Pagtudlo Ginamit Kini nga Manwal

Mga Manwal sa Primary ug Panahon sa Pagpakigbahin

Kini nga manwal adunay mga leksyon alang sa pagtudlo sa mga bata nga mag-edad og tres anyos inig ka 1 sa Enero. Ang mga titser mahimong mogamit sa manwal alang sa mga bata nga nag-edad og 18 ka bulan ngadto sa tres anyos. Kon ang mga bata nga wala pay tres anyos moapil og Primary, kinahanglang adto sila sa klase sa nursery lahi gikan sa mga tres anyos gawas kon ang ward o branch gamay ra kaayo. Kon adunay sobra sa walo o napulo ka mga bata nga parehog edad sa usa ka ward o branch, mahimong bahinon ang klase.

Kinahanglang basahon sa mga titser sa nursery ang “Paggamit sa Manwal diha sa Nursery,” sugod sa pahina x, dugang niini nga seksyon.

Kinahanglang magmainampoon ang mga lider ug mga titser kon unsaon nga maorganisar pag-ayo ang mga klase ug magamit ang mga leksyon ug mga kalihokan niini nga manwal aron matubag ang mga panginahanglan sa mga bata sa ilang mga ward o branch.

Ang Klase sa Tres Anyos

Ang mga bata nga magtres anyos inig 1 sa Enero apil niining klase sa tres anyos.

Katuyoan

Ang katuyoan sa klase sa tres anyos nga mga bata mao ang pagtabang sa mga bata nga makapalambo og pagsabut ug gugma alang sa Langitnong Amahan ug ni Jesukristo, makaapil sa positibo nga mga kasinatian sa Primary, ug mobati sa kabililhon sa kaugalingon.

Pag-ampo

Kada klase kinahanglang sugdan ug tapuson sa pag-ampo sa usa ka bata. Sa kasagaran ang pangbukas nga pag-ampo himoon sa sinugdanan sa leksyon, ug ang panapos nga pag-ampo himoon sa pagkahuman sa klase. Tudloi ang mga bata nga mohatag og mubo, simpol nga mga pag-ampo. Tabangi sila kon gikinahanglan.

Iskedyul sa Oras

Kining klaseha naghatag og hinayhinay nga transisyon gikan sa klase sa nursery ngadto sa regular nga Primary. Sa unang bahin sa tuig, mas maayo nga ang nag-edad og tres anyos adunay panahon sa pagpakigbahin og kalihokan sa ilang kaugalingong klasrom. Sa nahibiling bahin sa tuig, mahimo silang makig-uban sa ubang mga bata sa Primary. Ang kahingkod sa mga bata diha sa klase maoy makadeterminar kon duna bay kausaban sa klase. Obserbahi ang mga bata kon sila andam na ug konsultaha ang kapangulohan sa Primary aron madeterminar kanus-a ang kausaban himoon. Ang mga bata nga nag-edad og tres anyos mahimong moapil sa pagsugod ug panapos nga tulumanon uban sa laing mga bata sa Primary sa tibuok tuig.

Ang Primary sa kasagaran molungtad og 1 ka oras ug 40 ka minutos. Ang pagsugod ug panapos nga tulumanon molungtad og 20 ka minutos, 5 ka minutos alang sa mga bata nga moadto sa ilang mga klasrom. Kon ang mga bata nga nag-edad og tres anyos maghimo sa ilang panahon sa pakigbahin sa ilang kaugalingong klasrom, 75 minutos ang gidugayon sa klase. Ang mosunod nga gisugyot nga iskedyul mahimong usbon sumala sa lokal nga mga panginahanglan:

Oras sa Pag-abiabi:	10–15 ka minutos
Oras sa Leksyon:	25–30 ka minutos
Oras sa Pagpakigbahin ug kalihokan:	20–25 ka minutos
Oras sa Pagtapos:	10–15 ka minutos

Kon ang mga bata nga nag-edad og tres anyos motambong sa oras sa pagpakigbahin uban sa ubang mga bata sa Primary, ang oras sa klase molungtad og 40 ka minutos ug maglangkob sa oras sa leksyon ug mubo nga mga oras sa pag-abiabi ug panapos.

Oras sa Pag-abiabi: Ang katuyoan sa oras sa pag-abiabi mao ang pagtugot sa mga bata sa pagpakigsulti ug motubag sa titser ug sa usag usa sa laing inpormal nga sitwasyon. Ang mga bata mas mobati nga sigurado ug mas positibo nga anaa sa Primary kon gawasnon silang maglihoklihok niining orasa.

Tabangi ang mga bata nga mobati nga giabiabi ug komportable diha sa klase. Ipakita ang gugma, pagkasinsero, ug respeto pinaagi sa imong mga pulong ug mga aksyon. Hisguti ang mga panginahanglan ug mga interes sa mga bata. Angay nga mga hilisgutan mahimong maglakip sa:

Bag-ong mga kasinatian sa mga kinabuhi sa mga bata, sama sa bag-ong anak diha sa panimalay o pagpanuroy sa pamilya.
Espesyal nga mga holiday.
Ang kahimtang sa panahon.
Pag-obsebar sa kinaiyahan.
Sosyal nga mga abilidad sama sa pagpaminaw, pagpakigbahin, o pagpakita og maayong pamatasan.
Buhat sa kaayo.

Balak inubanan sa mga aksyon sa mga tudlo, ug pag-exercise, ug mga kanta mahimong gamiton niining higayona sa pagtabang sa mga bata nga maundang ang pagkalihokan.

Oras sa Leksyon: Sunda ang kinatibuk-ang outline sa leksyon, mopahaum niini kon gikinahanglan alang sa inyong klase. Ipahaum sa pagsabut ug interes sa mga bata. Pagpili og mga istorya ug mga kalihokan nga makatudlo sa mga miyembro sa klase sa importanting mga baruganan sa leksyon. Pagpili gikan sa seksyon sa “Mga Kalihokan sa Pagpalambo” og bisan unsang mga kalihokan nga sa inyong pagtuo nga makaayo sa mga bata sa imong klase. Gamita kini nga mga kalihokan kon kanus-a nimo gusto sa panahon sa leksyon. Ang mga bata makat-on pag-ayo pinaagi sa pagsublisubli, mao nga mahimo nimong gamiton ang sama nga kalihokan, kanta, istorya, o kasulatan sobra sa makausa sa panahon sa leksyon o sa mosunod nga mga leksyon.

Isunod-sunod pagtudlo ang mga leksyon, gawas sa mga leksyon 45 ug 46 (Pasko sa Pagkabanhaw ug Pasko).

Oras sa Pagpakigbahin ug Kalihokan: Kon ang mga bata adunay panahon sa pagpakigbahin kay sa makig-uban sa laing mga bata sa Primary, gamita ang mga kalihokan diha sa mga leksyon ug diha sa seksyon sa “Mga Kalihokan sa Pagpalambo” alang sa panahon sa pagpakigbahin. Mahimo nimong balikon ang paborito nga mga kalihokan sa mga bata sa miaging mga leksyon. Paggahin og panahon para sa pagkanta sa mga kanta sa Primary (tan-awa sa “Musika sa Klasrom,” p. vii.). Awhaga ang mga bata sa pag-apil ug sa pagpakigbahin sa ilang mga ideya sa usag usa.

Kon makasugod na sa pagtambong ang mga bata nga nag-edad og tres anyos sa panahon sa pagpakigbahin uban sa laing mga bata sa Primary, mahimo silang hangyoon sa paghatag og presentasyon sa panahon sa pagpakigbahin. Pagplano og simpol nga presentasyon nga makapaapil sa tanang mga bata sa klase. Ikaw mahimong:

Motabang sa mga bata nga modrama sa usa ka istorya o sitwasyon gikan sa usa sa mga leksyon.
Pagamita ang mga bata og mga litrato aron matabangan nga makaistorya og istorya gikan sa usa sa mga leksyon.
Pasultiha ang mga bata og kasulatan o hunahuna mahitungod sa usa ka baruganan sa ebanghelyo.
Pakantaha ang mga bata og kanta mahitungod sa baruganan nga gitudlo.

Oras sa Panapos: Ribyuha ug itingub ang importanting mga ideya sa leksyon. Hisguti ang usa o duha ka mubo nga mga pulong sa kasulatan gikan sa leksyon, ug hatagig gibugaton ang importanting mga ideya aron ang mga bata makahimo sa pagpakigbahin niini sa ila. Pag-imbitar og usa ka bata nga mohatag og panapos nga pag-ampo.

Pag-Andam sa Mga Leksyon

Ang labing importanting butang nga hinumduman sa pagtudlo sa gagmayng mga bata mao ang pag-ila ug paghigugma kanila. Ilha ug gamita ang mga ngalan sa miyembro sa imong klase kon makigsulti ikaw kanila. Pakigsulti nila sa personal ug pagpakisayud sa ilang mga kinabuhi. Pangitag paagi nga makaapil sila sa mga leksyon ug personal nilang magamit ang mga leksyon. Ipakita ang tukma nga gugma ug interes sa tanang mga bata sa imong klase.

Ang ikaduhang butang mao ang pag-andam. Sugdi ang pag-andam sa kada leksyon usa ka semana sa dili pa kini itudlo. Basaha ang tibuok leksyon, dayon tun-i kini sa mainampoong paagi aron madeterminar ang labing maayong paagi sa pagtudlo sa mga baruganan ngadto sa mga bata sa imong klase. Pagpili og mga kalihokan sa pagpalambo aron ikadugang sa mga kalihokan sa leksyon ug aron magpadayon ang interes ug pag-apil sa mga bata. Pagplano og daghang mga klase sa kalihokan ug dayon andam nga mopahiangay sa paggamit niini sa pagtubag sa mga panginahanglan sa mga bata. Tun-i pag-ayo ang leksyon aron dili ka na mobasa pa sa manwal. Kutob sa mahimo tan-awa ang mga mata sa mga bata. Pag-ampo kanunay samtang mag-andam ikaw sa kada leksyon, ug paninguhaa nga ikaw giyahan sa Espiritu samtang mag-andam ka ug magtudlo.

Pagtudlo sa Mga Leksyon

Samtang ikaw magtudlo sa mga bata sa mga baruganan sa ebanghelyo, kinahanglan imong awhagon ang mga bata sa paghigugma sa ebanghelyo. Ang mosunod nga mga sugyot makatabang kanimo nga malingaw ang mga bata sa imong klase sa Primary:

Hatagig daghang kahigayunan ang mga bata nga mosulti ug moapil.
Paminawa ang mga bata kon mosulti, ug paningkamuti nga makatubag sa maayong paagi.
Pagmadasigon. Kon ang titser malingaw sa Primary, ang mga bata malingaw sad sa Primary.
Sulti sa binuotan nga tingog.
Pagpailub, pagbinuotan, ug pagmahigugmaon, ilabi na kon ang mga bata gikapoy o wala mahimutang.
Pasalamati sila sa maayong kinaiya ug kon mahimo ibaliwala ang negatibo nga kinaiya.
Pag-andam og daghang mga matang sa mga kalihokan ug usab-usaba ang paggamit niini aron mohaum sa mga panginahanglan sa mga bata. Ang gagmayng mga bata mubo ra og atensyon ug kinahanglang maglihok kanunay.
Paningkamuti ang pag-usab sa atensyon sa mga bata kon adunay panaglalis.
Hinumdumi nga ang mga bata malingaw sa mga istorya, mga biswal nga tabang, musika, ug paglihoklihok. Pirme silang malingaw sa gibalikbalik nga mga kalihokan ug mga kanta, ilabi na kadtong naantigohan pag-ayo.

Musika Diha sa Klasrom

Kada leksyon niini nga manwal adunay mga kanta aron makatabang sa pagsuporta sa mga pagtulun-an sa ebanghelyo. Dili kinahanglan nga ikaw usa ka hanas nga musikero aron makalingaw ug makahuluganon ang pagpanganta diha sa klasrom. Wala makahibalo ang mga bata kon maayo ka bang mokanta o dili; ang bugtong nilang mahibaloan mao nga ikaw ganahan mokanta. Kat-uni ang kada kanta pag-ayo, ug praktisa kini isip kabahin sa imong pagpangandam sa leksyon. Kon anaa ang Songbook sa mga Bata sa mga audiocassette (musika lang, 52505; musika ug mga pulong, 52428) o mga compact disc (musika lang, 50505; musika ug mga pulong, 50428) makatabang kini nga makat-unan nimo ang mga kanta. Mahimo sad nimong gamiton kini nga mga rekording samtang kamo manganta diha sa klasrom.

Ang pagbalikbalik og kanta maoy pinakamaayong paagi sa pagtudlo og mga kanta ngadto sa mga bata. Mahimong gamiton ang sama nga kanta sa daghang mga higayon panahon sa leksyon. Simpol nga mga aksyon makatabang nga makaapil ang gagmayng mga bata sa usa ka kanta. Kon ang mga bata nakahibalo pag-ayo sa kanta ug malingaw, kantaha kini kanunay panahon sa leksyon o panahon sa pagpakigbahin ug kalihokan.

Sa pagtudlo og bag-ong kanta o kalihokan nga bersikulo ngadto sa mga bata:

Sag-uloha ang kanta o kalihokan nga bersikulo atubangan sa klase.
Itudlo ang bag-ong kanta o kalihokan nga bersikulo pinaagi sa pagkanta o pagsulti niini ngadto sa mga bata. Pasobrahi [exaggerate] ang mga aksyon, kon aduna.
Imbitara ang mga bata sa pagkanta o pagsulti sa mga pulong uban nimo. Dili dayon sila makahibalo sa mga pulong, pero kon imong balikon sa makadaghan ang kanta o han-ay sa kalihokan, ilang makat-unan ang mga pulong.
Hinayhinay lang aron ang mga bata makasabut sa mga pulong ug mga aksyon.
Paggamit og mga biswal nga tabang usahay aron sa pagtabang nga mapresentar ang kanta o kalihokan nga bersikulo. Madani ang atensyon ug mas makat-on ang mga bata kon duna silay tan-awon.
Pamub-i ang kanta o kalihokan nga bersikulo kon ang mga bata wala na mahimutang. Kon ang kanta o kalihokan nga bersikulo taas, mahimo kang motabang sa mga bata nga mohimo sa mga aksyon samtang ikaw ang mokanta o mosulti sa mga pulong.

Ang gagmayng mga bata dili kanunay gustong mokanta uban nimo, pero malingaw silang moapil pinaagi sa pagpaminaw sa pagpanganta.

Mga Biswal Nga Tabang

Mga biswal nga tabang importante sa pagtudlo sa gagmayng mga bata. Mga litrato, mga ginunting, mga butang, ug laing mga biswal nga tabang makakuha ug makapadayon sa atensyon sa mga bata, makatabang sa mga bata nga makahinumdom unsay imong gitudlo.

Ang mga litrato ug mga ginunting nga imong gamiton sa leksyon ania sa manwal. Ang seksyon sa “Pagpangandam” sa kada leksyon naglista sa mga litrato nga gamiton niana nga leksyon pinaagi sa ulohan ug numero. Ang mga numero sa parentesis nag-ila sa kada litrato (o sa kapareha) diha sa Pakete sa mga Hulagway sa Ebanghelyo (34730) ug sa librarya sa meetinghouse. Nalista usab diha sa seksyon sa “Pagpangandam” ang tanang ginunting ginamit ang numero niini diha sa manwal ug pinaagi sa Primary Visual Aids Cutouts set (33239-33250 o 08456) nga adunay pareho nga mga ginunting.

Ang mga butang nindot nga mga biswal nga tabang, ilabi na kon kini pamilyar nga mga butang nga mahikap o magunitan sa mga bata. Kon ikaw moistorya og istorya sa kasulatan, gamita ang imong kaugalingong mga kasulatan o mga kasulatan gikan sa library sa meetinghouse isip mga biswal nga tabang.

Linain Nga Mga Sumbanan Alang sa Pagpaapil sa Mga Bata Nga Adunay Depekto

Ang Manluluwas mipakita og ehemplo nga mobati kita og kalooy sa mga tawo nga dunay depekto. Sa lyang pagbisita sa mga Nephite human sa lyang Pagkabanhaw, miingon Siya:

“Aduna ba kamo dihay mga masakiton? Dad-a sila ngari. Aduna ba kamo dihay mga bakol, o mga buta, o mga pungkol, o mga angol, o mga sanglahon, o mga dili makalihok, o kadto nga mga bungol, o kadto nga gitakbuyan sa tanan nga mga matang sa sakit? Dad-a sila ngari ug Ako moayo kanila, kay Ako adunay kalooy diha kaninyo” (3Nephi 17:7).

Isip titser sa Primary ikaw anaa sa maayong pagkabutang nga mopakita og kalooy. Bisan og ikaw tingali wala mabansay sa paghatag og propesyonal nga tabang, isip usa ka titser ikaw makasabut ug moamuma sa mga bata kinsa adunay mga depekto. Pagpakabana, pagsabut, ug paningkamuti nga maapil ang kada miyembro sa klase sa pagkat-on sa mga kalihokan kon gikinahanglan.

Ang mga bata nga dunay mga depekto matandog sa Espiritu bisan unsa pay ilang lebel sa pagsabut. Bisan og ang ubang mga bata dili makatambong sa tibuok panahon sa Primary, kinahanglan aduna silay kahigayunan sa pagtambong bisan kadiyot aron mobati sa Espiritu. Gikinahanglan tingali nga adunay kauban nga sensitibo sa mga panginahanglan sa bata nga mouban sa bata panahon sa Primary inkaso kon ang bata kinahanglang mobiya gikan sa tibuok grupo.

Ang ubang mga miyembro sa klase tingali adunay mga depekto sa pagkat-on, panan-aw o pandungog, kadaot sa salabutan, mga problema sa pinulongan o sinultihan, mga problema sa kinaiya ug sosyal, kadaot sa pangutok, mga problema sa paglihoklihok, o balikbalik nga sakit. Ang uban dili sinati ug maglisud sa pinulongan o kahimtang sa kultura. Bisag unsa pay indibidwal nga mga kahimtang, ang kada bata pareha rag mga panginahanglan nga higugmaon ug dawaton, sa pagkat-on sa ebanghelyo, sa pagbati sa Espiritu, sa pagapil nga malampuson, ug sa pagserbisyo sa usag usa.

Kini nga mga sumbanan makatabang kanimo sa pagtudlo sa usa ka bata nga dunay mga depekto:

Ayaw og hunahunaa ang depekto ug ilailaha ang bata. Pagpakanatural, pagmahigalaon, ug pagmabination.
Pagpakisayud kabahin sa piho nga mga kalig-on ug mga problema sa bata.
Paningkamuti ang pagtudlo ug pagpahinumdom sa mga sakop sa klase sa ilang responsibilidad sa pagtahud sa kada sakop sa klase. Ang pagtabang og sakop sa klase nga dunay depekto usa ka Kristohanong kasinatian alang sa tibuok klase.
Pangitaa ang labing maayong mga paagi sa pagtudlo sa bata pinaagi sa pagkonsulta sa mga ginikanan, sa ubang mga miyembro sa pamilya, ug, kon angay, uban sa bata.
Sa dili pa motawag sa usa ka bata nga dunay depekto sa pag-ampo o pagpaapil, pangutan-a kon unsay iyang bation mahitungod sa pag-apil diha sa klase. Hatagig gibug-aton ang mga abilidad ug mga talento sa bata ug pangita og mga paagi nga ang kada usa makaapil nga komportable ug malampuson.
Gamita ang mga materyal sa leksyon ug pisikal nga palibot aron matubag ang indibidwal nga mga panginahanglan sa mga bata nga dunay mga depekto.