Leksyon 46
Ang Pagkatawo ni Jesukristo (Pasko)
Katuyoan
Aron sa pagtabang sa kada bata nga mobati og pasalamat alang sa pagkahimugso ni Jesukristo.
Pagpangandam
-
Tun-i sa mainampoong paagi ang Mateo 2:1-12 ug Lucas 1:26-35; 2:1-20.
-
Pagpakisayud og pipila ka simpol nga mga detalye bahin sa mga pagkahimugso sa mga bata diha sa imong klase, sama sa kon diin sila natawo, unsa ang kolor sa ilang buhok nianang higayuna, ug diin sila nagpuyo sa unang semana sa ilang mga kinabuhi. Magmabination ngadto sa mga pagbati ni bisan kinsa nga sinagop nga mga bata.
-
Paggunting og mga papel (nga mga 20 sentimetros ang gitas-on ug 4 sentimetros ang gilapdon) alang sa mga kadena sa Pasko [Christmas chains], Paggunting og igong mga papel alang sa kada bata aron masumpayan pa ang kadena.
-
Pagsulat og usa ka pahinumdom nga magpasabut sa kadena sa Pasko [Christmas chain] (tan-awa sa leksyon) ngadto sa mga ginikanan sa kada bata, aron nga makaawhag sila sa ilang anak sa pagbuhat og maayong mga binuhatan.
-
Mga materyal nga gikinahanglan:
-
Usa ka Biblia.
-
Usa ka gamayng talan-awon sa Pagkahimugso. Mahimo kang mogamit og batang monyeka nga giputos og habol, nga naghigda diha sa usa ka gamayng kahon. Paggunting og usa ka bitoon gikan sa papel aron ibutang ibabaw sa talan-awon sa pagkahimugso. Kon walay talan-awon sa pagkahimugso, gamita ang hulagway 1-75, Ang Pagkahimugso ni Jesus (Pakete sa Hulagway sa Ebanghelyo 200; 62116).
-
Mga krayola ug glue.
-
Hulagway 1-75, Ang Pagkahimugso ni Jesus (Pakete sa Hulagway sa Ebanghelyo 200; 62116); hulagway 1-76, Walay Lawak sa Balay-Paabangan (62115); hulagway 1-77, Ang Pagpahibalo bahin sa Pagkahimugso ni Kristo ngadto sa mga Magbalantay sa Karnero (Pakete sa Hulagway sa Ebanghelyo 202; 62117); picture 1-78, Ang Maalamon nga mga Tawo (Pakete sa Hulagway sa Ebanghelyo 203; 62120).
-
-
Himoa ang gikinahanglang mga pagpangandam alang sa bisan unsang mga kalihokan sa pagpalambo nga gusto nimong gamiton.
Mga Kalihokan sa Pagkat-on
Pag-imbitar og usa ka bata sa paghatag sa pangbukas nga pag-ampo.
Pang-atensyon nga Kalihokan
Pabaruga ang usa ka bata tapad nimo samtang nagsaysay ka sa mga detalye nga imong nasayran kabahin sa iyang pagkahimugso. Sublia alang sa kada bata sa klase.
Atong Gisaulog ang Pagkahimugso ni Jesukristo atol sa panahon sa Pasko
Ipasabut nga tungod kay panahon kini sa Pasko, nagsaulog kita sa pagkahimugso sa usa ka tawo nga gihigugma natong tanan.
-
Kang kinsa man nga pagkahimugso ang atong gisaulog?
Istorya
Isaysay ang istorya kabahin sa pagbisita sa anghel ngadto kang Maria, ingon nga makita diha sa Lucas 1:26-35. Ipasabut nga ang anghel misulti ni Maria nga mamahimo siyang inahan sa Anak sa Dios, nga si Jesus.
Istorya
-
Unsa man ang pangalan sa inahan ni Jesus? (Tan-awa sa Lucas 1:27.)
-
Kinsa man ang amahan ni Jesus? (Langitnong Amahan. Tan-awa sa Lucas 1:35.)
Ipasabut nga si Jose dili mao ang amahan ni Jesus. Maayo siya nga tawo nga gipili aron sa pag-atiman kang Jesus. Ang anghel nagpakita ngadto ni Jose pinaagi sa usa ka damgo ug misulti kaniya bahin sa mahinungdanong batang masuso nga mabatunan ni Maria. Ang anghel miingon kang Jose nga si Maria kinahanglan mahimo niyang asawa.
Istorya
Ipakita ang hulagway 1-76, Walay Lawak sa Balay-Paabangan, ug isulti ang kabahin sa biyahe nila ni Jose ug Maria gikan sa Nazaret padulong ngadto sa Bethlehem, nga makita diha sa Lucas 2:1-7. Basaha og kusog ang Lucas 2:7, nga magpasabut sa bisan unsang mga pulong nga dili pamilyar sa mga bata.
Kalihokan
Payak-a o paludha ang mga bata diha sa salug atubangan sa talan-awon sa Pagkahimugso. Mahimo kang mag-andam og habol nga ilang kayak-an. Ipasa palibut ang hulagway 1-75, Ang Pagkahimugso ni Jesus, ug pasultiha ang kada bata bahin sa usa ka butang nga iyang nakita sa hulagway.
Kalihokan
Kanta
Tabangi ang mga bata sa pagkanta o sa pagsulti sa mga pulong sa “Didto sa Pasungan” [Away in a Manger] (Songbook sa mga Bata, p. 26). Usba ang mga lihok sa kamot ug sa bukton aron mohaum sa mga pulong.
Didto’s pasungan, wa’y kunang katulgan,
Sa batang si Jesus wa’y kabutangan;
Kabitoonan sa langit nagbantay,
Sa batang si Jesus, natulog sa kumpay.
Istorya
Ipakita ang hulagway 1-77, Ang Pagpahibalo bahin sa Pagkahimugso ni Kristo ngadto sa mga Magbalantay sa mga Karnero, ug sulti kabahin sa pagbisita sa mga magbalantay sa mga karnero, nga gihulagway diha sa Lucas 2:8-20.
Istorya
-
Ngano nga ang mga magbalantay sa mga karnero nangahadiok man? (Tan-awa sa Lucas 2:9.)
-
Unsa man ang gisulti sa mga anghel ngadto sa mga magbalantay sa mga karnero? (Tan-awa sa Lucas 2:10-12.)
-
Unsa man ang gibuhat sa mga magbalantay sa mga karnero human sa ilang pagbisita sa batang si Jesus? (Tan-awa sa Lucas 2:17, 20.)
Istorya
Ipakita ang hulagway 1-78, Ang Maalamon nga mga Tawo, ug sultihi bahin sa pagbisita sa maalamon nga mga tawo, ingon nga gihulagway diha sa Mateo 2:1-12.
Kalihokan
Pabaruga ang mga bata ug pakaaron-ingna nga magsakay og mga kamelyo libut sa kwarto, nga magsunod sa bitoon nga mogiya kanila ngadto sa batang si Jesus.
Human sa pipila ka mga biyahe libut sa kwarto, pakanauga ang mga bata sa ilang mga kamelyo ug pabalika ngadto sa talan-awon sa pagkahimugso. Ipasabut nga sa dihang ang maalamon nga mga tawo nakakita sa batang si Jesus, si Jose nakakita na og mas maayong dapit nga kapuy-an sa pamilya ug wala na sila didto sa pasungan. Pahinumdumi ang mga bata nga ang maalamon nga mga tawo nagdala og mga gasa nga bulawan, insenso, ug mira. Pasultiha ang kada bata kon ang iyang gipakaaron-ingnon nga gasa bulawan ba, insenso, o mira ug dayon ihatag kini ngadto sa batang si Jesus.
Ang Atong Gasa ngadto kang Jesus Mao ang Mahimong mahisama Kaniya
Ipasabut nga kada Pasko samtang nagsaulog kita sa adlawng natawhan ni Jesus, makahatag kita og mga gasa ngadto kaniya. Dili kita makahatag og mga gasa nga bulawan, insenso, ug mira sama sa gibuhat sa maalamon nga mga tawo, pero makahatag kita og laing matang sa gasa. Naghatag kita og gasa ngadto ni Jesus kon maningkamot kitang mahisama kaniya. Mahisama kita ni Jesus kon magmabination kita ngadto sa atong pamilya ug mga higala.
Kalihokan
Tabangi ang kada bata sa paghimo og usa ka kadena sa Pasko [Christmas chain] nga dunay pipila ka mga sumpay. Pakolori sa mga bata ang ilang mga sumpay ug dayon ihiusa pagpapilit ang mga sumpay (tan-awa ang ilustrasyon sa katapusan sa leksyon). Sultihi ang mga bata sa pagbutang sa ilang mga kadena sa usa ka dapit sa ilang mga balay diin kini magpahinumdom kanila sa pagbuhat og mabinationg mga buhat alang sa uban isip mga gasa ngadto kang Jesus. Awhaga ang mga bata sa pagbuhat og usa ka mabinationg buhat bisan usa kada adlaw hangtud sa Pasko.
Tabangi ang mga bata sa paghunahuna og mabinationg mga buhat nga ilang mabuhat. Pahinumdumi sila nga kon magbuhat sila og mabinationg mga buhat, naghatag sila og maanindot nga gasa ngadto kang Jesus. Hatagi ang kada bata og usa ka sulat nga magpasabut sa kadena ngadto sa iyang mga ginikanan.
Pagpamatuod
Ipasabut nga ang pagkahimugso ni Jesukristo mao ang usa sa pinaka importante nga mga butang nga sukad nahitabo sa yuta. Ipadayag ang imong gugma alang kang Jesus ug sa imong tinguha nga mahisama kaniya, dili lamang atol sa panahon sa Pasko kondili sa tibuok tuig.
Mga Kalihokan sa Pagpalambo
Pagpili og pipila niining mga kalihokan nga gamiton sa panahon sa leksyon.
-
Isaysay pag-usab ang istorya bahin sa pagkahimugso ni Jesus samtang idrama sa mga bata ang mga bahin ni Jose, Maria, ang tigbantay sa balay-paabangan, ang mga magbalantay sa mga karnero, ug ang maalamong mga tawo. Paggamit og mga props sama sa usa ka monyeka nga batang masuso, usa ka gamayng habol, ug usa ka dakong panyo, kon anaa kini. Hatagi ang kada bata og kahigayunan nga makaapil. Mahimo nimong ipasubli ang kalihokan, nga mopadala sa mga bata og lainlaing mga papel.
-
Tabangi ang mga bata sa paggunting o sa pagdrowing og simpol nga mga dekorasyon nga bitoon. Pakolori sa mga bata ang ilang mga dekorasyon, ug paghigut og hilo ngadto sa kada bitoon aron nga ang bata makabitay niini diha sa usa ka dapit sa iyang balay.
-
Hisguti ang pipila ka komersyal nga mga pagpangandam alang sa Pasko nga nabantayan sa mga bata. Tabangi sila nga makasabut nga ang mga butang sama sa mga gasa ug mga salosalo makalingaw, pero ang Pasko kabahin gayud sa pagkahimugso ni Jesukristo ug sa kaimportante sa pagpokus diha kaniya ug sa iyang kinabuhi.
-
Hisguti ang lokal nga mga kustombre sa Pasko nga nagsentro kang Kristo nga malingaw kamo o inyong nahibaloan. Imbitara ang mga bata sa pagsulti kabahin sa bisan unsa nga mga tradisyon atol sa panahon sa Pasko nga malingaw ang ilang mga pamilya.
Dugang nga mga Kalihokan para sa mas Gagmayng mga Bata
-
Papakaaron-ingna ang mga bata nga mga magbalantay sa mga karnero nga namahulay sa tugwayanan, Tabangi sila sa pagdrama sa gibating kahadlok sa mga magbalantay sa mga karnero sa dihang nakakita sila og anghel, dayon sa kalipay nga ilang gibati sa dihang nakasabut sila sa balita. Tabangi sila sa paghunahuna nga naminaw sa mga anghel nga nanganta ug nagtan-aw sa matahum nga panganod sa kagabhion ug sa pagkakita sa bitoon. Magkuyog sa pagpanglakaw libut sa kwarto aron sa pagpangita sa batang masuso. Pangluhod atubangan sa batang masuso nga si Jesus nga diha sa pasungan, ug kanta og usa ka awit sa pagdayeg.
-
Tabangi ang mga bata sa pagbuhat sa mga aksyon sa mosunod nga bersikulo samtang imong isulti ang mga pulong:
Usa ka bata diha sa pasungan (tabyug-tagyuga ang mga bukton nga daw nagduyan og bata),
Naa sa duol ang mahigugmaong inahan (ituy-od ang mga bukton),
Usa ka bitoon ang nagdan-ag sa kalangitan (tudlo nga natingala ngadto sa panganod),
Ang Anak sa Dios ania (ipakpak ang mga kamot sa kalipay)!
-
Kantaha o isulti ang mga pulong sa [Jesus Said Love Everyone] (Songbook sa mga Bata, p. 39). Pahinumdumi ang mga bata nga atong gisaulog ang pagkahimugso ni Jesus atol sa panahon sa Pasko.
-
Paghimo og simpol nga mga ginunting sa papel nga batang masuso nga si Jesus nga giputos sa mga bakbak. Pangolekta og laya nga mga sagbut, uhot, o dagami ug dad-a kini aron mapapilit sa mga bata ngadto sa usa ka “pasungan” (usa ka kwadrado nga papel). Ipapilit sa mga bata ang ginunting sa batang masuso nga si Jesus diha sa ibabaw sa higdaanan nga sagbut o dagami.
