Mga Manwal sa Primary ug Panahon sa Pagpakigbahin

Leksyon 34: Makahimo Ko sa Paghigugma sa Uban

Leksyon 34

Makahimo Ko sa Paghigugma sa Uban

Katuyoan

Aron sa pag-awhag sa kada bata sa pagpadayag sa gugma alang sa uban pinaagi sa mabinationg mga pulong ug mga binuhatan.

Pagpangandam

Tun-i sa mainampoong paagi ang Mateo 7:12; Marcos 10:13-16; Lucas 10:30-37; ug Juan 13:34.
Ribyuha ang istorya gikan sa leksyon 19 kabahin ni Jesus nga miayo sa buta nga tawo (tan-awa sa Juan 9:1-7).
Paghimo og kasingkasing nga hinimo sa papel alang sa kada bata diha sa klase. Isulat ang Gihigugma ko ikaw diha sa matag kasingkasing.
Mga materyal nga gikinahanglan:
1. Usa ka Biblia.
2. Hulagway 1-3, Si Jesus ang Kristo (Pakete sa mga Hulagway sa Ebanghelyo 240; 62572); hulagway 1-43, Si Jesus nga Miayo sa Buta (Pakete sa mga Hulagway sa Ebanghelyo 213; 62145); hulagway 1 -48, Mga Bata nga Nagdula og mga Block: hulagway 1-62, Ang Maayong Samarianhon (Pakete sa mga Hulagway sa Ebanghelyo 218; 62156).
Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Ipakita ang hulagway 1-48, Mga Bata nga Nagdula og mga Block.

Pang-atensyon nga Kalihokan

Unsa man ang gibuhat niining mga bataa?
Sa inyong hunahuna managhigala ba kining mga bataa?
Unsaon man pagtratar sa mga managhigala ang usag usa?

Pahinumdumi ang mga bata nga ang mga managhigala motratar sa usag usa sa mabinationg paagi. Kon mabination kita ngadto sa uban, nagpakita kita og gugma ngadto kanila.

Kanta

Uban sa mga bata, kantaha o isulti ang mga pulong sa “Si Jesus Miingon Higugmaa ang Tanan” [Jesus Said Love Everyone] (Songbook sa mga Bata, p. 39), nga maggamit sa mga aksyon nga gipasabut sa ubos:

Higugmaa ang tanan (ituy-od og maayo ang mga bukton); 
Jesus miingon (iyangu-yango ang ulo). 
Kon puno ‘ta sa gugma (ipatong ang mga kamot sa kasingkasing), 
Mao sab sila (gaksa ang kaugalingon). 

Si Jesus Nagpakita og Gugma ngadto sa Uban pinaagi sa Pagkamabination

Ipakita ang hulagway 1-3, Si Jesus ang Kristo, ug sultihi ang mga bata nga si Jesus nagsulti kanato sa pagtratar sa uban sama sa unsay atong gusto sa uban nga motratar kanato. Ipakita ang Biblia ug basaha ang Mateo 7:12 hangtud sa inyo usab nga pagabuhaton ngadto kanila. Ipasabut nga kini nga kasulatan nagpasabut nga kon gusto nato nga ang uban magmabination ngari kanato, kinahanglan kitang magmabination ngadto kanila.

Istorya

Iplastar ang hulagway 1-43, Si Jesus nga Miayo sa Buta. Patabanga ang mga bata kanimo sa pagsaysay sa istorya nga gipakita sa hulagway (tan-awa sa Juan 9:1-7).

Istorya

Sa unsa nga paagi nga si Jesus nagmabination ngadto sa buta nga tawo?

Istorya

Isaysay ang istorya ni Jesus nga nanalangin sa gagmayng mga bata, ingon nga makita diha sa Marcos 10:13-16.

Istorya

Sa unsa nga paagi nga si Jesus nagmabination ngadto sa mga bata?

Ipasabut og maayo nga si Jesus migahin sa iyang kinabuhi sa pagtabang sa ubang mga tawo. Pinaagi sa pagkamabination, si Jesus nagpakita og gugma alang sa uban. Ipasabut nga si Jesus nagsugo kanato sa paghigugma sa usag usa. Basaha ang Juan 13:34 ngadto sa mga bata. Ipasubli sa mga bata ang “maghigugmaay kamo sa usag usa maingon nga ako nahigugma kaninyo” sa pipila ka mga higayon.

Kanta

Uban sa mga bata, kantaha o isulti ang mga pulong sa “Maghigugmaay sa Usag Usa” [Love One Another] (Songbook sa mga Bata, p. 74).

Maghigugmaay,
Sa usag usa.
Bag-o nga sugo:
Maghigugmaay.
Kamo nailhan
Nga akong tinun-an,
Kon kamo
Naghigugmaay.

Makapakita Kita og Gugma ngadto sa Uban pinaagi sa Pagka Mabination

Istorya

Ipakita ang hulagway 1-62, Ang Maayong Samarianhon, ug isaysay ang istorya kabahin sa maayong Samarianhon, ingon nga makita sa Lucas 10:30-37.

Istorya

Kinsa man ang mabination diha sa istorya?
Unsa man ang gibuhat sa Samarianhon aron sa pagtabang sa tawo kinsa nasakitan?

Tabangi ang mga bata nga makahunahuna og mga paagi nga mahimo silang mabination ngadto sa uban. Ipaambit ang ilang mga ideya ngadto sa ubang mga sakop sa klase.

Ipasabut nga usahay lisud ang mahimong mabination ngadto sa uban tungod kay kanang tawhana dili mahigalaon o lahi kay kanato. Tabangi ang mga bata nga makasabut nga ang kada usa kinahanglang trataron sa mabinationg paagi. Bisan tuod kon ang mga tawo daw dili mahigalaon o kon tan-awon lahi kay kanato (panangiitan, kon lain ang kolor sa ilang panit o may depekto), kinahanglan nato silang trataron sa mabinationg paagi.

Hisguti ang kaimportante sa pagpakita og gugma ug pagkamabination sa atong mga pamilya.

Istorya

Unsaon man ninyo sa pagpakita og gugma ngadto sa inyong amahan? ngadto sa inyong inahan? ngadto sa inyong mga igsoong lalaki ug babaye?

Ipasabut og maayo nga kon mabination kita sa atong mga pamilya, dili kay ato lang nga mga pamilya ang malipay, pero malipay usab ang Langitnong Amahan ug si Jesus.

Ipasabut nga usahay ang mga batang masuso o mas gagmayng mga bata mokuha o makaguba og mga butang nga atong gipanag-iya. Tabangi ang mga bata nga makasabut nga ang bata pa kaayong mga kabataan dili sa kanunay makasabut sa unsay ilang gibuhat. Kinahanglan nato silang trataron sa mabinationg paagi ug dili masuko ngadto kanila. Kon kita dunay mga butang nga mahimong mabuak, maningkamot kitang mopalayo niini aron dili nila makab-ot.

Istorya

Unsaon man nato sa pagpakita og gugma ngadto sa Langitnong Amahan ug ni Jesus?

Ipasabut og maayo nga makapakita kita og gugma ngadto sa Langitnong Amahan ug ni Jesus pinaagi sa pagsunod sa mga sugo, pinaagi sa pagbinuotan diha sa simbahan, ug pinaagi sa pagka mabination ug pagka matinabangon niadtong naa sa atong palibut.

Makapakita Kita og Gugma pinaagi sa Pagpamulong sa Mabinationg Paagi

Kalihokan

Hangyoa ang mga bata sa pagsunod sa mga instruksyon sa ubos. Human nga mabuhat sa mga bata ang kada aksyon, pasalamati sila sa pagsunod sa instruksyon.

Kalihokan

Palihug barug.
Panglingkod, palihug.
Palihug barug ug tuyok. Palihug lingkod. Barug pag-usab, palihug.
Ituy-od gyud ang inyong mga kamot ibabaw sa inyong ulo, palihug.
Palihug hilom nga manglingkod.

Kalihokan

Unsa man nga matinahuron, o mabination, nga mga pulong ang akong gisulti?
Unsa man ang inyong bation kon ang usa ka tawo moingon og “palihug” ug “salamat” nganha ninyo?

Tabangi ang mga bata nga makasabut nga kon gusto nato nga ang uban mosulti sa mabinationg paagi ngari kanato, kinahanglan kitang mosulti sa mabinationg paagi ngadto kanila.

Pahinumdumi ang mga bata sa uban pang matinahuron nga mga hugpong sa mga pulong, sama sa “Pasayloa ko” ug “Excuse me, palihug,” ug sa mga sitwasyon kon kanus-a kadtong mga hugpong sa mga pulong kinahanglang gamiton. Ipangutana ang mosunod nga mga pangutana o susama niini nga angay sa inyong kultura:

Kalihokan

Unsaon man ninyo sa pagpangayo og mainom nga tubig sa matinahurong paagi?
Unsay kinahanglan ninyong isulti kon dunay mohatag og regalo kaninyo?
Unsa man ang inyong isulti kon makapaguol kamo sa usa ka tawo?
Unsa man ang inyong isulti aron makuha ang atensyon sa usa ka tawo sa matinahurong paagi?

Ipasabut nga bisan tuod kon ang uban usahay mosulti ngari kanato sa dili mabinationg paagi, kinahanglan gihapon kitang mosulti sa mabinationg paagi ngadto kanila.

Kanta

Kantaha pag-usab ang “Si Jesus Miingon Higugmaa ang Tanan” [Jesus Said Love Everyone].

Pagpamatuod

Dayga ang mga bata sa imong naobserbahan kanila. Ipasabut nga tungod kay ang Langitnong Amahan ug si Jesus naghigugma sa kada usa, mahimuot sila kon ila kitang makita nga nagmabination ngadto sa usag usa. Ipamatuod nga ang Langitnong Amahan ug si Jesus gusto nga kita magmabination. Hatagi ang kada bata og usa ka papel nga kasingkasing. Sultihi sila kon unsay gisulti sa mga pulong diha sa mga kasingkasing, ug ipadayag ang imong gugma alang sa mga bata.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

Basaha ang mosunod nga mga ehemplo (o paghimo og pipila nga imong kaugalingong hinimo), ug ipaisa sa mga bata ang ilang mga papel nga kasingkasing kon ang aksyon nga gihulagway mabination o nagpakita og gugma. Pakupti nila ang ilang mga kasingkasing diha sa ilang mga paa kon ang aksyon dili mabination ug wala magpakita og gugma.
- Magpulipuli kon magdula.
- Pagka saputon.
- Motabang sa usa ka bata nga nasakitan.
- Manumbag sa usa ka tawo nga nagpalagot kaninyo.
- Maglakaw nga magbinuotan diha sa meetinghouse.
- Mosulti og “palihug” ug “salamat”.
- Moabli sa usa ka pultahan alang sa usa ka tawo.
- Magsaba-saba diha sa simbahan.
- Motabang sa pagpanglimpyo.
Pahinumdumi ang mga bata nga kon kita mabination ngadto sa uban, nagpakita kita og gugma, ug ang Langitnong Amahan ug si Jesus malipay kanato.
Paghunahuna og pipila ka pamilyar nga mga sitwasyon diin ang mga bata adunay oportunidad nga mahimong mabination ug sa pagpakita og gugma alang sa uban. Isulat kining mga sitwasyona diha sa mga piraso nga papel ug papilia ang kada bata og usa ka piraso nga papel. Basaha ang kada sitwasyon ug pasultia ang batang nakahulbot niini kon unsay buhaton niana nga sitwasyon. Mahimo nimong gamiton ang mosunod nga mga ehemplo:
- Ikaw ug usa ka higala manag-ubang nagdula, ug laing bata ang misulod sa kwarto. Unsa man ang kinahanglan nimong buhaton?
- Ikaw ug ang imong igsoong babaye gustong magdula sa pareho nga dulaan. Unsa man ang kinahanglan nimong buhaton?
- Ang imong manghud nga batang lalaki mikuha og butang nga gipanag-iya nimo. Unsa man ang kinahanglan nimong buhaton?
Maggamit og pamilyar nga mga ehemplo gikan sa inyong ward o dapit, hisguti kon unsaon sa pagpakita og pagkamabination ug gugma ngadto niadtong dunay mga depekto. Tabangi ang mga bata sa paghunahuna og mga butang nga ilang mahimo nga makatabang sa usa ka tawo nga dunay depekto.
- Unsaon man nato sa pagpakita og gugma ngadto sa usa ka tawo kinsa dili makakita?
- Unsaon man nato sa pagpakita og gugma ngadto sa usa ka tawo kinsa dili makadungog?
- Unsaon man nato sa pagpakita og gugma ngadto sa usa ka tawo kinsa naggamit og wheelchair o crutches?
Tabangi ang mga bata nga makasabut nga bisan tuod nga ang ubang mga tawo mahimong mosulti og laing pinulongan o dunay laing kolor sa panit kay sa kanila, kitang tanan mga anak sa Langitnong Amahan. Kinahanglan nga kitang tanan magmabination ngadto sa usag usa. Kinahanglan natong trataron ang kada usa sama sa unsay gusto nato nga kita trataron. Ipasabut nga ang kada tawo lahi kay sa uban sa pipila ka paagi.

Dugang nga mga Kalihokan para sa mas Gagmayng mga Bata

Kantaha o isulti ang mga pulong sa “Pagkamabination Magsugod Kanako” [Kindness Begins with Me] (Songbook sa mga Bata, p. “00” [145]).
Tabangi ang mga bata sa pagbuhat sa mosunod nga kalihokan ginamit ang bersikulo:

Makatakod gyud ang pahiyum (inata ang mga kilid sa ba-ba aron makapahiyum pahiyum),

Ug mao nga kon ako maguol (inata ang mga kilid sa ba-ba aron makapahiyum magulanong nawong),

Maningkamot kong mopahiyum (inata ang mga kilid sa ba-ba aron makapahiyum pahiyum),

Ug dili madugay mobati ko og kalipay (ibutang ang duha ka mga kamot ibabaw sa kasingkasing)!

(Gikuha gikan ni Pat Graham, “Feeling Glad,” Friend, Mar. 1990, p. 21.)