Leksyon 43

Kita Adunay Buhi nga Propeta

Katuyoan

Aron sa pagtabang sa kada bata nga makasabut nga mapanalanginan kita kon mosunod kita sa propeta.

Pagpangandam

1. Tun-i sa mainampoong paagi ang 1 Samuel 3:1-10, 19-20. Tan-awa usab sa Mga Baruganan sa Ebanghelyo (31110), kapitulo 9.

2. Ilista diha sa tagsa-tagsa nga mga piraso sa papel ang pipila ka mga pagtulun-an sa buhing propeta gikan sa mga pakigpulong sa komperensya o mga sinulat diha sa mga magasin sa Simbahan. Pag-andam og daghang mga papel nga dili mominus sa gidaghanon sa mga bata diha sa klase. Piloa ang mga piraso sa papel ug ibutang kini diha sa usa ka panaksan o basket. Ang mga pagtulun-an mahimong maglakip sa —

   • Magkat-on gikan sa mga kasulatan kada adlaw.

   • Magbalaan sa adlawng Igpapahulay.

   • Mag-ampo kada adlaw.

   • Moadto sa sakrament miting ug Primary.

   • Magmatinuoron.

3. Mga materyal nga gikinahanglan:

   1. Usa ka Biblia.

   2. Hulagway 1-4, Ang Unang Panan-awon (Pakete sa mga Hulagway sa Ebanghelyo 403; 62470); hulagway 1-29, Pagtukod sa Arka (Pakete sa mga Hulagway sa Ebanghelyo 102; 62053); hulagway 1-42, Ang Batang Lalaki nga si Samuel Gitawag sa Ginoo (Pakete sa mga Hulagway sa Ebanghelyo 111; 62498); hulagway 1-66, Si Moises ug ang Nagsiga nga Sampinit (Pakete sa mga Hulagway sa Ebanghelyo 107; 62239); usa ka hulagway sa buhing propeta.

4. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo,

Pang-atensyon nga Kalihokan

Usa sa matag higayon, ipakita ang mga hulagway nila ni Noe (hulagway 1-29), Moises (hulagway 1-66), ug Joseph Smith (hulagway 1-4). imbitara ang mga bata sa pagsulti sa unsay ilang nahibaloan kabahin sa unsay nahitabo diha sa kada hulagway.

Human mahisguti kon unsay nahibaloan sa mga bata kabahin sa mga hulagway, ipasabut sa daklit nga si Jesus misulti ni Noe sa paghimo og usa ka arka aron nga ang iyang pamilya maluwas gikan sa usa ka lunop. Si Jesus misulti ni Moises sa pagpalingkawas sa mga Israelitas gikan sa pagkaulipon. Si Jesus misulti ni Joseph Smith nga kinahanglan dili siya mopasakop sa bisan unsang simbahan nga diha na nianang higayuna sa yuta.

Ang mga Propeta Nakig-istorya sa Langitnong Amahan ug ni Jesukristo

Ipasabut nga sila si Noe, Moises, ug Joseph Smith tanan mga propeta. Ang propeta maoy usa ka tawo kinsa makig-istorya sa Langitnong Amahan ug ni Jesus. Kay ang Langitnong Amahan ug si Jesus wala man sa yuta aron sa pagtudlo kanato, duna silay mga propeta aron sa pagtabang kanila. Ang Langitnong Amahan ug si Jesus nagtudlo sa propeta, ug ang propeta nagtudlo kanato kon unsay kinahanglan natong buhaton aron mapanalanginan kita ug magmalipayon.

Istorya

Ipakita ang hulagway 1-42, Ang Batang Lalaki nga si Samuel Gitawag sa Ginoo, ug isaysay ang istorya ni Samuel nga gitawag nga mahimong usa ka propeta, ingon nga makita diha 1 Samuel 3:1-10,19-20. Basaha ang 1 Samuel 3:10 ngadto sa mga bata.

Istorya

• Kinsa man ang mitawag sa ngalan ni Samuel samtang diha siya sa higdaanan? (Si Jesus. Tan-awa sa 1 Samuel 3:4.)

• Kinsa man ang gituohan ni Samuel nga maoy mitawag kaniya? (Tan-awa sa 1 Samuel 3:5.)

• Unsa man ang gisulti ni Eli nga buhaton ni Samuel? (Tan-awa sa 1 Samuel 3:9.)

• Unsa man ang gisulti ni Samuel ngadto ni Jesus? (Tan-awa sa 1 Samuel 3:10.)

Ipasabut nga si Samuel usa pa ka batang lalaki sa dihang nakig-istorya niya si Jesus sa unang higayon. Sa dihang midako na siya, iyang gitudloan ang iyang katawhan kon unsay gusto sa Langitnong Amahan ug ni Jesus nga ilang buhaton.

Kalihokan

Hangyoa ang tulo ka mga bata sa pagpakaaron-ingnon nga mao sila si Samuel, Eli, ug Jesus ug ipadrama ang istorya. Sublia uban sa laing mga bata nga maoy modala sa mga papel, kon gusto pa.

Kita Dunay usa ka Propeta dinhi sa Yuta Karon

Ipakita ang litrato sa buhing propeta. Sultihi ang mga bata og butang nga imong nahibaloan kabahin sa propeta.

Pabaruga ang mga bata ug pagsultiha og, “Si (ngalan sa buhing propeta) usa ka propeta sa Dios.”

• Nganong nagkinahanglan man kita og usa ka buhing propeta? (Aron mahibalo kita sa unsay gusto sa Langitnong Amahan ug ni Jesus nga atong buhaton.)

Ipasabut nga ang propeta nagtudlo kanato pinaagi sa pagpamulong atol sa mga komperensya. Ang mga komperensya maoy dagkong mga miting nga tambungan sa daghang mga tawo. Mahimo kitang maminaw sa propeta diha sa telebisyon, radyo, o sa mga recording. Ang iyang mga pulong gisulat usab diha sa mga magasin sa Simbahan nga mabasa ngari nato sa atong mga ginikanan o sa uban.

Kalihokan

Papilia ang kada bata og usa ka piraso nga papel gikan sa panaksan o basket nga imong giandam. Basaha ang mensahe diha sa piraso nga papel ug hisguti kini sa daklit uban sa mga bata. Sultihi ang mga bata nga kini nga mga mensahe mao ang tanang mga butang nga gihangyo sa propeta nga atong buhaton.

Kalihokan

Hangyoa ang mga bata sa paghunahuna og mga paagi nga makasunod sila sa propeta. Pag-itsa o pagtunol og usa ka beanbag o humok nga butang ngadto sa kada bata ug mag-ingon, “Mosunod ko sa atong propeta pinaagi sa “ Ipahuman sa kada bata ang sentence uban sa paagi nga makasunod siya sa propeta.

Mapanalanginan Kita Kon Mosunod Kita sa Propeta

Gamita pag-usab ang mga hulagway nila ni Noe, Moises, Joseph Smith, ug sa buhing propeta. Ipasabut nga tungod kay ang pamilya ni Noe misunod kaniya, naluwas sila gikan sa usa ka lunop. Tungod kay ang mga Israelitas misunod ni Moises, gidala sila pagawas sa Ehipto ngadto na sa mas nindot nga dapit. Tungod kay ang mga tawo misunod ni Joseph Smith, nahimo silang mga miyembro sa Ang Simbahan ni Jesukristo sa mga Santos sa Ulahing mga Adlaw.

Ipasabut nga kining mga tawhana napanalanginan tungod kay misunod sila sa propeta, Mapanalanginan usab kita kon mosunod kita sa propeta.

Kanta

Tabangi ang mga bata sa pagkanta o sa pagsulti sa mga pulong sa koro sa “Sunda ang Propeta” [Follow the Prophet] (Songbook sa mga Bata, p. 58). Ipasabut nga ang mahisalaag nangahulugan og pagbuhat og sayop nga mga butang. Ipaisa sa usa ka bata ang hulagway sa buhing propeta samtang nanganta mo.

Sunda’ng propeta, sunda’ng propeta, sunda’ng propeta; di ka masaag.

Sunda’ng propeta, sunda’ng propeta, sunda’ng propeta; nasayud s’ya.

Pagpamatuod

Ipaambit ang imong pagpamatuod bahin sa buhing propeta. Sultihi ang mga bata nga nasayud ka nga kon kita mosunod sa propeta, mapanalanginan kita ug magmalipayon.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

1. Pagkuha og usa ka audiocassette o videocassette recording bahin sa buhing propeta nga pasalidahon alang sa mga bata, o pakita og mga hulagway niya gikan sa mga magasin sa Simbahan.

2. Kantaha o isulti ang mga pulong sa “Salamat, O Dios sa Propeta” (Mga Himno ug mga Awitsa mga Bata, no. 36) alang sa mga bata.

3. Isaysay pag-usab ang istorya kabahin sa panan-awon ni Presidente Lorenzo mahitungod sa Manluluwas (tan-awa sa leksyon 26). Ipasabut nga si Jesus mipakita ni Presidente Snow aron sa pagsulti kaniya kon unsaon sa pagpangulo sa Simbahan. Si Jesus misutli ni Presidente Snow kon unsay itudlo sa mga miyembro sa Simbahan.

4. Paghunahuna og pipila ka mga sitwasyon diin ang mga bata makasunod sa mga pagtulun-an sa propeta. Ihulagway ang kada sitwasyon ngadto sa klase, ug ipasulti sa mga bata o ipadrama kon unsay ilang buhaton sa kada sitwasyon aron sa pagsunod sa propeta. Panangiitan: “Nakakita mo og kwarta diha sa kusina. Ganahan mong moangkon niini, pero nakahibalo kamo nga sa inyo kining inahan. Unsa man ang inyong buhaton aron sa pagsunod sa pagtulun-an sa propeta nga mahimong matinuoron?”

Dugang nga mga Kalihokan para sa mas Gagmayng mga Bata

1. Iplastar ang hulagway sa buhi nga propeta sa tibuok panahon sa klase. Paggahin og panahon sa pagsulti sa mga bata kon si kinsa siya. Ipasabut nga nahigugma siya kanila ug gusto nga motabang kanila nga makabalik ngadto sa Langitnong Amahan ug ni Jesus. Sublia kini sa makaduha o makatulo ka mga higayon sa panahon sa klase.

2. Dulaa ang “Sunda ang Lider” uban sa mga bata. Pabaruga ang mga bata nga maglinya. Ang unang bata sa linya modagan, molukso, molayat, o mohimo og pipila ka laing aksyon sa laing bahin sa kwarto. Ang ubang mga bata mosunod sa unang bata, nga mobuhat kon unsay iyang gibuhat. Dayon ang unang bata moadto sa katapusan sa linya, ug ang sunod nga bata mao nay mahimong bag-o nga lider. Padayon hangtud nga ang kada bata aduna nay kahigayunan nga mahimong lider.

   Human sa dula, ipasabut nga ang propeta mao ang lider sa Simbahan. Kon atong sundon ang mga butang nga gisulti niya nga atong buhaton, mogiya siya kanato pabalik ngadto sa Langitnong Amahan ug ni Jesus.