Leksyon 12

Mapasalamaton Ko sa mga Kahayupan

Katuyoan

Aron sa pagtabang sa mga bata nga mobati og pasalamat ngadto sa Langitnong Amahan ug ni Jesus alang sa mga kahayupan.

Pagpangandam

1. Tun-i sa mainampoong paagi ang Genesis 1:24-25 ug 6:5-8:19.

2. Mga materyal nga gikinahanglan:

   1. Usa ka Biblia.

   2. Mga ginunting 1-6 hangtud sa 1-19, mga kahayupan (susama nga mga ginunting makita usab sa Primary Visual Aids Cutouts set 4 and 5.

   3. Hulagway 1-28, Paglalang—Buhi nga mga Nilalang (Pakete sa mga Hulagway sa Ebanghelyo 100; 62483); hulagway 1-29, Paghimo sa Arka (Pakete sa mga Hulagway sa Ebanghelyo 102; 62053); hulagway 1-30, Noe ug ang Arka uban sa mga Kahayupan (Pakete sa mga Hulagway sa Ebanghelyo 103; 62305).

3. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Ibutang ang mga ginunting nga mga kahayupan diha sa salog o sa lamesa sa atubangan sa mga bata. Tabangi ang usa ka bata nga mopunit sa ginunting, moila niana nga hayop, mopakita niini nganha sa klase. Padayuna hangtud ang kada bata makapuli bisag kausa.

Ang Langitnong Amahan Misugo ni Jesukristo sa Paglalang sa mga Kahayupan

Ribyuha uban sa mga bata nga ang Langitnong Amahan misugo ni Jesukristo sa paglalang sa atong maanindot nga yuta, lakip na ang adlaw ug gabii, sa mga lawod ug kayutaan, ug sa mga tanom ug mga kahoy. Ipakita ang Biblia ug pahinumdumi ang mga bata nga atong mabasa ang mahitungod sa paglalang dinhi niini nga libro. Ipasabut nga ang Biblia nagsulti kanato nga ang Langitnong Amahan misugo ni Jesus sa paglalang sa tanang mga kahayupan ug mibutang niini sa yuta.

Ipakita ang hulagway 1-28, Paglalang—Buhi nga mga Nilalang.

• Kinsa ang nagbuhat sa mga butang nga inyong nakita niining hulagway?

• Unsay mga ngalan sa mga kahayupan niini nga hulagway?

Ipasabut nga si Jesus milalang sa tanang matang sa mga kahayupan nga ania karon sa yuta. Ang pipila ka mga kahayupan nagpuyo sa kaumahan ug libot sa atong mga panimalay. Ang ubang mga kahayupan nagpuyo sa kalasangan, ang uban sa mga kabukiran, ug ang uban sa desierto. Ang ubang mga kahayupan nagpuyo sa bugnaw nga dapit sa kalibutan ug ang ubang mga kahayupan nagpuyo sa mainit nga mga dapit.

• Unsa nga mga kahayupan ang nagpuyo sa uma?

• Unsa nga mga kahayupan ang nagpuyo sa lasang, kabukiran, o sa desieto?

• Unsa ang inyong paborito nga hayop?

Kalihokan

Pabaruga ang mga bata ug magpakaaron-ingnon nga ang ilang paborito nga mga kahayupan.

Ang mga Kahayupan Motabang Kanato

Ipasabut nga ang Langitnong Amahan misugo ni Jesus sa pagbutang og mga kahayupan dinhi sa yuta aron sa pagtabang kanato. Gigamit nato ang ubang mga kahayupan alang sa pagkaon, ang uban sa pagtrabaho alang kanato, ug ang uban aron atong tan-awon o duladulaan.

• Sa unsa nga paagi nga ang mga kahayupan makatabang nato?

• Unsang klaseha sa mga kahayupan nga kakuhaan nato og pagkaon, sama sa gatas, mga itlog, o karne?

• Gikan sa unsang hayop ang kakuhaan nato og materyal sa sinina?

• Unsa nga hayop nga makalingaw nga himoong binuhi?

• Unsa nga hayop ang atong masakyan?

Pahisguti sa mga bata ang mga kasinatian nga ilang nasinati sa lain-laing mga matang sa mga kahayupan.

Ang Kahayupan nga Naluwas gikan sa Lunop

Isaysay ang istorya ni Noe ug ang Arka, nga makita sa Genesis 6:5-8:19. Ipakita ang hulagway 1-29, Pagtukod sa Arka, ug hulagway 1-30, Noe ug ang Arka uban sa Kahayupan. Mahimo usab nimong gamiton ang ginunting aron sa paghulagway sa istorya.

• Sa unsa nga paagi si Noe ug ang iyang pamilya napanalanginan tungod sa pagsunod ni Jesus?

• Sa unsa nga paagi naluwas ang kahayupan?

• Kon makakita kita og bangaw, unsay atong mahinumduman niini?

Kalihokan

Pabaruga ang mga bata ug pasunda sa mga aksyon uban nimo samtang imong i-recite ang mosunod nga bersikulo:

Noe

Dako kaayo ang gibuhat ni Noe nga arka (pinatuy-od nga mga bukton);

Nasayud siya unsay buhaton (ibutang ang tudlo sa kilid sa agtang).

Mimartilyo, migabas, ug misukod (paghimog aksyon sama sa gisulti)

Sama sa gisugo kaniya (iyango ang ulo).

Ug si Noe mitawag sa iyang pamilya (mosinyas ginamit ang kamot)

Sa paglakaw padulong ngadto sa barko (hilom nga maglakaw diha sa lugar)—

Ug, tinagurha, ang mga kahayupan (ipataas ang duha ka mga tudlo)

Misakay sa barko aron magpalutawlutaw (paghimog aksyon nga naglutawlutaw).

Ang dag-om nagpundok (ibutang ang mga kamot ibabaw sa ulo),

Nagsugod sa pag-ulan (ilihoklihok ang mga tudlo nga morag nag-ulan)—

Ug ang tibuok yuta natabunan (paghimog aksyon nga morag nagsuhid ang mga kamot);

Nawala ang yuta (ilingi ang ulo gikan sa pikas ngadto sa lain).

Luwas nga naglutawlutaw ang arka (paghimog aksyon nga morag naglutaw-lutaw ang mga kamot)

Daghang mga adlaw ug gabii (ibutang ang duha ka mga kamot sa pikas bahin sa nawong),

Hangtud nga migawas pag-usab ang adlaw (pormaha og lingin ang mga bukton ibabaw sa ulo)

Ug misanag nga mainit ug mahayag kaayo.

Ug miuga ang tubig (ikorus ang mga bukton diha sa dughan);

Migawas ang uga nga yuta (ibukhad ang mga bukton ug ituy-od ang mga kamot).

Nagpasalamat ang pamilya ni Noe (iduko ang ulo ug ikyugpus ang mga bukton)

Nga ang Dios anaa sa duol kanunay.

(Kinuha gikan sa bersikulo ni Beverly Spencer.)

Pagpamatuod

Ipaambit ang imong mga pagbati sa pasalamat alang sa maanindot nga kalibutan nga gilalang ni Jesukristo sumala sa piano sa Langitnong Amahan. Ipadayag kon unsa ka kamapasalamaton sa mga kahayupan nga gibutang dinhi sa yuta alang kanato aron magamit ug mapahimuslan.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

1. Dulaa ang “Hayop, Hayop, Kinsa Ka?” Paalironga ang mga bata. Pabaruga ang usa ka bata sa tunga sa alirong ug magpakaaron-ingnon nga usa ka hayop. Ang ubang mga bata mopataas sa ilang kamot aron tag-anon unsa nga hayop ang gisumaysumay sa bata. Kon matag-anan sa sakto sa usa ka bata ang hayop, siya na sad ang magpatunga ug mosumaysumay og laing hayop. Mahimong imong ipahunghong sa kada bata nganha nimo ang ngalan sa hayop nga iyang sumaysumayon aron masiguro nga maklaro sa bata ang maong hayop.

2. Dulaa ang “Unsa Kini Nga Hayop?” Hatagi og ilhanan ang mga bata mahitungod sa mao nga hayop, kon unsa kini ka dako, unsa ang tingog niini, unsa ang kolor niini, ug kon sa unsa nga paagi kini makatabang sa mga tawo. Sultihi ang mga bata sa pagpataas sa ilang mga kamot kon sila nakahibalo kon unsa nga hayop ang imong gihisgutan. Balika kini sa laing hayop kutob sa imong gusto.

3. Uban sa mga bata, kantaha, o isulti ang mga pulong sa “Ang Kalibutan Dako Kaayo” [The World Is So Big] (Children’s Songbook, p. 235). Buhata ang mga aksyon nga gihatag sa ubos:

   Ang kalibutan dako ug, lingin kaayo (pagporma og dako nga lingin ginamit ang mga bukton),

   Ug dinhi makita ang mga nilalang sa Dios;

   Mga kabukiran (ibutang ang mga kamot diha sa ulo nga pormag bukid)

   Ug mga walog (ibutang ang mga kamot nga pinakulob sa atubangan sa lawas)

   Ug ang mga kahoy nga tag-as (ituy-od ang mga kamot pinataas),

   Mga hayop nga dagko (kinto)

   Ug mga hayop nga gagmay (tikubo).

   Ang kalibutan dako ug, lingin kaayo (pagporma og dako nga lingin ginamit ang mga bukton).

   Ang Dios nahigugma natong tanan (gunite ang mga bukton ug gaksa ang kaugalingon).

4. Pahisguti sa mga bata ang bisan unsang binuhi nga naa kanila o gusto nilang maangkon. Hisguti uban sa mga bata kon unsaon pagtagad ug pag-atiman ang mga binuhi.

5. Hatagi ang mga bata og papel ug mga krayola. Padrowinga ang mga bata og litrato sa iyang paborito nga hayop. Isulat sa kada litrato Mapasalamaton ako sa kahayupan.

Dugang nga mga Kalihokan para sa Gagmayng mga Bata

1. Ipakita ang litrato 1-28, Paglalang—Buhi nga mga Nilalang. Sa inyong kaugalingong mga pulong, isaysay ang istorya sa paglalang sa kahayupan (tan-awa ang Genesis 1:24-25). Ipadayag ang imong pasalamat alang sa kahayupan.

2. Pagpili og pipila ka kahayupan nga pamilyar sa mga bata. Sultihi ang mga bata nga magpakaaron-ingnon nga usa ka hayop. Hisguti unsa nga mga hayop nga popareho ug parehog tingog ug unsa ang ilang kagamitan.