Mapasalamaton Ko sa Akong Panimalay

Katuyoan

Aron sa pag-awhag sa kada bata nga mobati og pasalamat alang sa iyang panimalay ug sa pagtabang sa pag-atiman niini.

Pagpangandam

Tun-i sa mainampoong paagi ang 1 Nephi 2:2-6; 17:7-8; ug 18:6, 23.
Mga materyal nga gikinahanglan:
1. Usa ka Basahon ni Mormon.
2. Usa ka sudlanan nga dunay tubig, usa ka sudlanan nga dunay yuta, ug usa ka gamayng sanga. Kon gusto nimo, pagdala og mga litrato sa usa ka linaw, yuta, o usa ka kahoy.
3. Papel ug mga krayola o mga lapis.
4. Hulagway 1-60, Si Lehi ug ang lyang mga Katawhan Miabut sa Gisaad nga Yuta (Pakete sa mga Hulagway sa Ebanghelyo 304; 62045); hulagway 1-61, Exodo gikan sa Nauvoo (Pakete sa mga Hulagway sa Ebanghelyo 410; 62493).
Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Ipakita ang sudlanan o litrato sa tubig ug pangutana kon unsa nga mga hayop o mga insekto ang nagpuyo diha sa tubig. Tabangi ang mga bata nga makahunahuna og daghan kutob sa mahimo. Ipakita ang yuta ug dayon ang sanga, ug tabangi ang mga bata sa paghunahuna og mga hayop o mga insekto nga naa magpuyo sa yuta ug diha sa mga kahoy.

Pang-atensyon nga Kalihokan

Unsa kaha sa inyong hunahuna ang mahitabo kon ang inyong panimalay naa sa tubig?
Unsa kaha ang mahitabo kon ang inyong panimalay anaa sa usa ka kahoy?

Anaay Daghang Nagkalainlaing mga Matang sa mga Panimalay

Ipasabut nga ang mga hayop ug ang mga insekto nagpuyo sa nagkalainlaing mga matang sa mga panimalay. Ang mga tawo usab nagpuyo sa nagkalainlaing mga matang sa mga panimalay.

Istorya

Ipakita ang hulagway 1-60, Si Lehi ug ang lyang mga Katawhan Miabut sa Gisaad nga Yuta, ug iplastar ang Basahon ni Mormon samtang naghisgut ka kabahin ni Lehi ug sa iyang pamilya ug sa mga matang sa mga panimalay nga ilang gipuy-an (tan-awa sa 1 Nephi 2:2-6; 17:7-8; ug 18:6, 23). Ang pamilya ni Lehi adunay komportable nga panimalay didto sa Jerusalem, pero sa dihang miingon ang Ginoo ngadto kanila nga mobiya sa Jerusalem, mipanaw sila didto sa disierto ug nagpuyo sa mga tolda. Paglabay sa daghang mga katuigan ang Ginoo mimando ni Nephi, ang anak ni Lehi, sa paghimo og barko. Si Lehi ug ang iyang pamilya nagpuyo sa barko samtang nagbiyahe sila ngadto sa gisaad nga yuta, usa ka dapit nga giandam sa Langitnong Amahan ug ni Jesus nga ilang kapuy-an. Sa pag-abut nila sa gisaad nga yuta, si Lehi ug ang iyang pamilya nagpuyo na usab sa mga tolda hangtud makatukod sila og mas permanenting mga panimalay.

Istorya

Unsa ang nagkalainlaing mga matang sa mga panimalay nga gipuy-an ni Lehi ug sa iyang pamilya?

Istorya

ipakita ang hulagway 1-61, Exodo gikan sa Nauvoo. Hisguti ang unang mga miyembro sa Simbahan kinsa nagtukod sa usa ka siyudad nga gitawag og Nauvoo. Nagkugi gyud sila og trabaho aron sa pagtukod sa ilang mga panimalay ug sa usa ka matahum nga templo. Pero ang pipila ka mga tawo nga naglibut sa Nauvoo wala ganahi sa mga miyembro sa Simbahan ug mipugos kanila nga mobiya. Ang mga miyembro sa Simbahan mipanaw nga nagdala lamang og mga butang nga ilang gipanag-iya nga igo rang masulod sa gitabunan nga mga karwahe. Tungod kay ang gitabunan nga mga karwahe gagmay ra man, daghan sa mga bata ang kinahanglang mobilin sa ilang mga dulaan. Ang pipila ka mga tawo nagpuyo sa ilang gitabunan nga mga karwahe ug diha sa mga tolda sulod sa taas nga panahon.

Istorya

Nganong lisud man ang pagpuyo diha sa gitabunan nga karwahe o sa tolda?

Kalihokan

Pabaruga ang mga bata ug ipabuhat ang mosunod nga bersikulo nga ginamitan og aksyon:

Ang mga batang pioneer nanglakaw ug nag-istoryahanay (lakaw sa nahimutangan); 
Dayon nagdula sila ug nanglukso ug nanglayat (lukso o layat diha sa nahimutangan). 
Sa dihang gabii na, ang mga bitoon mikislap-kislap ug midan-ag (isira o ibuka ang mga kamot); 
Sulod sa mga karwahe sila nangatulog ug nagdamgo (ipiyung ang mga mata, ihigda ang ulo diha sa mga kamot). 

Ang Panimalay maoy usa ka Dapit Diin Kita Gihigugma

Ipasabut nga ang klase sa balay nga atong gipuy-an dili maoy importante. Mahimong magpuyo kita sa usa ka dako nga balay, usa ka gamay nga balay, usa ka apartment, usa ka tolda, o usa ka sakayan. Ang importanting butang mao nga ang atong mga panimalay maoy mga dapit diin ang mga sakop sa pamilya maghigugmaay sa usag usa. Hisguti ang imong kaugalingong panimalay ug unsay imong gibuhat aron mahimo kining usa ka dapit sa paghigugma.

Nganong ganahan man kamong maanaa sa panimalay?
Giunsa man ninyo sa pagkahibalo nga ang inyong pamilya naghigugma kaninyo?
Nakatulog na ba kamo og usa ka gabii nga layo sa inyong panimalay?
Diin man kamo natulog?
Unsa man ang inyong gibati sa dihang nahibalik na kamo sa inyong kaugalingong panimalay?

Pahinumdumi ang mga bata kon unsa ka nindot nga mahibalik sa ilang kaugalingong mga panimalay ug mga higdaanan.

Kanta

Pabaruga ang mga bata ug papaminawa samtang nagsulti ka sa mga pulong sa “Home” (Children’s Songbook, p. 192). Sultihi ang mga bata sa paggakos sa ilang mga kaugalingon sa higayon nga makadungog sila sa pulong nga panimalay. Kon ganahan ka, sublia ang bersikulo ug pasultiha ang mga bata sa mga pulong nga dungan kanimo.

Ang panimalay maoy dapit kon asa ang kasingkasing
Ug kainit ug gugma anaa.
Ang panimalay maoy dapit kon asa ang mainiton, maagakong mga bukton
Manalipod sa tanang nagpuyo diha.

Makatabang Kita sa Atong mga Pamilya sa Pag-atiman sa Atong mga Panimalay

Ipasabut nga kinahanglan natong atimanon ang atong mga panimalay aron nga mamahimo kining nindot nga mga dapit nga kapuy-an. Ang kada sakop sa pamilya kinahanglang motabang nga mahimong hapsay ug limpyo ang panimalay.

Kalihokan

Ipa-pantomime sa mga bata ang mga butang nga ilang mabuhat sa pagtabang nga mahimong hapsay ug limpyo ang ilang mga panimalay, sama sa pagpunit sa ilang mga dulaan, pagpanilhig sa salug, ug sa pagpilo ug sa paghipos sa ilang mga sinina.

Tagsatagsaa pag-imbitar ang mga bata sa pagbarug tapad nimo. Ihulagway sa kada bata ang usa ka sitwasyon diin siya mahimong usa ka maayong katabang diha sa panimalay. Pangutan-a ang bata kon unsay iyang mabuhat aron sa pagtabang niana nga sitwasyon. Gamita ang mosunod nga mga ehemplo o paghimo og imong kaugalingong mga sitwasyon aron mahiangay sa mga sakop sa klase:

Kalihokan

Aksidente ninyong nayabo ang usa ka basong tubig diha sa salug. Unsa man ang inyong buhaton?
Nagdula kamo sa inyong mga block sa tibuok hapon. Karon oras na nga mokaon. Unsa man ang inyong buhaton sa inyong mga block?
Ang inyong mama nagdali-dali sa pag-andam sa panihapon diha sa lamesa. Nagkinahanglan siya og usa ka tawo nga maoy moandam sa lamesa sa dili pa mangaon ang pamilya. Unsa man ang mabuhat ninyo?
Ang inyong mga sinina nalabhan na ug hapsay nga pagkapilo. Unsa man ang inyong buhaton niini karon?
Nagdula kamo sa gawas ug ang inyong mga sapatos napuno sa lapok. Unsa man ang kinahanglan ninyong buhaton sa dili pa kamo mosulod sa balay?
Ang inyong higdaanan gubot kaayo sa pagbangon ninyo sa buntag. Unsa man ang kinahanglan ninyong buhaton niini?

Awhaga ang mga bata sa paghisgut kabahin sa mga butang nga ilang gibuhat aron sa pagtabang nga mahimong hapsay ug limpyo ang ilang mga panimalay. Sultihi ang mga bata kon giunsa nimo sa pagtrabaho aron mahimong hapsay ug limpyo ang imong panimalay.

Kalihokan

Hatagi ang mga bata og papel ug mga krayola o mga lapis ug padrowinga ang kada bata og usa ka hulagway sa butang nga iyang buhaton nianang semanaha sa pagtabang diha sa panimalay. Labeli ang kada hulagway og Mapasalamaton ko sa akong panimalay.

Pagpamatuod

Ipakigbahin ang imong mga pagbati kabahin sa imong panimalay ug ipadayag ang imong pasalamat ngadto sa Langitnong Amahan ug ni Jesukristo sa pagpanalangin kanimo og usa ka panimalay.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

Pagdala og pipila ka komon nga mga butang sa balay (dili mominus sa usa alang sa kada bata) sulod sa bag. Papilia ang kada bata og usa ka butang gikan sa bag ug ipasabut kon unsaon kini sa paggamit samtang nagtabang diha sa balay. Pananglitan, ang usa ka panapton mahimong gamiton sa pagtrapo sa abug o sa pagpauga sa mga plato, ang usa ka kutsara mahimong gamiton kon mag-andam sa lamesa alang sa pagpangaon, ug ang usa ka dulaan mahimong hipuson kon manglimpyo sa usa ka kwarto.
Kantaha o isulti ang mga pulong sa “Makalingaw nga Buhaton” [Fun to Do] (Songbook sa mga Bata, p. 129), nga maggamit sa mga hugpong sa mga pulong sama sa “Ang paghipos makalingaw” o “Ang pag-andam makalingaw” samtang mag -pantomime sa aksyon.
Palut-i ang mga kamot sa kada bata diha sa usa ka piraso sa papel aron dad-on sa balay. Labeli ang kada papel og Ako adunay matinabangon nga mga kamot. Hisguti kon unsay ikatabang sa mga kamot sa mga bata.
Papakaaron-ingna ang mga bata nga ang ilang mga lingkuranan mga karwahe nga gitabunan. Ipaguyod nila ang ilang mga lingkuranan ngadto sa usa ka lingin sama sa gibuhat sa mga pioneer atol sa gabii alang sa panalipod gikan sa dili mahigalaon nga mga tawo ug bangis nga mga hayop. Ipadrama nila ang paghimo og usa ka campfire ug ang pagluto og panihapon, pagkanta ug pagsayaw human sa panihapon, ug ang pagsaka ngadto sa ilang mga karwahe (mga lingkuranan) aron sa pagkatulog.
Pagdala og mga hulagway sa lainlaing mga klase sa mga panimalay, o pagdrowing niini diha sa pisara o diha sa usa ka piraso nga papel. Hisguti uban sa mga bata kon unsay gigamit sa pagtukod sa kada balay ug sama sa unsa kaha kon magpuyo diha niini. Mahimo nimong iapil ang usa ka tolda, usa ka igloo, usa ka kastilyo, usa ka balay-balay, usa ka balay nga gikarang.

Dugang nga mga Kalihokan para sa mas Gagmayng mga Bata

Kantaha o isulti ang mga pulong sa “Kon Kita Motabang” [When We’re Helping] (Songbook sa mga Bata, p. 108). Ipadrama sa mga bata ang mga butang nga ilang mabuhat sa pagtabang diha sa ilang mga panimalay.
Tabangi ang mga bata sa pagbuhat sa mga aksyon sa mosunod nga dula ginamit ang mga tudlo:

Bisi nga gagmayng mga tudlo (ipataas ang usa ka kumo),

Kinsa man ang motabang kanato nga makatuman?

“Ako.” “Ako.” “Ako.” “Ako.” “Ako” (ipataas ang usa ka tudlo sa kada “Ako” hangtud nga ang tanang mga tudlo mapataas),

Miingon ang bisi nga gagmayng mga tudlo.