Leksyon 1

Pilia ang Matarung

Katuyoan

Aron sa pagtabang sa mga bata sa pagkat-on nga ang pagpili sa matarung makatabang kanila sa pagsunod ni Jesukristo.

Pagpangandam

1. Pag-andam og usa ka blangko nga tag sa ngalan o tsapa alang sa matag bata ug usa alang sa imong kaugalingon. Isulat ang imong ngalan diha sa tag sa ngalan, apan ayaw pagsulat og bisan unsa diha sa uban.

2. Pangandam sa pag-awit o pagbasa sa “Pilia ang Matarung nga Paagi [Choose the Right Way]” (Children’s Songbook, p. 160); ang mga pulong gilakip diha sa luyo sa tamdanan nga basahon.

3. Mga kagamitan nga gikinahanglan:

   1. Biblia

   2. Krayola o lapis alang sa matag bata.

   3. Tape o alpirel alang sa matag bata.

   4. PAM nga taming alang sa matag bata nga pagakoloran; ang taming gilakip diha sa atubangan sa tamdanan nga basahon.

   5. PAM nga singsing alang sa matag bata kinsa wala makadawat og usa sa milabay nga tuig.

   6. Hulagway 3-1, Juan Bautista Nagbunyag ni Jesus (62133; Sudlanan sa Hulagway sa Ebanghelyo 208).

4. Himoa ang gikinahanglan nga mga pagpangandam alang sa bisan unsa nga pagpalambo nga mga kalihokan nga imong pagagamiton.

Gisugyot nga Pagpalambo sa Leksyon

Pagdapit og usa ka bata sa paghatag sa pagsugod nga pag-ampo

Pagtahud sa Akong Ngalan

Pang-atensyon nga kalihokan

Ipaila ang imong kaugalingon ngadto sa mga bata. Isulti kanila ang imong ngalan, ug ipakita kanila ang imong tag sa ngalan.

Hatagi ang matag bata og tag sa ngalan ug usa ka lapis o krayola, ug ipasulat ang iyang ngalan diha sa tag. Tabangi kadto kinsa dili makasulat sa ilang mga ngalan. Ipapilit ang mga tag ngadto sa saput sa mga bata pinaagi sa tape o mga alpirel.

Pang-atensyon nga kalihokan

• Ngano nga ang mga ngalan mahinungdanon? (Tabangi ang mga bata sa pagsabut nga ang ngalan nagpaila sa usa ka tawo ngadto sa uban.)

Isulti og kusog ang mga ngalan sa daghan nga mga tawo kinsa ang mga bata nakaila ug nagtahud, sama sa mga ngalan sa ilang mga ginikanan, sa obispo, sa usa ka misyonaryo, ug sa Presidente sa Simbahan. Pangutana kanila unsa ang ilang gihunahuna kon sila makadungog og mga ngalan ug unsa ang ilang gibati mahitungod niini nga mga tawo nga aduna niadto nga mga ngalan. Tabangi ang mga bata sa pagsabut nga ang usa ka ngalan nagpaila sa usa ka tawo ngadto sa uban; kon ang bata nakaila og ngalan sa usa ka tawo, siya makadungog sa ngalan ug maghunahuna unsa ang hitsura ug panglihok niana nga tawo.

Pasultiha ang matag bata sa iyang ngalan og kusog ngadto sa klase.

Pang-atensyon nga kalihokan

• Unsa ang inyong gusto nga hunahunaon sa mga tawo kon sila makadungog sa inyong ngalan?

• Sa unsa nga paagi kamo makahimo nga ang inyong ngalan nagbarug og maayo nga mga butang?

Ipasugyot sa mga bata ang daghan nga mga paagi nga sila makatahud o mobati og kaayo mahitungod sa ilang mga ngalan, sama sa pagbuhat sa ilang bahin sa trabaho, pagpakita og gugma, pagkahapsay og pamatasan, pagkamatinuoron, pagsunod sa ilang mga ginikanan, pagsunod sa mga sugo, ug pagsunod sa mga balaod ug mga lagda. Sultihi ang mga bata nga kita mobati og kaayo mahitungod sa atong mga kaugalingon kon kita mopili sa matarung, ug ang mga tawo mohunahuna sa maayo nga mga butang kon sila makadungog sa atong mga ngalan.

Pagpili sa Matarung Nagtabang Kanako nga Mobati og Kaayo mahitungod sa Akong Ngalan

Kalihokan

Ipakita ang PAM nga taming (shield) gikan sa atubangan sa tamdanan nga basahon.

Kalihokan

• Unsa ang Kahulugan sa PAM (Pilia ang matarung.)

Ipasabut nga pinaagi sa pagpili sa matarung, ang mga bata mobati og kaayo mahitungod sa ilang kaugalingon nga mga ngalan. Ipabalik-balik kanila sa pagsulti ang mga pulong pilia ang matarung uban kanimo.

Sugilanon

Isaysay ang mosunod nga sugilanon mahitungod sa usa ka bata nga lalaki kinsa adunay usa ka labing mahinungdanon nga pagpili nga himoon:

Si Randy ug ang iyang higala nga si David nagdula diha sa nataran sa ilang silingan. Ang banay sa silingan wala diha sa panimalay, ug ang duha ka mga batang lalaki nalingaw og dula sa pipila ka mga dulaan sa mga bata. Samtang sila nagtinukmuray sa usag usa diha sa duyan, kini nabugto ug nahulog ngadto sa yuta. Si Randy ug David wala makahibalo unsa ang buhaton, busa sila nanagan sa layo. Sila nanghinaut nga walay usa nga nakakita kanila didto.

Si Randy naguol nga siya ug si David nakabugto sa duyan. Siya naghunahuna niini kanunay sulod nianang adlawa apan dili makahukom unsa ang buhaton. Sa sunod nga buntag sa diha nga siya mimata, si Randy nakahinumdom unsa ang kahulugan sa PAM. Si Randy misulti sa mga pulong nga iyang nakat-unan sa Primarya, “Pilia ang matarung”; unya si Randy naghunahuna mahitungod sa duyan sa silingan.

Siya nag-ilis og dali ug miadto sa balay sa silingan. Siya mibarug sa gawas og makadiyut tungod kay siya nahadlok og gamay sa pagtuktok sa ilang pultahan. Sa katapusan siya mituktok.

Sa diha nga ang inahan miduol sa pultahan, siya misulti kaniya unsa ang nahitabo. Samtang siya nagsaysay sa sugilanon sa naguba nga duyan, siya naminaw. Sa diha nga siya nahuman na, siya mibutang sa iyang kamot og hinay diha sa iyang abaga ug nangutana kaniya sa iyang ngalan. Siya misulti kaniya nga ang iyang ngalan mao si Randy. Siya mitan-aw kaniya diha sa mga mata ug miingon, “Randy, sa panahon nga ako makakita kanimo o maghunahuna sa imong ngalan, ako mohunahuna og usa ka tawo kinsa matinuoron.”

Sugilanon

• Unsa ang gipili ni Randy nga buhaton?

• Unsa ang mitabang ni Randy sa paghimo niana nga paghukom?

Ipakita ang PAM nga taming (shield) ngadto sa mga bata.

Sugilanon

• Sa unsa nga paagi nga ang pagpili sa matarung nagtabang ni Randy sa pagbaton og maayo nga ngalan?

Awit

Awit uban sa mga bata o basaha og kusog ang mga pulong sa “Pilia ang Matarung nga Paagi [Choose the Right Way].”

Si Jesukristo Buot Kanako nga Mopili sa Matarung

Panaghisgutan

Ipasabut ngadto sa mga bata nga ikaw naghunahuna og lain nga ngalan. Kini mao ang ngalan sa usa ka tawo kinsa buot kanila nga mopili sa matarung. Ipatag-an sa mga bata kinsa ang imong gihunahuna samtang ikaw naghatag kanila og mga ilhanan sama sa—

Panaghisgutan

1. Siya naghigugma kanato.

2. Siya mitudlo kanato unsaon sa pagpili sa matarung.

Sultihi ang mga bata nga ang tawo nga imong gihunahuna mao si Jesukristo. Siya nagtudlo kanato sa pagpili sa matarung kanunay. Siya usab nagtudlo kanato sa pagpabunyag sa sama nga paagi nga siya gibunyagan.

Panaghisgutan

• Unsa ang inyong nahinumduman mahitungod sa paagi sa bunyag ni Jesus?

Hulagway nga panaghisgutan

Ipakita ang hulagway 3-1, Juan Bautista Nagbunyag ni Jesus. Basaha ang unang tunga sa Mateo 3:16 og kusog, nagtapos human sa mga pulong mihawas gikan sa tubig. Ipasabut nga si Jesus gibunyagan pinaagi sa pagpaunlod, diin nagpasabut nga siya gibutang ilawom sa tubig.

Hulagway nga panaghisgutan

• Sa unsa nga paagi ang Langitnong Amahan ug si Jesus buot kaninyo nga mabunyagan? (Pinaagi sa pagpaunlod, sama nga si Jesus gipaunlod.)

Pangutan-a ang mga bata pila ang ilang edad. Ipahimangno nga kon ang mga bata moabut sa walo ka mga tuig ang edad, sila hingkod na nga bunyagan. Sila usab may kapangakohan alang sa ilang mga pagpili. Pinaagi sa pagpabunyag ug pagsunod sa mga sugo, sila magpili na sa matarung.

Hulagway nga panaghisgutan

• Ngano nga mahinungdanon ang pagpabunyag?

• Sa unsa nga paagi nga ang pagpabunyag nagpakita nga kamo nagpili sa matarung nga paagi?

Ipasabut nga kon sila mopili sa pagpabunyag, sila nagpili nga mahimo nga mga sakop sa Simbahan ni Jesukristo ug nagdala sa iyang ngalan. Sila nagsaad sa paghimo sa ilang kaugalingon nga mga ngalan nga magbarug kaniya. Sila nagsaad sa pagpaningkamot nga masama kaniya ug sa pagbuhat sa mga butang nga siya mobuhat. Tabangi ang mga bata sa pagsabut nga pinaagi sa pagpili sa matarung, sila mobati og kaayo mahitungod sa ilang kaugalingon nga mga ngalan ug motahud sa ngalan ni Jesukristo ug sa ngalan sa iyang simbahan.

Pagpamatuod sa magtutudlo

Ipamatuod ngadto sa mga bata ang kamahinungdanon sa kanunay nga pagpili sa matarung.

Awit ug singsing

Tabangi ang mga bata sa pag-awit sa awit sa klase, “Pilia ang Matarung nga Paagi [Choose the Right Way].” Unya paghatag og PAM nga singsing ngadto sa matag bata kinsa wala pa makadawat og usa sa milabay nga tuig.

Pagdapit og usa ka bata sa paghatag sa panapos nga pag-ampo.

Pagpalambo nga mga Kalihokan

Pagpili gikan sa mosunod nga mga kalihokan kadto nga labing moangay alang sa inyong mga bata. Kamo makagamit kanila diha gayud sa leksyon o ingon nga usa ka balik-pagtuon o katingbanan. Alang sa dugang nga paggiya, tanawa ang “Panahon sa Klase” diha sa “Mga Tabang alang sa Matutudlo.”

1. Dapita ang matag bata sa pagsaysay og usa ka panahon sa diha nga siya mipili sa matarung ug sa pagpasabut unsa ang iyang gibati human mohimo niana nga pagpili.

2. Ipahimo sa matag bata ang pagkolor sa usa ka kopya sa PAM nga taming (shield) nga makita diha sa atubangan sa tamdanan nga basahon.

3. Ipadibuho sa mga bata ang mga hulagway sa mga paagi nga sila makapili sa matarung.

4. Ipapuli-puli sa mga bata ang pagpakaaron-ingnon nga sila nagbuhat og usa ka inadlaw-adlaw nga buluhaton nga ang ilang mga ginikanan naghatag kanila ug unya ipasabut sa unsa nga paagi kini nagpili sa matarung.