Leksyon 21

Ako Adunay mga Pagbati

Katuyoan

Aron sa pagtabang sa kada bata nga makasabut ug makaila sa mga pagbati ug makat-on sa mga paagi aron malipay.

Pagpangandam

1. Tun-i sa mainampoong paagi ang Lucas 15:11-32.

2. Mga materyal nga gikinahanglan:

   1. Usa ka Biblia.

   2. Hulagway sa Nagpahiyum/Nagmug-ot nga Nawong (tan-awa ang sumbanan sa katapusan sa leksyon).

   3. Tsok ug papas.

   4. Hulagway 1-45, Naghugas og mga Plato; hulagway 1-46, Mga Anak Naghatag og mga Bulak ngadto sa Inahan; hulagway 1-47, Mga Bata Nag-away; hulagway 1-48, Mga Bata Nagdula og mga Block; hulagway 1-49, Ang Mausikon nga Anak (Pakete sa mga Hulagway sa Ebanghelyo 220; 62155).

3. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Ipakita ang hulagway sa Nagpahiyum/Nagmug-ot nga Nawong. Kantaha o isulti ang mga pulong sa “Mga Pahiyum” [Smiles] (Songbook sa mga Bata, p. 128) sa pipila ka mga higayon uban sa mga bata. Hatagi ang pipila ka mga bata og oportunidad sa pagbali ngadto sa nagpahiyum o nagmug-ot nga nawong sa tukmang mga panahon.

Kon ikaw magmug-ot na,

Ay aw dugaya.

Kini dayon balihon

Kini ipahiyum.

Pagmug-ot makadaut.

Ipahiyum kini.

Kalibutan magmatahum

Kon mopahiyum.

Ang Atong mga Pagbati Makita sa Atong mga Nawong ug sa Atong mga Lihok

• Unsay inyong bation kon dunay pahiyum sa inyong nawong?

• Unsay inyong bation kon nagmug-ot ang inyong nawong?

Ipasabut nga ang mga tawo sa kasagaran makasulti kon unsay atong gibati pinaagi sa pagtan-aw sa atong mga nawong. Ipakita sa mga bata nganha kanimo ang ilang malipayong mga nawong.

Kalihokan

Pagdrowing og upat ka dagkong mga lingin diha sa pisara. Drowinga sa simpol nga mga hulagway aron sa paghimo sa mga nawong nga magpakita sa lainlaing mga emosyon: malipayon, magul-anon, masuk-anon, ug nahadlok (tan-awa ang gihulagway sa ubos). Samtang ang matag nawong gidrowing na, hangyoa ang mga bata sa paghulagway sa mga pagbati nga gipadayag diha sa nawong, ug dayon hangyoa sila sa paghimo sa ilang kaugalingong mga nawong nga malipayon, magul-anon, masuk-anon, ug nahadlok.

Kalihokan

• Unsa man ang makapahimo kaninyo nga mobati og kalipay?

• Unsa man ang makapahimo kaninyo nga mobati og kaguol?

• Unsa man ang makapahimo kaninyo nga mobati og kasuko?

• Unsa man ang makapahimo kaninyo nga mobati og kahadlok?

Ipakigbahin ngadto sa mga bata ang usa ka higayon sa dihang ikaw naguol, nasuko, o nahadlok ug sa usa ka higayon sa dihang ikaw nalipay.

Mahimo Natong Makat-unan ang Pagkontrolar sa Atong mga Pagbati

Ipasabut nga maayo man nga ipakita nato ang tanan sa lainlain natong mga pagbati, pero kinahanglan nato kining ipakita sa saktong mga paagi, ilabi na gyud kon kita nasuko.

Ipakita ang hulagway 1-47, Mga Bata nga Nag-away.

• Unsa kaha sa inyong hunahuna ang gibati niining mga bataa?

• Unsa kaha sa inyong hunahuna ang ilang gisulti sa usag usa?

• Unsa may kinahanglan ninyong buhaton kon kamo masuko?

Ipasabut nga bisan tuod nga mobati kita nga maayo gyung ipanghapak, isiyagit, o mopasakit sa usa ka tawo kon kita masuko, mahimo natong makat-unan ang pagpakita sa atong mga pagbati sa matinahuron ug sa mabination nga paagi. Kon kita manghapak o mosiyagit, ato lang bation nga mas nasuko, pero ang pagkamabination makatabang kanato nga mobati og mas maayo.

Kalihokan

Papulipuliha ang mga bata isip mao ang mga bata diha sa hulagway. Tabangi sila sa paghunahuna og mga butang nga mahimong masulti sa mga bata diha sa hulagway ngadto sa usag usa imbis nga magsiyagitanay o maghinapakay, sama sa “Mahimo bang ako na sad?” “Magpulihanay lang ‘ta,” “Maguol ko kon imo kong tawagon og bating mga ngalan,” o “Dili ko ganahan kon imo kanang buhaton.”

Ipakita ang hulagway 1-48, Mga Bata nga Nanagdula og mga Block. Ipasabut nga kining mga bataa maayo kaayong nag-ubang nagdula ug dunay malipayong mga nawong tungod kay sila nag-ambitanay ug mabinationg nagsultihanay ngadto sa usag usa.

Kalihokan

• Kinsa may makatabang kaninyo nga mobati og mas maayo kon kamo maguol, masuko, o mahadlok?

Ipasabut nga kon kita makigsulti sa atong mga inahan, mga amahan, ug sa uban nga naghigugma kanato, makatabang sila nato nga makasabut nganong atong gibati ang maong pagbati. Kon kita mag-ampo ngadto sa Langitnong Amahan, ang Espiritu Santo makatabang kanato nga mobati og mas maayo. Ang Espiritu Santo motabang kanato nga masayud kon unsay buhaton aron nga kita mahimong malipayon pag-usab.

Kalihokan

Pabaruga ang mga bata ug ipabuhat ang mosunod nga kalihokan ginamit ang bersikulo sa pipila ka mga higayon:

Ang Akong mga Pagbati

Usahay kon maguol kaayo ko (pakita og magul-anong nawong),

Akong mama mogakos nako. Dayon malipay na ko (gaksa ang kaugalingon ug pakita og malipayong nawong).

Usahay kon masuko kaayo ko (pakita og nasuko nga nawong),

Molakaw ko ug kang Papa makig-istorya ko (paglakaw-lakaw ug iyangu-yango ang ulo, nga daw nag-istorya).

Kon dunay makapahadlok nako (pakita og nahadlok nga nawong),

Mag-ampo ko aron mahupay ko (ikiyugpos ang mga bukton).

Dayon kon mogawas ko aron magdula para malingaw,

Magmalipayon ko kada adlaw (pakita og malipayong nawong).

Malipayon Kita Kon Motabang Kita sa Uban

Ipakita ang hulagway 1-46, Mga Anak Naghatag og mga Bulak ngadto sa Inahan.

• Unsa kaha sa inyong hunahuna ang gibati sa mga tawo nga naa niini nga hulagway?

• Ngano kaha sa inyong hunahuna nga mibati man sila niana?

• Unsa man ang inyong bation kon mohatag mo og butang sa usa ka tawo?

Ipakita ang hulagway 1-45, Naghugas og mga Plato.

• Unsa may gibuhat niining batang babaye?

• Unsa kaha sa inyong hunahuna ang gibati niining batang babaye nga naa sa hulagway? Ngano man?

• Unsa may inyong bation kon motabang mo sa usa ka tawo?

Kalihokan

Tabangi ang mga bata sa pagbuhat sa mosunod nga kalihokan ginamit ang bersikulo:

Ang Pagtabang Makapalipay Kanako

Ganahan kong motabang sa akong mama (pagpakaaron-ingnon nga magbutang og apron);

Daghan kaayo siyang kinahanglang pagabuhaton.

Sa pagtrapo sa mga plato ako motabang niya (pagpakaaron-ingnon nga magtrapo og mga plato)

Ug usab sa bata magpakaon (pakaaron-ingnon nga magpakaon sa bata).

Ganahan kong motabang sa akong papa (pagpakaaron-ingnon nga magsul-ob og mga gwantis para sa garden);

Daghan kaayo siyang kinahanglang buhaton (pakaaron-ingnon nga mamutol sa mga kahoy-kahoy o mangibut sa mga sagbut).

Diha sa garden ako motabang niya (pakaaron-ingnon nga mamu-bu sa mga tanom)

Hangtud mahuman ang iyang buluhaton.

Ang pagtabang makalipay kanako (tudlo ngadto sa nagpahiyum nga nawong).

Makapanindot kini sa akong pagbati (ibutang ang mga kamot diha sa mga isig ka abaga ug gaksa ang kaugalingon).

Kay kon motabang ko sa ubang tawo (ituyhad og maayo ang mga bukton),

Nagbuhat ko sa unsay kinahanglan kong buhaton (iyangu-yango ang ulo ug ikiyugpos ang mga bukton)!

Ang Langitnong Amahan ug si Jesus Gusto nga Kita Magmalipayon

Ipasabut nga ang Langitnong Amahan ug si Jesus gusto nga kita magmalipayon. Sila nasayud nga kita mahimong magmalipayon kon kita mobuhat sa unsay ilang gisulti nga atong buhaton.

Istorya

Ipakita ang hulagway 1-49, Ang Mausikon nga Anak, ug isaysay ang istorya nga makita diha sa Lucas 15:11-32. Ipasabut ang lainlaing mga pagbati nga gipadayag sa amahan ug sa iyang mga anak. Samtang ang matag pagbati mapadayag, mahimo nimong ipatudlo sa usa ka bata ang tukma nga nawong diha sa pisara. Pananglitan, mahimo kang moingon: Usa ka batang lalaki ang gustong mobiya sa iyang panimalay ug moadto sa usa ka layong dapit. Sa dihang mibiya na siya, ang iyang amahan naguol. Sa waia madugay, ang mga amigo sa batang lalaki mibiya kaniya. Naguol siya Sa wala madugay, wala na siyay kwarta. Siya nahadlok tungod kay gigutom na man siya ug walay tawo nga mihatag kaniya og pagkaon … ug dugang pa.

Istorya

• Unsa kaha sa inyong hunahuna ang gibati sa anak sa dihang mipauli na siya?

• Nganong naiipay man ang amahan sa dihang mibalik na ang iyang anak? (Tan-awa sa Lucas 15:24.)

• Ngano nga ang magulang nga igsoon nasuko man sa dihang ang iyang manghud mibalik? (Tan-awa sa Lucas 15:28-30.) Unsa man ang iyang mabuhat aron mahimong malipayon pag-usab?

Pagpamatuod

Pasaligi ang mga bata nga ang tanan mobati usahay og kalipay, kaguol, kasuko, o kahadlok. Kinahanglan kitang makat-on sa pagpakita niini nga mga pagbati sa sakto nga mga paagi. Pahinumdumi ang mga bata nga ang Langitnong Amahan ug si Jesus gusto nga kita magmalipayon. Sultihi ang mga bata kon unsa ang bation ninyong kalipay kon mobuhat kamo sa unsay gusto sa Langitnong Amahan ug ni Jesus nga atong buhaton.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

1. Pabaruga ang mga bata nga mag-alirong. Hangyoa sila nga tak-umon ang ilang mga ngabil ug dili mopahiyum. Dayon pagsugod og pahiyum libut sa nag-alirong pinaagi sa pagpahiyum ug sa pagsulti sa mosunod nga mga pulong: “Mohatag ko og pahiyum ngadto ni (ngalan sa bata).” Ang bata nga imong ginganlan kinahanglan mopahiyum karon ug mosubli sa hugpong sa mga pulong, nga mosingit sa ngalan sa sunod nga bata. Padayon hangtud nga ang tanang mga bata nga nag-alirong nagpahiyum na.

   Pahinumdumi ang mga bata nga kon mopahiyum kita sa ubang tawo, sa kasagaran mobalus sila og pahiyum. Lisud gyud nga maguol, masuko, o mahadlok kon kita magpahiyum.

2. Kantaha ang “Kon Kita Motabang” [When We’re Helping] (Songbook sa mga Bata, p. 108) o “Si Jesus Buot nga Ako ang Sunbeam alang Kaniya” [Jesus Wants Me for a Sunbeam] (Songbook sa mga Bata, p. 38).

3. Pahunahunaa ang mga bata og butang nga ilang mabuhat aron mahimong magmalipayon. Pag-itsa og usa ka beanbag o humok nga butang ngadto sa usa ka bata ug sulti og, “Si (ngalan sa bata) malipayon kon .” Pabutangi sa bata ang blangko og usa ka butang nga makapahimo niya nga malipayon ug dayon ipahatag og balik ang beanbag nganha kanimo. Padayon hangtud nga ang kada bata mahatagan og higayon sa pagbuhat sa ingon.

4. Isaysay ang usa ka istorya mahitungod sa usa ka bata kinsa nagbuhat og maayo nga butang ngadto sa iyang inahan, sama sa pagbuhat og usa ka buluhaton sa balay. Ang inahan wala mahibalo kon kinsa ang mitabang kaniya, mao nga iyang gipangutana ang kada bata sa pamilya kon kinsa ang mitabang niya. Sa dihang naabut na siya sa bata nga mipahigayon sa maayong buhat, nasayud kaniya. nga kini nga bata mao ang nagbuhat niadto tungod sa dakong pahiyum sa bata. Ang bata mibati nga malipayon tungod kay nakabuhat siya og butang nga maayo.

Dugang nga mga Kalihokan para sa mas Gagmayng mga Bata

1. Samtang nagsulti ka sa mosunod nga bersikulo, giyahi ang mga bata sa mga aksyon. Sublia kon gusto sa mga bata.

   Makahimo og Malipayong mga Adlaw

   Duha ka mga mata aron makakita og nindot nga mga butang nga buhaton (itudlo ang mga mata),

   Duha ka mga ngabil aron sa tibuok adlaw mopahiyum (pahiyum og dako).

   Duha ka mga dalunggan aron makadungog sa unsay gisulti sa uban (itapion ang mga kamot diha sa dalunggan),

   Duha ka mga kamot aron mohipos sa mga dulaan (pakaaron-ingnon nga mopunit og mga dulaan ug mohipos niini).

   Usa ka dila nga sa kada adlaw mamulong og mabinationg mga pulong (tudlo ngadto sa ba-ba),

   Usa ka kasingkasing nga sa pagtrabaho ug sa pagdula mahigugmaon (ipatong ang mga kamot diha sa kasingkasing).

   Duha ka mga tiil nga madasigong modagan (tudlo ngadto sa mga tiil)—

   Makahimo og malipayong mga adlaw sa tanan.

2. Kantaha ang “Kon Ikaw Malipayon” [If You’re Happy] (Songbook sa mga Bata, p. 125 ug himoa ang mga aksyon nga gipadayag sa mga pulong. Sublia uban sa dugang nga mga hugpong sa mga pulong sama niadtong gisugyot sa ubos sa pahina sa songbook.

3. Pahimoa ang mga bata og malipayon nga nawong, magul-anon nga nawong, masukanon nga nawong, ug gikapoy nga nawong. Ipasabut nga makasulti sila pinaagi sa mga pulong kon unsay ilang gibati imbis nga mohilak o magsaba-saba. Kon maghisgut kita bahin sa atong mga pagbati sa kasagaran mobati kita og mas nindot.