Mga Manwal sa Primary ug Panahon sa Pagpakigbahin

Leksyon 13: Ang Pakigsaad diha sa Bunyag

Leksyon 13

Ang Pakigsaad diha sa Bunyag

Katuyoan

Aron sa pagtabang sa mga bata nga makasabut nga kon sila magpabunyag, sila naghimo og usa ka pakigsaad uban sa Langitnong Amahan.

Pagpangandam

Pahibalo: Tungod kay kini nga leksyon tingali nanginahanglan og dako nga pagpaangay alang sa upat-, lima-, unom ka tuig ang mga panuigon, kamo mahimo nga mohulat sa pagtudlo niini hangtud nga ang mga bata hapit na moandam sa bunyag.

Sa mainampuon nga paagi pagtuon sa Mosiah 18:8–10 ug Alma 7:15–16.
Pag-andam sa mosunod nga mga gilis sa pulong:

Sunod sa mga sugo

Pasayloa ako

Gasa sa Espiritu Santo

Magpuyo uban kaniya sa kahangturan
Paghimo og duha ka mga timaan nga papel pinaagi sa pagpilo sa papel nga pinataas, ug butangi og ngalan ingon sa gipakita:

Ako nagsaad

Ang Langitnong Amahan nagsaad
Pangandam sa pagtabang sa mga bata sa pag-awit o pagsulti sa mag pulong sa “Bunyag [Baptism]” (Children’s Songbook, p. 100).
Mga kagamitan nga gikinahanglan:
1. Usa ka Basahon ni Mormon.
2. Usa ka tsapa nga papel alang sa matag bata nga may mga pulong “Ako makatuman sa akong mga saad.”
3. Paggunting og hulagway sa usa ka bata nga lalaki ug usa ka bata nga babaye (mga ginunting 3-1 ug 3-2).
4. Usa ka bulsita nga igo ang gidak-on nga masudlan sa mga gilis sa pulong.
5. Tisas, pisara, ug papas.
6. PAM nga taming ug singsing.
7. Hulagway 3-13, Bata nga Lalaki nga Gibunyagan (62018) hulagway 3-10, Ang Unang Panan-awon (62470; (Sudlanan sa Hulagway sa Ebanghelyo 403), hulagway 3-23, Bata Nagbasa sa Balaan nga mga Kasulatan; hulagway 3-24, Bata Nag-ampo; hulagway 3-25, Pagsimba; hulagway 3-26, Bata Nagbayad sa Ikapulo; hulagway 3-27, Pakigbahin sa Tricycle (62317); hulagway 3-28, Pagpili sa Matarung.
Paghimo sa gikinahanglan nga mga pagpangandam alang sa bisan unsa nga pagpalambo nga mga kalihokan nga inyong pagagamiton.

Gisugyot nga Pagpalambo sa Leksyon

Pagdapit og usa ka bata sa paghatag sa pagsugod nga pag-ampo.

Tinoa ang mga bata kon ikaw nag-awhag kanila sa pagbuhat og usa ka butang sulod sa semana.

Mga Saad ug mga Pakigsaad

Pang-atensyon nga kalihokan

Pagdapit og usa ka bata sa pagtabang kanimo. Sultihi siya nga kon siya mobuhat ingon sa imong gisugo, ikaw mohatag kaniya og usa ka butang nga talagsaon. Sugoa siya sa paghimo og usa ka yano nga buluhaton, sama pananglit sa pagtuyok og makaduha ug sa paglamano sa imong kamot. Hangyoa siya sa pagsaad sa pagbuhat sa iyang labing maayo nga mahimo niini. Unya ipabuhat kini kaniya. Human siya makahimo sa buluhaton, sultihi siya nga ikaw motuman sa imong bahin sa saad. Ialpiril o ipapilit diha sa iyang polo ang usa ka tsapa nga may mga pulong “Ako makatuman sa akong mga saad.” Sultihi ang mga bata mga ikaw ug ang bata mitabang kaninyo sa pagtuman sa inyong mga saad. Unya tuguti ang uban nga mga bata nga makadawat og usa ka tsapa pinaagi sa pagbuhat sa sama nga butang.

Pang-atensyon nga kalihokan

Unsay gisaad sa usag usa kanato nga buhaton?
Unsa ang nahitabo sa diha nga kamo mituman sa inyong saad?

Sugilanon

Isaysay ang mosunod nga sugilanon sa imong kaugalingon nga mga pulong:

Si Stephen andam na sa pagguwa aron magdula usa ka buntag niana sa diha nga ang iyang inahan mitunol kaniya og usa ka bulsita sa mga mansanas.

“Kining bulsita sa mga mansanas alang ni Sister Jones nga anaa ubos sa dalan. Mahimo ba nga ihatud mo sila alang kanako?” siya nangutana.

“Sigurado,” miingon si Stephen samtang siya mikuha sa bag.

“Siguroha nga imong ihatud ang mga mansanas sa dili pa ikaw magdula, ug pagmatngon nga dili mahulog bisan usa sa yuta,” mipahimatngon ang iyang inahan. “Ihatud og diretso ngadto ni Sister Jones.”

“Akong buhaton. Ako mosaad!” miingon si Stephen.

Sa diha nga si Stephen miguwa gikan sa iyang balay dala ang bulsita sa mga mansanas, duha sa iyang mga higala naghulat kaniya. Sila nagsugod na og usa ka dula ug buot kaniya nga modula.

“Ako kinahanglan mohatud una niining mga mansanas,” si Stephen mitubag.

Usa sa mga lalaki miingon, “A, ikaw makahimo niana unya. Kita makadula lamang sulod sa usa ka takna, busa kinahanglan nga kita makasugod na.”

“Dili, ako kining buhaton pag-una, Ako misaad sa akong inahan.”

Samtang siya naglakaw, si Stephen misugod sa paglabyog sa bulsita sa mga mansanas. Unya siya nakahinumdom sa iyang saad. Kon iyang ilabyog og taas ang bulsita usa ka mansanas tingali mahulog ug mabun-og. Iyang gigunitan pag-ayo ang bulsita samtang siya nagpadayon sa paglakaw padulong ngadto sa balay ni Sister Jones.

Samtang siya nagtunol sa bulsita ngadto ni Sister Jones, si Stephen mipahiyom.

Panaghisgutan sa sugilanon

Unsa ang gisaad ni Stephen sa iyang inahan?
Unsa sa inyong hunahuna ang gibati ni Stephen nga nasayud nga siya nakatuman sa iyang saad?

Pang-pisara nga panaghisgutan

Isulat ang saad diha sa pisara, ug pangutan-a ang mga bata unsa sa ilang hunahuna ang gipasabut niini. Itudlo nga kon kamo mouyon sa pagbuhat og usa ka butang o mosulti nga kamo mobuhat niini, kamo naghimo og usa ka saad.

Panaghisgutan sa sitwasyon

Sultihi ang mga bata nga adunay lain nga matang sa saad, usa ka nagsinaaray. Himoa nga sila maminaw pag-ayo sa mosunod nga sitwasyon aron sila makasulti unsa ang gisaad ni Jean ug sa iyang amahan sa usag usa:

Si Jean nahinangup nga misulti sa iyang amahan nga ang sirkus miabut na sa lungsod ug nangutana kon sila makaadto ba. Ang amahan mipahinumdom ni Jean nga gahapon ang hangin mipadpad og daghan kaayo nga sagbut ngadto sa nataran, ug kini nagkinahanglan nga malimpyohan. Si Jean mikusmod. Ang amahan misulti kaniya nga kon siya molimpyo sa nataran sa buntag, siya modala kaniya ngadto sa sirkus inig ka hapon. Si Jean misulti nga siya molimpyo sa nataran. Si Jean ug ang iyang amahan mihimo og saad ngadto sa usag usa.

Panaghisgutan sa sitwasyon

Unsa ang bahin ni Jean sa saad?
Unsa ang bahin sa amahan ni Jean sa saad?
Kon si Jean wala motuman sa iyang bahin sa saad, ang iyang amahan ba sa gihapon motuman sa iyang bahin sa saad? (Dili.)

Pang-pisara nga panaghisgutan

Isulat ang pakigsaad diha sa pisara. Ipasulti kini sa mga bata uban kaninyo.

Pang-pisara nga panaghisgutan

Unsa ang usa ka pakigsaad?

Ipasabut nga ang usa ka pakigsaad mao ang usa ka panagsinaaray. Kon kamo mohimo og pakigsaad ngadto sa usa ka tawo, kamo mouyon sa pagbuhat og piho nga mga butang ug nga kana nga tawo mouyon sa pagbuhat og piho nga mga butang.

Kita Naghimo og Pakigsaad diha sa Bunyag

Paghisgot sa balaan nga kasulatan

Sultihi ang mga bata nga sa panahon nga sila moabut sa walo ka tuig ang panuigon, sila makahimo og usa ka mahinungdanon kaayo nga pakigsaad. Sultihi sila sa pagpaminaw sa mosunod nga balaan nga kasulatan aron sila makasulti uban kang kinsa ang pakigsaad gihimo ug sa unsa nga paagi kini gihimo. Basaha ug ipasabut ang Alma 7:15, nagsugod sa “duol ug padayon.”

Paghisgot sa balaan nga kasulatan

Sumala niini nga balaan nga kasulatan, uban kang kinsa kamo naghimo og usa ka pakigsaad? (Langitnong Amahan.)
Unsa gayud ang kinahanglan ninyo nga buhaton aron sa pagpakita nga kamo naghimo sa pakigsaad uban sa Langitnong Amahan? (Magpabunyag.)

Hulagway ug panaghisgutan

Ipakita ang hulagway 3-13, Bata nga Lalaki Gibunyagan. Ipasabut nga ang pakigsaad nga atong gihisgutan gitawag og pakigsaad sa bunyag. Kon kita bunyagan, kita nagpakita sa Langitnong Amahan nga kita naghimo og usa ka pakigsaad uban kaniya. Kita nagsaad sa pagbuhat og usa ka butang, ug ang Langitnong Amahan nagsaad sa pagbuhat og usa ka butang.

Awit

Uban sa mga bata, awita o isulti ang mga pulong sa “Bunyag”:

Jesus miadto’s Judea,
Ni Juan nga Bautista,
Gipaunlod ang gibunyagan
Diha’s sapa sa Jordan.

Mga gilis sa pulong ug panaghisgutan

Ipasabut ang mosunod nga impormasyon, ug ipangutana ang mga pangutana. Tugoti ang mga bata sa pagpasabut kutob sa ilang mahimo. Tabangi sila ingon sa panginahanglan. Sa panahon sa panaghisgutan, ipakita ang angay nga mga gilis sa pulong. Unya pil-a sila ug ibutang sila sulod sa bulsita.

Kon kita bunyagan, kita nagsaad sa Langitnong Amahan nga kita mosunod sa iyang mga sugo. (Ipakita ang gilis sa pulong.)

Mga gilis sa pulong ug panaghisgutan

Unsa ang pipila sa mga sugo sa Langitnong Amahan?
Unsa ang atong gisaad sa Langitnong Amahan kon kita bunyagan? (Sa pagsunod sa iyang mga sugo.)

Kini mao ang atong bahin sa pakigsaad. Kon kita motuman sa atong saad, ang Langitnong Amahan nagsaad sa pagpasaylo kanato kon kita maghinulsol (ipakita ang gilis sa pulong) ug sa paghatag kanato sa gasa sa Espiritu Santo (ipakita ang gilis sa pulong). Siya nagsaad nga kita mopuyo uban kaniya sa kahangturan (ipakita ang gilis sa pulong).

Mga gilis sa pulong ug panaghisgutan

Unsa ang bahin sa Langitnong Amahan sa pakigsaad? (Siya mopasaylo kanato kon kita maghinulsol. Siya mohatag kanato sa gasa sa Espiritu Santo. Siya motugot kanato sa pagpuyo uban kaniya sa kahangturan.)

Kalihokan

Ipakita ang hulagway 3-10, Ang Unang Panan-awon, ug ang duha ka ginunting nga mga hulagway. Ipatudlo sa usa ka bata ang Langitnong Amahan diha sa hulagway. Basaha ang duha ka mga timaan ug ipabutang sa usa ka bata “Ako nagsaad” tupad sa ginunting nga mga hulagway; unya ipabutang sa usa ka bata “Langitnong Amahan nagsaad” tupad sa hulagway sa Unang Pananawon. Ipakuha sa matag bata ang gilis sa pulong gikan sa sulod sa bulsita, basahon kini (o inyong basahon kini), ug ibutang kini diha sa atubangan sa tukma nga timaan. Balika pag-usab ang kalihokan hangtud nga ang tanan makaapil sa dili mokubos og kausa. Balika pagtuon ang duha ka mga lista. Ipasabut nga ang mga sugo nga kita nagsaad sa pagsunod naglakip sa mga panudlo ni Jesukristo nga atong nakat-unan diha sa Primarya ug diha sa panimalay.

Katingbanan

Mga hulagway

Ipakita ang unom ka mga hulagway nga nagpakita sa mga sugo (mga hulagway 3-23 ngadto sa 3-28), ang PAM nga taming (shield), ug ang usa ka PAM nga singsing. Himoa nga usa ka bata mohingalan og usa ka sugo nga gipakita pinaagi sa mga hulagway ug sa taming. (Ang mga hulagway nagpakita og pagbasa sa balaan nga mga kasulatan, pag-ampo, pagsimba, pagbayad sa ikapulo, paghigugma sa uban, ug pagpili sa matarung. Tabangi ang mga bata nga makasabut nga kini dili lamang mao ang mga sugo nga kita nagsaad sa pagsunod. Kamo tingali buot kanila nga mosugyot og uban.)

Awhaga ang mga bata sa pagtan-aw sa ilang PAM nga mga singsing ug sa paghunahuna mahitungod sa pagtuman sa ilang saad ngadto sa Langitnong Amahan sa matag panahon nga sila motan-aw sa ilang mga singsing. Sila kinahanglan mohinumdom nga ang pagkabinunyagan naglakip sa pagsaad sa paghupot sa iyang mga sugo.

Pagpamatuod sa magtutudlo

Hatagi og gibug-aton ang kamahinungdanon sa pagtuman sa mga saad, ilabi na kadto nga atong gihimo uban sa atong Langitnong Amahan. Pagpamatuod nga ang Langitnong Amahan naghigugma sa tanan nga mga bata ug buot nga motuman sa iyang bahin sa pakigsaad sa bunyag. Awhaga ang mga bata sa pag-andam sa paghimo ug pagtuman sa pakigsaad sa bunyag pinaagi sa pagtuman sa mga saad nga ilang gihimo.

Pagdapit og usa ka bata sa paghatag sa panapos nga pag-ampo.

Pagpalambo nga mga Kalihokan

Pagpili gikan sa mosunod nga mga kalilhokan kadto nga labing moangay alang sa imong mga bata. Ikaw makagamit kanila diha sa leksyon gayud o ingon nga usa ka balik-pagtuon o katingbanan. Alang sa dugang nga paggiya, tan-awa ang “Panahon sa Klase” diha sa “Mga Tabang alang sa Magtutudlo.”

Ipakita ngadto sa mga bata “Baptism—A Promise to Follow Jesus” (9 ka gutlo) diha sa Primary Video Collection (53179), ug paghisgot sa mosunod nga mga pangutana:
- Unsa ang gisaad ni Luis sa iyang mga ginikanan?
- Unsa ang gisaad ni Luis sa Langitnong Amahan sa diha nga siya gibunyagan?
Pag-andam og usa ka kopya sa “Akong Pakigsaad sa Bunyag,” nga anaa sa katapusan sa leksyon, alang sa matag bata. Basaha kini uban sa mga bata. Tabangi o himoa nga ang matag bata mosulat sa iyang ngalan diha sa linya nga gibutang. Awhaga sila sa pagtipig sa ighahatag nga basahon diha sa usa ka linain nga dapit aron sila makakita niini ug maghunahuna mahitungod niini sa kanunay.