Makahimo Ko og Daghang mga Butang

Katuyoan

Aron sa pagtabang sa kada bata nga mahibalo nga isip mga anak sa Langitnong Amahan kada usa kanato makahimo og daghang mga butang.

Pagpangandam

Tun-i sa mainampoong paagi ang 1 Samuel 17.
Kontaka ang mga ginikanan sa kada bata diha sa klase aron mahibaloan ang usa ka butang nga mabuhat og maayo sa bata o gikat-unan niyang buhaton.
Pag-andam og mga piraso sa papel uban sa simpol nga mga instruksyon, sama sa pagpakpak sa mga kamot, pag-ihap hangtud sa tres, paglakaw libut sa kwarto, paglukso, pagdrowing og lingin (diha sa pisara o sa usa ka piraso nga papel), pagbarug ginamit ang usa lang ka tiil, pagkiyugpos sa mga bukton, o sa pagtudlo sa usa ka butang nga blue. Pagbaton og ingon ka daghang mga piraso sa papel nga dili mominus sa gidaghanon sa mga bata diha sa klase. Ilha ang mga bata diha sa imong klase nga dunay mga depekto, ug siguroha ang paglakip sa mga butang nga ilang mabuhat.
Isulat ang ngalan sa kada bata diha sa usa ka lahi nga piraso sa papel.
Mga materyal nga gikinahanglan:
1. Usa ka Biblia.
2. Usa ka gamay nga pasol (opsyonal; tan-awa sa leksyon 11).
3. Usa ka sudlanan nga mabutangan sa mga ngalan (opsyonal).
4. Hulagway 1-5, Pamilya nga dunay Batang Masuso (62307); hulagway 1-10, Pag-ampo sa Pamilya (62275); hulagway 1-38, Mga Bata nga Nagdula og Bola; hulagway 1-50, Kahibalo Kong Mag-ilis; hulagway 1-51, Usa ka Pamilya nga Manag-ubang Nagtrabaho (62313); hulagway 1-52, Si David Mipatay kang Goliath (Pakete sa mga Hulagway sa Ebanghelyo 112; 62073).
Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Pahinumdom ngadto sa titser: Magmabination ngadto sa mga pagbati ni bisan kinsang mga bata sa imong klase nga dunay mga depekto sa lawas. Pokus sa mga butang nga mabuhat sa ilang mga lawas, dili sa ilang mga depekto.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Pil-a ang mga papel nga may mga ngalan sa mga bata ug ibutang kini sa usa ka sudlanan o diha sa salug. Ipagamit sa usa ka bata ang pasol o ang iyang kamot aron sa pagkuha og usa sa mga papel. Hangyoa ang bata kansang ngalan maoy nabunutan sa pagbarug tapad nimo. Sultihi ang klase og butang nga maayong mahimo niining bataa o gikat-unan niyang buhaton. Sublia hangtud nga ang kada bata adunay higayon nga makapili og usa ka ngalan ug nakasulti ka og butang bahin sa kada bata. Pahalipayi ang mga bata sa unsay ilang mahimo ug sa gikat-unan nga buhaton.

Ang Atong mga Lawas Makahimo og Daghang mga Butang

Awit

Kantaha ang “Ako Anak sa Dios” [I Am a Child of God] (Songbook sa mga Bata, p. 2) uban sa mga bata.

Ako anak sa Dios,
Gipadala dinhi,
Panimalay, ginikanan,
Ako gihatagan.

Agaka ‘ko, tudloi ‘ko,
Unsay buhaton.
Nga makabalik ‘ko sa
Amahang Langitnon.

Awit

Kinsa man ang amahan sa inyong espiritu?
Kinsa man ang nagpadala kaninyo dinhi sa yuta aron makabaton og lawas?

Ribyuha uban sa mga bata nga ang Langitnong Amahan nagplano nga kita moanhi sa yuta aron makabaton og mga lawas. Ipasabut nga gusto niya nga kita makakat-on sa pagbuhat og daghang mga butang ginamit ang atong mga lawas ug gusto nga kita mogamit sa atong mga lawas sa sakto nga mga paagi aron kita mahimong mahisama kaniya.

Awit

Unsa man ang inyong mabuhat ginamit ang inyong mga kamot? inyong mga tiil? inyong ba-ba? inyong mga mata?

Ipakita ang hulagway 1-5, Pamilya nga dunay Batang Masuso.

Awit

Unsa kaha sa inyong hunahuna ang mabuhat niini nga batang masuso?

Ipangutana ang mosunod nga mga pangutana o susama nga mga pangutana aron mapasabut pag-ayo sa daghang mga butang nga nakat-unang buhaton sa mga bata sukad sa mga batang masuso pa sila.

Awit

Ang batang masuso makalakaw ba?
Ang batang masuso makasulti ba?
Ang batang masuso makapakaon ba sa iyang kaugalingon?
Ang batang masuso maka-ilis ba sa iyang kaugalingon?
Ang batang masuso makahimo ba og usa ka pagbalintong?
Ang batang masuso makakanta ba og mga awit?
Ang batang masuso makasakay ba sa traysikol?

Ipasabut nga ang mga bata nagtubo pa ug nga sila makakat-on ra sa pagbuhat og daghan pang mga butang. Sa tagsa-tagsa, ipakita ang mga hulagway 1-10, 1-38, 1-50, ug 1-51. Paguniti sa usa ka bata ang usa ka hulagway samtang ang ubang mga bata mopasabut kon unsay nahitabo diha sa hulagway. Human makabuhat ang mga bata, dayga sila sa mga butang nga ilang nailhan nga mabuhat sa atong mga lawas.

Kalihokan

Papilia ang kada bata og usa ka piraso nga papel nga may instruksyon nga nakasulat niini. Basaha og kusog ang instruksyon ug ipabuhat sa bata kon unsay gisulti niini. Papulipuliha ang kada bata.

Kalihokan

Unsa man ang inyong nakat-unang buhaton kamo?
Unsa man ang gusto ninyong makat-unang buhaton kon modako na kamo?

Sultihi ang mga bata nga ikaw mapasalamaton sa Langitnong Amahan nga duna kitay mga lawas nga makahimo og daghan kaayong mga butang.

Ang Langitnong Amahan Makatabang Kanato sa Paghimo og Daghang mga Butang

Sultihi ang mga bata nga usahay hangyoon kita sa pagbuhat og mga butang nga malisud.

Unsa man ang inyong nasulayan na nga lisud?
Kinsa man ang makatabang kanato aron makat-on sa pagbuhat niining mga butanga? (Mga ginikanan, mga igsoong lalaki ug babaye, mga titser.)
Kang kinsa kita makaampo alang sa panabang kon kinahanglan kitang mobuhat og butang nga lisud? (Langitnong Amahan.)

Ipasabut nga si Jesukristo makatabang usab kanato kon ang mga butang lisud buhaton.

Istorya

Ipakita ang hulagway 1-52, Si David Mipatay kang Goliath, ug isaysay ang istorya ni David ug ni Goliath, ingon nga makita diha sa 1 Samuel 17. Ipasabut nga si Jesus mitabang kang David sa pagbuhat og usa ka lisud nga butang.

Istorya

Kinsa man ang nanghadlok sa kasundalohan nga mga Israelite? (Tan-awa sa 1 Samuel 17:4-8.)
Kinsa man ang gisaligan ni David nga motabang kaniya? (Tan-awa sa 1 Samuel 17:37.)

Pagpamatuod

Ipadayag nga ikaw mapasalamaton kaayo sa Langitnong Amahan alang sa imong lawas ug sa daghang mga butang nga mabuhat niini. Awhaga ang mga bata sa paghangyo sa Langitnong Amahan sa pagtabang kanila sa paggamit sa ilang mga lawas sa pagbuhat og maayong mga butang.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

Uban sa mga bata, kantaha ang “Makalingaw nga Buhaton” [Fun to Do] (Songbook sa mga Bata, p. 129) ug buhata ang tukma nga mga aksyon. Pasugyota ang mga bata og mga aksyon alang sa dugang nga mga bersikulo.
Hatagi ang mga bata og papel ug mga krayola ug padrowinga ang kada bata og usa o daghan pang mga butang nga iyang mabuhat. Isulat ang Makahimo ko og daghang mga butang sa kada papel sa bata.
Tabangi ang mga bata nga makadesisyon kabahin sa butang nga ilang mahimo diha sa balay aron sa pagtabang sa usa ka tawo, sama sa pag-andam sa lamesa, pagsilhig sa salog, o pagpakaon sa binuhi. Pahinumdumi sila sa pagsulti sa ilang mga ginikanan mahitungod niini human sa Primary aron nga ang ilang mga ginikanan makatabang nila nga mahinumduman ang pagbuhat niini.
Sublia ang pipila ka angay nga mga kalihokan diha sa mga leksyon 16 hangtud sa 20.

Dugang nga mga Kalihokan para sa mas Gagmayng mga Bata

Pabaruga ang mga bata ug ipakanta ang mosunod nga mga pulong ngadto sa tuno sa “Kausa may Snowman” [Once There Was a Snowman] (Songbook sa mga Bata, p. 121). Paggamit og mga aksyon nga magpungko alang sa unang bersikulo ug mga aksyon nga maghiwatid alang sa ikaduhang bersikulo.

Kaniadto sa bata pa, bata,

Kaniadto ako gamay pa.

Karon ako dako, dako, dako,

Karon ako dako, taas na!

Pasultiha ang mga bata bahin sa mga butang nga ilang nakat-unang buhaton sukad pa sa ilang pagkabatang masuso.
Pagpakita og usa ka aksyon sama sa paglukso, pagpakpak, o paglayat, ug hangyoa ang mga bata sa paghingalan sa unsay imong gibuhat. Dayon ipabuhat sa mga bata ang samang aksyon. Hatagi ang kada bata og higayon sa pagpakita og usa ka aksyon. Ipasulti sa ubang mga bata kon unsa ang maong aksyon ug dayon ipasundog kini.