Leksyon 38

Mamahimo Kong Buotan

Katuyoan

Aron sa pag-awhag sa kada bata sa pagpakita og gugma alang sa Langitnong Amahan ug ni Jesus pinaagi sa pagbinuotan.

Pagpangandam

1. Tun-i sa mainampoong paagi ang Exodo 3:1-10.

2. Mga materyal nga gikinahanglan:

   1. Usa ka Biblia.

   2. Hulagway 1-19, Si Kristo ug ang mga Bata (Pakete sa mga Hulagway sa Ebanghelyo 216; 62467); hulagway 1-66, Si Moises ug ang Nagsiga nga Sampinit (Pakete sa mga Hulagway sa Ebanghelyo 107; 62239); hulagway 1-67, Usa ka Klase nga Nagbinuotan

3. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo,

Pang-atensyon nga Kalihokan

Hangyoa ang mga bata sa pagkiyugpos sa ilang mga bukton ug sa paglingkod sa hilom nga paagi samtang nagkanta o nagsulti ka sa mga pulong sa [Reverently, Quietly] (Songbook sa mga Bata, p. 11) sa hinay nga tingog. Kon ang mga bata nakahibalo sa kanta, mahimo silang makigdungan og kanta.

Pagtahud, sa hilom ug gugma ngadto niya;

Pagtahud, sa hilom hinay natong ikanta.

Pagtahud, sa hilom sa pag-ampo ‘ta,

Ang Espiritu niya ‘nato anaa.

Kon mahuman na mo, pasalamati ang mga bata sa paglingkod og hilom.

Mahimo Kitang Magbinuotan diha sa Simbahan

Ipakita ang hulagway 1-67, Usa ka Buotan nga Klase.

• Hain man kining mga bataa?

• Unsa man ang ilang gibuhat?

• Unsa kaha sa inyong hunahuna ang ilang gihunahuna?

• Unsa man ang inyong buhaton kon moabut na mo sa Primary?

Ipasabut nga kon moadto kita sa simbahan kinahanglan kitang molihok sa maayong paagi. Gitawag kini og pagkabuotan.

Ipasubli sa mga bata ang pulong buotan sa pipila ka higayon.

• Unsa man sa inyong hunahuna ang gipasabut sa pagkabuotan?

Ipasabut nga ang pagkabuotan nangahulugan og pagbuhat sa mga butang nga nagpakita sa atong gugma ug pagtahud sa Langitnong Amahan ug ni Jesus. Mapakita nato ang atong gugma ngadto kanila sa mosunod nga mga paagi (ipa-demonstrate sa mga bata ang pipila niini samtang nagsulti ka bahin niini):

• Maglakaw nga hilom ug mag-istorya og hinay.

• Maglingkod nga hilom ug maminaw sa mga pag-ampo ug sa mga leksyon.

• Mopataas sa atong mga kamot kon kita dunay gustong isulti.

• Mokyugpos sa atong mga bukton.

• Ipabiling limpyo ang meetinghouse.

Ipasabut nga kon atong buhaton kining mga butanga, ang Langitnong Amahan ug si Jesus nasayud nga ato silang gihigugma ug nga kita malipayon nga maanaa sa simbahan.

Kanta

Uban sa mga bata, kantaha o isulti ang mga pulong sa “I Want to Be Reverent” (Children’s Songbook, p. 28). Sublia kon gitinguha.

Gusto kong mahimong buotan,

Aron sa pagpakita sa akong gugma alang kanimo.

Maminaw ko sa hilom nga paagi,

Kay ang reverence magsugod nako.

Kanta

• Nganong kinahanglan man kitang magbinuotan diha sa Primary?

Pahinumdumi ang mga bata nga kon kita buotan, makapaminaw kita sa atong mga titser ug makat-on kabahin sa Langitnong Amahan ug ni Jesus. Kon kita buotan, atong gitabangan ang uban nga mahimo usab nga buotan.

Kanta

• Unsa nga bilding ang nahimutangan nato karon?

• Kang kinsa man kini nga balay?

Ipasabut nga ang meetinghouse gipanag-iya sa Langitnong Amahan ug ni Jesus. Usa kini ka dapit diin makat-on kita bahin kanila ug sa unsay gusto nila nga atong buhaton.

Kalihokan

Himoa ang mosunod nga dula ginamit ang mga tudlo uban sa mga bata. Usba ang mga aksyon sa kamot aron sa pagpakita sa mga parte sa meetinghouse.

Ang Meetinghouse

Mao kini ang mga bongbong sa usa ka balay nga nindot kaayo;

Mao kini ang taluktuk nga taas kaayo.

Mao kini ang mga bintana nga agianan sa kahayag

Ug mga pultahan nga abli kaayo sa tanan.

Kining balaya gitukod sa mahigugmaon nga Amahan

Isip usa ka dapit sa pag-awit ug pag-ampo.

Ikiyugpos nato ang atong mga bukton, moduko sa atong mga ulo (ikiyugpos ang mga bukton ug iduko ang mga ulo),

Ug hatag og pasalamat alang niining balaya karon.

Kalihokan

• Unsa man ang pipila ka mga butang nga kinahanglan ninyong buhaton diha sa meetinghouse?

• Unsa man ang pipila ka mga butang nga kinahanglan dili ninyo buhaton diha sa meetinghouse?

Tabangi ang mga bata nga makasabut nga dunay mga dapit ug mga panahon diha sa meetinghouse alang sa pagdagan-dagan ug sa pagdula, pero sa kasagaran sa bilding ug sa ma-Dominggo kinahanglan gyud kitang magbinuotan. Ipasabut nga gawas nga maglingkod og hilom diha sa Primary ug diha sa chapel, molakaw ug mag-istorya kita sa hilom kanila diha sa mga hall.

Istorya

Isaysay ang usa ka istorya kabahin sa mga bata sa imong klase nga moanha sa Primary. Ilakip kon unsa sila ka malipayon samtang managan sila ug maglukso-lukso sa ilang pagpadulong sa bilding, sa ilang paglakaw sa hilom nga paagi sa ilang pagsulod, ug kon unsay ilang gibuhat atol sa sakrament miting ug sa Primary ug pagkahuman diha sa hall. Ipasabut og maayo kon unsa ka buotan ang mga bata kon moanha sila sa simbahan.

Kalihokan

Isulti ang mga pulong sa “Duha ka Malipayong mga Tiil” [Two Happy Feet] (Children’s Songbook, p. 270) samtang ang mga bata maglakaw-lakaw libut sa kwarto sa hilom ug sa mabinantayon nga paagi aron nga ang ilang mga sapatos dili makahimo og kasaba.

Duna koy duha ka malipayon nga gagmayng mga tiil

Nga magdala kanako asa ako paingon.

Makalukso ako ug makalayat ako,

Ug magsaba-saba, nasayud ko.

Pero sa balay sa akong Langitnong Amahan

Hinay kaayo kining motunob

Niana, bisan naglakaw ko, dili mo kadungog

Sa akong duha ka gagmayng mga tiil.

Kalihokan

• Unsa man ang inyong buhaton sa inyong mga tiil diha sa mga hall sa simbahan? diha sa chapel? diha sa klase?

• Unsa man ang inyong buhaton sa inyong mga kamot?

• Unsa man ang inyong buhaton sa inyong tingog?

Makabaton Kita og Binuotan nga mga Pagbati

Ipakita ang hulagway 1-19, Si Kristo ug ang mga Bata, ug ipadayag kon unsay imong gibati kon maghunahuna ka kabahin ni Jesukristo ug kon unsa ka dako sa iyang gugma kanato. Ipasabut nga kini pagbati sa pagbinuotan. Imbitara ang mga bata sa pagpadayag sa ilang mga pagbati kabahin ni Jesus.

Istorya

Iplastar ang hulagway 1-66, Si Moises ug ang Nagsiga nga Sampinit, ug isaysay ang istorya nga makita diha sa Exodo 3:1-10. Ipasabut og maayo ang balaang pagtahud nga gibati ni Moises sa dihang nakigsulti niya ang Ginoo gikan sa nagsiga nga sampinit ug mitawag niya sa pagpangulo sa Israel paggawas sa Ehipto. Basaha og kusog gikan sa Biblia ug ipasabut ang bahin sa bersikulo 5: “Huboa ang imong mga sandalias gikan sa imong mga tiil, kay ang dapit nga imong gibarugan, yuta nga balaan.”

Istorya

• Nganong gihubo man ni Moises ang iyang mga sandalias?

Ipasabut nga mao kini ang usa ka paagi sa pagkabuotan. Siguroa nga ang mga bata nakasabut nga dili kinahanglan nga atong huboon ang atong mga sapatos aron mahimong buotan. Kita dunay daghang lain pang mga paagi nga mahimong buotan.

Istorya

• Sa unsa nga paagi nga mahimo kitang buotan?

Mahimo Kitang Magbinuotan diha sa Panimalay

Sutihi ang mga bata nga ang meetinghouse dili mao lamang ang dapit diin kinahanglan kitang magbinuotan.

• Unsa man ang inyong buhaton diha sa panimalay kon dunay usa ka tawo nga mag-ampo?

• Unsa man ang inyong buhaton diha sa panimalay atol sa family home evening?

Ipasabut nga kon maminaw kita sa hilom nga paagi atol sa mga pag-ampo ug sa mga leksyon diha sa panimalay, magbinuotan usab kita. Nagpakita kini ngadto sa Langitnong Amahan ug ni Jesus nga ato silang gihigugma.

Pagpamatuod

Ipadayag ang imong gugma alang sa Langitnong Amahan ug ni Jesukristo ug sa imong pasalamat nga imong mapakita kini nga gugma pinaagi sa pagbinuotan. Awhaga ang mga bata sa pagpakita sa ilang gugma alang sa Langitnong Amahan ug ni Jesus pinaagi sa pagbinuotan diha sa Primary, diha sa sakrament miting, ug atol sa mga pag-ampo ug sa family home evening diha sa panimalay.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

1. Palakta ang mga bata diha sa mga halls sa balay tigumanan nga magbinuotan. Kon posible, adto sa chapel. Kon mobalik na mo sa klasrom, dayga ang mga bata sa ilang buotan nga kinaiya ug hisguti kon sa unsa nga paagi nga ang ilang reverence makatabang sa ubang mga tawo diha sa bilding aron mahimong buotan sa ilang mga klase.

2. Kantaha o isulti ang mga pulong sa “Maninguha Ko nga Magbinuotan” [I Will Try to Be Reverent] {Songbook sa mga Bata, p. 13), “Amahan, Motahud Ko” [Father, I Will Reverent Be] (Songbook sa mga Bata, p. 10).

3. Palut-i ang mga tiil sa kada bata diha sa usa ka piraso nga papel nga dunay bersikulo sa “Duha ka Gagmayng mga Tiil” [Two Happy Feet] nga gisulat niini (tan-awa sa pahina 126). Pakolori sa kada bata ang sinundugan niya ug ipadala kini sa balay.

4. Papulipuliha ang kada bata sa pagpakita og paagi nga mahimo siyang buotan diha sa klase, sama sa paglingkod og hilom, pagkiyugpos sa mga bukton, o pagpataas sa kamot kon dunay isulti. Hisguti kon ngano man nga kinahanglan kitang magbinuotan diha sa balay sa Langitnong Amahan.

5. Tabangi ang mga bata sa pagsulti sa mga pulong sa usa o duha sa mosunod nga mga bersikulo. Usba ang mga aksyon ingon sa gisugyot sa mga pulong.

   Ibukhad, Kumoa Kini [Mga kamot]

   Ibukhad, kumoa kini;

   Ibukhad, kumoa kini;

   Pakpak hinay.

   Ibukhad, kumoa kini;

   Ibukhad, kumoa kini;

   Ibutang kini sa inyong paa.

   Akong Giuyog ang Akong mga Kamot

   Akong giuyog ang akong mga kamot.

   Akong paligiron ang akong mga kamot.

   Akong ipakpak ang akong mga kamot.

   Akong ipataas ang akong mga kamot,

   Dayon ipaubos kini

   Ug ibutang sa akong paa.

   Akong pahilumon ang akong mga tiil.

   Hunungon nako pagiihok ang akong mga tiil.

   Magtarung kog lingkod sa akong lingkuranan.

   lyukbo nako ang akong ulo.

   Ipiyong nako ang akong mga mata.

   Andam na ko sa pag-ampo.

Dugang nga mga Kalihokan para sa mas Gagmayng mga Bata

Ipapiyung sa mga bata ang ilang mga mata. Hangyoa sila sa pagpataas sa ilang mga kamot kon makadungog sila nimo nga naghulog og sinsilyo o butones. Ihulog ang sinsilyo o butones diha sa salug o sa lamesa. Dayon pusta ang butones o sinsilyo diha sa usa ka panyo o gamay nga piraso sa panapton. Hangyoa ang mga bata nga ipiyung una ang ilang mga mata, maminaw og maayo, ug mopataas sa ilang mga kamot kon makadungog sila sa sinsilyo o sa butones niining higayuna. Ihulog ang giputos nga butones o sinsilyo diha sa salug o sa lamesa. Tabangi ang mga bata nga makasabut nga dunay daghang madungog kon maminaw kita og maayo.