Leksyon 11

Bunyag

Katuyoan

Aron sa pagtabang sa matag bata nga labaw nga makasabut sa kamahinungdanon sa bunyag.

Pagpangandam

1. Sa mainampuon nga paagi pagtuon sa Mateo 3:13–17; 2 Nephi 9:23 ug Doktrina ug mga Pakigsaad 20:73–74.

2. Pangandam sa pag-awit o pagsulti sa mga pulong sa awit “Sa Akong Adlaw’ng Natawhan [I Like My Birthdays]” (Children’s Songbook, p. 104).

3. Dad-a ang tsart nga “Pagpasakop sa Simbahan ni Jesukristo,” nga unang gigamit sa leksyon 7. Ibutang ang mga gilis sa pulong “Hugot nga Pagtuo diha ni Jesukristo” ug “Paghinulsol” diha sa tsart. Himoa nga ang gilis sa pulong “Bunyag” andam nga ibutang diha sa tsart sa panahon sa leksyon.

4. Usa ka humok nga bola o gamay nga sinudlang dulaan nga hayop.

5. Mga kagamitan nga gikinahanglan:

   1. Usa ka Biblia, usa ka Basahon ni Mormon, ug usa ka Doktrina ug mga Pakigsaad.

   2. Hulagway 3-13, Bata nga Lalaki Gibunyagan (62018); ug hulagway 3-1, Juan Bautista Nagbunyag ni Jesus (62133; Sudlanan sa Hulagway sa Ebanghelyo 208).

6. Paghimo sa gikinahanglan nga mga pagpangandam alang sa bisan unsa nga pagpalambo nga mga kalihokan nga imong pagagamiton.

Pahinumdom: Gamita kini nga leksyon ingon sa panginahanglan kon adunay usa sa mga bata nga gibunyagan na.

Gisugyot nga Pagpalambo sa Leksyon

Pagdapit og usa ka bata sa paghatag og pagsugod nga pag-ampo.

Tinoa ang mga bata kon ikaw nag-awhag kanila sa pagbuhat og usa ka butang sulod sa semana.

Kita Mahimo nga Mabunyagan sa Panuigon nga Walo

Tsart

Ipakita ang tsart “Pagpasakop sa Simbahan ni Jesukristo.” Ipabutang sa usa ka bata ang gilis sa pulong nga “Bunyag” diha sa ikatulo nga paagi. Sultihi ang mga bata nga ang bunyag mao ang ikatulo nga paagi sa pagpasakop sa Simbahan ni Jesukristo.

Pang-atensyon nga kalihokan

Ipasabut nga sa dili pa ang mga bata mabunyagan, usa ka butang nga mahinungdanon kinahanglan gayud mahitabo. Sultihi sila sa pagpaminaw samtang ikaw mosulti sa mga pulong sa usa ka awit mahitungod sa bunyag.

Ipasabut nga ikaw molak-ang og usa ka pulong. Kana nga pulong usab usa ka numero. Hangyoa ang mga bata sa pagpaminaw ug tan-awa kon sila makatagan ba unsa ang nawala nga pulong. Sila kinahanglan nga mopataas sa ilang mga kamot kon sila makahibalo unsa nga pulong ang gilak-angan.

Sa akong adlaw’ng natawhan

Sa kalipay ako dad-an

Dili ko makapaabut,

Sa —————— nga mabunyagan.

Pang-atensyon nga kalihokan

• Unsa ang nawala nga pulong? (Walo.)

Ipasabut nga kita nagpaabut sa atong tanan nga adlaw’ng natawhan, apan ang atong ikawalo nga adlaw’ng natawhan adunay talagsaon nga kahulugan tungod kay kini nagpasabut nga kita igo na ang panuigon nga magpabunyag.

Si Jesukristo Misunod sa Sugo nga Magpabunyag

Pagtudlo sa magtutudlo

Pahinumdumi ang mga bata nga ang Langitnong Amahan nagsugo nga matag usa magpabunyag. Si Jesukristo buot nga mosunod sa tanan nga mga sugo sa Langitnong Amahan.

Balaan nga Kasulatan

Basaha og kusog ang 2 Nephi 9:23. Ipasabut nga ang Usa nga Balaan sa Israel mao ang lain nga ngalan ni Jesukristo.

Ipasabut nga kini nga balaan nga kasulatan nagsulti kanato nga kita gisugo nga magpabunyag. Ang balaan nga kasulatan nagsulti usab nga kon kita wala mabunyagi, kita dili maluwas ngadto sa gingharian sa Dios; sa lain nga pagkasulti, kita kinahanglan gayud nga magpabunyag aron makapuyo pagusab uban sa Langitnong Amahan ug ni Jesus.

Hulagway ug panaghisgutan

Ipakita ang hulagway 3-1, Juan Bautista Nagbunyag ni Jesus, ug isaysay ang sugilanon (tan-awa sa Mateo 3:13-17). Basaha kutob sa mahimo ang mahitungod niining balaan nga kasulatan ngadto sa mga bata kutob sa ilang masabtan.

Hulagway ug panaghisgutan

• Kinsa ang mibunyag ni Jesus? (Juan Bautista.)

Itudlo nga si Jesus miadto kang Juan Bautista aron bunyagan tungod kay si Juan adunay pagtugot sa pagkapari nga mobunyag.

Aron sa pagbunyag ni Jesus, si Juan Bautista midala kaniya ngadto sa katubigan sa Suba sa Jordan. Human ipamulong ang pag-ampo sa bunyag, si Juan mibutang kaniya sa hingpit sa ilawom sa tubig. Unya si Juan mihaw-as kaniya gikan sa tubig.

Ipasabut nga ang pagpabunyag pinaagi sa hingpit nga pagpasanap sa tubig ug pagpatunga og balik gikan sa tubig gitawag og bunyag pinaagi sa pagpaunlod. Ipasulti pag-usab sa mga bata ang mga pulong bunyag pinaagi sa pagpaunlod.

Kita Mahimo nga Bunyagan Sama sa Pagbunyag ni Jesukristo

Awit

Papaminawa ang mga bata samtang kamo mosulti sa mga pulong sa ikaduhang garay sa “Sa Akong Adlaw’ng Natawhan.” Unya ipaawit, kanila o ipasulti pag-usab ang mga pulong uban kaninyo.

Bunyagan sa matarung nga pagkapari,

Ug sa sala dili na gayud molingi

Buhat nga ako mopili.

Awit

• Unsa “ang butang nga buot kong buhaton,” sumala sa awit? (Magpabunyag, “sama ni Jesus.”)

• Sa unsa nga paagi kita pagabunyagan kon kita bunyagan sa sama nga paagi sa bunyag ni Jesus? (Pinaagi sa pagpaunlod ug pinaagi sa usa ka tawo nga may pagtugot sa pagkapari.)

Hulagway ug panaghisgutan

Ibutang ang hulagway 3-13, Bata nga Lalaki Gibunyagan, sunod sa hulagway ni Juan Bautista Nagbunyag ni Jesus.

Ipasabut nga sa diha nga si Jesukristo gibunyagan, siya gipaunlod o sa hingpit gisanapan sa tubig. Karon, ang mga bunyag sa kasagaran gihimo sa usa ka balay tigumanan diha sa usa ka linain nga tubigan nga gitawag og bunyaganan. Kon walay usa ka bunyaganan sa duol, mga sapa o uban nga mga tubigan ang gamiton.

Hulagway ug panaghisgutan

• Unsa nga pagtugot ni Juan Bautista aduna aron sa pagbunyag? (Ang Aaronic nga Pagkapari.)

• Unsa nga pagtugot kinahanglan gayud aduna ang tawo kinsa nagbunyag kanato? (Siya kinahanglan gayud nga usa ka pari diha sa Aaronic nga Pagkapari o naghupot sa Melchizedek nga Pagkapari.)

• Kamo nakaila ba og usa ka tawo kinsa naghupot sa pagkapari ug makabunyag?

Pagtudlo sa magtutudlo

Pahinumdumi ang mga bata nga sa dihang si Joseph Smith naghubad sa Basahon ni Mormon uban ni Oliver Cowdery, si Juan Bautista miduol kanila ug mitudlo kanila sa husto nga paagi sa pagbunyag. Siya mihatag kanila sa pagkapari aron sila adunay pagtugot sa pagbunyag sa uban. Ang pagkapari gihatag ngadto sa uban nga mga tawo aron kita adunay kahigayunan nga mabunyagan pinaagi sa usa ka tawo nga may tukma nga pagtugot.

Artikulo sa hugot nga pagtuo

Ipasabut ngadto sa mga bata nga ang tawo kinsa nagbunyag matag usa kanila nakabaton sa sama nga pagkapari nga anaa kang Juan Bautista. Ang ikalima nga artikulo sa hugot nga pagtuo nagsulti kanato sa unsa nga paagi ang usa ka tawo nagdawat niini nga pagtugot.

Basaha og kusog ug ipasulti pag-usab sa mga bata ang mosunod:

“Kami nagtuo nga ang usa ka tawo kinahanglan gayud pagatawgon sa Dios … pinaagi niadto kinsa adunay pagtugot.”

Ang Ordinansa sa Bunyag

Hulagway ug pagpasabut

Sa hulagway 3-13, Bata nga Lalaki Gibunyagan, itudlo ang posisyon sa mga kamot. Ipasabut ngadto sa mga bata ang mosunod nga mga sumbanan: Kon kamo bunyagan, kamo ug ang tawo nga nagbunyag kaninyo manaog ngadto sa bunyaganan. Ang tawo nga nagbunyag kaninyo mogunit sa inyong tuo nga kamot uban sa iyang wala nga kamot. Kamo makagunit sa inyong ilong pinaagi sa inyong tuo nga kamot ug sa inyong wala nga kamot gunit ngadto sa wala nga bukton sa tawo nga nagbunyag kaninyo. Ang tawo nga nabunyag kaninyo dayon mopataas sa iyang tuo nga kamot ug mosulti sa mga pulong sa pagampo sa bunyag.

Balaan nga kasulatan

Sultihi ang mga bata nga ang pag-ampo sa bunyag makaplagan diha sa balaan nga mga kasulatan. Papaminawa sila samtang kamo nagbasa kanila sa mga pulong sa pag-ampo.

Basaha ang Doktrina ug mga Pakigsaad 20:73, nagsugod sa mga pulong “Ingon nga sinugo.”

Ipasabut nga ang sinugo nagpasabut nga “gihatagan og pagtugot sa pagbarug.” Tabangi ang mga bata sa pagsabut nga ang tinuod nga bunyag gihimo lamang pinaagi sa usa ka tawo kinsa gihatagan og pagtugot sa pagbarug ni Jesukristo sa pagpahigayon sa bunyag. Ang ilang bunyag maadunay sama nga bili ingon og si Jesus sa iyang kaugalingon nagbunyag kanila.

Ipasabut nga human sa pag-ampo, ang tawo kinsa nagbunyag mobutang sa iyang tuo nga kamot diha sa likod sa tawo ug sa hinay mopaubos kaniya ngadto sa tubig hangtud ang tubig sa hingpit mosanap kaniya. Unya siya mobangon sa tawo gikan sa tubig.

Tabangi ang mga bata sa pagsabut nga sila maanaa ilawom sa tubig sulod sa mubo kaayo nga higayon, ug nga ang tawo nga nagbunyag kanila mogunit kanila pag-ayo. Sila mogunit sa iyang bukton ug makahimo sa paggunit sa ilang mga ilong aron sila dili makaginhawa o makainom sa tubig.

Kinaugalingon nga kasinatian

Kon kamo buot, kamo makasulti mahitungod sa inyong bunyag. O bisan hain sa mga bata diha sa imong klase nga nabunyagan na, dapita sila sa pagsulti mahitungod sa ilang mga bunyag.

Himoa nga ang mga bata mangutana ug makigbahin sa ilang mga pagbati mahitungod sa bunyag. Tabangi sila sa pagsabut nga ang bunyag mahimo nga usa ka maanindot nga kasinatian alang kanila.

Kita Malipayon Kon Kita Bunyagan

Sultihi ang mga bata nga ikaw adunay pipila ka mga pangutana nga imong buot ipangutana kanila aron sa pagbalik-pagtuon unsa ang ilang nakat-unan mahitungod sa mahinungdanon nga paagi sa bunyag. Iitsa ang bola o gamay nga dulaang hayop ngadto sa usa ka bata ug pangutana og usa sa mosunod nga mga pangutana. Siguroha nga ang matag bata makapuli sa pagsawo sa dulaan ug sa pagtubag og usa ka pangutana.

• Pila ang atong edad nga kita mahimo nga magpabunyag? (Walo.)

• Ngano nga kita kinahanglan nga magpabunyag? (Kini usa ka sugo.)

• Asa kita bunyagan? (Diha sa usa ka bunyaganan o uban nga tubigan.)

• Unsa ang kinahanglan gayud nga huptan sa usa ka tawo aron makabunyag? (Ang pagkapari.)

• Sa unsa nga paagi kita bunyagan? (Pinaagi sa pagpaunlod.)

• Ngano sa inyong hunahuna kamo malipay kon kamo bunyagan?

Himoa nga ang mga bata motubag ug makigbahin sa ilang mga pagbati. Ikaw mahimo nga mohatag og gibug-aton nga sila malipay nga mahimong sakop sa Simbahan ni Jesukristo, sila malipay nga masayud nga sila nagsunod sa iyang panig-ingnan, ug sila malipay nga mosunod sa iyang sugo.

Sugilanon

Isaysay ang mosunod nga sugilanon sa usa ka bata nga babaye kinsa buot nga magpabunyag:

“Sa diha nga ang inahan ug igsoon nga mga babaye ni Alice mihukom nga magpasakop sa Ang Simbahan ni Jesukristo sa mga Santos sa Ulahing Adlaw, si Alice unom ka tuig pa lamang ug gamay pa kaayo nga bunyagan dungan sa ubang sakop sa banay …. Tungod kay sila sa kasagaran nagsultihanay sa makalipay nga kasinatian sa bunyag ug sa kalipay nga ilang nadala sa pagkasakop diha sa Simbahan, si Alice hapit dili makahulat nga mahimong walo ka tuig aron siya bunyagan usab.

“Si Alice naglaraw ug nagdamgo unsaon siya pagbunyag sa iyang adlaw’ng natawhan. ‘Dili bisan kanus-a,’ siya namugos, ‘apan nianang adlawa gayud.’

“Bisan pa niana, tulo ka mga adlaw sa wala pa mahimong walo ka tuig si Alice, siya nahigmata uban sa usa ka grabe nga labad sa ulo, ug sa sunod nga adlaw siya masakiton kaayo nga dili makaeskwela.

“Ang doktor kinsa gitawag miingon nga siya magpabilin sa balay ug maghigda sulod sa dili mokubos sa usa ka semana. Ang dagkong mga mata ni Alice napuno sa mga luha sa kahigawad.

“Sa sunod nga adlaw si Alice labaw pa nga nagmasulub-on, ug ang iyang kainit misamot bisan pa sa medisina nga gihatag sa doktor. Ang mama naglibug ug nabalaka, apan si Alice labaw nga mibati og kalisud nga dili mabunyagan sa adlaw gayud sa iyang adlaw’ng natawhan kay sa iyang gibati mahitungod sa iyang tanan nga mga gipamati ug mga sakit ug hilanat.

“Sa hapon nga wala pa ang adlaw’ng natawhan ni Alice, ang iyang inahan mipaingon ngadto sa kwarto sa masakiton. Apan siya mihunong sa may pultahan sa diha nga siya nakakita ni Alice nga nagluhod sa tim-os nga pagampo diha sa iyang higdaanan. Kini nga batang babaye nangalyupo ngadto sa Langitnong Amahan alang sa katumanan sa iyang dako nga tinguha nga mahimo nga usa ka sakop sa Ang Simbahan ni Jesukristo sa mga Santos sa Ulahing Adlaw.

“Sa buntag sa iyang adlaw’ng natawhan, si Alice mibangon, nag-ilis, ug nagandam alang sa bunyag. Ang iyang hilanat nawala ug siya mibati og kamaayo ug malipayon. Pipila ka mga takna wala madugay ang iyang inahan misusi sa kainit sa lawas ni Alice pag-usab ug kini normal.

“[Langitnong Amahan] mitubag sa kinasing-kasing nga pag-ampo ni Alice. Niana nga gabii siya gibunyagan!” (“A Birthday Baptism,” Friend, Okt. 1974, p. 33).

Sugilanon

• Unsay inyong pagabation kon kamo pa si Alice?

Tabangi ang mga bata sa pagsabut nga sila tingali dili mabunyagan sa untop gayud sa ilang adlaw’ng natawhan apan hinoon sa usa ka adlaw nga dili madugay human sa ilang ikawalo nga adlaw’ng natawhan; sa kasagaran adunay usa ka petsa sa pagbunyag matag bulan alang sa tanan nga bata diha sa purok o istaka. Sultihi sila nga ang obispo o presidente sa sanga makighinabi kanila sa dili pa sila bunyagan. Sultihi sila kanus-a ang bunyag sa kasagaran gihimo diha sa inyong dapit. Ipahayag ang imong paglaum nga ang mga bata mobati og sama nga pagbati sa kalipay nga gibati si Alice kon sila bunyagan.

Katingbanan

Pahinumdumi ang mga bata nga ang ilang ikawalo nga adlaw’ ng natawhan mahimo nga talagsaon tungod kay sila igo na ang ka hamtong nga pagabunyagan.

Isulti ang mga pulong sa awit “Sa Akong Adlaw’ng Natawhan.”

Awita o itudlo ang mga paagi diha sa tsart, ug basaha sila. Ipasabut nga human ang bata mabunyagi, sila andam na sa paghimo sa katapusang lakang sa pagpasakop sa Simbahan.

Pagdapit og usa ka bata sa paghatag sa panapos nga pag-ampo.

Pagpalambo nga mga Kalihokan

Pagpili gikan sa mosunod nga mga kalihokan kadto nga labing moangay sa imong mga bata. Ikaw makagamit kanila niini nga leksyon gayud o ingon nga usa ka balik-pagtuon o katingbanan. Alang sa dugang nga paggiya, tan-awa ang “Panahon sa Klase” diha sa “Mga Tabang alang sa Magtutudlo.”

1. Pagkopya o pagsubay og usa ka hulagway sa cake alang sa adlaw’ ng natawhan alang sa matag bata. Himoa nga ang mga bata mo-dibuho og walo ka mga kandila diha sa cake ug unya mo-kolor niini. Butangi og ngalan ang hulagway, “Ako dili makahulat hangtud ako mahimo nga walo ka tuig.”

   Kon ang imong klase dili sinati sa karaang kinaiya sa cake sa adlaw’ ng natawhan, ipasabut nga sa daghan nga mga nasud, kon ang mga bata adunay pagsaulog sa adlaw’ ng natawhan, usa ka cake sa adlaw’ ng natawhan himoon alang kanila. Usa ka kandila ibutang diha sa cake alang sa matag tuig sukad sila matawo. Kon ang bata nahimo na nga walo ka tuig, sila adunay walo ka mga kandila diha sa ilang cake.

2. Paghisgot sa mga paagi nga ang mga bata kinahanglan nga mobuhat sa pag-andam alang sa bunyag. Samtang ang matag mosunod nga mga ideya gisulti, pagbutang og usa ka ginunting nga tunob diha sa sawog. Himoa nga ang mga tunob modangat ngadto sa hulagway 3-13, Bata nga Lalaki Gibunyagan.

   • Tambong sa Primarya ug tigum sa sakramento matag semana.

   • Pagkat-on mahitungod sa balaan nga mga kasulatan.

   • Pagmatinuoron.

   • Pag-ampo matag adlaw.

   • Bayad sa ikapulo.

   • Pagmabination ngadto sa banay ug mga higala.

   • Sunod sa panig-ingnan ni Jesukristo.

   • Paghulat nga mahimong walo ka tuig ang panuigon.

   • Pagpakighinabi sa obispo o presidente sa sanga.

3. Pagdapit og usa ka tawo kinsa naghupot sa Melchizedek nga Pagkapari sa pag-anha sa klase ug pasultiha sa mga bata unsa ang mahitabo sa ilang bunyag. Himoa nga siya mobansay uban kanila sa tukma nga posisyon sa ilang mga kamot ug sa mga lihok sa bunyag.

4. Ipakita ngadto sa mga bata “Baptism—A Promise to Follow Jesus” (9 ka gutlo) sa Primary Video Collection (53179).