Nahisakop Ako sa usa ka Pamilya

Katuyoan

Aron sa pagtabang sa kada bata nga makasabut nga ang Langitnong Amahan nagplano alang sa kada usa kanato nga mahisakop sa usa ka pamilya nga nagkinahanglan ug naghigugma nato.

Pagpangandam

Tun-i sa mainampoong paagi ang Lucas 1:26-35.
Ilailaha ang mga pamilya sa mga bata diha sa imong klase ug pangandam sa paghisgot og butang nga positibo nga nahitabo sa kada usa, sama sa usa ka bag-o pang natawo nga bata, usa ka igsoong lalaki o babaye nga naa sa misyon, o usa ka outing sa pamilya.
Mga materyal nga gikinahanglan:
1. Usa ka Biblia.
2. Tsok ug papas.
3. Hulagway 1-5, Pamilya nga dunay Batang Masuso (62307); hulagway 1-7, Usa ka Mahigugmaon nga Pamilya; hulagway 1-16, Ang Pagkahimugso (Pakete sa mga Hulagway sa Ebanghelyo 201; 62495); hulagway 1-23, Usa ka Salag nga dunay mga Kuyabog; hulagway 1-51, Usa ka Pamilya nga Nagtinabangay sa Pagtrabaho (62313); hulagway 1-53, Kalingawan sa Pamilya (62384).
Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Pahinumdom ngadto sa titser: Magmabination ngadto sa mga kahimtang sa pamilya sa mga bata diha sa imong klase. Tabangi ang mga bata nga makasabut nga ang importanting butang mahitungod sa usa ka pamilya dili ang gidaghanon sa mga tawo diha sa pamilya, pero nga ang mga sakop sa pamilya naghigugmaay sa usag usa ug nag-atiman sa usag usa.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Ipakita ang hulagway 1-23, Usa ka Salag nga dunay mga Kuyabog. Pasultiha ang mga bata kabahin sa hulagway ug ipaila kanila ang mga langgam ug ang salag.

Pang-atensyon nga Kalihokan

Kinsa man ang naghimo sa salag alang sa mga kuyabog?
Ngano kaha nga ang mga kuyabog nagkinahanglan man og usa ka inahan ug amahan aron sa pag-atiman kanila? (Aron sa pagpakaon kanila, sa pagpabilin kanila nga mainitan, ug sa pagpanalipod kanila gikan sa peligro.)
Kon ang mga kuyabog magkadako na ug magkalig-on na, kinsa man ang motudlo nila sa paglupad?

Ipasabut nga ang mga kuyabog nahisakop sa usa ka pamilya nga motabang sa pag-atiman sa ilang mga panginahanglan.

Nahisakop Ko sa usa ka Pamilya

Kamo ba dunay usa ka pamilya?
Nganong nagkinahanglan man kamo og usa ka pamilya nga moatiman kaninyo?

Ipakita ang hulagway 1-5, Pamilya nga dunay Batang Masuso. Ribyuha kon giunsa sa Langitnong Amahan pagplano alang sa kada usa kanato nga moanhi sa yuta ug mahimong kabahin sa usa ka pamilya. Ipasabut nga kon ang usa ka batang masuso mahimugso, ang batang masuso dili makaatiman sa iyang kaugalingon. Ang batang masuso dili makakaon o makailis nga siya ra. Nagkinahanglan kini og usa ka pamilya nga moatiman niya.

Kinsa man ang nag-atiman kaninyo sa dihang nahimugso mo?
Unsa man ang pipila ka mga butang nga gibuhat sa inyong pamilya alang kaninyo sa dihang usa pa kamo ka batang masuso?
Unsa man ang pipila ka mga butang nga gibuhat sa inyong pamilya alang kaninyo karon?
Kinsa man ang nagplano alang kaninyo aron mahisakop sa usa ka pamilya?

Tabangi ang mga bata nga makasabut kon unsa ka malipayon ang ilang mga pamilya sa dihang sila nahimugso. Ipasabut og maayo kon unsa sila kamahal sa ilang mga ginikanan ug sa ubang mga sakop sa pamilya ug gusto nga sila magmalipayon.

Kanta

Tabangi ang mga bata nga mokanta o mosulti sa mga pulong sa “Ako Anak sa Dios” [I Am a Child of God] (Songbook sa mga Bata, p. 2).

Ako anak sa Dios,
Gipadala dinhi,
Panimalay, ginikanan,
Ako gihatagan.

Agaka ‘ko, tudloi ‘ko,
Unsay buhaton.
Nga makabalik ‘ko sa
Amahang Langitnon.

Ipakita ang hulagway 1-16, Ang Pagkahimugso, ug ipasabut nga si Jesus natawo sa usa ka pamilya sa dihang mianhi siya sa yuta (tan-awa sa Lucas 1:26-35).

Kanta

Kinsa man ang mga tawo nga naa niini nga hulagway?
Kinsa man ang inahan ni Jesus?
Kinsa man ang amahan ni Jesus? (Pahinumdumi ang mga bata nga ang Langitnong Amahan mao ang amahan ni Jesus; si Jose usa ka maayo nga tawo nga gipili sa Langitnong Amahan aron sa pag-atiman kang Maria ug ni Jesus.)
Unsa kaha sa inyong hunahuna ang gibati nila ni Maria ug Jose kabahin kang Jesus?
Unsa kaha sa inyong hunahuna ang gibuhat nila ni Maria ug Jose aron sa pag-atiman sa batang si Jesus?
Kinsa man ang nagplano alang ‘kang Jesus aron makabaton og usa ka pamilya nga mohigugma ug moatiman kaniya?

Ang Langitnong Amahan ug si Jesus Naghigugma sa Kada Pamilya

Ipakita ang hulagway 1-7, Usa ka Mahigugmaon nga Pamilya. Ipasabut nga ang pipila ka mga pamilya adunay usa ka inahan ug usa ka amahan, ug ang pipila ka mga pamilya dunay usa lang ka ginikanan. Ang pipila ka mga pamilya dunay usa ka apohan o laing tawo nga nagtabang sa pag-atiman sa mga bata. Ang pipila ka mga pamilya dunay daghang mga anak, samtang ang ubang mga pamilya dunay usa ra ka anak o walay mga anak. Tabangi ang mga bata nga makasabut nga ang kada pamilya managlahi ug ang Langitnong Amahan ug si Jesus naghigugma sa kada pamilya.

Kalihokan

Imbitara ang kada bata sa pagsulti kabahin sa iyang pamilya. Kausa lang sa usa ka higayon, tabangi ang kada bata sa pagdrowing og mga tukog nga naghulagway og mga tawo diha sa pisara aron sa pagrepresentar sa mga sakop sa iyang pamilya. Ipasulti og kusog sa bata ang ngalan sa kada sakop sa pamilya ug dayon ipaihap ang mga sakop sa pamilya. Kon mahuman na ang kada bata, ipaambit sa klase ang butang nga imong nahibaloan kabahin sa pamilya sa bata.

Ang Langitnong Amahan ug si Jesus Gusto nga ang mga Sakop sa Pamilya Mopakita og Gugma alang sa Usag Usa

Kanta

Tabangi ang mga bata sa pagkanta o sa pagsulti sa mga pulong sa “Malipayon nga Pamilya” [A Happy Family] (Songbook sa mga Bata, p. 104).

Gimahal ko si mama.
Gimahal namo’s papa;
Gimahal sab ‘mi niya,
Malipayon ang pamilya.

Kanta

Giunsa ninyo pagkahibalo nga ang inyong pamilya naghigugma kaninyo?
Unsa man ang inyong gibuhat aron sa pagpakita ngadto sa inyong mga sakop sa pamilya nga inyo silang gihigugma?

Ipakita ang hulagway 1-53, Kalingawan sa Pamilya.

Kanta

Kini ba usa ka malipayon nga pamilya? Giunsa man ninyo sa pagkahibalo?
Unsa man ang gusto ninyong buhaton sa inyong pamilya?
Kon ang kada usa mabination ngadto sa usag usa, unsa may inyong bation?

Ipakita ang hulagway 1-51, Usa ka Pamilya nga Manag-ubang Nagtrabaho.

Kanta

Unsa man ang gibuhat niini nga pamilya?
Unsa man ang inyong gibuhat aron sa pagtabang sa inyong pamilya?
Unsa man ang inyong bation kon motabang kamo sa mga sakop sa inyong pamilya?

Kalihokan

Pahunahunaa ang mga bata og lainlaing mga paagi nga ilang matabangan ang ilang mga pamilya sa balay, sama sa pagpunit sa ilang mga dulaan, pagpakigdula uban sa gamayng bata, o sa pagtabang sa paghugas sa mga plato. Ipabuhat sa mga bata ang ilang mga ideya. Awhaga ang mga bata sa pagtabang sa ilang mga pamilya nianang semanaha.

Pagpamatuod

Ipaambit ang imong mga pagbati sa pagpasalamat ngadto sa Langitnong Amahan alang sa mga panalangin nga mahimong kabahin sa usa ka pamilya.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

Kantaha pag-usab ang “Malipayon ang Pamilya” [A Happy Family], Pagpili og upat ka mga bata nga maoy magsilbing pamilya diha sa kanta. Pakupta sila og mga pahibalo aron sa pagpaila kon hain nga sakop sa pamilya ang girepresentar sa kada usa. Barug sa luyo sa upat ka mga bata ug itudlo ang tukmang ulo sa bata samtang ikaw nagkanta o nagsulti sa mga pulong uban sa mga bata. Sublia ang kanta, nga magtugot sa ubang mga bata nga magsilbi nga mga sakop sa pamilya. Padayon hangtud ang kada bata mahatagan og higayon.
Sultihi ang mga bata mahitungod sa mga panudlo ni Haring Benjamin ngadto sa mga pamilya, ingon nga makita diha sa Mosiah 4:14-15. Basaha og kusog ang katapusang katunga sa bersikulo 15. Pasugyuta ang mga bata og mga paagi diin ang mga sakop sa pamilya mahimong mohigugma ug moserbisyo sa usag usa.
Tabangi ang mga bata sa pagbuhat sa mosunod nga dula ginamit ang mga tudlo:

Ang Akong Pamilya

Nia ang akong gwapang mama (tudloa ang unang tudlo);

Nia ang akong taas nga papa (tudloa ang tunga-tungang tudlo).

Nia ang akong magulang nga babaye (tudloa ang tudlo para sa singsing),

Ug dili lang na kay mao ra.

Nia ang manghud nakong lalaki (tudloa ang kumingking),

Nga gamay pa kaayo.

Kinsa man kining laing tawo (tudloa ang kumagko)?

Siyempre kahibalo na mo nga ako kini.

Tan-awa, usa, duha tulo, upat, lima (hikapa ang kada tudlo samtang nag-ihap ka),

Mahimong usa ka nindot kaayo nga pamilya!

Tabangi ang kada bata sa pagpataas sa tukmang gidaghanon sa mga tudlo aron sa pagrepresentar sa gidaghanon sa mga tawo sa iyang pamilya (kon ang pamilya sa bata dunay sobra pa sa napulo ka mga tawo, patabanga ang laing bata). Tabangi ang kada bata sa pagsubli sa katapusang duha ka mga linya sa bersikulo, nga mag-ihap hangtud sa gidaghanon sa mga tawo sa iyang pamilya sa dili pa moingon og “makahimo og usa ka nindot kaayo nga pamilya!”

Dugang nga mga Kalihokan para sa mas Gagmayng mga Bata

Ipakita ang hulagway 1-23, Usa ka Salag nga dunay mga Kuyabog. Tabangi ang mga bata sa paghimo sa mga aksyon sa “Birds in the Tree” (Children’s Songbook, p. 241) samtang mokanta ka o mosulti sa mga pulong:

Makakita kita og gamayng salag (isawod og dungan ang mga kamot)

Diha sa mga sanga sa usa ka kahoy (ipataas ang mga bukton nga magporma og lingin ibabaw sa ulo).

Atong iphon ang mga itlog sa sulod;

Dunay usa, duha, tulo (ipataas ang usa, duha, ug tulo ka mga tudlo).

Ang inahan nga langgam naglumlum diha sa salag (isawod ang walang kamot, ibutang ang tuong kamot sa ibabaw)

Aron mapiso ang mga itlog, kanang tulo gyud (ipataas ang tulo ka mga tudlo).

Ang amahan nga langgam naglupad-lupad sa palibut (ilihok-lihok ang mga bukton sa porma nga maglupad)

Aron sa pagbantay sa iyang pamilya.
Isulti ang mga pulong sa “Here We Are Together” (Children’s Songbook, p. 261).

Kita nagkatigum, nagtigum, nagtigum;

Oh, kita nagkatigum dinhi’s pamilya.

Si papa ug mama ug ate ug kuya;

Oh, kita nagkatigum karong adlawa.
Tabangi ang mga bata sa pagbuhat sa mga aksyon sa mosunod nga bersikulo samtang imong isulti ang mga pulong:

Ang Akong Pamilya

Sama sa mga langgam sa taas sa kahoy (ikapakapa ang mga bukton sama sa mga pako),

Duna koy akong kaugalingong pamilya (tudloa ang kaugalingon).

Gipakaon ko nila (pakaaron-ingnon nga magkaon)

Ug gitudloan sa pagdula (lukso),

Aron ko luwas ug malipayon sa tibuok adlaw (pahiyum og dako).
Isulti ang mosunod nga mga pulong o kantaha kini sa bisan unsa ngatuno nga moangay:

Si Mama naghigugma kanimo, si Mama naghigugma kanimo.

Si Papa usab, si Papa usab.

Ang mga tawo sa imong pamilya, ang mga tawo sa imong pamilya,

Matinud-anong naghigugma kanimo matinud-anong naghigugma kanimo.