Leksyon 32

Mapasalamaton Ko sa Pagkaon ug sa Sinina

Katuyoan

Aron sa pagtabang sa kada bata nga mobati ug mopadayag og pasalamat alang sa pagkaon ug sinina.

Pagpangandam

1. Tun-i sa mainampoong paagi ang Genesis 1:11–12 ug 1 Mga Hari 17:8–16.

2. Mga materyal nga gikinahanglan:

   1. Usa ka Biblia.

   2. Usa ka prutas o utanon nga dunay mga liso sulod niini.

   3. Usa ka beanbag o laing humok nga butang.

   4. Ginunting 1-5, isda; ginunting 1-7, baboy; ginunting 1-8, karnero; ginunting 1-9, baka; ginunting 1-22, mga manok (susamang mga ginunting mahimo usab nga makita diha sa Primary Visual Aids Cutouts set 4); o pangita og mga hulagway sa kahayupan nga makahatag og pagkaon ug sinina diha sa inyong lugar.

   5. Hulagway 1-15, Pagpanalangin sa Pagkaon; hulagway 1-50, Makahimo kong Mag-ilis.

3. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Ihatag ang mosunod nga mga instruksyon, nga magbutang og tubag sa mga blangko uban sa komon nga mga pagkaon sa pamahaw:

Kon ganahan kang mokaon og alang sa pamahaw, iisa ang usa ka kamot.

Kon ganahan kang mokaon og alang sa pamahaw, iisa ang laing kamot.

Kon ganahan kang mokaon og alang sa pamahaw, barug.

Padayon sa ubang mga aksyon hangtud nga imong nahinganlan ang dili mominus usa ka pagkaon nga ganahan sa kada bata. Sulti dayon og, “Kon mapasalamaton mo ngadto sa Langitnong Amahan alang sa pagkaon nga inyong gikaon, lingkod ug ikiyugpos ang inyong mga bukton.”

Atong Gigamit ang mga Tanom ug mga Hayop alang sa Pagkaon

• Unsa pa man nga mga pagkaon ang ganahan ninyong kaonon?

• Diin man nato gikuha ang atong pagkaon?

• Kinsa man ang nagbuhat sa mga tanom ug mga hayop diin diha nato gikuha ang pagkaon aron kaonon?

Hisguti ang pipila ka mga pagkaon nga imong gikaon ug diin kini gikan. Ipasabut nga nakakuha kita og daghang mga pagkaon gikan sa mga tanom.

Putla o pikasa ang prutas o utanon nga imong gidala ug itudlo ang mga liso.

• Unsa man kini?

• Nganong ang mga tanom duna may mga liso?

Ipasabut nga ang Langitnong Amahan nagplano nga ang mga tanom adunay mga liso aron nga ang mga liso mahimong motubo ngadto sa daghan pang mga tanom sa paghatag kanato og mga pagkaon (tan-awa sa Genesis 1:11-12). Kon ang usa ka tanom sama sa usa ka prutas o utanon motubo na, daghan pang mga liso ang maporma.

Kalihokan

Himoa ang mosunod nga kalihokan uban sa mga bata ginamit ang bersikulo:

Ang mga Liso Gilubong og Maayo

Ang mga liso gilubong og maayo (yuko ug hikapa ang salug sa imong mga kamot).

Diha sa yuta sila natulog (ipatong ang usa ka kamot ibabaw sa lain, nga ang mga palad nag-akub).

Ang adlaw hayag nga midan-ag (ibutang ang mga bukton ibabaw sa ulo aron makaporma og lingin).

Ang mga tinulo sa ulan hinayng nangatagak (ikitoy ang mga tudlo samtang kini nagpaubos).

Bugnaw’ng mga huyuhoy mihuyop (ilubay-lubay ang mga bukton sa ibabaw sa ulo).

Gagmayng mga liso misugod sa pagtubo (ikitoy ang mga tudlo pataas gikan sa salug).

Kalihokan

• Nakatabang na ba kamo og tanom og mga liso?

• Unsa man ang inyong gitanom?

• Unsa man nga mga pagkaon ang atong makuha gikan sa mga tanom?

Tabangi ang mga bata sa paghunahuna og pipila ka mga prutas, mga utanon, ug mga lugas. Ipasabut nga ang pan ug cereal ginama gikan sa mga lugas. Sultihi ang mga bata nga ikaw mapasalamaton sa Langitnong Amahan sa mga liso nga motubo ngadto sa mga prutas, mga utanon, ug mga lugas.

Ipakita pag-usab ang mga liso.

Kalihokan

• Unsa man ang gikinahanglan niini nga mga liso aron motubo?

Istorya

Isaysay ang istorya ni Elias ug sa biyuda sa Sarepta, nga makita sa 1 Mga Hari 17:8-16. Tabangi ang mga bata nga makasabut nga walay igong pagkaon didto tungod kay walay ulan. Kon wala ang ulan nga nagdala og tubig, walay pagkaon nga motubo.

Istorya

• Unsa man ang inyong bation kon kamo walay makaon nga pagkaon?

• Sa unsa man nga paagi nga ang biyuda napanalanginan tungod sa pagpakigbahin sa gamay nga pagkaon ngadto kang Elias? (Tan-awa sa 1 Mga Hari 17:15-16.)

Ipasabut nga dili tanan sa atong pagkaon nagagikan sa mga tanom.

Istorya

• Diin man nato gikuha ang gatas?

• Diin man nato gikuha ang mga itlog?

• Diin man nato gikuha ang karne?

Hisguti kon sa unsa nga paagi nga ang pipila ka pagkaon nagagikan sa mga hayop. Gamita ang tukmang mga ginunting o mga hulagway, hisguti ang mga hayop nga gigamit alang sa pagkaon diha sa inyong lugar.

Atong Gigamit ang mga Tanom ug mga Hayop alang sa Sinina

Ipasabut nga ang pagkaon dili lang maoy bugtong butang nga atong makuha gikan sa mga tanom ug mga hayop. Ipakita ang hulagway 1-50, Makahimo ako nga Mag-ilis.

• Unsa man ang gibuhat niini nga batang lalaki?

• Unsa man ang inyong isul-ob kon mag-ilis na mo?

Kalihokan

Ipa-pantomime sa mga bata ang pagsul-ob sa mga butang nga may kalabutan sa panaput sama sa usa ka kamisin, usa ka bistida, mga sapatos, usa ka kupo, ug usa ka kalo.

Kalihokan

• Nganong nagkinahanglan man kita og sinina? (Aron sa pagtabon sa atong mga lawas, sa pagpanalipod sa atong mga lawas, aron sa magpabilin kanato nga init kon tingtugnaw.)

• Unsa man ang gigamit sa paghimo og sinina?

Kon ang mga bata makahingalan og mga materyal nga gigamit sa paghimo og sinina, pangutan-a kon nahibalo ba sila kon asa gikan kadto nga mga materyal. Ipasabut nga atong gikuha ang mga materyal nga gigamit sa paghimo og sinina ug mga sapatos gikan sa mga tanom ug mga hayop. Sultihi ang mga bata kon unsa nga mga tanom o mga hayop nga nagsangkap og mga materyal nga komon kaayong gigamit alang sa paghimo og sinina diha sa inyong lugar. Panangiitan, ang cotton ug linen nagagikan sa mga tanom, ug ang sida nagagikan sa mga silkworm. Ang wool nagagikan sa karnero, ug kasagaran sa mga panit nagagikan sa mga baka.

Mahimo kitang magmapasaiamaton tungod sa pagkaon ug sinina

Kalihokan

Hangyoa ang mga bata sa paghunahuna og mga pagkaon nga sila nagmapasalamaton. litsa o itunol ang usa ka beanbag o humok nga butang ngadto sa kada bata, usa sa matag higayon. Pahinganla ang kada bata og usa ka pagkaon nga siya mapasalamaton ug dayon ipaitsa o ipatunol ang beanbag pabalik nimo. Hisguti kon asa gikan ang pagkaon nga gihinganlan sa dili pa iitsa ang beanbag ngadto sa sunod nga bata. Pahinumdumi ang mga bata nga ang kada tanom o hayop gilalang ni Jesus, ubos sa mando sa Langitnong Amahan.

Sublia ang kalihokan, nga mangutana sa kada bata sa paghingalan og usa ka butang nga may kalabutan sa sinina imbis sa usa ka pagkaon.

Ipakita ang hulagway 1-15, Pagpanalangin sa Pagkaon.

Kalihokan

• Kinsa ang angay natong pasalamatan alang sa atong pagkaon?

• Kinsa ang angay natong pasalamatan alang sa atong sinina?

• Unsaon man nato sa pagpasalamat ang Langitnong Amahan alang niining mga butanga? (Usa ka paagi mao ang paghisgut niini diha sa atong inadlaw nga mga pag-ampo.)

Pagpamatuod

Ipadayag ang imong pasalamat nga ang Langitnong Amahan ug si Jesus maoy mihimo nga kita makabaton og sinina nga masul-ob ug pagkaon nga kan-on.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

1. Hatagi ang kada bata og usa ka piraso nga papel nga dunay linya nga gidrowing diha sa tunga ug ang mga pulong nga Mapasalamaton ko alang sa: gisulat diha sa ibabaw. Padrowinga ang kada bata og usa ka hulagway sa pagkaon sa usa ka bahin sa linya ug butang nga may kalabutan sa sinina diha sa pikas bahin.

2. Tabangi ang mga bata sa pagkanta o sa pagsulti sa mga pulong sa unang duha ka mga bersikulo sa “Salamat sa Atong Amahan” [Thanks to Our Father] (Songbook sa mga Bata, p. 15).

3. Papakaaron-ingna ang mga bata nga sila mga liso. Palukoa sila sa ubos nga daw gitanom sila diha sa yuta, dayon pabaruga og hinay samtang ang adlaw nagdan-ag ug ang ulan hinay nga mibu-bu kanila. Mahimo nimong papulipulihon ang mga bata isip adlaw ug ulan.

4. Pagdala og usa ka prutas o utanon ug hatagi ang mga bata og gagmayng mga sample aron kan-on. Ihulagway ang matang sa liso ug tanom nga gigikanan sa prutas o utanon. (Susiha uban sa mga ginikanan sa bata aron sa pagsiguro nga walay bata nga allergic sa pagkaon nga imong gidala.)

5. Paghulagway og usa ka pamilyar nga pagkaon ngadto sa mga bata ug hangyoa sila sa pagtag-an kon unsa nga pagkaon ang imong gihulagway. Panangiitan, mahimo kang moingon nga, “Kini nga pagkaon puti o brown sa gawas. Kini dunay bayanan. Gipagawas kini diha sa usa ka sag. Unsa man kini?” (Usa ka itlog.) Sublia sa makadaghan kutob sa imong gusto. Mahimo kang magdala og ehemplo sa kada pagkaon nga imong gihulagway.

6. Pagdala og mga aytem nga may kalabutan sa sinina sama sa mga sweater, mga coat, ug mga kalo ug pasulaya ang mga bata sa pagsul-ob niini samtang naghisgut ka kabahin sa sinina nga gipasalamatan sa mga bata.

Dugang nga mga Kalihokan para sa mas Gagmayng mga Bata

1. Tabangi ang mga bata sa pagkanta o sa pagsulti sa mga pulong sa “Sa Kahimsog ug Kalig-on” [For Health and Strength] (Songbook sa mga Bata, p. 15).

2. lpa-pantomime sa mga bata ang pagsul-ob sa sinina samtang nagsulti ka sa mga pulong sa mosunod nga kalihokan nga ginamit ang bersikulo:

   Mga bata, isul-ob ang inyong karsones, karsones, karsones.

   Mga bata, isul-ob ang inyong karsones, usa, duha, tulo.

   Mga bata, isul-ob ang inyong sayal, sayal, sayal.

   Mga bata, isul-ob ang inyong sayal, usa, duha, tulo.

   Mga bata, isul-ob ang inyong sinina, sinina, sinina.

   Mga bata, isul-ob ang inyong sinina, usa, duha, tulo.

   Mga bata, isul-ob ang inyong medyas, medyas, medyas.

   Mga bata, isul-ob ang inyong medyas, usa, duha, tulo.

   Mga bata, isul-ob ang inyong sapatos, sapatos, sapatos.

   Mga bata, isul-ob ang inyong sapatos, usa, duha, tulo.

   Ang tanang mga bata nakasul-ob na, nakasul-ob na, nakasul-ob na (ipakpak ang mga kamot).

   Ang tanang mga bata nakasul-ob na; magdula na ‘ta!