Leksyon 16

Ako Adunay Lawas

Katuyoan

Aron sa pagtabang sa kada bata nga magpasalamat ug motahud sa iyang pisikal nga lawas.

Pagpangandam

1. Tun-i sa mainampoong paagi ang Daniel 1 ug Doktrina ug mga Pakigsaad 89. Tan-awa usab sa Mga Baruganan sa Ebanghelyo (31110), kapitulo 29.

2. Mga materyal nga gikinahanglan:

   1. Usa ka Biblia ug usa ka kopya sa Doktrina ug mga Pakigsaad.

   2. Hulagway 1-5, Pamilya uban sa Batang Masuso (62307); hulagway 1-37, Daniel Nagdumili sa Pagkaon sa Karne ug Bino sa Hari (Pakete sa mga Hulagway sa Ebanghelyo 114; 62094); hulagway 1-38, Mga Bata Nagdulaog Bola.

3. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Pahinumdom ngadto sa titser: Kinahanglan nga sensitibo ka ngadto sa mga pagbati ni bisan kinsang mga bata sa inyong klase nga adunay mga depekto sa lawas. Pokus sa mga butang nga mahimo sa ilang mga lawas, ug dili sa ilang mga depekto.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Pabaruga ang mga bata. Tabangi sila nga makakanta ug mohimo sa mga aksyon sa “O, Abaga, Tuhod, Tiil” [Head, Shoulders, Knees, and Toes] (Songbook sa mga Bata, p. 129). Kantaha og hinay aron matudlo o malihok ang mga parte sa lawas samtang kini hisgutan. Pananglit, iyango ang imong ulo, uyuga ang imong mga abaga, ipiko ang imong mga tuhod, ug kinto.

Ulo, abaga, tuhod, tiil, tuhod, tiil, tuhod, tiil;

Ulo, abaga, tuhod, tiil, mata, dalunggan, baba, ilong.

Ipasabut ngadto sa mga bata nga ilang magamit ang ilang mga lawas sa pagtabang kanila sa pagkanta niini nga kanta.

Gipiano sa Langitnong Amahan nga Kitang Tanan Makabaton og Pisikal nga Lawas

Ribyuha uban sa mga bata nga sa dihang nagpuyo kita sa langit uban sa Langitnong Amahan ug ni Jesukristo, wala kitay pisikal nga mga lawas. Mga espiritu lang kita. Kinahanglan nga moanhi kita sa yuta aron makabaton og pisikal nga mga lawas. Gipiano sa Langitnong Amahan nga matawo kita sa yuta ug makabaton og yutan-ong mga ginikanan nga moatiman kanato.

Ipakita ang hulagway 1-5, Pamilya uban sa Batang Masuso.

• Kinsa ang mga tawo nga ania niini nga hulagway.

• Kinsa ang nagplano nga makaanhi kita sa yuta ug makabaton og mga pamilya?

Kalihokan

Pabaruga ang mga bata ug ipasunod nila ang imong mga aksyon samtang imong ipasabut nga ang atong mga lawas gikan sa ibabaw sa atong mga ulo (hikapa ang ulo) ngadto sa tumoy sa mga tudlo sa tiil (hikapa ang mga tudlo). Ang atong mga nawong (pahiyom) ug ang atong mga tudlo (lihoka ang mga tudlo) ang tanan parte sa atong mga lawas. Patuyuka ang mga bata makausa ug dayon palingkura.

Ipasabut nga ang atong mga lawas makahimo og daghang mga butang. Kada parte sa lawas adunay iyang trabaho nga himoonon.

Kalihokan

• Unsay inyong mahimo sa inyong mga mata?

• Unsay inyong mahimo sa inyong mga dalunggan?

• Unasay inyong mahimo sa inyong ba-ba?

• Unsay inyong mahimo sa inyong mga kamot?

• Unsay inyong mahimo sa inyong mga tiil?

Kalihokan

Pabaruga ang mga bata ug ipahimo ang mosunod nga aksyon nga bersikulo:

Duna Akoy Talagsaon nga Lawas

Duna koy talagsaong lawas (ihikap ang mga kamot ngadto sa dughan)

Nga giplano sa Langitnong Amahan alang kanako.

Gihatagan ko niyag dalunggan aron makadungog (pinasawod nga kamot ilibut sa dalunggan)

Ug mga mata aron ko makakita (itudlo ang mga mata).

Duna koy duha ka mga kamot nga makapakpak (ipakpak ang mga kamot),

Duha ka mga tiil nga makatuyok (tuyok).

Kon gusto ko, makahikap ko sa

Akong mga tudlo sa tiil (tikubo ug hikapa ang mga tudlo

Kon maghunahuna ko sa akong lawas (ibutang ang tudlo sa ulo)

Ang pinakanindot nga bahin niini (hilom nga molingkod)

Nga ang Langitnong Amahan miplano niini

Nga parehog hitsura kaniya.

Ang Langitnong Amahan ug si Jesukristo Gusto nga Atong Atimanon ang Atong mga Lawas

Ipasabut nga ang atong mga lawas importante kaayo, ang Langitnong Amahan ug si Jesus mihatag kanato og lagda aron sa pagtabang kanato sa pag-atiman sa atong mga lawas ug himoon kini nga lig-on ug himsog. Kini nga mga lagda gitawag og ang Pulong sa Kaalam. Ipakita ang kopya sa Doktrina ug mga Pakigsaad (o ipakita asa ang Doktrina ug mga Pakigsaad magsugod diha sa tub ka kombinasyon). Ipasabut nga ang Pulong sa Kaalam gisulat niining libro sa kasulatan.

Hisguti ang mga klase sa pagkaon nga gisulti diha sa Pulong sa Kaalam nga makatabang kanato nga magmahimsog ang atong mga lawas, sama sa mga prutas, utanon, ug mga lugas. Dayon hisguti ang mga butang nga gisulti sa Langitnong Amahan ug ni Jesus nga dili nato gamiton, sama sa tabako, alkohol, ug kape. Tabangi ang mga bata nga makasabut nga kita mosunod sa Pulong sa Kaalam ug mokaon sa sakto nga mga pagkaon, ang Langitnong Amahan ug si Jesus mahimuot kanato ug mopanalangin kanato.

Istorya

Isaysay ang istorya sa Daniel 1 kon sa unsa nga paagi nga mikaon si Daniel sa pagkaon nga gusto sa Langitnong Amahan nga iyang kan-on. Ipakita ang hulagway 1-37, Si Daniel Nagdumili sa Pagkaon sa Karne ug Bino sa Hari, sa angay nga panahon.

Istorya

• Unsay gibuhat ni Daniel sa dihang misulti ang hari sa pagkaon sa mga butang nga dili maayo alang kaniya? (Tan-awa sa Daniel 1:8, 12-13.)

• Sa unsa nga paagi nga si Daniel ug ang iyang mga higala napanalanginan tungod sa pagsunod sa mga lagda sa Langitnong Amahan mahitungod kon unsay kan-on? (Tan-awa sa Daniel 1:15, 17, 20.)

• Unsa nga makapahimsog nga pagkaon ang inyong gikaon?

• Nganong mokaon man kamo og makapahimsog nga pagkaon?

• Unsay inyong bation kon kamo mokaon og mga pagkaon nga maayo alang kaninyo?

Ipasabut nga kinahanglan usab nga kita mohimo sa laing mga butang aron magmahimsog ug magmalig-on ang atong mga lawas.

Ipakita ang hulagway 1-38, Mga Bata Nagdula og Bola.

Istorya

• Unsay gibuhat niining mga bataa?

• Ngano nga importante man nga magpaugnat sa atong mga lawas?

• Unsa ang ubang mga paagi nga atong mapaugnat ang atong mga lawas?

Ibutang ang imong mga kamot sa usa ka parte sa imong nawong ug ipiyong ang imong mga mata ingon og ikaw natulog.

Istorya

• Unsay akong gipasumangil nga gibuhat?

• Ngano nga importante man nga makaangkon og sakto nga gidugayon sa pagkatulog?

Pagpakaaron-ingnon nga nanghugas ka sa imong kamot.

Istorya

• Unsay akong gipasumangil nga gibuhat?

• Kanus-a kita mohugas sa atong mga kamot?

• Kanus-a kita maligo?

• Kanus-a kita magsipilyo?

• Nganong kinahanglan man kitang limpyo?

Hisguti ang laing importanting mga lagda sa panglawas, sama sa pagsul-ob og tukma nga sinina sa lain-laing panahon, pagpraktis og maayong luwas nga mga kinaiya, ug paghanggap og presko nga hangin.

Ang Langitnong Amahan ug si Jesukristo Gusto nga Atong Panalipdan ang Atong mga Lawas

Ipasabut nga ang Langitnong Amahan ug si Jesus gusto nga atong panalipdan ang atong mga lawas gikan sa mga kadaot. Pangutan-a ang mga bata mahitungod sa mga kakuyaw nga ilang mahimong masugatan, ginamit ang mosunod nga mga pangutana o mahimong maghimo kag imoha:

• Unsay mahitabo kon kamo magdula og mga posporo?

• Unsay mahitabo kon kamo magdula sa dalan o duol sa mga sakyanan?

• Unsay mahitabo kon kamo dili magbantay sa hait nga mga butang sama sa mga kutsilyo ug mga gunting?

• Nganong itaod nato ang mga bakus sa lingkuranan kon kita mosakay og sakyanan?

Ipasabut nga kinahanglang atong panalipdan ang atong mga lawas. Kinahanglang dili nato buhaton ang mga butang nga makuyaw sa atong mga lawas ug makadaot niini. Ipasabut nga ang Langitnong Amahan ug si Jesus gusto nga kita mobati nga luwas ug malipayon. Gusto sila nga atong atimanon ang atong mga lawas aron kita magmahimsog.

Pagpamatuod

Ipadayag ang imong mga pasalamat nga imong gibati sa imong pisikal nga lawas. Ipadayag ang imong pasalamat nga ang mga bata nag-atiman sa ilang mga lawas aron sila magmahimsog ug magmalig-on.

Mga Kalihokan sa Pagpalambo

Pagpili og pipila niini nga mga kalihokan nga gamiton sa panahon sa leksyon.

1. Kantaha ang “Mapikopiko” [Hinges] (Songbook sa mga Bata, p. 127), mohimo sa mga aksyon sumala sa gisugyot sa mga pulong. Sultihi ang mga bata nga ikaw mapasalamaton kaayo sa lawas nga daghan og mabuhat.

2. Pagdala og mga litrato sa nagkalain-laing mga butang sa pagkaon ug mainom. Pasultiha ang mga bata kon ang kada butang maayo ba o dili sa ilang mga lawas. Ipasabut nga ang ubang mga butang maayo, pero dili maayo kon sobra ra. Pananglit, ang karmelitos lami, pero kon sobrahan ra masakit kita. Ipakita ang mga iitrato sa maayong mga butang nga matan-aw sa mga bata.

3. Sa usa ka bag o kahon, pagdala og pipila ka mga butang nga makatabang kanato sa pag-atiman sa atong mga lawas. lapil ang butang nga makatabang kanato nga mahimong limpyo, sama sa sabon, trapo o gamay nga toalya, o totbras. lapil ang usa ka butang sa maayong pagkaon, usa ka gamay nga habol nga magrepresentar og pagkatulog, ug butang magrepresentar nga pagpaugnat sa kusog, sama sa gamay nga bola. Hatagi ang mga bata og mga timailhan mahitungod sa usa ka butang ug ipatag-an nila kon unsa kini. Ipakita ang butang kon matag-anan nila. Padayona hangtud ang tanang mga butang napakita na.

4. Pabaruga ang mga bata ug ipa-pantomime nila ang paghinlo ug paglimpyo sa ilang lawas. Sultihi sila nga magpakaaron-ingnon nga nanghugas sa ilang mga kamot, nagsipilyo sa ilang mga ngipon, ug nanudlay sa ilang mga buhok. Dayon ipa-pantomine nila ang ilang paborito nga paagi sa pagpaugnat sa kusog, sama sa pag-ambak-ambak, sa pagtakingking, paglukso, o pag-itsa og bola.

5. Hisguti sa mga bata ang mahitungod sa ubang mga tawo nga dunay depekto sa ilang mga lawas. Kinahanglan nga dili kita mobiaybiay niining mga tawhana o motudlo o mokatawa kanila. Hisguti kon unsaon nato sa pagtagad ang mga tawo nga dunay mga depekto (makigsulti kanila, makig-amigo kanila, normal nga motagad nila, motabang nila kon nagkinahanglan silag tabang).

6. Padrowinga ang kada bata og hulagway sa iyang kaugalingon. Labeli ang kada papel og Mapasalamaton ako sa akong lawas.

Dugang nga mga Kalihokan para sa Gagmayng mga Bata

1. Ipakita ang hulagway 1-5, Pamilya uban sa usa ka Batang Masuso, ug pahisguti sa mga bata ang mahitugod niini.

   • Miagi ka ba sa pagkabatang masuso?

   • Makalakaw o makasulti ba ang batang masuso?

   Pahinumdumi ang mga bata nga sila sa makausa mga batang masuso, pero karon ang ilang mga lawas midako na ug makahimo silag daghan pa nga mga butang. Samtang ang ilang lawas nagtubo pa.

   Ipakita ang hulagway 1-16, Ang Paghimugso, ug pahinumdumi ang mga bata nga bisan gani si Jesus usa ka bata kaniadto.

2. Itudlo ang imong ba-ba ug isulti, “Mao kini ang akong ba-ba.” Dayon pangutana, “Mapakita ba ninyo ngari kanako ang inyong ba-ba?” ug tabangi ang mga bata nga motudlo sa ilang mga ba-ba. Usba alang sa mga mata, ilong, mga dalunggan, mga kamot, ug mga tiil. Dayon itudlo ang kada parte sa lawas nga dili mosulti sa pangalan niini ug ang mga bata maoy pasultia sa pangalan niini. Kon ang mga bata makasulti sa pangalan sa tanan niining mga partiha, mahimo usab nimong ipangutana ang mga pangalan sa ubang mga parte sa lawas nga wala kaayo mailhi sa mga bata, sama sa mga siko, mga tuhod, mga pulso, ug mga buol-buol.

3. Paghimo og simpol nga istorya mahitungod sa usa ka gamay nga bata gikan sa inyong dapit. Hisguti ang mahitungod sa pagmata sa bata sa buntag, pagsinina, pagpamahaw, ug uban pa sa tibuok adlaw. Samtang ikaw maghisgot sa kada kalihokan, pangutan-a ang mga bata unsa nga mga parte sa lawas ang gigamit sa bata.

4. Pabaruga ang mga bata ug pakantaha sa mosunod nga kanta sa “Dihay usa ka Snowman” [Once There Was a Snowman] (Songbook sa mga Bata, p. 121). Gamita ang nagtikubo nga mga aksyon alang sa unang bersikulo ug maghiwatid nga mga aksyon alang sa ikaduhang bersikulo.

   Sa bata, bata, bata, pa ako,

   Sa bata, gamay, gamay, gamay pa ko.

   Karon dako, dako, dako na ko,

   Karon dako, taas, taas, taas na!