Ako Anak sa Dios

Katuyoan

Aron sa pagtabang sa kada bata nga makasabut nga kita mga anak nga espiritu sa Langitnong Amahan, kinsa nakaila kanato ug nagmahal kanato.

Pagpangandam

Tun-i sa mainampoong paagi ang Exodo 2:1-10; Salmo 82:6; Doktrina ug mga Pakigsaad 138:55-56; ug Moises 1:1-6. Tan-awa usab sa Mga Baruganan sa Ebanghelyo (31110), kapitulo 2.
Pangitag duha o tulo ka nindot nga mga kinaiya sa kada bata pinaagi sa pagpakigsulti sa iyang mga ginikanan.
Mga materyal nga gikinahanglan:
1. Usa ka Biblia ug Perlas nga Labing Bililhon.
2. Usa ka beanbag o gagmay og humok nga butang.
3. Hulagway 1-1, Ang Kalibutan (62196); hulagway 1-2, Moises sa Kabugangan (Pakete sa mga Hulagway sa Ebanghelyo106; 62063).
Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Kantaha ang “Ako Anak sa Dios” [“I Am a Child of God”] (Songbook sa mga Bata, p. 2) uban sa mga bata.

Ako anak sa Dios,
Gipadala dinhi,
Panimalay, ginikanan
Ako gihatagan.

Agaka ko, tudloi ko,
Unsay buhaton.
Nga makabalik ko sa
Amahang Langitnong.

litsa ang beanbag o humok nga butang ngadto sa usa ka bata samtang imong isulti ang mga pulong “Nakaila ko og usa ka anak sa Dios nga ginganlan og. “Ipasulti sa bata ang iyang kaugalingong pangalan ug ipabalik ang beanbag nganha nimo. Balika ang kalihokan hangtud ang tanan nakasulay na.

Kita Espiritu nga mga Anak sa Langitnong Amahan

Kinsa ang Langitnong Amahan? (Gamita ang mga tubag sa mga bata sa paghatag nimo og direksyon sa pagpasabut niini nga seksyon diha sa angay nga lebel.)

Ipakita ang hulagway 1-1, Ang Kalibutan. Ipasabut nga sa wala pa kita matawo dinhi sa yuta nagpuyo kita sa langit uban sa Langitnong Amahan. Mga espiritu kita didto. Ang usa ka espiritu mao ang anaa sa sulod kanato nga maoy nakapabuhi kanato. Sa mga espiritu pa kita, wala kitay unod ug mga bukog sama sa atong mga lawas karon, pero susama kitag panagway.

Ipasabut nga ang Langitnong Amahan mao ang amahan sa atong mga espiritu, ug kita iyang espiritu nga mga anak. Wala kita mahinumdom nga nagpuyo uban sa Langitnong Amahan sa wala pa kita moanhi sa yuta, pero nasayud kita nga kita iyang espiritu nga mga anak tungod kay mabasa nato kini diha sa mga kasulatan.

Ipakita ang Biblia ug basaha ang Salmo 82:6, magpasabut nga ang Labing Halangdon nagpasabut nga Langitnong Amahan. Ipasabut nga ang kada tawo sa yuta usa ka anak sa Langitnong Amahan.

Kanta

Kantaha ang “Ako Anak sa Dios” pag-usab. Ipasabut nga ang Dios maoy laing ngalan alang sa Langitnong Amahan.

Nakaila ug Nahigugma ang Langitnong Amahan Kanato

Ipasabut nga ang Langitnong Amahan nahigugma pag-ayo sa matag usa kanato tungod kay kita iyang mga anak. Nakaila siya sa atong mga pangalan ug sa atong tibuok pagkatawo. Nasayud siya unsay makalipay nato ug unsay makapaguol kanato. Nasayud siya unsay labing maayo sa matag usa kanato.

Kalihokan

Isulti ang mosunod nga mga bersikulo sa makadaghan uban sa mga bata, ginamit ang mga aksyon nga gihulagway:

Ang Langitnong Amahan Nakaila Kanako

Nakaila ang Langitnong Amahan nako (itudlo ang kaugalingon) 
Ug unsay akong gustong buhaton.
Nakaila Siya sa akong pangalan ug asa ako magpuyo (pagporma og atop pinaagi sa pagdugtong sa mga tudlo sa duha ka mga kamot). 
Nasayud ko nga nahigugma usab siya kanako, (kinuros nga mga bukton ug ibutang ang mga kamot diha sa imong abaga sama nga ikaw migakos sa imong kaugalingon). 

Nasayud siya unsay makalipay kanako (ibutang ang mga tudlo sa nagpahiyom nga ba-ba). 
Nasayud siya unsay makapaguol kanako (ibutang ang mga tudlo sa nagtibi nga ba-ba). 
Nasayud ko nga gusto Siyang motabang kanako (itudlo ang kaugalingon), 
Ug mao kanay makapalipay nako!

Hangyoa ang usa ka bata nga moduol sa atubangan sa klase. Ginamit ang unsay inyong nakat-unan gikan sa mga ginikanan sa bata, ipasabut nga ang Langitnong Amahan nasayud sa maayong mga kinaiya sa bata. Pananglit, ikaw makasulti, “ang Langitnong Amahan nasayud nga si Emily usa ka mahigugmaong anak, motabang sa iyang mama sa pag-atiman sa iyang igsoong babaye, ug sa kasagaran malipayon ug mapahiyumon.” Padayon hangtud nga ang matag bata makahimo sa iyang turno.

Ipasabut nga kon mobuhat kita og maayo ug mahigugmaong mga butang, sama kita sa Langitnong Amahan.

Mahimo Kitang sama sa Langitnong Amahan

Unsay tawag sa gamay nga iro?
Unsa man ang itoy kon modako na?
Unsay tawag sa gamay nga manok?
Unsa man ang piso kon modako na?

Ipasabut nga sama sa mga hayop nga modako nga mahisama sa ilang mga ginikanan, modako kita nga mahisama sa atong mga ginikanan. Ang Langitnong Amahan mao ang amahan sa atong mga espiritu, mao nga kita modako nga mahisama kaniya. Ang Langitnong Amahan mahigugmaon, ug mabination, ug gusto siyang motabang kanato. Kon kita mahigugmaon, buotan, ug mabination mahisama kita sa Langitnong Amahan. Ipasabut nga kinahanglan maningkamot kita nga mahisama sa Langitnong Amahan kada adlaw.

Ang Langitnong Amahan Adunay Importanting Trabaho nga Ipabuhat Kanato

Istorya

Ipakita ang hulagway 1-2, Si Moises diha sa Kabugangan, ug isaysay ang istorya kon sa unsa nga paagi nga ang anak nga babaye sa Paraon miluwas ni Moises gikan sa kakuyaw sa batang masuso pa siya, nga makita diha sa Exodo 2:1-10.

Ipasabut nga si Moises nagtubo nga mahimong usa sa importanting mga tigtabang sa Langitnong Amahan, usa ka propeta. Misulti ang Langitnong Amahan ni Moises nga si Moises iyang anak (tan-awa sa Moises 1:4, 6) ug siya adunay importante nga ipabuhat ni Moises. Basaha ang unang hugpong sa mga pulong sa Moises 1:6 ngadto sa mga bata. Si Moises mihimo sa iyang trabaho sa dihang iyang gipagawas ang mga Israelite gikan sa yuta sa Ehipto, diin sila giabusohan pag-ayo, ngadto sa laing yuta, diin gitudloan sila ni Mosies sa mga kasugoan sa Langitnong Amahan.

Patagsa-tagsaa sa pagpaatubang ang mga bata diha sa klase, ug tabangi ang matag usa sa pagsubli sa unang hugpong sa mga pulong sa Moises 1:6, ipuli ang iyang kaugalingong pangalan: “Ako adunay usa ka buhat alang kanimo, (pangalan sa bata), akong anak.”

Ipasabut nga ang Langitnong Amahan adunay importante nga mga butang nga ipabuhat kanato samtang magpuyo kita dinhi sa yuta, sama sa pagkainahan o pagkaamahan, pagkamisyonaryo, pagkatitser, tigtabang sa Simbahan, o tigtabang sa komunidad.

Istorya

Unsa kaha ang importante nga buhat nga gustong ipabuhat sa Langitnong Amahan kanato?

Kalihokan

l-papantomine sa mga bata kon unsay ilang gusto kon modako na sila, sama nga mahimong inahan o amahan nga magduyan sa usa ka bata, usa ka misyonaryo nga magtrakting, o usa ka titser nga magtudlo og usa ka klase.

Pagpamatuod

Sultihi ang mga bata nga kinahanglan nilang hinumduman nga sila mga espiritu nga anak sa Langitnong Amahan ug nga siya nakaila kanila ug nahigugma kanila. Tabangi sila nga makasabut nga mahisama sila sa Langitnong Amahan ug nga sila adunay importanting buhat nga himoon dinhi sa yuta. Mahimo nimong ipakigbahin kanila ang personal nga kasinatian nga nakatabang kanimo nga makahibalo nga ang Langitnong Amahan nakaila kanimo ug nahigugma kanimo.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

Ipakita ang mga litrato sa lain-laing mga tawo, o paghisgot og mga tawo nga nailhan sa mga bata, ug pangutan-a, “Kini bang tawhana anak sa Dios?” Pananglit, “Ang bishop ba anak sa Dios?” “Ang opisyal ba sa pulis anak sa Dios?” “Ang inyo bang silingan anak sa Dios?” ug uban pa. Tabangi ang mga bata nga makasabut nga ang tanan usa ka anak sa Dios.
Sa pagpasabut nga ang Langitnong Amahan nakaila ug nag-amuma sa matag anak, ipatiwas sa mga bata ang imong mga pulong, sama niining ehemplo: “Ang Langitnong Amahan nasayud nga ako masulub-on kon ,” “Ang Langitnong Amahan nasayud nga ako malipayon kon ako ,” “Ang Langitnong Amahan nasayud sa akong paboritong butang nga buhaton nga mao ang ,” “Ang Langitnong Amahan nasayud nga gusto kong mosulod sa Primary tungod kay _,” ug uban pa.
Ipasabut nga ang Langitnong Amahan mao ang hari sa iangit ug yuta. Tungod kay kita iyang mga anak, kita mga prinsipe ug mga prinsisa. Paghimo og simpol nga korona alang sa kada bata ug isulat ang mga pulong nga Ako anak sa Dios sa kada korona. Pakolori sa mga bata ang mga korona.
Uban sa mga bata, kantaha, o isulti ang mga pulong sa unang bersikulo sa “Ako Nasayud Akong Amahan Buhi” [“I Know My Father Lives”] (Mga Himno ug mga Awit sa mga Bata, p. 59).

Dugang nga mga Kalihokan alang sa Gagmay nga mga Bata

Pangutan-a ang mga bata sa paghunahuna og butang nga ilang nagustohan (makuha usab nimo kini nga impormasyon gikan sa ilang mga ginikanan). Pangutan-a ang matag bata unsa ang ilang gusto, ug sultihi siya nga ang Langitnong Amahan nasayud nga, sama niini nga ehemplo: “Ang Langitnong Amahan nasayud nga si Leah gusto sa mga iro.”
Tabangi ang mga bata nga mobuhat sa mga aksyon sa mosunod nga kalihokan ginamit ang bersikulo:

Kon kamo taas, taas kaayo (ipatuy-od ug ipataas ang mga bukton)

Adunay dapit sa simbahan alang kanimo

Kon kamo mubo, kaayo (tikuko),

Adunay dapit sa Simbahan alang nimo.

Taas (pang-unat),

Mubo (tikuko),

Taas (pang-unat),

Mubo (tikuko)—

Ang Langitnong Amahan nahigugma natong tanan.
Tabangi ang mga bata nga mohimo sa mga aksyon sa mosunod nga bersikulo samtang imong isulti ang mga pulong:

Ang gamayng bata nga si Moises

Ang gamayng bata nga si Moises diha sa usa ka sakayan (pinasawod nga kamot ug ibutang ang tudlo sa laing kamot diha niini).

Ang iyang mahigugmaong igsoong babaye nagtan-aw kaniya diha sa kasagbutan nga iyang gitagoan (milili agi sa mga tudlo sa kamot nga gibutang taliwala sa mga mata).

Usa ka adlaw niana usa ka prinsesa ang nakakita kaniya (tikubo, tan-aw sa ubos) ug mikugos kaniya sa iyang mga bukton (pagpakaaron-ingnon nga magkugos og bata);

Miingon siya, “Dad-on nako kining bataa ug bantayan nga dili maunsa” (pagpakaaron-ingnon nga mosayawsayaw sa bata diha sa mga bukton).

(Gikan sa Fascinating Finger Fun ni Eleanor Doan. © 1951. Gigamit pinaagi sa pagtugot.)