Leksyon 33

Mahimo Akong Usa ka Higala

Katuyoan

Aron sa pagtabang sa kada bata nga magtinguha nga mahimong usa ka maayong higaia.

Pagpangandam

1. Tun-i sa mainampoong paagi ang Juan 6:1-13 ug 11:1-7, 17-44.

2. Mga materyal nga gikinahanglan:

   1. Usa ka Biblia.

   2. Hulagway 1-3, Si Jesus ang Kristo (Pakete sa mga Hulagway sa Ebanghelyo 240; 62572).

3. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Itudlo ang imong kaugalingon ug pangutana, “Kinsa man ko?” Ang mga bata mahimong motubag sa imong ngalan o sa pulong nga titser. Ipasabut nga ikaw ila usab nga higala, ug sila imong mga higala. Ipasabut nga ang mga higala mga tawo nga ganahan sa usag usa.

Pag-alirong uban sa mga bata. Magtan-aw usab sa kada bata, sulti og, “Si (ngalan sa bata) akong higala.” Papulipuliha ang kada bata sa pagbuhat niini, nga magsiguro nga ang matag bata gitawag kada higayon.

Kita Adunay Daghang mga Higala

• Kinsa man ang inyong mga higala?

Tuguti ang mga bata sa paghisgut kabahin sa ilang mga higala. Bisan unsa ang edad mahimong usa ka higala. Ang mga sakop sa pamilya mahimong pipila sa atong pinakasuod nga mga higala. Ipasabut og maayo nga ang kada tawo diha sa klase usa ka higala.

Ipakita ang hulagway 1-3, Si Jesus ang Kristo. Ipasabut nga ang tawo diha sa hulagway usa ka maayo kaayo nga higala sa kada usa diha sa klase.

• Kinsa man ang atong higala nga naa niini nga litrato?

• Giunsa man ninyo pagkahibalo nga si Jesus inyong higala?

Awit

Kantaha o isulti ang mga pulong sa “Si Jesus Atong Mahigugmaong Higala” [Jesus Is Our Loving Friend] (Songbook sa mga Bata, p. 37).

Si Jesus atong mahigugmaong higala.

Naa siya kanunay

Mogiya siya kanato kon mag-ampo ta;

Gihigugma ni Jesus ang tanang bata.

Istorya

Isaysay ang istorya ni Jesus nga mipabangon kang Lazaro gikan sa pagkamatay, ingon nga makita diha sa Juan 11:1-7, 17-44. Ipasabut og maayo nga si Lazaro ug ang iyang mga igsoong babaye mga higala ni Jesus. Sa dihang si Jesus didto sa Betania, miistar siya didto sa ilang panimalay ug nanihapon uban kanila.

Istorya

• Unsa man ang gibati ni Jesus mahitungod ni Lazaro? (Tan-awa sa Juan 11:3, 35-36.)

• Unsa man ang gibuhat ni Jesus alang kang Lazaro? (Tan-awa sa Juan 11:43-44.)

• Sa inyong hunahuna unsa kaha ang gibati nila ni Lazaro, Maria, ug Marta ngadto kang Jesus?

Mahimo Kitang Buotan nga mga Higala

• Unsaon man nato sa pagtratar ang atong mga higala?

Ipasabut nga kon buotan kita nga mga higala, motabang kita sa uban nga mobuhat og maayong mga butang. Magpakabana kita sa atong mga higala ug gustong mahimo silang malipayon. Hisguti ang kaimportante sa pagtratar sa uban sa paagi nga kita gustong trataron. Pangutana kon sa unsa nga paagi nga ang mga bata mahimong buotan nga mga higala sa mga sitwasyon sama niini:

• Ikaw ug ang usa ka higala nagdula, ug laing bata ang miabut ug gustong makigdula uban kaninyo.

• Usa ka bata ang mitungha sa klase sa unang higayon ug mibati og kaulaw o kahadlok.

• Usa ka bata ang gisungog ug lain ang gibati.

Awit

Kantaha o isulti ang mga pulong sa “Pagkamabination Magsugod Kanako” [Kindness Begins with Me] (Songbook sa mga Bata, p. 83).

Buot ko nga magmabination

Ngadto sa katawhan.

Ako miingon, “Hinumdumi:

Magmabination.”

Awit

• Unsa man ang inyong bation kon ang inyong mga higala mabination nganha kaninyo?

• Unsa kaha sa inyong hunahuna ang ilang bation kon mabination kamo ngadto kanila?

Tabangi ang mga bata nga makasabut nga kon gusto silang makabaton og mga higala, sila mismo kinahanglan gayud nga mahimong buotan nga mga higala.

Ang mga Higala Makigbahin sa Usag Usa

• Kon kamo nagdula og (ngalan sa usa ka dulaan o usa ka laing pihong butang), ug may usa ka higala nga moabut aron makigdula kaninyo, unsa man ang kinahanglan ninyong buhaton?

Ipasabut nga kon atong tugutan ang laing tawo nga makigdula kanato, o kon kita mohatag unsay ania kanato ngadto sa laing tawo, kita nakigbahin. Usahay dili nato mapikas ang unsay anaa kanato, mao nga makigpulipuli kita niini. Pakigbahin usab kini.

• Kon usa sa inyong mga higala gigutom ug kamo dunay pagkaon, unsa man ang kinahanglan ninyong buhaton?

Istorya

Ipakita ang Biblia ug isaysay ang istorya kabahin ni Jesus nga nagpakaon sa lima ka libo, ingon nga makita diha sa Juan 6:1-13. Ipasabut nga tungod kay ang usa ka batang lalaki mipakigbahin sa iyang pagkaon, si Jesus nakagamit sa iyang gahum sa paghimo og igong pagkaon aron ipakaon sa tanang mga tawo.

Pahinumdumi ang mga bata kabahin sa istorya ni Elias ug sa biyuda sa Sarepta (nga gisaysay diha sa leksyon 32). Ang biyuda napanalanginan tungod kay mipakigbahin siya sa iyang pagkaon bisan tuod kon gamay ra kaayo kini.

Istorya

• Unsa man ang atong ikapakigbahin ngadto sa atong mga higala?

• Unsa man ang atong ikapakigbahin ngadto sa atong mga pamilya?

Kanta

Pabaruga ang mga bata ug pakantaha sa “Makalingaw nga Buhaton” [Fun to Do] (Songbook sa mga Bata, p. 129), nga maggamit sa hugpong sa mga pulong nga “Pakigbahin sa akong (mga dulaan, libro, o bisan usang butanga nga masugyot sa mga bata) makalingaw.” Pahimoa ang mga bata og mga aksyon nga tukma sa mga pulong.

Pakigbahin makalingaw,

Makalingaw’ng buhaton!

Pakigbahin makalingaw’ng,

Buhaton, buhaton!

(© 1963 sa D. C. Heath and Company. Giimprinta pag-usab nga may pagtugot.)

Pahinumdumi ang mga bata nga ang mga higala magtinabangay sa usag usa, ug awhaga sila sa pagtabang sa pagpanglimpyo sa klasrom kon gikinahanglan.

Pagpamatuod

Hatag sa imong pagpamatuod bahin sa kaimportante sa pagka maayong higala. Mahimo kang mopaambit og personal nga kasinatian kabahin sa usa nimo ka higala. Pahinumdumi ang mga bata nga ang Langitnong Amahan ug si Jesus atong mga higala ug sila naghigugma kanato. Awhaga ang mga bata nga magmabination ngadto sa ilang mga higala niining semanaha.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

1. Kantaha o isulti ang mga pulong sa “Sama’s Gamayng Sapa” [’Give,’ Said the Little Stream] (Songbook sa mga Bata, p. 116), “Si Jesus Miingon Higugmaa ang Tanan” [Jesus Said Love Everyone] (Songbook sa mga Bata, p. 39).

2. Pabaruga ang mga bata ug ipabuhat ang bersikulo nga gamitan og aksyon nga “Minahal Nga Gamayng Higala”:

   Duna koy gimahal gyud nga gamayng higala (gaksa ang kaugalingon);

   Makita ko siya kada adlaw.

   Gihigugma ko ang akong mahigalaong gamayng higala.

   Ingon ani kon unsaon namo pagdula:

   Magdula ‘mi og mga monyeka (pakaaron-ingnon nga nagpakatulog og usa ka monyeka sa imong mga bukton);

   Maglabay-labay ‘mi sa among mga bola (pakaaron-ingnon nga naglabay og bola);

   Magmartsa ‘mi sama usab sa mga sundalo (pagmartsa sa hilom diha sa nahimutangan).

   Magdula ‘mi sa duyan (pakaaron-ingnon nga nagduyan);

   Mag-istoryahanay ‘mi ug manganta;

   Sama sa buhaton sa tanang buotang managhigala (ikiyugpos ang mga bukton ug iyangu-yango ang ulo).

3. Pagdala og gamayng makaon alang sa klase (tinoa uban sa mga ginikanan sa mga bata aron sa pagsiguro nga walay bata nga allergic sa makaon). Ibutang ang makaon sa lugar nga makita sa mga bata. Hisguti kon unsa ka nindot kining tan-awon ug pangutan-a ang mga bata kon ganahan ba sila nga mopaambit ka niini ngadto kanila. Pangutan-a ang mga bata kon unsay ilang bation kon imong ipaambit ang makaon ngadto lamang sa pipila kanila. Hisguti kon unsay bation sa uban kon dili sila maapil. Ipaambit ang makaon ngadto sa mga bata.

4. Padrowinga ang kada bata og usa ka hulagway sa iyang kaugalingon nga nakigbahin ngadto sa usa ka higala. Labeli ang kada hulagway og Makapaambit ko ngadto sa akong higala.

5. Isaysay ang mosunod nga tinuod nga istorya sa kaugalingon nimong mga pulong:

   Ang Sapatos nga Sinapinan og Tumbaga

   Sa dihang ang mga pioneer miabut aron manimuyo didto sa Utah, kasagaran kanila mga pobre. Ilang nagasto ang tanan nilang kwarta aron sa pagpalit og mga butang alang sa taas nga biyahe ug sa pagpalit sa mga himan nga ilang gikinahanglan aron sa pagtukod og mga balay ug sa pagpananom. Tungod kay ang mga tawo wala may daghang kwarta, daghang mga bata ang dunay usa ra ka parisan nga sapatos, nga ilang isul-ob ma-Dominggo. Sa kasagaran manglakaw sila nga magtiniil lang sa ubang mga adlaw sa semana.

   Usa ka pioneer nga batang babaye nga ginganlan og Melinda dunay usa ka parisan sa sapatos nga bug-at, bati, sinapinan og tumbaga nga iyang ginasul-ob atol sa tingtugnaw. Sa ting-init ang iyang pamilya mipalit niya og usa ka bag-ong parisan nga nindot, komportable nga sapatos nga pang-Dominggo, ug iya kining isul-ob sa usa ka parada.

   Ang pinakasuod nga amiga ni Melinda, nga si Amanda, wala gayuy sapatos. Si Melinda nalooy kang Amanda ug nananghid sa iyang inahan nga ipahulam niya ang usa ka parisan sa iyang sapatos ngadto ni Amanda aron masul-ob sa parada. Sa pagpunit ni Melinda sa iyang daan, bug-at, sinapinan og tumbaga nga sapatos aron dad-on ngadto sa iyang amiga, ang iyang inahan miingon, “Kon gusto kang mopakigbahin, kinahanglan nimong ihatag ang butang nga gusto nimong madawat mismo.”

   Naghunahuna og maayo si Melinda sulod sa pipila ka mga minuto. lyang gihunahuna kon unsa kaha ang buhaton ni Jesus. Naghunahuna siya kon unsa nga parisan sa sapatos ang iyang isul-ob, ug dayon nakahukom na siya. lyang gidala ang iyang bagong sapatos nga pang-Dominggo aron masul-ob sa iyang amiga, ug miadto siya sa parada nga nagsul-ob sa iyang daan, bati, ug sinapinan og tumbaga nga sapatos. Pero si Melinda mibati og tumang kalipay! Nahibalo siya nga nagpaambit siya sa gusto ni Jesus nga iyang buhaton.

Dugang nga mga Kalihokan para sa mas Gagmayng mga Bafa

1. Ihan-ay ang pipila ka mga dulaan nga madulaan sa mga bata. Hisguti ang kaimportante sa pag-ingon og “palihug” ug “salamat.” Awhaga ang mga bata sa pagpakigbahin sa mga dulaan kon magdula ug sa pagtabang sa usag usa sa pagpanghipus sa mga dulaan kon mahuman na sila sa pagdula.

2. Sa imong pagsulti sa mosunod nga bersikulo, pangulohi ang mga bata sa mga aksyon. Sublia kon gusto pa sa mga bata.

   Makahimo og Malipayong mga Adlaw

   Duha ka mga mata aron makakita og nindot nga mga butang nga buhaton (itudlo ang mga mata),

   Duha ka mga ngabil aron sa tibuok adlaw mopahiyum (pahiyum og dako).

   Duha ka mga dalunggan aron makadungog sa unsay gisulti sa uban (itapion ang mga kamot diha sa dalunggan),

   Duha ka mga kamot aron mohipos sa mga dulaan (pakaaron-ingnon nga mopunitog mga dulaan ug mohipos niini).

   Usa ka dila nga sa kada adlaw mamulong og mabinationg mga pulong (tudlo ngadto sa ba-ba),

   Usa ka kasingkasing nga sa pagtrabaho ug sa pagdula mahigugmaon (ipatong ang mga kamot diha sa kasingkasing).

   Duha ka mga tiil nga madasigong modagan (tudlo ngadto sa mga tiil)—

   Makahimo og malipayong mga adlaw sa tanan.

3. Kantaha o isulti ang mga pulong sa “Ako Dunay Duha ka Gagmay nga Kamot” [I Have Two Little Hands] (Songbook sa mga Bata, p. 126).