Leksyon 45

Ang Pagkabanhaw ni Jesukristo (Pasko sa Pagkabanhaw)

Katuyoan

Aron sa pagtabang sa kada bata nga makasabut nga si Jesukristo nabanhaw.

Pagpangandam

1. Tun-i sa mainampoong paagi ang Lucas 23:33-24:12, 36-40, 51. Tan-awa usab sa Mga Baruganan sa Ebanghelyo (31110), kapitulo 12.

2. Mga materyal nga gikinahanglan:

   1. Usa ka Biblia.

   2. Hulagway 1-3, Si Jesus ang Kristo (Pakete sa mga Hulagway sa Ebanghelyo 240; 62572); hulagway 1-16, Ang Pagkahimugso (Pakete sa mga Hulagway sa Ebanghelyo 201; 62495); hulagway 1-55, Wali sa Bukid (Pakete sa mga Hulagway sa Ebanghelyo 212; 62166); hulagway 1-59, Ang Paglansang sa Krus (Pakete sa mga Hulagway sa Ebanghelyo 230; 62505); hulagway 1-72, Si Jesus nga Nag-ampo sa Getsemani (Pakete sa mga Hulagway sa Ebanghelyo 227; 62175); hulagway 1-73, Ang Paglubong ni Jesus (Pakete sa mga Hulagway sa Ebanghelyo 231; 62180); hulagway 1-74, Gipakita ni Jesus ang Iyang mga Samad (Pakete sa mga Hulagway sa Ebanghelyo 234; 62503).

3. Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.

Mga Kalihokan sa Pagkat-on

Pag-imbitar og usa ka bata sa paghatag sa pangbukas nga pag-ampo.

Pang-atensyon nga Kalihokan

Gunite ang hulagway 1-3, Si Jesus ang Kristo, nga ang atubangan magkulob diha sa imong paa. Sultihi ang mga bata nga mag-istorya kabahin sa usa ka tawo kinsa importante gayud kaayo. Hangyoa ang mga bata sa pagtag-an kon si kinsa kining tawhana human ka makahatag kanila sa mosunod nga mga timailhan:

Pang-atensyon nga Kalihokan

1. Kining tawhana naghigugma pag-ayo sa tanan.

2. Nagpuyo siya dinhi sa yuta sa dugay nang panahon ang milabay ug mi-organisar sa iyang simbahan.

3. Iya kitang gitudloan kon unsaon sa pagpakabuhi ug magmalipayon.

4. Iyang gipanalanginan ang mga tawo ug misulti kanila nga magmabination ug magmahigugmaon.

Kon ang mga bata nakatag-an na (o imo silang gisultihan) nga kanang tawhana mao si Jesus, iplastar ang hulagway.

Si Jesus Naghigugma Kanato

Pahinumdumi ang mga bata nga si Jesus mao ang anak sa Langitnong Amahan. Ang Langitnong Amahan mipadala ni Jesus ngari sa yuta alang sa usa ka importanting katuyoan.

Istorya

Ipakita ang hulagway 1-16, Ang Pagkahimugso. Isulti sa daklit ang kabahin sa pagkahimugso ni Jesus. Mahimo nimong patabangon ang mga bata sa pagsaysay sa istorya. Pahinumdumi sila nga si Jesus usa ka espesyal nga batang masuso.

Ipakita ang hulagway 1-55, Wali sa Bukid. Ipasabut nga sa dihang midako na si Jesus, iyang gi-organisar ang iyang simbahan ug mitudlo sa mga tawo kon unsaon sa pagpakabuhi ug sa paghigugma sa usag usa.

Kanta

Pabaruga ang mga bata ug pakantaha o pasultiha sa mga pulong sa “Si Jesus Miingon Higugmaa ang Tanan” [Jesus Said Love Everyone] (Songbook sa mga Bata, p. 39), nga maggamit sa mosunod nga mga aksyon:

Higugmaa ang tanan (ituy-od og maayo ang mga bukton);

Jesus miingon (iyangu-yango ang ulo).

Kon puno ‘ta sa gugma (ipatong ang mga kamot sa kasingkasing),

Mao sab sila (gaksa ang kaugalingon).

Ipakita ang hulagway 1-72, Si Jesus nga Nag-ampo sa Getsemani.

Kanta

• Unsa man ang gibuhat ni Jesus dinhi sa hulagway?

Ipasabut nga sa wala pa mamatay si Jesus, miadto siya aron mag-ampo sa usa ka dapit nga gitawag og Tanaman sa Getsemani. Nag-antus si Jesus didto alang sa atong mga sala aron kita makahinuisol ug mapasaylo sa sayop nga mga butang nga atong nabuhat. Si Jesus mao ang bugtong tawo kinsa adunay gahum sa pagbuhat niini alang kanato. lya kadtong gibuhat tungod kay gihigugma gyud kita niya pag-ayo.

Si Jesus Nabanhaw

Ipasabut nga daghang mga tawo kinsa nagpuyo sa panahon ni Jesus dinhi sa yuta ang naghigugma kaniya. Bisan pa man niana, ang pipila ka mga tawo wala makagusto kang Jesus. Wala sila motuo nga anak siya sa Langitnong Amahan.

Istorya

Ipakita ang hulagway 1-59, Ang Paglansang sa Krus. Ipasabut sa simpol mga termino ang Paglansang sa Krus, ingon nga gihulagway diha sa Lucas 23:33-46. Ipasabut nga ang mga tawo kinsa wala makagusto ni Jesus hilabihan ka pintas ngadto kaniya. Ang mga sundalo milansang sa mga kamot ug mga tiil ni Jesus ug mibitay kaniya sa usa ka krus. Ilang gibiyaan si Jesus diha sa krus hangtud namatay siya. (Pagbantay sa pagsaysay niini nga istorya ug sa pagbuhat sa kalihokan ginamit ang bersikulo sa ubos. Ang pipila ka mga bata mahimong sensitibo kaayo sa ideya nga ang mga tawo mipasakit kang Jesus.)

Ipasabut nga sa dihang namatay na si Jesus, ang iyang espiritu mibiya sa iyang lawas ug miadto sa langit. Pahinumdumi ang mga bata nga kada usa kanato dunay usa ka espiritu. Ang atong mga espiritu dili makita, pero mao kini ang nakapabuhi kanato.

Ipakita ang hulagway 1-73, Ang Paglubong ni Jesus. Ipasabut nga ang mga tawo nga naghigugma kang Jesus mikuha sa iyang lawas ug miputos niini og maayo ginamit ang mga panapton. Ilang gidala ang lawas ni Jesus ngadto sa lubnganan (usa ka sama sa langub nga dapit diin ang mga tawo gipanglubong) ug mainampingong mibutang sa iyang lawas didto (tan-awa sa Lucas 23:50-56).

Ipakita ang hulagway 1-74, Gipakita ni Jesus ang lyang mga Samad. Ipasabut nga tulo ka adlaw human sa iyang kamatayon, si Jesus nabanhaw. Nabuhi na usab siya pagbalik. Sa dihang namatay si Jesus, ang iyang espiritu mibiya sa iyang lawas. Sa dihang nabanhaw siya, ang iyang espiritu mibalik sa iyang lawas. Si Jesus maoy unang tawo nga nabanhaw.

Ipasabut nga daghang mga tawo ang nakakita ni Jesus human siya nabanhaw (tan-awa sa Lucas 24). Si Jesus nagtudlo sa iyang mga higala ug mipakita kanila sa iyang nabanhaw nga lawas (tan-awa sa Lucas 24:36). lyang gipahikap ang iyang mga higala kaniya aron masayud sila nga ang iyang nabanhaw nga lawas dunay unod ug bukog (tan-awa sa Lucas 24:39-40). Human magtudlo sa mga tawo, si Jesus nakig-uban pag-usab sa Langitnong Amahan (tan-awa sa Lucas 24:51).

Istorya

• Nganong gusto man ni Jesus nga ang mga tawo mohikap kaniya? (Tan-awa sa Lucas 24:36-40.)

• Diin man moadto si Jesus human siya mobiya sa mga tawo? (Tan-awa sa Lucas 24:51.)

Ipasabut nga ang adlaw nga si Jesus nabanhaw mao ang unang Pasko sa Pagkabanhaw. Atong gisaulog ang Pasko sa Pagkabanhaw kada tuig aron sa pagtabang kanato nga makahinumdom nga si Jesus nabanhaw.

Kalihokan

Pabaruga ang mga bata ug ipabuhat ang mga aksyon sa mosunod nga bersikulo uban kanimo:

Si Jesus nabuhi pag-usab

Tulo ka adlaw human siya namatay (iisa ang tub ka mga tudlo).

Dunay mga agi sa linansangan diha sa iyang mga kamot ug mga tiil (tudlo ngadto sa palad sa kamot ug ngadto sa tiil)

Ug usa ka samad sa bangkaw diha sa iyang kilid (tudlo ngadto sa kilid).

Si Jesus miabut ug nagtudlo kanamong tanan (ituy-od og maayo ang mga bukton)

Aron matinud-anong mosunod sa ebanghelyo (ikiyugpos ang mga bukton).

Tungod kay nabanhaw man si Jesus,

Kita mabanhaw usab (iyangu-yango ang ulo).

Kita Pagabanhawon

Tabangi ang mga bata nga makasabut nga si Jesus mibalik pagkabuhi human siya namatay. Si Jesus buhi karon didto sa langit, ug dili na gayud siya mamatay pag-usab. Ipasabut nga si Jesus mihimong posible nga kita mabanhaw sama kaniya. Nagpasabut kini nga ang kada usa kanato mabuhi pag-usab human kita mamatay.

• Nakahibalo ba mo og usa ka tawo nga namatay?

Ipasabut nga kon ang mga tawo mamatay, ang ilang mga espiritu buhi pa gihapon. Sa umaabot nga adlaw sila pagabanhawon, nga nangahulugan nga ang ilang mga lawas ug mga espiritu magkahiusa pag-usab sama sa kang Jesus. Mahimo nimong ipasabut sa mga bata nga mahimong dili kita mabanhaw pagkahuman sa tulo ka adlaw, sama kang Jesus, pero kitang tanan pagabanhawon sa umaabot nga adlaw.

Ipasubli sa mga bata ang pulong nabanhaw sa pipila ka mga higayon ug ipasulti kon unsay kahulugan niini.

Ipasabut kon unsa ka nindot ang masayud nga ang tanang mga tawo nga atong nailhan ug gihigugma—ang atong mga ginikanan, mga igsoong lalaki, mga igsoong babaye, mga apohan, ug mga higala—mabanhaw. Kitang tanan mabuhi pag-usab human kita mamatay. Si Jesus mihimo niining posible.

Pagpamatuod

Hatag sa imong pagpamatuod nga si Jesus naghigugma sa kada usa kanato. Tungod sa iyang dakong gugma alang kanato, nag-antus siya ug namatay ug nabanhaw aron ang kada usa kanato mahimo usab nga mabanhaw sa umaabot nga adlaw.

Mga Kalihokan sa Pagpalambo

Pagpili og pipila niining mga kalihokan nga gamiton sa panahon sa leksyon.

1. Hisguti sa daklit ang pipila ka mga kasinatian ug mga kustombre sa Pasko sa Pagkabanhaw nga pamilyar sa mga bata. Dawata nga ang sekular nga mga kustombre sa Pasko sa Pagkabanhaw makalingaw, pero tabangi ang mga bata sa pagbuwag niadtong mga ideyaha gikan sa tinuod nga kahulugan sa Pasko sa Pagkabanhaw.

2. Ipakita sa mga bata ang usa ka gwantis o putos sa kamot. Ikomparar ang atong yutanong mga lawas ngadto sa kamot nga dunay gwantis. Ipakita kon giunsa sa kamot (ang espiritu) pagpalihok ang gwantis (ang lawas). Tangtanga ang gwantis ug ipasabut nga sama kini sa pisikal nga kamatayon. Ang espiritu ug ang lawas gibulag, ug ang lawas dili makalihok. Isul-ob og balik ang gwantis sa imong kamot ug ipasabut nga sama kini sa pagkabanhaw. Karon ang espiritu ug ang lawas gihiusa pag-usab. Pahinumdumi ang mga bata nga tungod kay si Jesukristo nabanhaw, ang tanang mga tawo mabanhaw sa umaabot nga adlaw.

3. Paghimo og mga kopya sa handout nga giulohan og “Si Jesus Maoy Atong Mahigugmaong Higala,” nga makita sa katapusan sa leksyon 6, ug pakolori kini sa mga bata.

4. I-itsa o itunol ang usa ka beanbag o laing humok nga butang ngadto sa usa ka bata ug patubaga siya sa usa sa mga pangutana sa ubos (o usa ka susama nga pangutana) sa dili pa moitsa o motunol sa beanbag balik kanimo. Padayon hangtud ang kada bata duna nay kahigayunan sa pagtubag og usa ka pangutana.

   • Nganong magsaulog man kita sa Pasko sa Pagkabanhaw?

   • Kinsa man ang unang tawo nga nabanhaw?

   • Unsay buot ipasabut sa mahimong mabanhaw?

   • Diin man gibutang ang lawas ni Jesus human siya namatay?

   • Human si Jesus nabanhaw, daghan bang mga tawo ang nakakita ni Jesus?

   • Nganong gipahikap man ni Jesus ang mga tawo sa iyang nabanhaw nga lawas?

   • Kinsa pa man ang mabanhaw tungod kay si Jesus nabanhaw man?

5. Tabangi ang mga bata sa pagkanta o sa pagsulti sa mga pulong sa “Nabuhi Ba Gyud si Jesus Pag-usab” [Did Jesus Really Live Again]?” (Songbook sa mga Bata, p. 45) o “Si Jesus Nabanhaw” [Jesus Has Risen] (Songbook sa mga Bata, p. 44).

Dugang nga mga Kalihokan para sa mas Gagmayng mga Bata

1. Tabangi ang mga bata sa paghimo sa mga aksyon sa mosunod nga kalihokan ginamit ang bersikulo samtang imong isulti ang mga pulong:

   Si Jesus nabanhaw!

   Mao ning dapita diin siya gipahimutang (tudloa);

   Tan-awa, ang bato napadaplin na!

   Duko; tan-awa (duko ug tabuni ang mga mata ginamit ang kamot).

   Wala na siya dinhi (barug)!

   Nabanhaw si Jesus! Pagmalipayon (ipakpak ang mga kamot)!

   (Dana Eynon, sa Bible Story Finger Plays and Action Rhymes [Cincinnati: Standard Publishing Co., 1964], p. 29.)

2. Ipasabut nga si Jesus namatay ug nabanhaw sa panahon sa tingpamulak. Ang panahon sa tingpamulak mao ang panahon sa bag-ong kinabuhi. Ang mga kahoy ug ang mga bulak nagsugod na usab sa pagtubo. Daghang mga hayop ang mangatawo sa tingpamulak. Padrowinga ang kada bata og usa ka hulagway sa mga bulak o batang mga hayop. Ipakita ang hulagway 1-3, Si Jesus ang Kristo, ug ipasabut nga tungod kay si Jesus nabanhaw, kitang tanan mabuhi pag-usab human kita mamatay.

3. Kantaha o isulti ang mga pulong sa “Si Jesus Atong Mahigugmaong Higala” [Jesus Is Our Loving Friend] (Songbook sa mga Bata, p. 37). Pahinumdumi ang mga bata nga atong gisaulog ang Pasko sa Pagkabanhaw aron sa paghinumdom ni Jesus ug sa iyang pagkabanhaw.