Leksyon 29

Makasulti Ko og Pasayloa Ako

Katuyoan

Aron sa pagtabang sa kada bata nga makasabut nga kon magbuhat kita og butang nga sayop, kinahanglan kita nga mangayo og pasaylo ug maningkamot sa pagkorihir sa sayop nga butang nga atong nabuhat.

Pagpangandam

1. Tun-i sa mainampoong paagi ang Mosiah 27:8-37.

2. Mga materyal nga gikinahanglan:

   1. Usa ka Basahon ni Mormon.

   2. Usa ka gamay nga dulaan nga masulod ra sa bulsa.

3. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Sa pagsulod sa mga bata sa kwarto o sa pagpundok alang sa leksyon, tuyoa ang paghimo og mga sayop sa paghan-ay sa klasrom o sa pagpangandam alang sa leksyon. Mahimo kang—

Pang-atensyon nga Kalihokan

• Maghulog og butang sa salug.

• Magbutang og usa ka lingkuranan nga nag-atubang sa luyo.

• Magplastar og usa ka hulagway nga nagtuwad.

• Magsugod sa pagsulat diha sa pisara o sa usa ka piraso nga papel ug dayon papason kini o badlisan kini sa tunga.

Human sa kada sayop sulti og, “Pasayloa ko; nakahimo ko og sayop.” Dayon korhii ang sayop.

Pangutan-a ang mga bata kon nakabantay ba sila sa tanang mga sayop nga imong nahimo. Ipasabut nga ang tanan makahimo og mga sayop.

Usahay Makabuhat Kita og mga Butang nga Sayop

Ipasabut nga sa atong pagdako ug sa pagkat-on sa pagpili sa matarung, usahay makahimo kita og sayop nga mga pagpili. Dili lamang kini mga sayop sama sa pagbutang sa usa ka hulagway nga nagtuwad; kini mga panahon sa dihang nagbuhat kita og nga sayop, butang nga dili gusto sa Langitnong Amahan ug ni Jesus ug sa atong mga ginikanan nga atong buhaton. Pinaagi sa pagbuhat og sayop nga mga pagpili, mahimong dili kita magmalipayon ug ang ubang mga tawo.

Istorya

Isaysay ang mosunod nga istorya sa imong kaugalingong mga pulong, nga maggamit og usa ka gamayng dulaan aron sa paghulagway niini:

Sila si Travis ug Matt nalingaw og dula sa balay ni Matt. Si Travis ganahan sa mga dulaan ni Matt ug nangandoy nga iya na lang unta kini. Si Travis nakahukom sa pagpanghulam sa pipila ka mga dulaan, ug gibutang kini sulod sa iyang bulsa nga wala mananghid ni Matt.

Sa dihang nagdula si Travis sa mga dulaan didto sa ila, dili gyud kini makalingaw. Ang iyang inahan nangutana nganong dili man siya malipayon. Gisultihan ni Travis ang iyang inahan nga iyang gihulaman ang mga dulaan ni Matt nga wala mananghid ug nga karon wala siya malipay niini.

Ang inahan ni Travis miingon kaniya nga sayop ang manguha og butang nga gipanag-iya sa laing tawo. Iyang gipangutana si Travis kon unsay kinahanglan niyang buhaton aron sa pagkorihir sa iyang sayop nga pagpili. Gusto ni Travis nga iuli ang mga dulaan, pero nahadlok siya basin masuko niya si Matt. Ang inahan ni Travis miingon nga bisan tuod masuko si Matt, ang pag-uli sa mga dulaan mao ang saktong butang nga angayng buhaton. lya usab nga giingnan si Travis nga ang pagsulti ni Matt nga pasayloon siya makatabang nga mawala ang dili malipayong mga pagbati nga iyang gibati tungod sa pagbuhat og butang nga sayop.

Giuli ni Travis ang mga dulaan ngadto ni Matt. Nangayo siyag pasaylo sa pagkuha sa mga dulaan nga wala mananghid ug misaad nga dili na gayud mobuhat niini pag-usab. Nalipay si Matt nga giuli ni Travis ang mga dulaan. Si Travis nalipay nga nasulti niya ang tinuod ug nakahimo sa mga butang nga sakto (gikuha gikan sa Pat Graham, “Travis Repents,” Friend, Mar. 1987, pp. 40-41).

Istorya

• Unsa may nabuhat ni Travis nga sayop?

• Unsa man ang gibati ni Travis sa dihang gikuha niya ang mga dulaan ni Matt?

Ipasabut nga kon makabuhat kita og butang nga sayop, lain ang atong bation. Usa kini ka paagi nga mitabang ang Langitnong Amahan nga atong mahibaloan nga nakahimo kita og butang nga sayop.

Istorya

• Unsa man ang gibuhat ni Travis aron sa pagwagtang sa dili malipayon nga mga pagbati?

• Unsa man ang gibati ni Travis sa dihang iyang giuli ang mga dulaan ni Matt ug miingon nga nasubo siya?

Kinahanglang Mosulti Kita nga Nasubo Kita

• Unsa man ang inyong bation kon makabuhat mo og butang nga sayop?

• Unsa man ang inyong mahimo aron sa pagwagtang sa dili malipayon nga mga pagbati?

Tabangi ang mga bata nga makasabut nga kon mahibalo kita nga nakahimo kita og butang nga sayop, kinahanglan ato kining angkunon. Dayon kinahanglan kitang mosulti nga “Pasayloa ko.” Kinahanglan usab kita nga mosulay sa pagkorihir sa unsay atong sayop nga nabuhat ug mosaad nga dili na nato kini buhaton pag-usab.

Kalihokan

Pabaruga ang mga bata ug ipabuhat ang mosunod nga kalihokan ginamit ang bersikulo uban nimo:

Kon makabuhat ko og butang nga sayop (ikitoy ang tudlo sa isig ka kilid),

“Pasayloa ko,” moingon ko.

Mobati ko og hilabihan kaguol (bitara paubos ang isig ka kilid sa ba-ba ginamit ang kamot, nga maghimo og guol nga nawong)

Sa unsay akong nabuhat karon.

Mobuhat ko og mas maayo pa (ibutang ang mga kamot diha sa mga bat-ang ug iyanguyango ang ulo pataas ug paubos);

Maningkamot kong mobuhat kutob sa mahimo.

Magmalipayon ko (pahiyum)

Kon mobuhat ko sa unsay sakto (ikiyugpos ang mga bukton ug iyangu-yango ang ulo).

Kinahanglan Natong Buhaton ang Atong Pinakamaayo aron sa Pagkorihir sa Sayop

Istorya

Ipakita sa mga bata ang Basahon ni Mormon. Sultihi sila nga ang Basahon ni Mormon nagsaysay kabahin sa usa ka tawo nga nakahimo og butang nga sayop.

Ablihi ang Basahon ni Mormon ug isaysay ang istorya ni Alma, ingon nga makita diha sa Mosiah 27:8-37. Ipasabut nga si Alma dili maminaw sa iyang amahan. Iyang gisupak ang Langitnong Amahan ug si Jesus. Naghimo siya og daghang mga butang nga sayop. Iyang gisultihan ang mga tawo sa mga butang nga dili tinuod kabahin sa Simbahan. Daghang mga tawo ang mituo niya ug dili maminaw sa mga lider sa Simbahan.

Ipasabut nga si Alma nausab gikan sa pagbuhat og sayop nga mga butang ngadto sa pagbuhat og sakto nga mga butang. Naningkamot siya sa pagkorihir sa sayop nga mga butang nga iyang nahimo pinaagi sa pagtudlo sa mga tawo sa kamatuoran.

Istorya

• Unsa kaha sa inyong hunahuna ang gibati ni Alma sa dihang nakaamgo siya nga nagbuhat siya og sayop nga mga butang? (Tan-awa sa Mosiah 27:29.)

• Giunsa man ni Alma sa pagkorihir sa sayop nga mga butang nga iyang nabuhat? (Tan-awa sa Mosiah 27:32, 35-36.)

• Unsa kaha sa inyong hunahuna ang gibati ni Alma sa dihang nagsugod siya sa pagtudlo sa mga tawo sa kamatuoran?

• Kon makabuhat kamo og butang nga sayop, nganong kinahanglan man nga maningkamot kamo sa pagkorihir niini?

Ipakigbahin ang simpol nga personal nga kasinatian kabahin sa usa ka higayon sa dihang miingon ka nga nasubo ka. Sultihi ang mga bata kon unsay imong gibati ug giunsa nimo sa pagpaningkamot sa pagkorihir sa sayop nga butang nga imong nabuhat.

Ribyuha ang mga butang nga kinahanglan natong buhaton kon masayud kita nga nakabuhat kita og butang nga sayop:

Istorya

1. Angkonon nga nakabuhat kita og butang nga sayop.

2. Moingon nga “Pasayloa ko.”

3. Mosaad nga dili na kini buhaton pag-usab.

4. Mobuhat sa atong pinakamaayo aron sa pagkorihir sa unsay atong nabuhat nga sayop.

Ipasabut nga kining tanang mga lakang gitawag og paghinulsol. Ang Langitnong Amahan ug si Jesus malipayon kon maghinulsol kita sa sayop nga mga butang nga atong nabuhat.

Pahisguti sa mga bata kon unsaon nila sa pagsunod niini nga mga lakang sa paghinulsol diha sa mosunod nga mga sitwasyon:

Istorya

• Unsa man ang kinahanglan ninyong buhaton kon makakuha kamo og butang nga dili inyo?

• Unsa man ang kinahanglan ninyong buhaton kon nakasulti kamo og butang nga dili maayo ngadto sa usa ka tawo?

• Unsa man ang kinahanglan ninyong buhaton kon wala kamo mosulti sa tinuod ngadto sa inyong mga ginikanan?

• Unsa man ang kinahanglan ninyong buhaton kon nanukmod kamo og usa ka tawo?

Pagpamatuod

Ipadayag ang imong pagpamatuod nga ang Langitnong Amahan ug si Jesus naghigugma kanato bisan pa man kon nakabuhat kita og sayop nga mga butang. Sultihi ang mga bata nga nasayud ka nga sila magmalipayon kon sila mosulti nga sila nasubo tungod sa mga butang nga ilang nabuhat nga sayop ug kon maningkamot sila sa dili pagbuhat pag-usab sa sayop nga mga butang.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

1. Sangkapi ang kada bata og usa ka piraso nga clay o dulaanan nga dough. Pakit-a ang mga bata kon unsaon sa pagpigsat ang clay o dulaanan nga dough ngadto sa usa ka bola ug dayon sapyaon kini. Tabangi sila sa paghimo og mapahiyumong nawong ginamit ang clay o dulaanan nga dough aron sa pagpahinumdom nila nga kon sila moingon og “Pasayloa ko” mas nindot ang ilang bation. (Ang usa ka resipe sa dulaanan nga dough mahimong makita sa pahina xv niini nga manwal.)

2. Hatagi ang kada bata og usa ka piraso nga papel ug usa ka krayola o lapis. Padrowinga ang kada bata og usa ka mapahiyumong nawong. Labeli ang hulagway og Mahimo kong magmalipayon kon moingon ko nga pasayloa ko.

3. Kantaha o isulti ang mga pulong sa “Gusto Kong Sundon ang Ebanghelyo” [I Want to Live the Gospel] (Songbook sa mga Bata, p. 72).

Dugang nga mga Kalihokan para sa mas Gagmayng mga Bata

1. “Aksidenteng” iyabo ang usa ka kahon sa mga krayola o ubang gagmay nga mga butang diha sa salug. Sultihi ang mga bata nga nasubo ka nga imong napasad ang mga krayola, ug pangutana dayon kon unsay imong mabuhat aron mas mamaayo ang sitwasyon. Sa imong pagpanglimpyo, sultihi ang mga bata nga mas nindot ang imong bation kon ang salug hapsay ug limpyo na usab. Imbitara ang mga bata nga motabang nimo sa pagpanglimpyo.

   Ipasabut nga usahay makabuhat kita og mga butang nga makapahimo kanato ug sa ubang tawo nga mobati og kaguol. Kon mahitabo kini, kinahanglan kitang moingon og “Pasayloa ko” ug mosulay sa paghimo sa mga butang nga mas maayo. Pasalamati ang mga bata sa pagtabang kanimo og pagpanglimpyo, ug pahinumdumi sila nga mobati sila og kalipay kon motabang sila sa uban.

2. Kantaha o isulti ang mga pulong sa “Si Jesus Miingon Higugmaa ang Tanan” [Jesus Said Love Everyone] (Songbook sa mga Bata, p. 39).

3. Pasultiha ang mga bata og usa ka taas nga pulong, sama sa hippopotamus. Sultihi sila nga usahay lisud ang pagsulti og pipila ka mga pulong. Ipasabut nga mahimong lisud ang pagsulti og “Pasayloa ko” kon makabuhat kita og butang nga sayop. Ipasabut nga bisan tuod nga ang mga pulong nga “Pasayloa ko” lisud ilitok, makatabang kini sa paghimo sa magul-anong mga pagbati ngadto sa mas maayo nga mga pagbati.

4. Saysay og usa ka mubong istorya kabahin sa duha ka mga bata nga magkaubang nagdula. Sa dihang ang usa sa mga bata nakabangga sa usa, ang unang bata miingon og, “Pasayloa ko” ug naningkamot sa pagtabang sa nasakitang bata nga mobati og mas maayo. Ilakip ang ideya sa paghimo sa usa ka magul-anong pagbati ngadto sa malipayong pagbati. Mahimo nimong gamiton ang hulagway nga Nagpahiyum/Nagmugot nga Nawong gikan sa leksyon 21. Pakupti sa usa ka bata ang hulagway ug iatubang kini aron mapakita ang mga pagbati sa mga bata diha sa istorya.