mensahe sa ebanghelyo. Pananglit, niini nga leksyon ang snack mahimo nga pan ug prutas. Ipasabut ngadto sa mga bata nga kining mga butanga nagagikan sa mga kahoy, mga tanom, ug mga bulak (tan-awa sa kalihokan sa pahina 37). Dayon tabangi ang usa ka bata nga mohatag og panalangin sa pagkaon.

Oras sa Leksyon

10 ka minutos

Pagpili og mga bahin gikan sa leksyon nga imong pagtuo makatabang sa mga bata nga makasabut sa mensahe sa ebanghelyo. Pananglit, makatabang ka sa mga bata nga makasabut kon sa unsang paagi nga motubo kining mga kahoy, mga tanom, ug mga bulak pinaagi sa pag-abli og usa ka piraso sa prutas aron ang mga bata makakita sa mga liso. Ipasabut unsay mahitabo sa mga liso nga motubo ug makahatag og daghang bunga (tan-awa sa kalihokan sa pagpalambo 4, pahina 37). Dayon tabangi ang mga bata nga motanom og mga liso diha sa papel nga mga baso nga puno og yuta (tan-awa sa kalihokan sa pagpalambo 1, pahina 37).

Oras sa Kalihokan

15 ka minutos

Pagkahuman sa leksyon, mahimo nimong patukaron ang hinay nga musika samtang ang mga bata mokolor sa mga litrato sa mga kahoy, mga tanom, ug mga bulak. Ang mga kalihokan kinahanglan pilion gikan sa mga leksyon o gikan niadtong gilista sa mga pahina xvi—xx. Ang ubang mga bata gusto tingaling magdula niining orasa. Pag-andam og mga kalihokan, pero ayaw pugsa ang mga bata nga moapil.

Oras sa Panapos

10 ka minutos

Ang oras sa pagtapos pagagamiton sa pagtingub sa mensahe sa ebanghelyo ug sa pagtabang sa mga bata sa pag-ampo. Niini nga leksyon, mahimo nimong pasundon ang mga bata sa mga pulong sa kanta nga “Gamayng mga Liso Nahinanok” [Little Seeds Lie Fast Asleep] sa pagpahinumdom sa mga bata nga mapasalamaton kita sa mga kahoy, mga tanom, ug sa mga bulak (tan-awa sa kalihokan sa pagpalambo 2, pahina 30. Dayon tabangi ang usa ka bata nga mohatag sa panapos nga pag-ampo.