Leksyon 28

Makahimo Ako nga Magmasulundon

Katuyoan

Aron sa pagtig-on sa tinguha sa kada bata sa pagsunod sa Langitnong Amahan ug ni Jesukristo ug sa pagsunod sa iyang mga ginikanan.

Pagpangandam

1. Tun-i sa mainampoong paagi ang Daniel 3; Juan 14:15; ug Mga Taga-Efeso 6:1. Tan-awa usab sa Mga Baruganan sa Ebanghelyo (31110), kapitulo 35.

2. Mga materyal nga gikinahanglan:

   1. Usa ka hugpong sa mga kasulatan.

   2. Hulagway 1-5, Pamilya nga dunay Batang Masuso (62307); hulagway 1-8, Pagpakalawat sa Sakrament (62021); hulagway 1-9, Pag-ampo sa Buntag (62310); hulagway 1-46, Mga Anak nga Naghatag sa Inahan og mga Bulak; hulagway 1-55, Wali sa Bukid (Pakete sa mga Hulagway sa Ebanghelyo 212; 62166); hulagway 1-56, Tub ka mga Lalaki sa sulod sa Nagdilaab nga Hudno (Pakete sa mga Hulagway sa Ebanghelyo 116; 62093).

3. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Hangyoa ang mga bata sa matinahurong paagi sa pagbuhat sa pipila ka mga aksyon, sama sa pagbarug, pagtuyok-tuyok, sa pagkab-ot sa taas, sa paghikap sa ilang mga tudlo sa tiil, ug sa paglingkod. Pasalamati sila sa pagbuhat sa unsay imong gipabuhat. Ipasabut nga sila nagmasulundon. Ilang gisunod ang imong mga instruksyon.

Ang Langitnong Amahan ug si Jesus Gusto nga Kita Mosunod sa Atong mga Ginikanan

Ipakita ang hulagway 1-5, Pamilya nga dunay Batang Masuso.

• Unsa man ang gipakita niini nga hulagway?

Itudlo ang batang masuso diha sa hulagway ug hisguti kon sa unsang paagiha nga ang kada usa kanato nakaanhi sa yuta isip usa ka batang masuso. Pahinumdumi ang mga bata nga tungod kay ang mga batang masuso gagmay pa man kaayo ug walay mahimo, nagkinahanglan sila og usa ka tawo nga mas edaran ug mas dako na aron sa pag-atiman kanila.

• Kinsa man ang nag-atiman kaninyo sa dihang usa pa kamo ka batang masuso?

• Kinsa man ang nag-atiman ninyo karon?

Ipasabut ngadto sa mga bata nga ang mga tawo nga nag-atiman kanila, sama sa ilang mga ginikanan ug uban pang mga sakop sa pamilya, naghigugma kanila ug gusto nga sila luwas ug malipayon.

• Unsa man ang gitudlo sa inyong mga ginikanan nga dili ninyo buhaton?

Hisguti ang mga butang nga malagmit buhaton sa mga bata nga makadaot nila o dili makahatag nila og kalipay, sama sa pagdula diha sa dalan, paghikap sa init nga stove, pagpunit og usa ka hait nga kutsilyo, pagdagan paubos sa usa ka bakiliron kaayo nga bungtod, o pagpakig-away sa ilang mga igsoong lalaki ug babaye.

• Ngano nga dili man gusto ang inyong mga ginikanan nga inyong buhaton kining mga butanga?

Hisguti ang mga butang nga mabuhat sa mga bata nga luwas ug malipayon, sama sa pagdula sa ilang mga dulaan, pagsuroy sa mga lugar uban sa ilang mga ginikanan, ug pagkabuotan ngadto sa ilang mga igsoong lalaki ug babaye.

• Nganong gitugutan man mo sa inyong mga ginikanan sa pagbuhat niining mga butanga?

• Nganong kinahanglan man ninyong sundon ang inyong mga ginikanan?

Ipasabut nga ang atong mga ginikanan naghigugma kanato ug gusto nga kita mobuhat sa mga butang nga makapabilin kanatong luwas ug malipayon.

Kalihokan

Pabaruga ang mga bata ug ipaaksyon ang mosunod nga bersikulo:

Ang akong mga tiil ganahang modagan (hilom nga modagan sa nahimutangan),

Ang akong mga kamot ganahang modula (ikitoy ang mga kamot),

Pero kon si Mama [o si Papa] moingon, “Duol” (ikamay ang kamot),

Dali kong motuman.

Kalihokan

• Unsa man ang inyong bation kon inyong sundon ang inyong mga ginikanan ug moduol kon sila motawag kaninyo?

• Unsa man ang inyong bation kon mobuhat mo og ubang mga butang nga gipabuhat sa inyong mga ginikanan kaninyo?

Ipasabut nga kon mosunod kita sa atong mga ginikanan, mobati kita nga malipayon. Ang atong mga ginikanan malipayon usab kon kita mosunod.

Sultihi ang mga bata nga ang Langitnong Amahan ug si Jesus gusto nga kita mosunod sa atong mga ginikanan. Basaha ug ipasabut ang Mga Taga-Efeso 6:1 ngadto sa mga bata.

Kanta

Kantaha o isulti ang mga pulong sa tanang tulo ka mga bersikulo sa “Dali Kong Motuman” [Quickly I’ll Obey] {Songbook sa mga Bata, p. 71).

Kon tawgon kong mama,

Daling motuman.

Buhaton ko ang maayo

Sa matag adlaw.

Kon tawgon kong papa,

Daling motuman.

Buhaton ko ang maayo

Sa matag adlaw.

Langitnong Amahan,

Gimahal ako.

Buhaton ko ang maayo

Sa matag adlaw.

Ang Langitnong Amahan ug si Jesus Gusto nga Kita Mosunod sa mga Sugo

Ipakita ang hulagway 1-55, Wali sa Bukid.

• Kinsa man ang naa niini nga hulagway?

Ipasabut nga sa dinhi pa si Jesus sa yuta, iyang gitudloan ang mga tawo kon unsay gusto sa Langitnong Amahan nga ilang buhaton. Kini nga mga pagtulun-an gitawag og mga sugo. Ipataas ang mga kasulatan. Sultihi ang mga bata nga ang mga sugo gisulat diha sa mga kasulatan.

Kalihokan

Ablihi ang imong Biblia ug basaha ang Juan 14:15. Ipasabut nga si Jesus maoy namulong niini nga mga pulong. Ipasubli sa mga bata ang kasulatan uban kanimo sa pipila ka higayon.

Kalihokan

• Unsa man ang pipila ka mga sugo nga gusto sa Langitnong Amahan ug ni Jesus nga atong sundon?

Maggamit sa mosunod nga mga hulagway, hisguti ang pipila ka mga sugo nga mahimong sundon sa mga bata:

Kalihokan

• Hulagway 1-5, Pamilya nga dunay Batang Masuso—higugmaon ang atong mga pamilya

• Hulagway 1-8, Pagpakalawat sa Sakrament—motambong sa mga miting sa Simbahan

• Hulagway 1-9, Pag-ampo sa Buntag—mag-ampo ngadto sa Langitnong Amahan

• Hulagway 1-46, Mga Anak nga Naghatag sa Inahan og mga Bulak—magmabination ngadto sa uban

Kalihokan

• Unsa man ang buhaton sa Langitnong Amahan kon mosunod kita sa iyang mga sugo?

Ang Langitnong Amahan Mopanalangin Kanato Kon Kita Mosunod

Istorya

Isaysay sa daklit ang istorya nila ni Sadrach, Mesach, ug Abed-nego, ingon nga makita diha sa Daniel 3. Iplastar ang hulagway 1-56, Tulo ka mga Lalaki sulod sa Nagdilaab nga Hudno, sa tukmang panahon. Ipasabut nga usa sa mga sugo sa Langitnong Amahan mao nga kita mag-ampo ngadto lamang kaniya. Dili kita mag-ampo sa ubang mga tawo o sa mga imahen, nga sama sa mga estatuwa. Ipasabut nga sila si Sadrach, Mesach, ug Abednego nasayud sa mga sugo sa Langitnong Amahan ug gusto nga mosunod niini. Ang Langitnong Amahan nanalipod niining mga tawhana gikan sa kalayo tungod kay sila nagsunod kaniya. Ang kalayo wala makasunog kanila.

Istorya

• Nganong wala man maunsa sa kalayo sila si Sadrach, Mesach, ug Abed-nego?

• Unsa kaha sa inyong hunahuna ang gibati nila ni Sadrach, Mesach, ug Abed-nego sa dihang ang Langitnong Amahan nanalipod kanila gikan sa kalayo?

Pagpamatuod

Ipadayag ang imong mga pagbati kabahin sa kaimportante sa pagsunod sa atong mga ginikanan ug sa Langitnong Amahan ug ni Jesus. Sultihi ang mga bata kon sa unsang paagi nga ang pagsunod sa mga sugo nakatabang kanimo nga magmalipayon.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

1. Kantaha o isulti ang mga pulong sa unang bersikulo sa “Sunda ang Sugo” [Keep the Commandments] (Songbook sa mga Bata, p. 68) o sa ikaduhang bersikulo sa “Ako Dunay Duha ka Gagmay nga Kamot” [I Have Two Little Hands] (Songbook sa mga Bata, p. 126).

2. Papulipuliha ang kada bata sa paghatag og pipila ka mga instruksyon ngadto sa klase, sama sa “barug” ug “ibutang ang inyong mga kamot sa inyong ulo.” Ipasunod sa ubang mga bata ang mga instruksyon.

3. Gamita ang pasol gikan sa leksyon 11 ug pag-andam og pipila ka isda nga papel nga maoy sulatan sa simpol nga mga instruksyon, sama sa “ikyugpos ang inyong mga bukton,” “sublia ang ‘miingon si Jesus, Kon nahigugma kamo kanako, inyong pagatumanon ang akong mga sugo,’” “hilom nga molakaw tuyok sa kwarto,” “pahiyum ngadto sa ubang mga bata,” ug “tabangi ang klase sa pagkanta sa ‘Ako Anak sa Dios.’” Hatagi ang kada bata og higayon sa pagsalo og isda nga papel ug sa pagsunod sa instruksyon nga gisulat diha sa isda.

4. Ribyuha ang istorya ni Noe, nga maghatag og gibug-aton nga si Noe ug ang iyang pamilya naluwas gikan sa lunop tungod kay nagsunod man sila sa mga sugo.

5. Hatagi ang kada bata og usa ka piraso nga papel nga imong gidrowingan og usa ka malipayon nga nawong ug gisulatan sa mga pulong nga Malipayon ako kon mosunod ako. Pakolori sa mga bata ang mga nawong.

Dugang nga mga Kalihokan para sa mas Gagmayng mga Bata

1. Tabangi ang mga bata sa pagbuhat sa mga aksyon sa mosunod nga dula nga gamitan og mga tudlo:

   Bisi nga gagmayng mga tudlo (ipataas ang usa ka kumo),

   Kinsa man ang motabang kanato aron nga motuman?

   “Ako.” “Ako.” “Ako.” “Ako.” “Ako” (ipataas ang usa ka tudlo sa kada “Ako” hangtud nga ang tanang mga tudlo mapataas),

   Ang bisi nga gagmayng mga tudlo miingon.

2. Pagdala og pipila ka mga aytem nga nagtanyag og proteksyon, sama sa mga sapatos, mga kalo, ug mga gwantis. Pangutan-a ang mga bata kon unsa nga matang sa proteksyon ang mahatag sa kada aytem (pananglitan, ang mga sapatos makaprotektar sa atong mga tiil; ang mga kalo makaprotektar sa atong mga ulo gikan sa katugnaw o sa atong mga mata gikan sa adlaw). Sultihi ang mga bata nga kon kita mosunod sa atong mga ginikanan, mapanalipdan usab kita. Hisguti ang pipila ka mga lagda ug sa unsa nga paagi kini makapanalipod kanato.

3. lisa ang imong mga kamot ug ipakita sa mga bata kon sa unsang paagiha nimo malihok ang imong mga tudlo. Ipaisa sa mga bata ang ilang mga kamot, ipalihok ang ilang mga tudlo, ug ipaabli ug ipakumo ang ilang mga kamot. Ipasabut nga atong malihok ang atong kaugalingong mga kamot ug mga tudlo, pero wala nay lain pa. Ipasabut nga mapasunod nato ang atong mga kamot kon ang usa ka tawo mohangyo kanato sa pagbuhat og usa ka butang. Ang pagbuhat niini makapahimo nato nga malipayon sa sulod.

4. Tabangi ang mga bata sa pagbuhat sa mga aksyon sa mosunod nga kalihokan ginamit ang bersikulo samtang nagsulti ka sa mga pulong:

   Ganahan Ko sa Akong mga Kamot

   Ganahan ko sa akong mga kamot; mga amigo ko sila (isikitang mga kamot diha sa atubangan ug tan-awa kini).

   Bisi sila ug matinabangon hangtud sa pagsalup sa adlaw (i-pantomime ang trabahong mabuhat sa mga kamot).

   Hilom silang makumkom (ikumkon ang mga kamot) o ipakpak og kusog (pakpak)!

   Kon makabuhat sila og unsay maayo, makapahimo sila kanakong mapagarbuhon!