Mamahimo Ko nga Maayong Ehemplo

Katuyoan

Aron sa pagtabang sa kada bata nga mopakita og maayong ehemplo alang sa uban pinaagi sa pagsunod sa ehemplo ni Jesus.

Pagpangandam

Tun-i sa mainampoong paagi ang Mateo 4:19; Lucas 19:1-10; Juan 13:15; ug 3 Nephi 17:11-24.
Mga materyal nga gikinahanglan:
1. Usa ka Biblia ug usa ka Basahon ni Mormon.
2. Pipila ka mga tunob sa tiil nga gigunting gikan sa papel.
3. Hulagway 1-3, Si Jesus ang Kristo (Pakete sa mga Hulagway sa Ebanghelyo 240; 62572); hulagway 1-63, Si Zaqueo nga diha sa usa ka Kahoy; hulagway 1-64, Si Jesus Nag-ampo uban sa mga Nephite (62542).
Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Isulti ang mga pulong sa “Sunda Akong Gibuhat” [Do As I’m Doing] (Children’s Songbook, p. 276) uban sa mga bata. Ipasunod sa mga bata ang bisan unsa nga mga aksyon nga imong gibuhat, sama sa pagtuyok sa imong mga bukton, pagpakpak sa imong mga kamot, o pagpakaaron-ingnon nga molupad sama sa usa ka langgam.

Akong gibuhat;
Sunda, sunda ko!
Akong gibuhat;
Sunda, sunda ko!
Mataas o maubos,
Mapaspas o mahinay,
Akong gibuhat;
Sunda, sunda ko!
Akong gibuhat;
Sunda, sunda ko.

Ipasabut ngadto sa mga bata nga dihang ilang gibuhat ang samang mga aksyon nga imong gibuhat, nagsunod sila sa imong ehemplo. Kon mosunod kita sa ehemplo sa usa ka tawo, atong buhaton kon unsay ilang gibuhat. Sultihi ang mga bata nga si Jesus miingon, “Sumunod kamo kanako” (tan-awa sa Mateo 4:19).

Ang Langitnong Amahan Mipadaia kang Jesukristo ngari sa Yuta aron Mahimo nga usa ka Ehemplo alang Kanato

Iplastar ang hulagway 1-3, Si Jesus ang Kristo. Ipasabut nga usa sa mga rason nga si Jesus mianhi sa yuta mao nga mahimong usa ka ehemplo alang kanato ug mopakita kanato kon unsaon sa pagpakabuhi. Si Jesus hingpit. Nagpasabut kana nga iyang gibuhat ang tanan sa saktong paagi. Ang paagi sa iyang pagpakabuhi sa dinhi pa siya sa yuta mao ang paagi nga kinahanglan kita nga maningkamot sa pagpakabuhi.

Paklia ang Biblia ug basaha ang Juan 13:15 ngadto sa mga bata. Sultihi ang mga bata nga mao kini ang mga pulong ni Jesus. Ipasabut og maayo nga gusto kitang mahisama kang Jesus ug mosunod sa iyang ehemplo.

Kanta

Tabangi ang mga bata sa pagkanta o sa pagsulti sa mga pulong sa unang bahin sa “Naningkamot Kong Mahimong Mahisama kang Jesus” [I’m Trying to Be like Jesus] (Songbook sa mga Bata, p. 40).

Naningkamot kong mahimong
Mahisama kang Jesus.
Sama’s iyang paghigugma,
Sa buhat ug sa sulti.

Kanta

Unsang klaseha sa mga butang ang kinahanglan natong buhaton kon naningkamot kitang mahisama kang Jesus?

Istorya

Ipakita ang hulagway 1-63, Si Zaqueo nga diha sa usa ka Kahoy, ug isaysay ang istorya bahin ni Jesus ug ni Zaqueo, ingon nga makita diha sa Lucas 19:1-10. Ipasabut nga si Jesus mipakita og maayong ehemplo alang kanato sa dihang nagmabination siya ngadto ni Zaqueo. Bisan tuod nga ang ubang mga tawo wala ganahi ni Zaqueo, gusto ni Jesus nga moadto sa iyang balay ug mahimo niyang higala.

Istorya

Sa unsa nga paagi nga si Jesus mabination ngadto kang Zaqueo? {Tan-awa sa Lucas 19:5.)
Unsa kaha sa inyong hunahuna ang gibati ni Zaqueo sa dihang mabination si Jesus ngadto kaniya?

Kanta

Kantaha o isulti ang mga pulong sa “Si Jesus Miingon Higugmaa ang Tanan” [Jesus Said Love Everyone] (Songbook sa mga Bata, p. 39), nga maggamit sa mga aksyon nga gipasabut sa ubos:

Higugmaa ang tanan (ituy-od og maayo ang mga bukton); 
Jesus miingon (iyangu-yango ang ulo). 
Kon puno ‘ta sa gugma (ipatong ang mga kamot sa kasingkasing), 
Mao sab sila (gaksa ang kaugalingon). 

Istorya

Ipakita ang hulagway 1-64, Si Jesus Nag-ampo uban sa mga Nephite, ug isaysay ang istorya kabahin kon giunsa ni Jesus sa pag-ampo alang sa mga bata nga mga Nephite, ingon nga makita diha sa 3 Nephi 17:11-24. Ipasabut nga gipakita ni Jesus pinaagi sa iyang ehemplo nga kinahanglan kitang mag-ampo alang sa uban.

Istorya

Para kang kinsa man ang giampo ni Jesus? (Tan-awa sa 3 Nephi 17:21.)
Unsa kaha sa inyong hunahuna ang gibati sa mga bata sa dihang si Jesus nag-ampo alang kanila?
Kinsa man ang mahimo natong i-ampo?

Hisguti ang mga tawo nga mahimo natong i-ampo, sama sa mga sakop sa pamilya, mga tawo nga nangasakit, ang mga misyonaryo, ug ang atong mga lider sa Simbahan.

Kalihokan

Iplastar ang hulagway 1-63, Si Zaqueo nga diha sa usa ka Kahoy, ug ang hulagway 1-64, Si Jesus Nag-ampo uban sa mga Nephite, diha sa nag-atbang nga mga bahin sa kwarto, ug ibutang ang mga tunob sa tiil nga ginama sa papel diha sa salug nga magpadulong ngadto sa kada hulagway. Pakantaha ang mga bata o ipasulti pag-usab ang mga pulong sa unang bahin sa “Naningkamot Kong Mahimong Mahisama kang Jesus” [I’m Trying to Be like Jesus] samtang magsunod sila sa mga tunob padulong ngadto sa kada hulagway.

Hunong sa kada hulagway ug ipasaysay pag-usab sa mga bata kutob sa ilang mahimo bahin sa istorya. Tabangi ang mga bata sa paghunahuna og mga paagi nga mahimo silang maayong ehemplo sama kang Jesus sa matag sitwasyon. Pananglitan, mahimo silang makigbahin sa ilang mga dulaan o makigdula sa usa ka bata nga nagkinahanglan og higala (Zaqueo), ug mahimo silang makaampo alang sa usa ka tawo nga nasakit o nagkinahanglan og espesyal nga tabang (nag-ampo alang sa mga bata nga mga Nephite).

Tabangi ang mga bata nga makaamgo nga kon magpakita sila og gugma alang sa uban pinaagi sa pagkamabination ug sa pag-ampo alang kanila, nagsunod sila sa ehemplo ni Jesus. Nagpakita usab sila og maayong ehemplo alang sa ubang mga tawo.

Kanta

Kantaha o isulti ang mga pulong sa koro sa “Naningkamot Kong Mahimong Mahisama kang Jesus” [I’m Trying to Be Like Jesus] (Songbook sa mga Bata, p. 40), nga maggamit sa mga aksyon nga gihulagway sa ubos:

Paghigugma sa usag usa (gaksa ang kaugalingon). 
Ug ipakita ang kaayo ‘ta (lamanoha ang kamot sa laing tawo). 
Pagtarung sa buhat ug hunahuna (ipakaaron-ingnon ang usa ka kamot nga ulo sa usa ka mananap ug hapyura kini sa laing kamot), 
Kay kini ang sugo Niya (iakub ang duha ka mga kamot, nga ang mga palad paitaas, sama sa libro sa kasulatan). 

Mahimo Kitang Maayong mga Ehemplo ngadto sa Uban

Ipasabut nga sama sa mga bata nga nagsunod sa ehemplo ni Jesus, ang ubang mga tawo magtan-aw kanila ug mosunod sa ilang mga ehemplo.

Kalihokan

Paanhaa sa atubangan sa klase ang usa ka bata ug maoy mahimong lider. Pagiyahe sa bata ang ubang mga bata sa mga aksyon sama sa pagpakpak sa ilang mga kamot, pagtuyok, o paglukso-lukso. Sublia ang kalihokan aron sa pagtugot sa ubang mga bata nga maoy mahimong lider.

Ipasabut nga dunay mas importante pang mga paagi kay sa unsaon nato sa pagiihok sa atong mga lawas. Sultihi ang mga bata nga mahimo silang maayong mga ehemplo pinaagi sa pagbuhat og maayong mga butang, sama sa pagsulti sa tinuod, pagsunod sa ilang mga inahan ug mga amahan, pagpakigbahin sa ilang mga dulaan, pagbinuotan diha sa simbahan, ug sa pagtabang sa ilang mga pamilya.

Kalihokan

Unsa man ang inyong mabuhat aron mahimong maayong ehemplo ngadto sa uban?

Pahunahunaa ang kada bata og usa ka paagi nga mahimo siyang maayong ehemplo ug sultihi ang klase kon unsay iyang buhaton.

Pagpamatuod

Sulti bahin sa usa ka higayon nga inyong gisunod ang maayong ehemplo sa usa ka tawo. Ipakigbahin ang inyong mga pagbati kabahin sa kaimportante sa pagsunod sa ehemplo ni Jesus. Awhaga ang mga bata sa pagpakita og maayong mga ehemplo alang sa uban pinaagi sa pagbuhat sa mga butang nga buhaton ni Jesus.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

Paghimo og simpol nga korona o kalo nga binuhat sa papel alang sa kada bata. Sa kada korona o kalo, isulat ang Mahimo kong maayo nga ehemplo. Hisguti ang mga paagi nga mahimong maayo nga mga ehemplo ang mga bata nianang semanaha.
Kantaha ang “Sa Bata Pa si Jesus” [Jesus Once Was a Little Child] (Songbook sa mga Bata, p. 34), “Si Jesus Buot nga ako ang Sunbeam alang Kaniya” [Jesus Wants Me for a Sunbeam] (Songbook sa mga Bata, p. 38), o “Sama Ko sa usa ka Bitoon” [I Am like a Star] [Songbook sa mga Bata, p. 84).
Ipakita ang usa ka flashlight o laing gamayng suga. Pasigaa kini ug hisguti kon sa unsa nga paagi nga ang kahayag nga gikan sa flashlight nakatabang sa mga tawo samtang magsiga kini. Basaha og kusog ang unang hugpong sa mga pulong sa 3 Nephi 12:16. Ipasabut ngadto sa mga bata nga sama sila sa gagmayng mga suga kon magpakita sila og maayong mga ehemplo, tungod kay ang ubang mga tawo nagtan-aw man ug nagsunod kanila. Pakupti sa usa ka bata ang flashlight ug pagiyahi ang uban libut sa kwarto. Sublia hangtud ang kada bata kinsa gusto nga mahimong lider makapuli na.
Pabaruga ang mga bata ug pabuhata sa mga aksyon sa mosunod nga kalihokan ginamit ang bersikulo:

Gihigugma ni Jesus ang Gagmayng mga Bata

Ang pipila ka mga bata nanagan sa abugon nga daian (dagan sa nahimutangan),

Nga nagdali ginamit ang ilang mga tiil (tudloa ang mga tiil),

Agi sa pundok sa mga tawo aron makakita og dapit (pakaaron-ingnon nga moduot agi sa usa ka pundok sa mga tawo)

Nga maduol kang Jesus, aron makakita sa iyang nawong (kinto ug tan-aw sa palibut).

Ang pipila ka mga dagkong tawo miingon, “Papahawaa na sila” (iisa ang kamot nga daw nag-ingon nga “hunong”).

“Bisi kaayo siya para sa mga bata karon” (pagmug-ot ug ilingu-lingo ang ulo).

Pero si Jesus miingon, “Paduola sila kanako” (Ikamayang mga kamot).

“Mahinungdanon ug gihigugma nako sila” (gaksa ang kaugalingon).

(Gikuha gikan ni Margaretta Harmon sa Bible Story Finger Plays and Action Rhymes [Cincinnati: Standard Publishing, 1964], p. 27.)

Dugang nga mga Kalihokan para sa mas Gagmayng mga Bata

Hangyoa ang mga bata sa pagsubli sa pulong ehemplo. Sultihi sila nga ang maayong ehemplo mao ang tawo nga gusto ninyo nga kamo mahisama sa inyong pagdako. Ang atong mga ginikanan mahimong maayong mga ehemplo ngari kanato. Hangyoa ang mga bata sa paghingalan og mga butang nga gibuhat sa ilang mga ginikanan aron sa pag-atiman kanila o aron magmalipayon sila.
Pakupta ang mga bata sa ilang mga kamot ug magtuyoktuyok diha sa alirong samtang ikaw nagkanta o nagsulti sa mga pulong sa “Kon Kita Motabang” [When We’re Helping] (.Songbook sa mga Bata, p. 108). Sublia ang awit kutob sa imong gusto, nga mag-ilis sa mama sa papa, kuya, ate, lola, o lolo.
Dulaa ang “Sunda ang Lider” uban sa mga bata. Pabaruga ang mga bata nga maglinya. Ang unang bata diha sa linya modagan, molukso, molayat, o mobuhat og pipila ka laing aksyon dinha sa laing bahin sa kwarto. Ang ubang mga bata mosunod sa unang bata, nga maghimo sa unsay iyang gibuhat. Dayon ang unang bata moadto sa tumoy sa linya, ug ang sunod nga bata maoy mahimong sunod nga bag-ong lider. Padayon hangtud nga ang kada bata makabaton og kahigayunan nga mahimong lider.