Leksyon 19

Mapasalamaton ko sa Akong mga Mata

Katuyoan

Aron sa pagtabang sa mga bata nga mopasalamat sa iyang mga mata ug sa unsay mahimo niini.

Pagpangandam

1. Tun-i sa mainapoong paagi ang Juan 9:1-7 ug 3 Nephi 11:1-17.

2. Mga materyal nga gikinahanglan:

   1. Usa ka Biblia ug Basahon ni Mormon.

   2. Usa ka tubo nga dunay dako nga lungag ug liston o piraso sa lambo. (Kon dako ang imong klase, mahimong magdala ka og sobra sa kada usa.)

   3. Ua ka bandana o panapton para itabon sa mata.

   4. Hulagway 1-43, Si Jesus Miayo sa Buta (Pakete sa mga Hlagway sa Ebanghelyo 213; 62145); hulagway 1-44, Si Jesus Nagtudlo sa Kasadpang Bahin sa Kalibutan (Pakete sa mga Hulagway sa Ebanghelyo 316; 62380).

3. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Pahinumdom ngadto sa titser: Kinahanglang magmabination ka sa mga pagbati ni bisan kinsang mga bata sa imong klase kinsa adunay mga depekto sa lawas. Pokus sa mga butang nga mahimo sa ilang mga lawas, dili sa ilang mga depekto.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Ipakita sa mga bata kon unsa ka sayon ang pagpasulod sa liston o lambo sa tubo nga bukas ang imong mga mata. Dayon piyonga ang inyong mga mata ug sulayi ang pagpasulod ang liston sa tubo. Hatagi og higayon ang kada bata.

Ang Atong mga Mata usa ka Panalangin ngari Kanato

Ipasabut nga duna kitay mga mata aron nga kita makabasa ug makat-on, ug makadula, ug makakita sa maanindot nga yuta.

Hisguti uban sa mga bata kon unsa ka lahi ang ilang mga kinabuhi kon dili sila makakita.

• Unsaon ninyo pagkaon ang inyong pagkaon?

• Unsaon ninyo pagkahibalo unsa nga sinina ang inyong isul-ob?

• Unsaon ninyo pagkahibalo asa kamo paingon diha sa inyong balay?

Kanta

Tabangi ang mga bata nga mokanta o mosulti sa mga pulong sa “Duha ka Gagmayng mga Mata” [Two Little Eyes] (Children’s Songbook, p. 268).

Duha ka mata nga mamilok,

Duha ka mata nga makakita;

Ulo ug abaga; tuhod; ug tudlo;

Ug daghang pang mga butang nga nakahimo nako.

Tra la la la la la,

Duha ka mata makakita,

Duha ka mata nga mamilok,

Ug daghang pang mga butang nga nakahimo nako.

(Gikan sa Merrily We Sing, © 1948, 1975 pinaagi sa Pioneer Press, Inc. [usa ka dibisyon sa Jackman Music], Gigamit pinaagi sa pagtugot.)

Kalihokan

Patan-awa ang mga bata sa bintana (o sa usa ka nindot nga litrato) ug magpakaaron-ing-non nga mao pa kini ang unang higayon nga sila makakita. Imbitara sila sa pagsulti unsa ang ilang nakita. Hisguti ang mahitungod sa mga kolor ug mga porma. Tabangi ang mga bata nga makaamgo kon unsa ka dako nga panalangin ang makakita.

Kalihokan

• Unsa pa man ang ubang paborito nimong tan-awon?

Ipasabut nga ang mga mata sa ubang mga tawo dili kaayo makakita. Kining mga tawhana kinahanglang mosul-ob og antyohos o contact lenses aron matabangan sila nga makakita. Ang uban mga tawo buta ug walay gayuy makita.

Kalihokan

Hisguti kon giunsa sa buta nga mga tawo nga makalakaw lakaw sa mga lugar sa ilang mga kaugalingon uban sa iro nga mogiya o sa usa ka sungkod. Taptapi ang mga mata sa usa ka bata ug pagpakaaron-ingnon nga ikaw usa ka iro nga mogiya. Paguniti sa bata ang imong bukton sama sa higot sa iro. Dad-a ang bata libut sa kwarto. Papulipuliha ang mga bata nga magpakaaron-ingnon nga buta o usa ka iro nga mogiya.

Istorya

Ipakita ang hulagway 1-43, Jesus Miayo sa Buta, ug isaysay ang istorya ni Jesus nga miayo sa buta, nga makita sa Juan 9:1-7.

Istorya

• Unsay gibuhat ni Jesus sa clay? (Tan-awa sa Juan 9:6.)

• Unsay nahitabo sa diha nga ang buta nga tawo gihugasan diha sa lim-aw? (Tan-awa sa Juan 9:7.)

• Unsa sa inyong hunahuna ang gibati sa buta nga tawo sa dihang nakakita na siya?

Mapasalamaton Ako sa Langitnong Amahan tungod sa Akong mga Mata

Kalihokan

Pabaruga ang mga bata ug pasunda sila sa mosunod nga bersikulo uban kanimo, motudlo sa kada parte sa lawas kon kini gihisgutan:

Mapasalamaton Ako sa Akong mga Mata

Mapasalamaton ako sa akong mga mata,

Sa akong mga dalunggan, sa akong ba-ba ug ilong;

Mapasalamaton ako sa akong mga kamot ug mga bukton,

Sa akong mga tuhod, tiil ug mga tudlo sa tiil.

(Kinuha gikan sa bersikulo ni Lucy Picco.)

Istorya

Ilibot sa pagpasa ang hulagway 1-44, Si Jesus Nagtudlo didto sa Kasadpang bahin sa Kalibutan, ug hangyoa ang kada bata sa pagsulti og usa ka butang bahin sa iyang nakita sa litrato. Isugilon ang istorya ni Jesus nga mibisita sa Kasadpang Bahin sa Kalibutan, nga makita sa 3 Nephi 11:1-17.

Istorya

• Kinsa ang nakita sa mga tawo?

• Unsa ang gibati sa mga tawo sa dihang ilang nakita si Jesus? (Tan-awa sa 3 Nephi 11:16-17.)

• Unsa ang kolor sa kupo ni Jesus? (Tan-awa sa 3 Nephi 11:8.)

Ipasabut nga dili kita makakita ni Jesus sa linawas sama sa nasinati sa mga tawo ni Nephi, pero sa matag higayon nga atong makita ang maanindot nga kalibutan, mahinumduman nato ang iyang gugma alang kanato.

Pagpamatuod

Ipaambit sa mga bata ang imong pasalamat sa imong mga mata. Isulti kon giunsa sa maanindot nga linalang nga inyong nakita kada adlaw mopahinumdom kaninyo sa gugma ni Jesus ug sa Langitnong Amahan alang kaninyo. Pahinumdumi ang mga bata sa pagpasalamat sa Langitnong Amahan alang sa ilang mga mata.

Mga Kalihokan sa Pagpalambo

Pagpili og pipila niini nga mga kalihokan nga gamiton sa panahon sa leksyon.

1. Imbitara ang mga bata sa pagtan-aw pag-ayo sa mga mata sa usag usa, sa mga tabon-tabon, sa mga kilay, ug sa mga pilok. Ipasabut nga ang atong mga tabon-tabon, mga kilay, ug mga pilok makatabang nga dili masudlan og hugaw, abug, ug singot ang atong mga mata.

2. Sa dili pa ang klase, paggamit og hait nga butang sama sa alpiler nga makalungag sa papel sa porma nga lingin ug eskwala. Sa klase, taptapi ang mga bata tagsa-tagsa ug sultihi sila sa paghikap sa mga burot-burot diha sa papel ug ipasulti unsa nga porma kini. Ipasabut nga pareha kini sa braille, nga mao ang paagi nga makabasa ang mga tawo nga buta.

3. Paggamit og mga bag nga papel, paghimog mata nga moabli ug mopiyong (tan-awa ang ilustrasyon sa katapusan sa leksyon) alang sa kada bata. Isulat sa kada bag sa papel ang mapasalamaton ako alang sa akong mga mata. Pakolori sa mga bata ang mga mata ug padrowingi og buhok ang mga bag nga papel. Ginamit ang mga mata sa bag nga papel, ipa -pantomime sa mga bata ang mga panahon nga atong bukhon ug piyongon ang atong mga mata, sama sa pagmata o pagkatulog, kon mag-ampo kita, ug kon kita mahadlok.

4. Kon posible, dad-a ang mga bata sa paglakaw-lakaw sa kinaiyahan. Hangyoa sila sa pagkyugpos sa ilang mga bukton ug maghilom sa paglakaw, aron sila makaconcentrate sa paggamit sa ilang mga mata. Kon mobalik na sila sa klase, Imbitara sila sa pagpulipuli sa pagsulti unsay ilang nakita.

Dugang nga mga Kalihokan para sa Gagmayng mga Bata

1. Kantaha o isulti ang mga pulong sa “Popcorn Popping” (Songbook sa mga Bata, p. 118). Ipasabut nga ang mga bulak sa kahoy nga apricot pareho sa popcorn.

   • Kon motambo ka sa bintana, sama sa gisulti sa kanta, makakita ba kamo og bulak sa popcorn sa kahoy nga apricot? Unsay inyong nakita sa dihang mitambo mo sa bintana?

   Patamboa ang mga bata sa bintana, o dad-a sila sa gawas sa makadiyot. Balik ngadto sa klase ug ribyuha unsay ilang nakita.

   • Unsay inyong gigamit aron makakita niining mga butanga? (Mga mata.)

   Ipasabut nga kinahanglan nga magpasalamaton kita ngadto sa Langitnong Amahan alang sa atong mga mata.

2. Pabaruga ang mga bata ug isulti ang mga pulong sa “Hikapa ang Inyong mga Mata,” maghimo sa mga aksyon nga gipasabut sa mga pulong:

   Hikapa ang inyong mga mata,

   Hikapa ang inyong ilong,

   Hikapa ang inyong mga dalunggan,

   Hikapa ang inyong mga tudlo sa tiil.

   Ituy-od ang mga kamot

   Sa Taas,

   Taas kaayo

   Ngadto sa langit.

   Ibutang ang inyong mga kamot

   Sa inyong buhok;

   Maghilom nga molingkod

   Sa inyong lingkuranan.

3. Ipakita sa mga bata ang gamay nga butang. Ipasabut nga imo kining ibutang bisan asa sa kwarto, ug ilang gamiton ang ilang mga mata sa pagpangita niini. Ipapiyong sa mga bata ang ilang mga mata, ug ibutang ang butang diin kini makita pero dili kaayo klaro. Ipabuka sa mga bata ang ilang mga mata ug ipapangita ang butang nga dili molihok o magsaba. Sultihi sila sa pagkyugpos sa ilang mga bukton kon ilang makit-an ang butang. Pahinumdumi ang mga bata nga kinahanglang maghilom sila ug motugot sa uban nga mangita sa butang ginamit ang ilang mga mata. Balika bisan kapila kon gusto pa.