Leksyon 25

Gihigugma Nako ang Akong Tibuok Pamilya

Katuyoan

Aron sa pagtabang sa kada bata nga mobati og paghigugma alang sa tanang mga sakop sa pamilya.

Pagpangandam

1. Tun-i sa mainampoong paagi ang Lucas 1:36-44, 56.

2. Mga materyal nga gikinahanglan:

   1. Usa ka Biblia.

   2. Hulagway 1-7, Usa ka Mahigugmaon nga Pamilya; hulagway 1-18, Si Juan Bautista nga Nagbunyag kang Jesus (Pakete sa mga Hulagway sa Ebanghelyo 208; 62133); hulagway 1-54, Templo sa Salt Lake (Pakete sa mga Hulagway sa Ebanghelyo 502; 62433), o usa ka hulagway sa lokal nga templo.

3. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Kantaha ang “Malipayon ang Pamilya” [A Happy Family] (Songbook sa mga Bata, p. 104) uban sa mga bata.

Gimahal ko si mama.

Gimahal namo’s papa;

Gimahal sab ‘mi niya,

Malipayon ang pamilya.

Gimahal ko si ate.

Gimahal namo’s kuya;

Gimahal sab ‘mi niya,

Malipayon ang pamilya.

(Gikan sa Merrily We Sing, © 1948, 1975 sa Pioneer Music Press, Inc. [usa ka dibisyon sa Jackman Music]. Gigamit nga may pagtugot.)

Pasultiha ang mga bata kabahin sa unsay ilang gibuhat uban sa ilang mga pamilya sa miaging semana. Pahinganli sa kada bata ang usa sa iyang pamilya, sama sa papa, mama, igsoong lalaki, o igsoong babaye.

Pang-atensyon nga Kalihokan

• Kinsa pa man ang kabahin sa inyong pamilya?

Ang mga Apohan, mga lyaan, mga Uyoan, ug mga lg-agaw Importanting Kabahin sa Atong mga Pamilya

Ipakita ang hulagway 1-7, Usa ka Mahigugmaon nga Pamilya.

• Sa unsang paagi nga kini nga pamilya sama sa inyong pamilya?

• Sa unsang paagi nga kini nga pamilya lahi kay sa inyong pamilya?

• Hain ang lola ug lolo niini nga hulagway?

Ipasabut nga ang mga apohan mao ang mga ginikanan sa atong mga inahan ug mga amahan. Kitang tanan dunay mga apohan, bisan tuod nga usahay wala kaayo kita makaila kanila tungod kay namatay na sila o nagpuyo sila sa layo.

• Pila man kaninyo ang nakaila sa inyong mga apohan?

• Ang inyo bang mga apohan nagpuyo sa duol o sa layo?

• Unsa man ang ganahan ninyong buhaton uban kanila?

Kanta

Kantaha o isulti ang mga pulong sa unang duha ka mga bersikulo sa “Lola” [Grandmother] (Songbook sa mga Bata, p. “00” [200]), nga maggamit sa mosunod nga mga aksyon. Sublia kon gikagustohan, nga maggamit sa lolo agig hulip sa lola diha sa katapusang linya sa kada bersikulo.

Ikaw mohalok (ibutang ang mga tudlo sa mga ngabil; unya kuhaon kini).

Ikaw mogakos (gaksa ang kaugalingon).

Mopahiyum ka kanako (pahiyum).

Unta ang tanan nga bata (ituyhad og maayo ang mga bukton)

Adunay lola nga sama nimo (tudlo).

Ikaw mobasa (pakaaron-ingnon nga magkupot og libro).

Ikaw mokanta (bukha og maayo ang ba-ba nga daw nagkanta).

Gimahal mo gayud ako (isawod ang mga kamot diha sa ba-ba).

Unta ang tanan nga bata (ituyhad og maayo ang mga bukton)

Adunay lola nga sama nimo (tudlo).

Kanta

• Kinsa pa man ang naa sa inyong pamilya? (Mga iyaan, mga uyoan, ug mga ig-agaw.)

Ipasabut sa daklit kon sa unsa nga paagi nga ang mga iyaan, mga uyoan, ug mga ig-agaw dunay kalabutan (pananglitan, ang inyong uyoan mao ang igsoong lalaki sa inyong inahan o amahan). Pasultiha ang mga bata kabahin sa ilang mga iyaan, mga uyoan, ug mga ig-agaw.

Istorya

Ipakita ang Biblia ug pahinumdumi ang mga bata nga atong mabasa niini nga libro ang kinabuhi ni Jesus. Abliha ngadto sa Lucas 1:36-44, 56 ug ipasabut nga sa wala pa matawo si Jesus, si Maria mibisita sa iyang ig-agaw nga si Elisabet, kinsa nagpaabut usab nga manganak. Ang anak ni Elisabet ginganlan og Juan, ug siya ig-agaw ug amigo ni Jesus. Sa dihang sila si Juan ug Jesus midako na, gibunyagan ni Juan si Jesus. Ipakita ang hulagway 1-18, Si Juan Bautista Nagbunyag kang Jesus, ug ipatudlo sa mga bata sila si Jesus ug Juan.

Ang mga Sakop sa Pamilya maoy Atong Maayong mga Higala

Ipasabut nga ang tanang mga sakop sa atong pamilya mahimo natong maayong mga higala. Kon ikaw adunay usa ka paryente nga imong suod, sultihi ang mga bata kon unsay imong gibati kabahin niining tawhana.

• Nganong ganahan man kamo nga makig-uban sa inyong pamilya?

Kanta

Kantaha pag-usab ang “Malipayon ang Pamilya” [A Happy Family] uban sa mga bata. Niining higayona iapil ang mga bersikulo para sa iyaan, uyoan, ig-agaw, ug mga apohan.

Kanta

• Unsa man ang inyong gibuhat uban sa inyong mga iyaan, mga uyoan, mga ig-agaw, ug mga apohan?

Sultihi ang mga bata bahin sa usa ka reunion sa pamilya o sa laing higayon sa dihang ang inyong pamilya nagkapundok para sa usa ka espesyal nga okasyon. Pasultiha ang mga bata bahin sa mga salo-salo o mga pagbisita sa pamilya nga ilang mahinumduman.

Ipasabut nga ang Langitnong Amahan ug si Jesukristo nagplano para kanato nga makauban ang atong mga pamilya hangtud sa kahangturan. Ipakita ang hulagway 1-54, Templo sa Salt Lake, o usa ka hulagway sa lokal nga templo. Ipasabut sa daklit nga kon kita maminyo sa templo ug magpuyo nga matarung, makauban nato ang atong mga pamilya hangtud sa kahangturan.

Pagpamatuod

Sultihi ang mga bata bahin sa imong gugma alang sa imong mga sakop sa pamilya. Ipasabut og maayo nga ang atong mga pamilya usa ka panalangin ngari kanato. Awhaga ang mga bata nga mahimong mahigugmaon ug mabination ngadto sa ilang mga sakop sa pamilya.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

1. Uban sa pagtugot sa inyong presidente sa Primary, hangyoa ang usa ka apohan sa usa sa mga bata, o usa ka tawo sa inyong ward kinsa usa ka apohan, sa pagbisita sa klase. Pasultiha ngadto sa mga bata ang bisita bahin sa iyang gugma para sa mga apo. (O mahimo kang modapit og usa ka iyaan, uyoan, o ig-agaw sa usa sa mga bata aron sa pagsulti bahin sa gugma para sa tanang mga sakop sa pamilya.)

2. Pagdala og usa o daghan pang mga litrato sa imong pamilya, ilabi na kadtong naglakip sa mga apohan, mga iyaan, mga uyoan, o mga ig-agaw. Ipapangita sa mga bata kon asa ka ug si bisan kinsa nga ilang nailhan (sama sa imong kapikas o mga anak) diha sa mga litrato. Sultihi ang mga bata kabahin sa uban pang mga tawo nga naa diha sa mga litrato.

3. Hatagi ang kada bata og usa ka tag nga may ngalan sa usa ka sakop sa pamilya diha niini, sama sa “Inahan,” “Amahan,” “Igsoong Lalaki,” “Igsoong Babaye,” “Lola,” “Lolo,” “Uyoan,” “Iyaan,” o “Ig-agaw.” (Kon ikaw dunay gamay ra nga mga bata diha sa imong klase, gamita lang ang pipila niini nga mga ngalan; kon ikaw dunay daghang mga bata diha sa imong klase, sobra sa usa ka bata ang mahimong dunay pareho nga ngalan.) Paadtoa ang kada bata sa atubangan sa lawak samtang imong masulti ang ngalan diha sa iyang tag. Ipasabut nga ang mga pamilya importante ug gitunong nga mahimong magkauban. Paalironga ang mga bata ug magkinuptanay sa mga kamot. Hangyoa sila sa paghimo og pipila ka mga aksyon samtang nagkinuptanay sa mga kamot, sama sa paglubay-lubay sa ilang mga bukton, paglakaw diha sa lingin, ug sa pagkanta og “Malipayon ang Pamilya” [A Happy Family],

4. Padrowinga ang kada bata og usa ka hulagway sa iyang mga apohan o ubang mga paryente. Labeli ang hulagway og Ang Akong mga Apohan o bisan unsa nga tukma.

Dugang nga mga Kalihokan para sa mas Gagmayng mga Bata

1. Paghimo og usa ka kahon o bag nga dunay usa ka kasingkasing diha niini nga nagrepresentar sa gugma. Paggunting og simpol nga mga hulagway o mga drawing nga nagrepresentar sa labing duol ug extended nga mga sakop sa pamilya. Pangutan-a ang mga bata, “Kinsa man ang naghigugma kaninyo?” Sa pagtubag sa mga bata, ibutang ang tukma nga mga hulagway diha sa kahon o sa bag usa sa matag higayon. Kon ang tanang mga hulagway naa na sa kahon o sa bag, iisa kini ug sultihi ang mga bata, “Ang tanan niining mga tawhana naghigugma gyud og maayo kaninyo.”

2. Ibutang ang mga ginunting sa mga sakop sa pamilya (tan-awa sa kalihokan 1, sa ibabaw) diha sa lamesa o sa salug. Patalikura o papiyunga ang mga bata samtang imong gikuha ang usa ka ginunting. Ipatag-an sa mga bata kon si kinsa ang nawala. Sublia sa makadaghan sigun sa imong gusto. Ibutang og balik ang tanang mga ginunting ug sultihi ang mga bata nga ang Langitnong Amahan gusto nga ang mga pamilya magkauban og usab uban kaniya, nga walay usa nga mawala.

3. Kantaha ang “Kon Kita Motabang” [When We’re Helping] (Songbook sa mga Bata, p. 108), nga maggamit sa mga ngalan sa extended nga mga sakop sa pamilya agig hulip sa mama. Ipa -pantomime sa mga bata ang mga butang nga ilang mabuhat aron sa pagtabang niini nga mga sakop sa pamilya.