Ang Langitnong Amahan ug si Jesus Mihatag Kanato sa mga Kasulatan

Katuyoan

Aron sa pagtabang sa kada bata nga makasabut nga ang mga kasulatan nag lang kob sa mga pulong sa Langitnong Amahan ug ni Jesukristo ug nga makakat-on kita kabahin sa Langitnong Amahan ug ni Jesukristo pinaagi sa pagtuon sa mga kasulatan.

Pagpangandam

Tun-i sa mainampoong paagi ang Lucas 22:19-20; 3 Nephi 18:21; Doktrina ug mga Pakigsaad 59:6; ug Moises 7:11. Tan-awa usab sa Mga Baruganan sa Ebanghelyo (31110), kapitulo 10.
Pangandam sa pagsaysay sa usa sa imomg paborito nga mga istorya gikan sa mga kasulatan, nga maggamit og usa ka hulagway kon posible.
Mga materyal nga gikinahanglan:
1. Mga kasulatan (Biblia, Basahon ni Mormon, Doktrina ug mga Pakigsaad, ug Perlas nga Labing Bililhon).
2. Usa ka piraso nga panapton aron itabon sa mga kasulatan o usa ka piraso nga papel aron iputos niini.
3. Hulagway 1-3, Si Jesus ang Kristo (Pakete sa mga Hulagway sa Ebanghelyo 240; 62572); hulagway 1-18, Si Juan Bautista nga Nagbunyag ni Jesus (Pakete sa mga Hulagway sa Ebanghelyo 208; 62133); picture 1-44, Si Jesus nga Nagtudlo didto sa Western Hemisphere (Pakete sa mga Hulagway sa Ebanghelyo 316; 62380); picture 1-70, Ang Katapusang Panihapon (Pakete sa mga Hulagway sa Ebanghelyo 225; 62174).
Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Sa dili pa ang klase, taboni ang sa mga kasulatan ginamit ang panapton o pusta kini sa papel. Ibutang ang tinabunan nga mga kasulatan diha sa lamesa o sa lingkuranan diin makita kini sa mga bata. Ipasabut nga ikaw dunay gitabunan nga butang nga importante nganha kanimo ug sa tanan. Ipatag-an sa mga bata kon unsay imong gitabunan.

Human sa pipila ka mga pagtag-an, ipahikap sa mga bata ang panapton o papel. Kon ang usa ka bata motag-an nga usa kini ka libro o mga libra, sultihi ang mga bata nga sakto kana ug kuhai sa tabon ang mga libro. Sultihi ang mga bata nga kining mga libroha gitawag og mga kasulatan. Ipasulti sa mga bata ang pulong nga mga kasulatan sa pipila ka mga higayon.

Ang mga Kasulatan mao ang Sagrado nga mga Libro

Ipasabut nga ang mga kasulatan mao ang importante nga mga libro nga lahi sa ubang mga libro. Sagrado kini nga mga libro. Pahinumdumi ang mga bata nga ang butang nga sagrado makatabang kanato nga makahunahuna kabahin sa Langitnong Amahan ug ni Jesus. Ipasabut nga ang mga kasulatan nagsulti kanato kabahin sa Langitnong Amahan ug ni Jesus ug unsa nila kita ka mahal. Nagsulti kini kanato kon unsay gusto sa Langitnong Amahan ug ni Jesus nga atong buhaton aron kita magmalipayon.

Ipakita ug hinganli ang kada usa sa upat ka sumbanan nga mga libro, usa sa kada higayon. Kon ang pipila niini gihiusa sa usa ka libro, tudlo ngadto sa kilid diin ang mga ulohan gilista o pakli ngadto sa mga ulohang pahina sa kada usa sa sumbanan nga mga libro.

Kalihokan

Sultihi ang mga bata nga kinahanglan natong atimanon pag-ayo ang mga kasulatan ug mopakli og tarung sa mga pahina. Paanhaa ang mga bata sa atubangan sa klase usa sa kada higayon ug ipakita kon unsa sila ka maayong modala sa mga kasulatan ug sa pagpakli sa mga pahina.

Ipasabut nga ang mga kasulatan naglangkob sa mga istorya nga mga matuod. Kini nga mga istorya makatabang kanato nga masayud kon unsay gusto sa Langitnong Amahan ug ni Jesus nga atong buhaton. Ang mga istorya diha sa mga kasulatan makatabang kanato diha sa atong mga kinabuhi.

Istorya

Sultihi ang mga bata sa usa sa imong paborito nga mga istorya sa mga kasulatan, nga maggamit og usa ka hulagway kon posible. Ipasabut og maayo kon sa unsa nga paagi nga ang mga butang nga gitudlo niini nga istorya sa kasulatan nakatabang kanimo. Ipadayag nga gusto kaayo nimo nga mobasa sa mga istorya diha sa mga kasulatan.

Kanta

Tabangi ang mga bata sa pagkanta o sa pagsulti sa mga pulong sa “Sultihi Ko sa mga Istorya ni Jesus” [Tell Me the Stories of Jesus] (Songbook sa mga Bata, p. 36). Pahinumdumi ang mga bata nga ang mga istorya sa kasulatan nga ilang makat-unan sa Primary tinuod nga mga istorya.

Sultihi ko’s mga istorya ni Jesus,
Nga gusto kong masayran kon nia lang s’ya.
Nagkalainlaing hitabo,
Istoryang Jesus, sultihi ko.

Ang mga Kasulatan Naglangkob sa mga Pagtulun-an ni Jesus

Ipasabut nga ang pipila ka mga kasulatan gisulat sa mga tawo kinsa nakaila ni Jesus ug nagpuyo sa iyang panahon. Nakakita sila ni Jesus ug nakadungog kaniya nga nagtudlo. Kining mga tawhana misulat sa mga kasulatan aron nga ang tanan makakat-on kabahin ni Jesus ug sa iyang mga pagtulun-an ug nasayud nga anak siya sa Langitnong Amahan.

Iplastar ang hulagway 1-70, Ang Katapusang Panihapon. Pasultiha ang mga bata kon unsay ilang nahibaloan kabahin sa hulagway. Ipakita ang Biblia ug ipasubli sa mga bata ang ngalan niini. Paklia ang Biblia ngadto sa Lucas 22. Ipasabut nga si Jesus nagtudlo diha sa Biblia nga kinahanglan kitang moambit sa sakrament aron sa paghinumdom kaniya. Mikuha si Jesus og pan ug mipanalangin niini ug mihatag niini ngadto sa iyang mga disipulo (mga kaabag). Mikuha siya og kopa ug mipainom kanila. Basaha ang bahin sa bersikulo 19 diin miingon si Jesus, “Buhata ninyo kini sa paghandum kanako.” Ipasabut nga kini mga pulong ni Jesus.

Iplastar ang hulagway 1-44, Si Jesus nga Nagtudlo didto sa Western Hemisphere, ug pahinumdumi ang mga bata bahin sa unsay nahitabo diha sa hulagway. Ipakita ang Basahon ni Mormon ug ipasubli sa mga bata ang ngalan niini. Paklia ang Basahon ni Mormon ngadto sa 3 Nephi 18. Ipasabut nga si Jesus nagtudlo sa mga tawo og daghang mga butang. Basaha ang bahin sa bersikulo 21 diin si Jesus miingon, “Pag-ampo uban sa inyong mga banay.”

Unsa man ang gisulti ni Jesus ngari kanato nga atong buhaton sa atong mga pamilya?

Iplastar ang hulagway 1-3, Si Jesus ang Kristo. Ipakita ang Doktrina ug mga Pakigsaad ug ipasubli sa mga bata ang ngalan niini. Paklia ang Doktrina ug mga Pakigsaad ngadto sa seksyon 59. Ipasabut nga usa sa mga butang nga gitudlo ni Jesus mao nga kinahanglan natong higugmaon ang tanan. Basaha ang bahin sa bersikulo 6 diin miingon si Jesus, “Kamo mohigugma sa inyong silingan,”

Unsay gisulti ni Jesus nga buhaton?
Kinsa man ang inyong silingan?
Unsa man ang inyong bation kon mabination kamo ngadto sa uban ug nagpakita og gugma ngadto kanila?

Kanta

Tabangi ang mga bata sa pagkanta o sa pagsulti sa mga pulong sa “Si Jesus Miingon Higugmaa ang Tanan” [Jesus Said Love Everyone] (Songbook sa mga Bata, p. 39), nga maggamit sa mga aksyon nga gihulagway sa ubos:

Higugmaa ang tanan (ituy-od og maayo ang mga bukton); 
Jesus miingon (iyangu-yango ang ulo). 
Kon puno ‘ta sa gugma (ipatong ang mga kamot sa kasingkasing), 
Mao sab sila (gaksa ang kaugalingon). 

Iplastar ang hulagway 1-18, Si Juan Bautista nga Nagbunyag ni Jesus. Pasultiha ang mga bata kabahin sa hulagway. Ipasabut og maayo nga si Jesus gibunyagan ug nga gusto niya nga ang tanan mabunyagan. Ipakita ang Perlas nga Labing Bililhon ug ipasubli sa mga bata ang ngalan niini. Paklia ang Perlas nga Labing Bililhon ngadto sa Moises 7 ug isulti kon giunsa ni Jesus pagtudlo ang tawo nga ginganlan og Enoch sa pag-adto sa mga tawo ug mamunyag kanila. Basaha ang bahin sa bersikulo 11 diin miingon si Jesus, “Mobunyag diha sa ngalan sa Amahan, ug sa Anak, … ug sa Espiritu Santo.”

Iisa ang upat ka sumbanan nga mga basahon. Ipasabut og maayo nga ang mga pagtulun-an ni Jesus anaa sulod sa tanan niini.

Kanta

Unsa man kining mga libroha?
Kang kinsa man nga mga pagtulun-an ang makita diha sa mga kasulatan?
Nganong gisulat man ang mga kasulatan?
Unsa man ang inyong gibati nga masayud nga ang Langitnong Amahan ug si Jesus naghigugma kanato ug mihatag kanato og mga kasulatan?

Pagpamatuod

Ipadayag ang imong pasalamat ug gugma alang sa mga kasulatan. Hatag og pamatuod nga ang mga kasulatan maoy mga pulong sa Langitnong Amahan ug ni Jesus ug nga pinaagi sa pagtuon sa mga kasulatan makakat-on kita kon unsay gusto sa Langitnong Amahan ug ni Jesus nga atong buhaton.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

Piloa nga tinunga ang mga piraso sa papel aron makahimo og gagmayng mga replica sa mga hapin sa upat ka sumbanan nga mga basahon, usa ka set alang sa kada bata. Isulat ang mga ngalan sa sumbanan nga mga basahon diha sa mga hapin. Lungagi ang kilid sa kada hapin ug gamiti og usa ka piraso nga hilo o lambo aron hugpungon og higot ang upat ka mga hapin sa mga kasulatan sa kada bata.

Sa sulod sa kada hapin, isulat ang kasulatan nga gitudlo atol sa leksyon:

Biblia: Si Jesus mitudlo kanato bahin sa sakrament (Lucas 22:19).

Basahon ni Mormon: Si Jesus mitudlo kanato sa pag-ampo uban sa atong mga pamilya (3 Nephi 18:21).

Doktrina ug mga Pakigsaad: Si Jesus mitudlo kanato sa paghigugma sa atong mga silingan (D&P 59:6).

Perlas nga Labing Bililhon: Si Jesus mitudlo kanato nga magpabunyag (Moises 7:11).

Hatagi ang kada bata og set sa mga hapin aron madala sa balay. Sa pagbuhat nimo, ribyuha ang mga pagtulun-an ni Jesus nga gihisgutan diha sa leksyon.
Tabangi ang mga bata sa pagsag-ulo sa bahin sa ikawalo nga artikulo sa hugot nga pagtuo: “Kami nagtuo sa Biblia nga pulong sa Dios” ug “kami nagtuo usab sa Basahon ni Mormon nga pulong sa Dios.”
Pagkuha og mga hulagway sa pipila ka mga istorya sa Basahon ni Mormon gikan sa mga hulagway nga anaa niini nga manwal o gikan sa library sa meetinghouse. Ipakita ang kada hulagway ug hisguti sa daklit ang istorya nga gihulagway niini. Pahinumdumi ang mga bata nga ang mga kasulatan naglangkob og tinuod nga mga istorya. Pakantaha ang mga bata og “Mga Istorya sa Basahon ni Mormon” [Book of Mormon Stories] (Songbook sa mga Bata, p. 62).
Sultihi ang mga bata bahin sa usa ka higayon sa dihang ang mga kasulatan dunay espesyal nga kahulugan sa imong kinabuhi. Ipasabut kon sa unsa nga paagi nga ang mga kasulatan nakatabang kanimo ug unsay imong gibati bahin niini.
Pangita og mugbo nga mga kasulatan nga naglangkob sa mga pulong ni Jesus, sama sa unsay naa sa leksyon. l-recite ang kada kasulatan, nga magsugod sa mga pulong nga Si Jesus miingon. Pananglitan, “Si Jesus miingon, ‘Sumunod kamo kanako.’” Pagitsa og usa ka beanbag o laing humok nga butang ngadto sa usa ka bata ug ipasubli niya ang kasulatan inig ka human nimo ug dayon ipa-itsa og balik ang beanbag. Padayon sa pag-itsa sa beanbag hangtud nga ang kada bata nahatagan na og kahigayunan.

Dugang nga mga Kalihokan para sa mas Gagmayng mga Bata

Kantaha o isulti ang mga pulong sa “Mga Istorya sa Basahon ni Mormon” [Book of Mormon Stories] (Songbook sa mga Bata, p. 62) samtang mag-isa sa usa ka kopya sa Basahon ni Mormon o “Sultihi Ko sa mga Istorya ni Jesus” [Tell Me the Stories of Jesus] (Songbook sa mga Bata, p. 36) samtang mag-isa sa usa ka Biblia.
Isaysay sa daklit ang istorya bahin sa napulo ka mga sanglahon (tan-awa sa Lucas 17:11-19), ug dayon buhata ang mosunod nga kalihokan ginamit ang mga tudlo uban sa mga bata:

Napulo ka mga tawo ang nasakit (iisa ang napulo ka mga tudlo);

Giayo sila ni Kristo usa ka adlaw niana.

Simpol ra siyang namulong, ug ang ilang sakit nawala (paghimo og aksyon nga nagbabay)!

Dili ba katingalahan? Ug lain gyud (ibutang ang usa ka tudlo sa kilid sa ulo ug tan-aw nga naglibug)

Nga usa ra ka tawo (iisa ang usa ka tudlo)

Ang mipasalamat kaniya

Ug midayeg sa Dios (iisa ang duha ka mga bukton pataas)?

(Gikuha gikan ni Jean Shannon sa Bible Story Finger Plays and Action Rhymes [Cincinnati: Standard Publishing Co., 1964], p. 27.)

Ipakita sa mga bata kon asa kini nga istorya makit-an diha sa Biblia.
Pangutan-a ang mga bata kon unsa ang ilang paborito nga mga istorya sa kasulatan. Kon mahimo nimo, ipakita nila kon asa kini nga mga istorya makita diha sa mga kasulatan.