Leksyon 2

Ang Langitnong Amahan Adunay Lawas

Katuyoan

Aron sa pagtabang sa kada bata nga makasabut nga ang Langitnong Amahan usa ka tinuod nga tawo, dunay perpekto nga lawas nga unod ug mga bukog, ug nga kita gilalang sumala sa iyang hitsura.

Pagpangandam

1. Tun-i sa mainampoong paagi ang Juan 14:9; Doktrina ug mga Pakigsaad 130:22; Moises 2:27; ug Joseph Smith—History 1:14-17. Tan-awa usab sa Mga Baruganan sa Ebanghelyo (31110), kapitulo 1.

2. Mga materyal nga gikinahanglan:

   1. Usa ka Biblia ug Perlas nga Labing Bililhon.

   2. Papel ug mga krayola alang sa matag bata.

   3. Usa ka gamay nga salamin.

   4. Hulagway 1-3, Jesus ang Kristo (Pakete sa mga Hulagway sa Ebanghelyo 240; 62572); hulagway 1-4, Ang Unang Panan-awon (Pakete sa mga Hulagway sa Ebanghelyo 403; 62470).

3. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Ipanghatag ang papel ug mga krayola, ug ipadrowing sa mga bata ang ilang mga kaugalingong panagway. Kon mahuman na sila, pagunite nila ang ilang mga litrato, ug pangutan-a sila kon hain ang tinuod, ang kanang anaa sa papel o ang naggunit sa mga papel. Pangutan-a sila giunsa nila sa pagkahibalo.

Ipasabut nga sama nga sila tinuod tungod kay aduna silay mga lawas, ang Langitnong Amahan tinuod ug siya adunay lawas. Atong makita ang mga hulagway sa Langitnong Amahan, pero dili kini tinuod nga Langitnong Amahan. Ang tinuod nga Langitnong Amahan adunay lawas nga unod ug mga bukog.

Si Jesukristo Parehog Hitsura sa Langitnong Amahan

Pangutan-a ang mga bata kon duna bay misulti nila nga ka parehog histsura sila sa ilang mga ginikanan. Ipakita ang litrato 1-3, Jesus ang Kristo, ug ipasabut nga si Jesukristo mao ang anak sa Langitnong Amahan. Ang mga kasulatan nagsulti kanato nga si Jesus ka parehog hitsura sa Langitnong Amahan. Ipakita ang Biblia ug ipasabut ang Juan 14:9 ngadto sa mga bata.

• Kinsa ang ka parehog hitsura ni Jesus?

Kalihokan

Pabaruga ang mga bata. Tabangi sila sa pagsag-ulo sa unang bahin sa unang artikulo sa hugot nga pagtuo: “Kita nagtuo sa Dios, ang Mahangturong Amahan, ug sa Iyang Anak, nga si Jesukristo.”

Pareho Kitag Hitsura sa Langitnong Amahan ug ni Jesus

Ipasabut nga kita espiritu nga mga anak sa Langitnong Amahan ug nga kita parehog hitsura niya. Duna kitay mga lawas pareho sa iyaha. Ipasabut ang Moises 2:27 ngadto sa mga bata. Ipasabut nga ang pagkalalang sa panagway sa Amahan nagpasabut nga pareho kitag hitsura kaniya.

Kalihokan

Papulipuliha ang mga bata sa pagtan-aw sa salamin o ngadto sa laing bata. Pahinganli sa kada bata ang parte sa lawas nga iyang makita, sama sa mga bukton, mga tiil, mga mata, o mga dalunggan. Ipasabut nga ang Langitnong Amahan ug si Jesus aduna usab niadtong mga parte sa lawas.

Kalihokan

• Aduna ba kamoy lawas nga parehog hitsura sa lawas sa Langitnong Amahan ug ni Jesus?

Ipasabut nga kita nasayud unsay hitsura sa Langitnong Amahan ug ni Jesus tungod kay ang ubang mga propeta (mga lider sa Simbahan) nakakita sa Langitnong Amahan ug ni Jesus ug misulat mahitungod kanila diha sa mga kasulatan.

Istorya

Ipakita ang hulagway 1-4, Ang Unang Panan-awon. Isaysay ang istorya sa Unang Pananawon, nga makita sa Joseph Smith—Kasaysayan 1:14-17.

Istorya

• Giunsa pagkahibalo ni Joseph Smith unsay hitsura sa Langitnong Amahan ug ni Jesus?

• Unsang matanga sa lawas ang anaa sa Langitnong Amahan ug ni Jesus?

Pagpamatuod

Ipamatuod kon unsa ikaw ka mapasalamaton nga dunay lawas nga gihimo sama sa hitsura sa Langitnong Amahan. Ipadayag ang pasalamat sa daghang nindot nga mga butang nga mahimo sa imong lawas.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

1. Pabaruga ang mga bata ug ipabalik-balik og sulti sa makadaghan ang mosunod nga kalihokan ginamit ang bersikulo, ginamit ang mga aksyon nga gihulagway:

   Aduna Akoy Talagsaon nga Lawas

   Aduna akoy talagsaon nga lawas (ibutang ang mga kamot sa dughan)

   Nga giplano sa Langitnong Amahan kanako.

   Gihatagan ko Niya ug mga dalunggan aron makadungog (pinasawod nga kamot ilibot sa dalunggan)

   Ug mga mata aron ako makakita (tudlo ngadto sa mga mata).

   Duna koy duha ka mga kamot nga akong mapakpak (ipakpak ang mga kamot),

   Duha ka mga tiil aron makatuyok (tuyok).

   Kon gusto ko, ako makahikap

   Sa akong mga kumagko sa tiil (tikubo ug hikapa ang mga kumagko sa tiil).

   Kon maghunahuna ko sa akong lawas (ibutang ang tudlo sa ulo),

   Ang pinakamaayong bahin niini (hilom nga molingkod)

   Nga ang Langitnong Amahan miplano niini

   Nga maparehog hitsura kaniya.

2. Tabangi ang mga bata sa pagkanta o sa pagsulti sa mga pulong sa “Mga Ulo, Abaga, Tuhod, ug mga tudlo sa Tiil” [“Head, Shoulders, Knees, and Toes”] (Songbook sa mga Bata, p. 129). Pahinumdumi ang mga bata nga ang Langitnong Amahan mihatag kanato og mga lawas sama sa iyaha ug nga kining nindot nga mga lawas makahimo og daghang mga butang.

3. Papuli-puliha ang mga bata sa paggamit sa hulagway 1-4, Ang Unang Panan-awon, sa pagsaysay sa istorya sa Unang Panan-awon ngadto sa uban sa klase.

4. Isaysay ang istorya ni Marc ug ang kalihokan sa pamilya:

   Namatay ang amahan ni Marc sa dihang batang masuso pa si Marc. Pirming maghunahuna si Marc kon unsay hitsura sa iyang amahan. Siya ug ang iyang inahan moadto sa kalihokan sa pamilya diin siya makigsulti sa iyang mga tiya ug mga tiyo nga nakaila pag-ayo sa iyang amahan.

   Sa ilang pag-abut, si Tiyo Joe misugat kanila. Mitan-aw siya ni Marc ug miingon, “Nakaila na ko nimo. Pareha kag mga mata sa imong papa.” Si Tiya Elizabeth miingon, “Kabalo ka Marc, duna kay ilong nga pareha sa imong papa.” Miingon si Tiya Mary, “Marc, ang imong pahiyum nagpahinumdom nako sa pahiyum sa imong papa.”

   Samtang nagdrayb sila pauli, giingnan ni Marc ang iyang mama, “Nalingaw ko karong adlawa! Nakahibalo ko og daghang mga butang bahin sa akong papa karon. Nahibaloan nako nga pareha kog hitsura niya, ug kana nakalipay kanako! Karon kon motan-aw ko sa salamin, mahinumdom ko unsay iyang hitsura, ug dili ko kalimot niya.” Mipaduol ang mama ni Marc, mihikap sa kamot ni Marc, ug miingon, “Kon ikauban tika, di sad ko kalimot niya.”

   Sultihi ang mga bata nga sama ni Marc nga nakahibalo nga pareho siyag hitsura sa iyang amahan bisan og wala niya kini makita, nasayud kita nga pareho kitag hitsura sa Langitnong Amahan bisan og dili kita makakita kaniya.

Dugang nga mga Kalihokan para sa Gagmayng mga Bata

1. Ipakita ang hulagway 1-4, Ang Unang Panan-awon. Isulti ang simpol nga bersyon sa istorya sa Unang Panan-awon. Ipasabut og maayo nga ang Langitnong Amahan ug si Jesukristo tinuod nga mga tawo ug nga sila maminaw sa atong mga pag-ampo.

2. Gamita ang hulagway 1-4, Ang Unang Panan-awon, aron sa pagpakita kon sa unsang paagi nga ang atong lawas sama sa mga lawas sa Langitnong Amahan ug ni Jesus. Samtang imong itudlo ang parte sa lawas diha sa litrato, ipatudlo sa mga bata ang maong parte sa ilang kaugalingong mga lawas. Pananglit, kon imong itudlo ang bukton sa Langitnong Amahan, ang mga bata kinahanglang motudlo sa ilang kaugalingong mga bukton.

3. Tabangi ang mga bata nga mohimo sa mga aksyon sa mosunod nga kalihokan ginamit ang bersikulo samtang imong isulti ang mga pulong:

   Si Joseph miluhod diha sa kakahoyan (luhod ug ikyugpos ang mga bukton)

   Ug nag-ampo og espesyal nga pag-ampo (hikapa ang mga ngabil sa tudlo).

   Nakakita siya sa Amahan ug sa Anak (hangad, ipandong ang mga kamot sa mata)

   Ug naminaw kanila didto (pinasawod nga kamot libot sa dalunggan).

4. Itudlo ang imong ba-ba ug sulti, “Mao kini ang akong ba-ba.” Dayon pangutana, “Mapakita ba ninyo nako ang inyong ba-ba?” ug tabangi ang mga bata nga motudlo sa ilang kaugalingong mga ba-ba. Pangutana, “Aduna bay ba-ba ang Langitnong Amahan?” Balika para sa mga mata, mga dalunggan, mga kamot, ug mga tiil. Dayon tudlo ngadto sa kada parte sa lawas nga dili mosulti sa pangalan niini, ug ang mga bata ang pasultia niini.