Ang Musika Makalipay Nako

Katuyoan

Aron sa pagtabang sa kada bata nga makasabut nga ang maayong musika makatabang kanato nga mobati og kalipay ug makapahinumdom kanato sa Langitnong Amahan ug ni Jesus.

Pagpangandam

Tun-i sa mainampoong paagi ang 1 Samuel 16:19-23; Ether 6:2-12; ug Doktrina ug mga Pakigsaad 25:12.
Mga materyal nga gikinahanglan:
1. Usa ka Biblia, usa ka Basahon ni Mormon, ug usa ka kopya sa Doktrina ug mga Pakigsaad.
2. Hulagway 1-61, Exodo gikan sa Nauvoo (Pakete sa mga Hulagway sa Ebanghelyo 410; 62493); hulagway 1-68, Si David Mitukar alang kang Haring Saul; hulagway 1-69, Mga Lantsa sa mga Jaredite.
Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Pahinumdom ngadto sa titser: Mahimo nimong dapiton ang lider sa musika sa Primary aron sa pagtabang kanimo niini nga leksyon.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Pasirkula ang mga bata ug kantaha ang “Kon Ikaw Nalipay” [If You’re Happy] (Songbook sa mga Bata, p. 125) sa pipila ka mga higayon, nga maggamit sa mga hugpong sa mga pulong sama sa “mopakpak ka,” “iundak ang tiil,” ug “ikipat ang imong mga mata.” Usba ang mga aksyon ingon sa gisugyot sa mga pulong.

Kon ikaw nalipay, mopakpak ka.
Kon ikaw nalipay, mopakpak ka.
Kon ikaw nalipay,
Makita sa imong dagway.
Kon nalipay ka, mopakpak ka.

Pang-atensyon nga Kalihokan

Unsa man ang inyong gibati sa dihang nanganta mo niining kantaha?

Ang Maayong Musika Makatabang Kanato nga Mobati og Kalipay

Ipasabut nga ang malipayon, matahum, o malinawon nga musika makatabang nato nga mobati og kaanindot sa sulod nato. Kon kita maguol, masuko, o mahadlok, ang maayong musika makatabang kanato nga mobati pag-usab og kalipay.

Istorya

Iplastar ang hulagway 1-68, Si David Mitukar alang kang Haring Saul. Isaysay ang istorya kabahin ni David nga Mitukar sa iyang alpa alang kang Haring Saul sa dihang ang hari wala sa kondisyon, ingon nga makita diha sa 1 Samuel 16:19-23.

Istorya

Ngano kaha sa inyong hunahuna nga ang musika ni David nakapahimo man ni Haring Saul nga mobati og mas maayo?
Unsa nga mga instrumento sa musika ang gusto ninyong madungog?

Ipa-pantomime sa daklit ang mga instrumento sa panahon nga mahisgutan kini.

Kalihokan

Papakaaron-ingna ang kada bata nga magtukar og instrumento sa musika, sama sa piano, violin, gitara, piawta, o alpa, samtang nag-hum ka og usa ka pamilyar nga kanta sa Primary o himno.

Ipasabut nga ang pagkanta makatabang usab kanato nga mobati og kalipay.

Kalihokan

Unsa nga mga kanta sa Primary ang nakatabang kaninyo nga mobati og kalipay?

Kanta

Papilia ang mga bata og usa ka paboritong kanta, ug kantaha kini uban nila.

Istorya

Ipakita ang hulagway 1-61, Exodo gikan sa Nauvoo, ug isaysay sa imong kaugalingong mga pulong ang mosunod nga istorya:

Sa dihang ang mga pioneer mibiya sa ilang mga panimalay didto sa Nauvoo ug mibalhin sa kasadpan, ilang gihipos ang tanan kutob sa ilang mahimo diha sa tinabunan nga mga karwahe o mga kariton. Kinahanglan nilang biyaan ang daghan sa ilang mga gipanag-iya tungod kay wala na may kabutangan niini. Ang pagbiyahe lisud, ug ang mga pioneer sa kasagaran kapoy na kaayo inig ka hapon.

Sa gabii pormahon sa mga pioneer ang ilang mga kahayopan ug sa mga karwahe og lingin ug maghimo og dakong daub. Si Brigham Young, ang propeta, nasayud nga ang mga tawo mahimong mas malipayon sa ilang pagpanaw kon duna silay musika. lya silang giawhag sa pagkanta ug pagsayaw. Ang mga pioneer nga nagdala og mga violin, mga trumpeta, ug mga drum migamit niini aron makapatukar sila og musika. Ang tanan nanganta ug nanayaw libut sa kalayo. Usa sa ilang paborito nga mga kanta maoa ang “Dali, Dali, Kamo mga Santos.” Ang musika nakahatag og kalig-on ug kaisug sa mga pioneer. Sa dihang manghigda na sila sa gabii human sa pagkanta ug pagsayaw, mibati sila og kalipay.

Kanta

Palingkura ang mga bata nga mag-alirong ug magpakaaron-ingnon nga sila mga pioneer nga nanglingkod libut sa daub. Kantaha ang “Pioneer nga mga Bata Nagkanta Samtang Sila Nanglakaw” [Pioneer Children Sang As They Walked] [Songbook sa mga Bata, p. 137) o laing paborito nga awit sa Primary uban sa mga bata.

Ang Musika Makatabang Kanato nga Makahinumdom sa Langitnong Amahan ug ni Jesus

Ipasabut nga ang musika sa simbahan nagpahinumdom kanato sa Langitnong Amahan ug ni Jesus. Hangyoa ang mga bata sa pagpiyung sa ilang mga mata ug magpakaaroningnon nga naminaw sa musika nga gitukar diha sa chapel sa wala pa ang sakrament miting.

Sa unsa nga paagi nga ang musika makatabang kanimo aron mahimong buotan diha sa simbahan?

Ipasabut nga ang Langitnong Amahan ug si Jesus ganahan nga makadungog kanato nga mokanta. Basaha og kusog ang unang duha ka mga hugpong sa mga pulong sa Doktrina ug mga Pakigsaad 25:12 (hangtud sa usa ka pag-ampo ngari kanako). Ipasabut nga ang pagkanta og mga kanta sa simbahan sama ra sa pag-ampo ngadto sa Langitnong Amahan. Nagpasalamat kita sa Langitnong Amahan sa mga panalangin nga iyang gihatag kanato. Ang pagkanta og mga awit kabahin sa Langitnong Amahan ug ni Jesus nagpahinumdom kanato nga naghigugma sila kanato ug gustong motabang kanato. Ipasabut nga ang mga awit nga atong gikanta diha sa sakrament miting gitawag og mga himno.

Nganong manganta man kita og mga kanta ug mga himno diha sa simbahan?

Istorya

Ipakita ang hulagway 1-69, Mga Kasko sa mga Jaredite, ug isaysay ang istorya kabahin sa mga Jaredite nga miadto sa gisaad nga yuta, nga makita diha sa Ether 6:2-12. Ipasabut nga ang mga Jaredite nanganta og mga awit sa pagdayeg ngadto sa Langitnong Amahan ug ni Jesus samtang didto pa sila sa sulod sa ilang mga kasko, o mga barko.

Istorya

Ngano kaha sa inyong hunahuna nga ang mga Jaredite nanganta man og mga kanta sa ilang pagbiyahe?
Sa inyong hunahuna unsa kaha ang gibati sa mga Jaredite sa dihang ang hangin ug ang mga balud miigo sa ilang mga kasko?
Sa unsa nga paagi nga ang pagkanta nakatabang kanila sa dihang nahadlok sila?
Nakakanta na ba kamo og usa ka kanta sa dihang nahadlok mo? Sa unsa man nga paagi nga kini nakatabang kaninyo?

Pagpamatuod

Isulti ang usa ka higayon sa dihang ang musika nakalipay kanimo. Pahinumdumi ang mga bata nga ang Langitnong Amahan ug si Jesus ganahan nga makadungog nila nga mokanta og maayong mga kanta. Kon mokanta sila, mobati sila og kalipay ug mahinumdom nga ang Langitnong Amahan ug si Jesus naghigugma kanila.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

Kantaha ang “Makalingaw nga Buhaton” [Fun to Do] (Songbook sa mga Bata, p. 129), “Nagtuo Ko nga ang Kalibutan Mahimayaon” [I Think the World Is Glorious] (Songbook sa mga Bata, p. 122).
Kon ang klase gamay ra, papilia ang kada bata og usa ka paboritong kanta sa Primary, ug dayon kantaha kadto nga mga awit nga magdungan isip usa ka klase.
Paghimo og paper cup shakers aron magamit sa mga bata isip rhythm instruments. Pagbutang og gamayng humay o balas sulod sa paper cup. l-fape ang ikaduhang cup ngadto sa una aron nga walay mahulog nga humay o balas. Kanta og awit sa Primary samtang ang mga bata naggamit sa ilang mga shakers. Mahimo sab kang magdala og ubang mga butang nga magamit isip rhythm instruments, sama sa kampanilya, mga dumpol nga mga iipak aron mosingki og dungan, o mga blocks nga kahoy aron masingki.
Pagpatukar og musika gikan sa Children’s Songbook audiocassettes (52538), kon anaa, ug pakantaha ang mga bata uban niini o mohimog aksyon niini.
Sa imong kaugalingong mga pulong, isaysay ang istorya sa dihang si Propeta Joseph Smith ug uban pang mga lider sa Simbahan didto sa Bilanggoan sa Carthage. Ang dautang mga tawo mibalhug kanila sa bilanggoan bisan pa man nga wala silay nabuhat nga sayop. Ang Propeta nasayud nga ang iyang kinabuhi naa sa pilegro, ug mibati siya og hilabihan nga kaguol. lyang gihangyo ang iyang amigo nga si John Taylor sa pagkanta alang kaniya. Si John naguol usab kaayo, ug iyang gisultihan si Joseph nga morag dili siya kakantahon, pero si Joseph miawhag kaniya. Sa pagkanta ni John og usa ka kanta kabahin ni Jesus, ang tanan nga diha sa bilanggoan mibati og mas maayo. Ang awit nagpahinumdom kanila nga ang Langitnong Amahan ug si Jesus naghigugma nila. Naghatag kini kanila og kalig-on ug kaisug.

Dugang nga mga Kalihokan para sa mas Gagmayng mga Bata

Kantaha ang pipila ka paboritong mga kanta sa mga bata uban nila, Papakpaka sa hilom nga paagi ang mga bata samtang nagkanta sila. Pakig-istorya sa mga bata kabahin kon sa unsa nga paagi nga ang musika makapalipay nila.
Pag-andam og usa ka rekording sa lainlaing mga estilo sa musika nga mapaminaw sa mga bata. Siguroa nga ang musika angay alang sa Igpapahulay.
Sultihi ang mga bata nga ang Langitnong Amahan naghatag kanato og daghang nagkalainlaing klase sa musika. Ang pipila ka mga musika hinimo sa mga tawo, ug ang ubang musika hinimo sa mga butang sa kalibutan sa palibut nato. Paghingalan og pipila ka mga butang sa kinaiyahan nga makahimo og mga tingog nga sama sa musika, sama sa hangin, ulan, mga langgam, mga buyog, ug dugdug. Ipasundog sa mga bata ang kada tingog.