Leksyon 15

Ang Igpapahulay Mao ang Adlaw sa Pagsimba

Katuyoan

Aron sa pagtabang sa kada bata nga makasabut nga ang Igpapahulay mao ang adlaw sa pagsimba ug pagpahulay.

Pagpangandam

1. Tun-i sa mainampoong paagi ang Genesis 2:1-3 ug Exodo 16:11-31. Tan-awa usab sa Mga Baruganan sa Ebanghelyo (31110), kapitulo 24.

2. Mga Mateiyal nga gikinahanglan:

   1. Usa ka Biblia.

   2. Hulagway 1-6, Family Home Evening (62521); hulagway 1-7, Usa ka Mahigugmaong Pamilya; hulagway 1-8, Pagpaambit sa Sakramento (62021); hulagway 1-9, Pag-ampo sa Buntag (62310); hulagway 1-10, Pag-ampo sa Pamilya (62275); hulagway 1-35, Pagpanguha sa Mana; hulagway 1-36, Mga Bata ug mga Ginikanan Nagbasa sa Istorya sa Kasulatan.

3. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Tabangi ang mga bata nga modrama sa kada adlaw nga Paglalang samtang imo silang pahinumduman kon unsay gibuhat sa matag adlaw. (tan-awa sa Genesis 1):

Adlaw 1	Pagpakaaron-ingnon nga natulog ug dayon momata, sa pagpaila sa gabii ug adlaw.
Adlaw 2	Tindog, hangad, ug idupa ang mga bukton aron sa pagpaila sa langit.
Adlaw 3	Tikubo aron sa pagpunit og bulak ug dayon simhota ang bulak.
Adlaw 4	Paghimo og dako nga lingin ginamit ang imong mga bukton alang sa adlaw ug gamay nga lingin ginamit ang imong mga kamot alang sa bulan, ug dayon lihoklihoka ang imong mga tudlo samtang ang imong mga bukton magrepresentar sa nagkidlap nga mga bitoon.
Adlaw 5	Pagpakaaron-ingnon nga usa ka langgam nga naglupadlupad libot sa kwarto o usa ka isda nga naglangoylangoy sa dagat.
Adlaw 6	Pagpakaron-ingnon nga usa ka mananap. Lakaw-lakaw libot sa kwarto sa makadaghan og sundog-sundugon kana nga mananap. Dayon maglinya ug ang matag usa mingon, “Ang akong ngalan mao si (kaugalingong pangalan sa bata). Ako anak sa Dios.”

Hilom nga palingkura ang mga bata.

Sultihi ang mga bata nga sa ikapito nga adlaw, ang Langitnong Amahan ug si Jesus mipahulay. Gitawag nila kining adlaw sa pahulay Igpapahulay.

Ipasulti og usab sa mga bata ang pulong Igpapahulay sa pipila ka mga higayon.

Ang Igpapahulay Usa ka Balaan nga Adlaw

Basaha pagkusog ang Genesis 2:1-2 ug bersikulo 3 hangtud sa pulong nga adlaw. Ipasabut nga sa dihang nahuman sa Langitnong Amahan ug ni Jesus ang paglalang sa yuta ug sa tanan nga anaa niini, ilang gipanalanginan ang ikapito nga adlaw. Usa kini ka balaan nga adlaw, lahi gikan sa ubang mga adlaw sa semana. Ang Igpapahulay usa ka adlaw alang kanato nga mopahulay gikan sa atong trabaho ug sa pagsimba sa Langitnong Amahan ug ni Jesus.

• Unsa nga adlaw sa semana ang Igpapahulay?

• Unsa ang gibuhat sa Langitnong Amahan ug ni Jesus sa adlaw nga Igpapahulay? (Tan-awa sa Genesis 2:2.)

Kalihokan

Sultihi ang mga bata sa pagpataas sa pito ka mga tudlo. Ipha hangtud sa ikapito uban nila, molihok sa kada tudlo kon kini naihap. Ipasabut nga sulod sa unom ka mga adlaw (lihoka ang unang unom ka mga tudlo), kita motrabaho. Sa ikapito nga adlaw lihoka ang (ikapito nga tudlo lamang), mopahulay kita gikan sa atong trabaho tungod kay kini adlaw nga Igpapahulay.

Istorya

Ipakita ang hulagway 1-35, Pagpanguha sa Mana, ug isaysay ang istorya sa mga Israelites ug mana, nga makita sa Exodo 16:11-31.

Tabangi ang mga bata nga makasabut sa milagro sa mana. Ipasabut nga sa kada adlaw ang mga Israelites manguha lang og igo nga mana alang nianang adlawa, pero sa ikaunom nga adlaw makakuha sila og igo alang sa duha ka mga adlaw. Kon ang mga Israelites manguha og sobra sa bisan unsang adlawa gawas sa ikaunom, madaot kini. Sa ikapito nga adlaw, nga mao ang Igpapahulay, walay mana nga makuha. Niining adlawa ang mga Israelite mikaon sa sobra nga mana nga ilang nakuha sa ikaunom nga adlaw.

Istorya

• Giunsa sa mga Israelites pagkuha og pagkaon?

• Nganong dili man sila manguha og mana sa Igpapahulay?

Basaha pagkusog ang Exodo 16:26. Ipasabut nga ang mga Israelites gitudloan nga dili motrabaho sa Igpapahulay. Sa Igpapahulay, ang Langitnong Amahan ug si Jesus gusto nga maghunahuna ta nila kay sa atong trabaho. Ang Igpapahulay usa ka balaan kaayo nga adlaw ngadto sa Langitnong Amahan ug ni Jesus.

Ipasabut og maayo nga ang Igpapahulay dili ang adlaw sa pagtrabaho ug pagbuhat sa naandang mga butang pero adlaw sa pagsimba sa Langitnong Amahan ug ni Jesus. Ang pagsimba nagpasabut sa paghunahuna mahitungod sa Langitnong Amahan ug ni Jesus ug sa pagbuhat sa mga butang nga nagpakita kon unsa ka dako ang atong gugma kanila.

Ang Igpapahulay Mao ang Adlaw sa Pagsimba

Tabangi ang mga bata nga makasabut nga ang Igpapahulay usa ka malipayong adlaw tungod kay atong gisimba ang Langitnong Amahan ug si Jesus sa daghang lain-laing mga paagi.

• Unsay inyong gibuhat karon sa pagpakita sa Langitnong Amahan ug ni Jesus nga nahigugma kamo nila?

Ipasabut nga usa sa importante nga paagi nga makasimba kita sa Langitnong Amahan ug ni Jesus, o sa pagpakita kanila nga gihigugma nato sila, mao ang pagsimba ug pag-ambit sa sakramento. Ipakita ang hulagway 1-8, Pagpaambit sa Sakramento. Ang Langitnong Amahan ug si Jesus malipayon kon kita mokanta ug maminaw ug kon kita maghilom ug magbinuotan aron makapaminaw kita sa atong mga titser ug mobati sa gugma sa Langitnong Amahan ug ni Jesus alang kanato.

Kalihokan

Tabangi ang mga bata nga mohimo sa dula sa tudlo:

Nalipay Ko nga Nakasimba Ko Karon

Nalipay ko nga nakasimba ko karon (itak-op ang mga kamot ug paghimo og tore sa Simbahan pinaagi sa pag-abut sa mga tumoy sa tudlo).

Nakat-on ko sa pagpaminaw (pinasawod sa kamot libut sa dunggan)

Ug sa pag-ampo (ikyugpos ang mga bukton ug iduko ang ulo).

Nakat-on ko ni Jesus nga tua sa langit (tudlo ngadto sa taas)

Naghunahuna ko ni Jesus ug sa iyang gugma (gaksa ang kaugalingon)

Gipakita usab nato sa Langitnong Amahan ug ni Jesus nga gihigugma nato sila pinaagi sa pagmahinlo ug pagmalimpyo kon moadto ta sa Simbahan. Kinahanglang limpyohan nato ang atong mga nawong ug buhok ug isul-ob nato ang atong pinakanindot nga mga sinina.

Kalihokan

Ipa-pantomine sa mga bata ang pagpangandam sa pag-adto sa Simbahan.

Kalihokan

• Unsay atong buhaton sa pagsimba sa Langitnong Amahan ug ni Jesus kon kita atua sa Simbahan?

• Unsay atong buhaton sa pagsimba sa Langitnong Amahan ug ni Jesus kon kita anaa sa panimalay?

Tabangi ang mga bata nga makasabut nga kinahanglang dili kita mogasto o mamalit sa panahon sa Igpapahulay. Kinahanglang dili ta moadto sa mga kalihokan sa sport o kalingawan panahon sa Igpapahulay. Kinahanglang dili ta motrabaho diha sa atong nataran o mga tanaman o mangisda o mangayam sa panahon sa Igpapahulay.

Ipasabut nga adunay daghang mga butang nga mabuhat diha sa balay aron mabalaan ang adlaw nga Igpapahulay. Ipakita ang mga hulagway gikan sa seksyon sa “Pagpangandam” sa saktong higayon sa panahon niining panaghisgutan. Makadula kitag hilom nga dula uban sa mga sakop sa pamilya, magpabasa og mga istorya sa kasulatan, maghimo og album sa pamilya, mobisita sa mga kabanay o kadtong nagmasakiton, magdrowing og mga litrato sa mga butang nga kita mapasalamaton, makipaglakawlakaw uban sa usa ka sakop sa pamilya, mag-ampo, manganta, ug maminaw sa maayong musika.

Kalihokan

Papulipuliha ang mga bata sa pagpapantomine sa mga butang nga ilang gustong buhaton sa balay aron mabalaan ang adlaw nga Igpapahulay.

Pagpamatuod

Sultihi ang mga bata nga ang Langitnong Amahan ug si Jesus malipay kon kita mosimba sa Igpapahulay ug kon kita mokanta, mag-ampo, ug maminaw sa atong mga titser. Malipay usab sila kon kita magbinuotan sa balay sa panahon sa Igpapahulay. Isulti ang pipila ka mga butang sa pagbinuotan nga imong gustong buhaton sa panahon sa Igpapahulay, ug ipadayag kon unsa ikaw ka malipayon sa panahon sa Igpapahulay. Awhaga ang mga bata sa pagpakigbahin uban sa ilang mga pamilya kon unsay ilang nakat-unan niini nga leksyon.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

1. Buhata ang mosunod nga kalihokan, maghimo og bersikulo alang sa kada bata sa imong klase. Imbitara ang mga bata sa paghimo sa mga aksyon uban kanimo.

   Tungod kay Dominggo Karon

   Tudloa ang usa ka bata sa imong klase ug isulti ang pangalan sa bata samtang imong isulti kini nga bersikulo ug himoon ang giingon nga aksyon

   (Pangalan sa bata) naminaw sa mga kasulatan karon (pinasawod nga kamot libut sa dunggan)

   (Pangalan sa bata) naminaw sa mga kasulatan karon, tungod kay Dominggo karon.

   Pagsulti og bersikulo alang sa kada bata, ginamit ang mosunod nga mga ideya nga pare ho sa ibabaw:

   (Pangalan sa bata) nag-ampo sa Primary karon (kyugpusa ang mga bukton, iduko ang ulo, ipiyong ang mga mata.)

   (Pangalan sa bata) nagdrowing og litrato karon(pagpakaaron -ingnon nga nagdrowing ginamit ang kamot).

   (Pangalan sa bata) mibisita og usa ka tawo nga nagsubo karon (pakiglamano sa bata nga ginganlan).

   (Pangalan sa bata) nakat-on mahitungod sa family history karon (pagpakaaron-ingnon nga nagpakli og mga pahina ug nagtan-aw sa mga litrato).

   (Pangalan sa bata) misulat ngadto ni Loio ug Lola karon (lihoka ang mga kamot nga ingon og nagsulat.

   (Pangalan sa bata) naminaw sa istorya karon (pinasawod nga kamot libut sa dunggan).

2. Isaysay sa mga bata ang mosunod nga istorya sa inyong kaugalingong mga pulong:

   Ang mga pioneer milatas og daghang mga milya aron makaabut sa Walog sa Salt Lake aron manimuyo. Miabut sila pipila ka mga adlaw sa dili pa ang Igpapahulay. Bisan og dunay silay balay nga himoonon ug mga tanom nga igtatanom, nakahukom sila nga dili motrabaho sa Igpapahulay. Nagtrabaho sila pag-ayo ug dihadiha dayon mibugwal sa yuta miandam niini aron katamnan. Gahi kaayo ang yuta, mao nga kinahanglan nga ila kining bas-on pag-ayo aron kini madaro. Pagka Sabado sa gabii, daghan na ang ilang natanom nga mga utanon. Pagka Dominggo sa buntag nagpundok sila alang sa mga miting sa Igpapahulay ug nagpasalamat sa Langitnong Amahan sa pagdala nila diha sa bag-ong lugar nga kapuy-an.

3. Padrowinga ang kada bata og usa ka hulagway sa iyang kaugalingon nga naghimo og buhatonon sa Igpapahulay. Ipasulti sa mga bata ngadto sa usag usa mahitungod sa ilang mga hulagway. Labeli ang kada litrato sa pangalan sa bata ug kalihokan sama niini nga ehemplo: Si David mikanta sa mga kanta sa Primary sa panahon sa Igpapahulay.

Dugang nga mga Kalihokan alang sa Gagmayng nga Bata

1. Tabangi ang mga bata nga mohimo sa mga aksyon sa mosunod nga kalihokan nga bersikulo samtang imong isulti ang mga pulong:

   Ang Paglalang

   Si Jesus miingon nga ang adlaw kinahanglang mohayag (paghimo og dako nga lingin ginamit ang mga bukton ibabaw sa ulo),

   Ang ulan kinahanglang mangatagak (ipaubos ang mga kamot sa atubangan sa lawas samtang lihoklihokon ang mga tudlo),

   Ang mga bulak kinahanglang motubo (pinasawod nga kamot, ang mga palad maghayang)

   Si Jesus miingon nga ang mga kalanggaman kinahanglang mokanta (bukhara ug kumkuma ang mga tudlo sama sa sungo sa langgam),

   Ug natuman kini (ikyugpos ang mga bukton).

   (Johnie B. Wood, sa Kanta, Tan-awa, Buhata, Aksyon nga mga Kanta alang sa mga Bata [Sing, Look, Do, Action Songs for Children], ed. Dorothy M. Peterson [Cincinnati: Standard Publishing Co., 1965].)

   Ipasabut nga human sa pagkalalang sa yuta, ang Langitnong Amahan ug si Jesus mipahulay. Ang Igpapahulay mao ang adlaw nga kita mopahulay ug mahinumdom sa Langitnong Amahan ug ni Jesus.

2. Sultihi ang mga bata nga kon kita mohimo sa atong trabaho sa Sabado mas sayon mahinumduman si Jesus ug ang Langitnong Amahan sa Dominggo. Kantaha ang “Sabado” [Saturday] (Songbook sa mga Bata, p. 105), maghimo sa mga aksyon sumala sa gisugyot sa mga pulong.