Leksyon 27

Makaampo Kita Isip usa ka Pamilya

Katuyoan

Aron sa pagtabang sa kada bata nga makasabut nga ang kanunay nga pag-ampo sa pamilya makatabang nga magpabilin ang usa ka pamilya nga duol ngadto sa Langitnong Amahan ug ngadto sa usag usa.

Pagpangandam

1. Tun-i sa mainampoong paagi ang Alma 34:19-27 ug 3 Nephi 18:17-21. Tan-awa usab sa Mga Baruganan sa Ebanghelyo (31110), kapitulo 8.

2. Mga materyal nga gikinahanglan:

   1. Usa ka Basahon ni Mormon.

   2. Ginunting 1-26, amahan; ginunting 1-27, inahan; ginunting 1-28, batan-ong babaye; ginunting 1-29, batan-ong lalaki nga naa sa pangmisyonaryong edad (ang susamang mga ginunting makita usab diha sa Primary Visual Aids Cutouts set 1).

   3. Hulagway 1-10, Pag-ampo sa Pamilya (62275); hulagway 1-15, Pagpanalangin sa Pagkaon; hulagway 1-44, Si Jesus Nagtudlo didto sa Kasadpang Katungang Bahin sa Kalibutan (Pakete sa mga Hulagway sa Ebanghelyo 316; 62380).

3. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Hangyoa ang mga bata sa pagsulti kabahin sa butang nga ilang gihimo uban sa ilang mga pamilya. Hatagi ang kada bata og kahigayunan nga makatubag. Dayon ipakita ang hulagway 1-10, Pag-ampo sa Pamilya.

Pang-atensyon nga Kalihokan

• Unsa man ang gibuhat niini nga pamilya?

Ipasabut nga kon mag-ampo kita isip usa ka pamilya, nagbuhat kita og butang nga gusto sa Langitnong Amahan ug ni Jesus nga atong buhaton. Ang pag-ampo isip usa ka pamilya maoy gitawag og pag-ampo sa pamilya.

Ang Langitnong Amahan ug si Jesukristo Gusto nga Kita Mag-ampo uban sa Atong mga Pamilya

Istorya

Ipakita ang hulagway 1-44, Si Jesus Nagtudlo didto sa Kasadpang Katungang Bahin sa Kalibutan. Isaysay ang kabahin sa pagbisita ni Jesukristo sa mga Nephite ug nagsugo kanila nga mag-ampo, ingon nga gihulagway diha sa 3 Nephi 18:17-21. Pakit-a ang mga bata sa Basahon ni Mormon ug basaha og kusog ang 3 Nephi 18:21. Tabangi ang mga bata nga makasabut nga si Jesus gusto nga kita mag-ampo uban sa atong mga pamilya. Sama nga ang mga bata nga mga Nephite napanalanginan pinaagi sa pag-ampo sa pamilya, busa kita usab mapanalanginan pinaagi sa pag-ampo sa pamilya.

Makahimo Kita og Pag-ampo sa Pamilya Kada Adlaw

Ipasabut nga ang Langitnong Amahan ug si Jesus gusto nga kita mag-ampo uban sa atong mga pamilya kada buntag ug kada gabii. Sa kasagaran ang amahan o ang usa ka tawo nga maoy gibilinan sa katungdanan diha sa pamilya mohangyo sa usa ka tawo sa pag-ampo. Bisan kinsa sa pamilya makahimo sa pag-ampo sa pamilya.

• Kanus-a man kita mag-ampo uban sa atong mga pamilya?

• Kinsa man ang makahimo sa pag-ampo sa pamilya?

Kanta

Kantaha o isulti ang mga pulong sa “Pag-ampo Alang sa Banay” [Family Prayer] {Songbook sa mga Bata, p. 101).

Magliyok ‘ta ug mangluhod

Pag-ampo sa banay

Ang Langitnong Amahan

Atong pasalamatan.

Kanta

• Unsa man ang atong isulti diha sa mga pag-ampo sa pamilya?

Ipasabut nga mosulti kita sa samang mga matang sa mga butang diha sa mga pag-ampo sa pamilya sama sa unsay atong gisulti sa atong kaugalingong mga pag-ampo sa buntag ug sa gabii. Pero diha sa pag-ampo sa pamilya mosulti kita kabahin sa mga butang nga may kalabutan sa tibuok pamilya, dili kay sa ato lang mga kaugalingon.

Kanta

Ribyuha ang mga butang nga atong gisulti samtang kita mag-ampo pinaagi sa pagsulti sa mga pulong sa ikaduhang bersikulo sa “I Pray in Faith” (Children’s Songbook, p. 14).

Magsugod ko pinaagi sa pag-ingon og “Mahal namong Langitnong Amahan”;

Magpasalamat ko kaniya sa mga panalangin nga iyang gipadala;

Dayon mapainubsanong mangayo kaniya sa mga butang nga akong gikinahanglan,

Sa pangalan ni Jesukristo, Amen.

(© 1987 ni Janice Kapp Perry. Gigamit nga may pagtugot.)

Kanta

• Unsa man ang atong isulti sa sinugdanan sa usa ka pag-ampo?

• Unsa man ang atong isulti sa katapusan sa usa ka pag-ampo?

• Unsa man ang buhaton sa uban samtang nag-ampo?

Ipasabut nga ang pag-ingon og “amen” sa katapusan sa usa ka pag-ampo nagpasabut nga miuyon kita sa unsay gipamulong diha sa pag-ampo.

Ipakita ang hulagway 1-15, Pagpanalangin sa Pagkaon. Ipasabut nga mag-ampo usab kita isip usa ka pamilya kon mangayo kita alang sa pagpanalangin sa atong pagkaon.

Kanta

• Unsa man ang atong isulti kon mangayo kita alang sa pagpanalangin sa pagkaon? (Magpasalamat kita sa Langitnong Amahan alang sa pagkaon ug mohangyo kaniya sa pagpanalangin niini.)

• Kinsa man ang makahimo sa pag-ampo aron sa paghangyo sa Langitnong Amahan sa pagpanalangin sa pagkaon?

Kanta

Isulti pag-usab ang mga pulong sa ikaduhang bersikulo sa “I Pray in Faith”.

Makadawat Kita og Daghang mga Panalangin pinaagi sa Pag-ampo nga Magkauban isip usa ka Pamilya

Istorya

Ginamit ang mga ginunting 1-26 hangtud 1-29, pagsaysay og usa ka istorya kabahin sa usa ka pamilya nga magkaubang nag-ampo alang sa usa ka sakop sa pamilya kinsa nagalagad og misyon. Mahimo nimong gamiton ang mosunod nga mga ideya:

Si Catherine usa ka batan-ong babaye. Gihigugma niya ang iyang pamilya ug nasayud nga sila naghigugma kaniya. Usahay ang iyang magulang nga igsoong lalaki nga si Paul mosaysay kaniya og mga istorya gikan sa Biblia ug sa Basahon ni Mormon. Si Paul nagtuon niini nga mga basahon tungod kay gusto niyang moadto sa misyon ug mosulti sa ubang mga tawo kabahin niini.

Usa ka adlaw niana si Paul nakadawat og sulat. Sa dihang iyang giablihan ang sulat, na-excited siya. “Moadto na ko sa misyon!” miingon siya. Pipila ka mga semana ang milabay, si Paul sa katapusan andam na nga molakaw. Sa wala pa siya mobiya, ang pamilya nangluhod alang sa pag-ampo sa pamilya. Ang amahan ni Catherine nagpasalamat sa Langitnong Amahan alang sa daghang mga panalangin nga nadawat sa ilang pamilya ug alang sa kahigayunan ni Paul nga makaadto sa misyon. Iyang gihangyo ang Langitnong Amahan sa pagpanalangin ni Paul, sa pagpabilin niya nga luwas, ug sa pagtabang niya nga mahimong maayo nga misyonaryo. Ang pag-ampo nakapahimo ni Catherine nga mobati og kalipay sa sulod niya. Nakahibalo siya nga ang Langitnong Amahan motabang ni Paul sa iyang misyon. Si Catherine ug ang iyang pamilya nag-ampo kada adlaw alang kang Paul samtang tua siya sa iyang misyon.

Ipasabut nga ang mga pamilya makahimo sa pag-ampo nga magkauban alang sa usa ka tawo nga nasakit, alang sa panabang kabahin sa problema sa pamilya, alang sa usa ka misyonaryo kinsa nanginahanglan sa tabang sa Langitnong Amahan, ug alang sa daghan pang mga hinungdan. Ipasabut nga mahimo kitang mag-ampo mahitungod sa bisan unsang butanga nga importante kanato. Gamita ang Alma 34:19-27 aron sa pagtabang sa mga bata nga makasabut kon kanus-a mag-ampo.

Usba pagbasa og kusog ang 3 Nephi 18:21. Pahinumdumi ang mga bata nga si Jesus misaad nga mapanalanginan kita kon kita dunay pag-ampo sa pamilya.

Pagpamatuod

Ipadayag ang imong pagpamatuod kabahin sa pag-ampo sa pamilya. Mahimong mosulti ka kabahin sa usa ka higayon sa dihang ang pag-ampo sa pamilya nakapalig-on sa imong kaugalingong pamilya.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

1. Himoa ang mosunod nga kalihokan ginamit ang bersikulo uban sa mga bata:

   Mao kini akong mama, kinsa motabang kanako sa pagdula (ipataas ang unang tudlo);

   Mao kini akong papa, kinsa nagtrabaho tibuok adlaw (ipataas ang ikaduhang tudlo).

   Mao kini akong kuya, nga kusgan kaayo ug taas kaayo (ipataas ang ikatulong tudlo);

   Mao kini akong ate, kinsa ganahang magdula og bola (ipataas ang ikaupat nga tudlo).

   Ug mao kini ako; malipayon kong mosulti (iisa ang kumagko)

   Ang among pamilya manag-ubang mangluhod aron mag-ampo (ikumo ang kamot).

2. litsa o itunol ang usa ka humok nga butang sama sa usa ka beanbag o bola ngadto sa mga bata, usa sa matag higayon. Human masalo sa mga bata ang butang, hangyoa sila sa paghingalan og butang nga makapasalamat sila sa Langitnong Amahan kon mohimo sila og usa ka pag-ampo sa pamilya. Human mahatagi ang kada bata og higayon, sublia ang kalihokan, nga ang mga bata maghingalan og mga butang nga makapasalamat nga ilang mapangayo sa Langitnong Amahan kon sila mohimo og usa ka pag-ampo sa pamilya.

3. Hatagi ang kada bata og usa ka piraso nga papel ug mga krayola o mga lapis. Padrowinga ang mga bata og mga hulagway sa ilang mga pamilya nga nag-ampo. Labeli ang kada hulagway og Malipayon ko kon ang akong pamilya magkaubang mag-ampo.

Dugang nga mga Kalihokan para sa mas Gagmayng mga Bata

1. Tabangi ang mga bata sa pagsubli niini nga bersikulo, sa kada linya:

   Gihigugma namo ang Langitnong Amahan;

   Pasalamatan namo siya kon mag-ampo kami.

   Naghigugma kanamo ang Langitnong Amahan;

   Maminaw siya sa mga butang nga among gisulti.

2. Isaysay ang usa ka istorya sa usa ka pamilya nga magkaubang mag-ampo ug nakadawat sa gikinahanglan nga panabang. Pananglitan, ang pamilya mahimong nasaag ug dayon nakakita sa ilang agianan; mahimong nawad-an sila og butang ug dayon nakit-an kini; o usa ka tawo sa pamilya mahimong nasakit ug dayon naayo. Isugyot nga agig dugang sa pag-ampo alang sa panabang, ang pamilya kinahanglang mahinumdom sa paghalad og mga pasalamat nga pag-ampo human makadawat sa tabang nga ilang gikinahanglan. Pahinumdumi ang mga bata nga ang Langitnong Amahan malipayon kon magpasalamat kita kaniya alang sa mga panalangin nga iyang gihatag kanato.

3. Kantaha o isulti ang mga pulong sa una ug sa ikatulo nga mga bersikulo sa “Salamat sa Atong Amahan” [Thanks to Our Father] (Songbooksa mga Bata, p. “OCT [20]).