Leksyon 40

Ang Sakrament Makatabang Nako sa Paghunahuna ni Jesus

Katuyoan

Aron sa pag-awhag sa kada bata sa paghunahuna kabahin ni Jesukristo atol sa sakrament.

Pagpangandam

1. Tun-i sa mainampoong paagi ang Lucas 22:19-20 ug 3 Nephi 18:1-11. Tan-awa usab sa Mga Baruganan sa Ebanghelyo (31110), kapitulo 23.

2. Uban sa pagtugot sa inyong presidente sa Primary, hangyoa ang bishop sa pagpakigsabut sa usa ka sakop sa korum sa mga priest nga moanha sa imong klase sulod sa pipila ka minuto atol sa pagsugod sa panahon sa leksyon. Ang sakop sa korum sa mga priest kinahanglan mag-andam sa pagsulti sa mga bata kabahin sa iyang mga responsibilidad sa pagdumala sa sakrament ug sa iyang mga pagbati kabahin niining sagradong ordinansa.

3. Mga materyal nga gikinahanglan:

   1. Usa ka Biblia ug usa ka Basahon ni Mormon.

   2. Mga hulagway sa mga panghitabo sa kinabuhi ni Jesus, sama sa hulagway 1-16, Ang Pagkahimugso (Pakete sa mga Hulagway sa Ebanghelyo 201; 62495); hulagway 1-17, Ang Batang si Jesus diha sa Templo (Pakete sa mga Hulagway sa Ebanghelyo 205; 62500); hulagway 1-19, Si Kristo ug ang mga Bata (Pakete sa mga Hulagway sa Ebanghelyo 216; 62467); hulagway 1-43, Si Jesus nga Nag-ayo sa Buta (Pakete sa mga Hulagway sa Ebanghelyo 213; 62145); ug uban pa nga gusto nimong gamiton.

   3. Hulagway 1-3, Si Jesus ang Kristo (Pakete sa mga Hulagway sa Ebanghelyo 240; 62572); hulagway 1-8, Pagpakalawat sa Sakrament (62021); hulagway 1-44, Si Jesus Nagtudlo didto sa Western Hemisphere (Pakete sa mga Hulagway sa Ebanghelyo 316; 62380); hulagway 1-70, Ang Katapusang Panihapon (Pakete sa mga Hulagway sa Ebanghelyo 225; 62174).

4. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Ipakita ang hulagway 1-8, Pagpaambit sa Sakrament. Sultihi ang mga bata nga ang miting sa Dominggo diin kita sa kasagaran magpundok isip mga pamilya gitawag og sakrament miting.

Pang-atensyon nga Kalihokan

• Nganong ato man nga gitawag kini nga miting og sakrament miting?

Ipaila-ila ang sakop sa korum sa mga priest ngadto sa mga bata. Pasultiha siya kabahin sa responsibilidad sa Aaronic Priesthood alang sa sakrament. Ipadayag niya ang iyang mga pagbati kabahin sa iyang tahas niining sagradong ordinansa. Pasalamati siya sa paganha ug i-excuse siya aron makabalik ngadto sa iyang miting sa korum o sa klase sa Sunday School.

Si Jesus Mihatag Kanato sa Sakrament aron sa Pagtabang Kanato nga Makahinumdom Kaniya

Ipakita ang hulagway 1-3, Si Jesus ang Kristo. Pahinumdumi ang mga bata nga si Jesus mao ang anak sa Langitnong Amahan. Tungod kay gihigugma man kita og maayo ni Jesus, mianhi siya sa yuta aron mahimo natong Manluluwas. Miayo siya sa masakiton, mitudlo sa ebanghelyo, ug mipakita sa saktong paagi sa pagpakabuhi. Dayon namatay siya alang kanato.

Istorya

Ipakita ang hulagway 1-70, Ang Katapusang Panihapon. Isaysay ang istorya sa Katapusang Panihapon, ingon nga makita diha sa Lucas 22:19-20. Basaha og kusog gikan sa Biblia ang katapusang hugpong sa mga pulong sa bersikulo 19: “Buhata ninyo kini sa paghandum kanako.” Ipasabut nga gisultihan ni Jesus ang iyang mga Apostoles sa pagpundok sa kada adlaw sa Igpapahulay ug mohinumdom kaniya pinaagi sa pag-ambit sa sakrament.

Ipakita ang hulagway 1-44, Si Jesus Nagtudlo didto sa Western Hemisphere. Ipasabut nga sa dihang mibisita si Jesus sa mga Nephite, iya usab silang gisultihan sa pagpundok sa kada Igpapahulay nga adlaw ug mohinumdom kaniya pinaagi sa pagkalawat sa sakrament (tan-awa sa 3 Nephi 18:1-11).

Istorya

• Kinsa man ang angay nga hunahunaon sa mga Apostoles sa dihang mikalawat sila sa sakrament?

• Kinsa man ang angay nga hunahunaon sa mga Nephite sa dihang mikalawat sila sa sakrament?

• Kinsa man ang angay natong hunahunaon kon mokalawat kita sa sakrament?

• Kanus-a man kita mokalawat sa sakrament?

Kalihokan

Buhata ang mosunod nga kalihokan ginamit ang bersikulo uban sa mga bata:

Malipayon Ako nga Mianhi sa Simbahan Karon

Malipayon ako nga mianhi sa Simbahan karon (itak-op ang mga kamot ug paghimo og tore sa Simbahan pinaagi sa pag-abut sa mga tumoy sa tudlo).

Nakat-on ko sa pagpaminaw (pinasawod sa kamot libut sa dunggan)

Ug sa pag-ampo (ikyugpos ang mga bukton ug iduko ang ulo).

Nakat-on ko ni Jesus nga tua sa langit (tudlo ngadto sa taas)

Naghunahuna ko ni Jesus ug sa iyang gugma (gaksa ang kaugalingon)

Mga istorya

Ipakita ang mga hulagway sa kinabuhi ni Jesus usa sa kada higayon. Kon makaila ang mga bata sa hulagway, ipasaysay nila ang istorya. Kon wala sila kahibalo sa istorya, ipaambit kini ngadto nila sa daklit. Pasalmuta ang daghang mga bata kutob sa mahimo sa pagsaysay sa mga istorya.

Mga istorya

• Unsa nga mga istorya nga kabahin ni Jesus ang inyong mahunahunaan atol sa sakrament?

Ipasaysay sa mga bata ang uban pang mga istorya kabahin ni Jesus nga ilang mahunahunaan atol sa sakrament. Kon wala silay mahunahunaan, sultihi sila og usa o duha ka mga istorya kabahin ni Jesus nga ganahan nimong hunahunaon atoi sa sakrament.

Mahimo Kita nga Buotan atol sa Sakrament

Kalihokan

Tabangi ang mga bata sa pagsulti sa mosunod nga bersikulo, nga maggamit sa mga aksyon nga gihulagway:

Akong ikiyugpos ang akong mga bukton (ikiyugpos ang mga bukton);

Akong iduko ang akong ulo (iduko ang ulo)

Ug magmahilumon gyud (ihunghong kini nga linya).

Samtang ang sakrament gipanalanginan,

Ikaw akong hinumduman,

Ipasabut nga tungod kay gihatag kanato ni Jesus ang sakrament aron makahinumdom kaniya, importante ang paghunahuna kabahin ni Jesus ug sa pagtabang usab sa uban nga makahinumdom kaniya. Mabuhat kini nato pinaagi sa pagbinuotan atoi sa sakrament.

Kalihokan

Ihunghong ang usa sa mosunod nga mga pamahayag ngadto sa usa ka bata ug ipasubli niya kini og kusog ngadto sa klase. Padayon sa ubang mga pamahayag ug sa ubang mga bata.

Kalihokan

1. Mangandam kita para sa sakrament pinaagi sa pagkanta og reverent nga himno nga makapahinumdom kanato ni Jesus.

2. Maminaw kita og maayo samtang gipamulong ang pag-ampo sa pagpanalangin sa pan.

3. Kon ipaambit na ang pan, mokuha lang kita og usa ka piraso.

4. Maminaw kita og maayo samtang gipamulong ang pag-ampo sa pagpanalangin sa tubig.

5. Matinahuron kitang moinom sa tubig ug mobutang og balik sa giimnan diha sa butanganan.

6. Dili gyud kita magdula sa pan o sa mga imnanan sa sakrament.

Ipasabut nga ang pagbuhat niining mga butanga nagpakita nga buotan kita samtang mokalawat kita sa sakrament.

Kalihokan

• Sa unsa nga paagi nga kita magbinuotan atol sa sakrament?

Kalihokan

Papaminawa og maayo ang mga bata sa mga aksyon nga imong gihulagway. Sultihi sila sa pagbarug kon ikaw dunay isulti nila nga butang nga ilang kinahanglan nga buhaton o hunahunaon atol sa sakrament. Sultihi sila sa paglingkod kon ikaw dunay isulti nga kinahanglan dili nila buhaton o hunahunaon atol sa sakrament. Gamita ang mosunod nga mga ehemplo o pipila nga imong kaugalingong hinimo:

Kalihokan

• Maminaw og maayo samtang gipamulong ang mga pag-ampo sa sakrament.

• Hinumdumi nga ang Langitnong Amahan ug si Jesus naghigugma kanato.

• Maghunahuna nga moadto og piknik.

• Maghinumdom nga si Jesus miayo sa masakitong mga tawo.

• Makig-istorya sa imong igsoong lalaki o babaye.

• Magsige og balhin-balhin.

• Maghunahuna kabahin ni Jesus nga nanalangin sa mga bata.

Pagpamatuod

Hatag sa imong pagpamatuod kon unsa ka kamapasalamaton nga naa ang sakrament aron sa pagtabang kanato nga makahinumdom ni Jesukristo ug sa unsay iyang nabuhat alang kanato. Ipasabut nga mas magpasalamat kita kon ang tanan nagbinuotan atol sa sakrament aron ka makahunahuna og tarung kabahin ni Jesus.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

1. Padrowinga ang kada bata og usa ka hulagway sa iyang kaugalingon nga miambit sa sakrament. Labeli ang kada hulagway og Makahunahuna ko kang Jesus samtang moambit ko sa sakrament.

2. Pagdala og walay sulod nga mga tray sa sakrament alang sa pan ug tubig. Patan-awa ang mga bata ug pakupta sa mga tray. Ipahulagway sa mga bata kon unsay mahitabo atol sa pagdumala sa sakrament diha sa sakrament miting.

3. Ipadrama sa mga bata ang pipila sa ilang paborito nga mga istorya gikan sa kinabuhi ni Jesus.

Dugang nga mga Kalihokan para sa mas Gagmayng mga Bata

1. Ipasabut ang sakrament sa simpol nga paagi: Pakita og hulagway ni Jesus ug sultihi ang mga bata nga dunay usa ka panahon sa Dominggo nga atong hinumduman si Jesus sa usa ka espesyal nga paagi. Mao kini sa dihang mokaon kita og gamayng piraso sa pan ug moinom og gamayng tubig atol sa sakrament miting. Ipasabut nga atol sa sakrament atong hinumduman kon unsa kita ka mahal ni Jesus ug maghunahuna sa daghang mga butang nga iyang nabuhat aron sa pagtabang nato nga mahimong malipayon.

2. Kantaha o isulti ang mga pulong sa “Sultihi Ko sa mga Istorya ni Jesus” [Tell Me the Stories of Jesus] (Songbook sa mga Bata, p. 36) o “Si Jesus Buot nga Ako ang Sunbeam alang Kaniya” [Jesus Wants Me for a Sunbeam] (Songbook sa mga Bata, p. 38).

3. Tabangi ang mga bata sa pagbuhat sa mga aksyon sa mosunod nga kalihokan ginamit ang bersikulo samtang imong gisulti ang mga pulong:

   Ang Paglalang

   Si Jesus miingon nga ang adlaw mohayag (paghimo og dako nga lingin ibabaw sa ulo ginamit ang mga bukton),

   Kinahanglang mangatagak ang ulan (ipaubos ang mga kamot sa atubangan sa lawas samtang lihoklihokon ang mga tudlo),

   Ang mga bulak kinahanglang motubo (pinasawod nga kamot, ang mga palad maghayang)

   Si Jesus miingon nga ang mga kalanggaman kinahanglang mokanta (bukhara ug kumkuma ang mga tudlo sama sa sungo sa langgam),

   Ug mao kini, nahitabo (ikyugpos ang mga bukton).

   (Johnie B. Wood, sa Kanta, Tan-awa, Buhata, Aksyon nga mga Kanta alang sa mga Bata [Sing, Look, Do, Action Songs for Children], ed. Dorothy M. Peterson [Cincinnati: Standard Publishing Co., 1965].)

   Pahinumdumi ang mga bata nga si Jesus mihatag kanato og daghang mga butang aron mahimo kitang malipayon. Atol sa sakrament atong mapakita nga mapasalamaton kita pinaagi sa paghunahuna kabahin ni Jesus.