Leksyon 17

Kami Nagtuo nga ang Basahon ni Mormon Pulong sa Dios

Katuyoan

Aron sa pagtabang sa mga bata sa pagsabut nga ang balaan nga mga kasulatan makatabang kanila sa pagkat-on ug pagsabut sa mga sugo ug nga ang balaan nga mga kasulatan makatabang kanila sa pagduol ngadto ni Jesukristo.

Pagpangandam

1. Sa mainampuon nga paagi pagtuon sa 1 Nephi 3–4; 3 Nephi 18:19; ug Mosiah 23:15. Pangandam sa pagsaysay sa sugilanon ni Nephi ug sa tumbaga nga mga palid.

2. Hapniga ang upat ka sumbanan nga mga basahon diha sa lamesa; pagbutang og lain nga daghang mga basahon, sama sa usa ka basahon sa mga sugilanon, basahon sa resipe, ug basahon nga tun-anan, sa lain nga mga suok sa lawak. Pangandam sa paghisgot uban sa mga bata sa nagkalainlain nga mga matang sa basahon nga imong gipakita aron sila makasabut sa katuyoan sa matag usa.

3. Pangandam sa pag-awit o pagsulti sa mga pulong sa “Ang Ikawalo nga Artikulo sa Hugot nga Pagtuo [The Eighth Article of Faith]” (Children’s Songbook, p. 127); ang mga pulong sama gayud sa tinuod nga artikulo sa hugot nga pagtuo.

4. Mga kagamitan nga gikinahanglan:

   1. Ang upat ka sumbanan nga mga basahon.

   2. Lain nga daghang mga basahon, sama sa usa ka basahon sa mga sugilanon, basahon sa resipe, ug basahon nga tun-anan.

   3. Pisara, tisas, ug papas.

   4. Hulagway 3-41, Laman Milayas; hulagway 3-42, Nephi Duol sa Balay ni Laban; hulagway 3-43, Nephi ug Zoram; ug hulagway 3-44, Lehi ug ang Tumbaga nga mga Palid.

5. Paghimo sa gikinahanglan nga mga pagpangandam alang sa bisan unsa nga pagpalambo nga mga kalihokan nga imong pagagamiton.

Gisugyot nga Pagpalambo sa Leksyon

Pagdapit og usa ka bata sa paghatag sa pagsugod nga pag-ampo.

Tinoa ang mga bata kon ikaw nag-awhag kanila sa pagbuhat og usa ka butang sulod sa semana.

Ang Balaan nga mga Kasulatan Naglangkob sa mga Sugo sa Langitnong Amahan

Pang-atensyon nga mga kalihokan

Ibutang ang nagkalain-lain nga mga matang sa basahon sa gilain nga mga suok sa lawak ug pagsulti og gamay mahitungod sa matag usa. Unya pangutana sa mosunod nga mga pangutana o uban nga mga pangutana kalabut ngadto sa mga basahon nga imong gipakita. Human ang mga bata motubag og husto sa matag pangutana, paadtoa sila ngadto sa suok sa lawak nga anaa kana nga basahon ug itudlo kini nganha kaninyo.

Pang-atensyon nga mga kalihokan

• Hain sa mga basahon ang nagpasabut unsaon sa paghimo og cake?

• Hain sa mga basahon adunay tinumo-tumo nga mga sugilanon?

• Hain sa mga basahon adunay mga pagtulun-an sa mga propeta nga motabang kanato sa paghupot sa mga sugo?

Ipasabut nga ang Langitnong Amahan buot kanato nga mosunod sa mga sugo. Siya misugo sa mga propeta sa pagsulat sa iyang mga pulong aron kita makahibalo sa iyang mga pagtulun-an ug mga sugo.

Pang-atensyon nga mga kalihokan

• Unsa ang atong itawag sa balaan nga mga basahon diin ang mga propeta nagsulat? (Ang balaan nga mga kasulatan.)

Ipasabut nga daghan nga mga propeta mitala sa ebanghelyo ug sa unsa nga paagi ang mga katawhan mihupot niini aron kita makahibalo unsa ang mga sugo. Kini nga mga sugo gitala sa atong upat ka mga basahon sa balaan nga kasulatan. Kita usahay nagtawag kanila og sumbanan nga mga basahon.

Si Nephi Nakabaton sa Balaan nga mga Kasulatan

Mga hulagway, sugilanon sa balaan nga kasulatan, ug panaghisgutan

Ipasabut nga ang Basahon ni Mormon naglangkob og usa ka sugilanon nga nagpakita unsa kamahinungdanon ang balaan nga mga kasulatan ngadto ni Nephi ug sa iyang banay.

Sultihi ang mga bata nga si Lehi misulti sa iyang anak nga mga lalaki—Laman, Lemuel, Sam, ug Nephi—nga ang Ginoo buot kanila nga mobalik ngadto sa Jerusalem ug sa pagkuha sa tumbaga nga mga palid gikan sa usa ka tawo nga ginganlan og Laban. Kini nga tumbaga nga mga palid mga basahon sa balaan nga kasulatan nga hinimo gikan sa metal (tumbaga) nga mga pahina. Si Laman ug si Lemuel dili buot mobalik ngadto sa Jerusalem ug hilabihan sa kasuko, apan si Nephi ug si Sam andam sa pag-adto.

Aron sa pagpakita sa mga bata unsay gibati ni Nephi mahitungod sa pag-adto aron sa pagkuha sa tumbaga nga mga palid, basaha og kusog ang 1 Nephi 3:7 ug paghisgot niini uban sa mga bata.

Mga hulagway, sugilanon sa balaan nga kasulatan, ug panaghisgutan

• Ngano nga si Nephi andam sa pag-adto? (Siya nasayud nga ang Dios moandam og usa ka paagi alang kaniya sa pagtuman sa sugo nga siya gihatagan.)

• Unsa nga saad ang gihimo ni Nephi? (Nga siya mobuhat unsay gisugo sa Ginoo kaniya nga buhaton.)

Ipasabut nga si Nephi midani sa iyang igsoon nga mga lalaki sa pag-uban kaniya.

Si Laman mao ang unang misulod sa balay ni Laban. Iyang gipangayo ni Laban ang tumbaga nga mga palid. Si Laban dili mohatag sa mga palid ug mihulga sa pagpatay kaniya. Si Laman nahadlok ug midagan pagbalik ngadto sa iyang igsoon nga mga lalaki. Ipakita ang hulagway 3-41, Laman Milayas. Siya buot nga mobalik ngadto sa ilang amahan didto sa kamingawan.

Si Nephi miingon nga sila kinahanglan nga mosunod sa sugo nga kuhaon ang tumbaga nga mga palid. Si Nephi ug ang iyang igsoon nga mga lalaki mibalik sa ilang kanhi pinuy-anan sa Jerusalem ug mikuha sa ilang bulawan ug pilak. Sila naglaraw nga ibaylo ang ilang mga bahandi sa tumbaga nga mga palid.

Gikuha ni Laban ang ilang bulawan ug pilak apan dili mohatag ni Nephi ug sa iyang igsoon nga mga lalaki sa tumbaga nga palid. Siya misugo sa iyang mga tawo sa pagpatay kanila. Si Nephi ug ang iyang igsoon nga mga lalaki midagan sa layo ug mitago.

Si Laman ug si Lemuel nasuko. Ilang gibunalan si Nephi ug si Sam sa usa ka sanga. Usa ka anghel mipakita ug misugo kanila sa paghunong. Ang anghel miingon nga ang Ginoo motabang kanila sa pagkuha sa tumbaga nga mga palid ug misulti kanila sa pagsunod ni Nephi.

Ipakita ang hulagway 3-42, Nephi Duol sa Balay ni Laban.

Niini nga higayon si Nephi miadto sa pagkuha sa mga palid. Ang iyang igsoon nga mga lalaki naghulat sa gawas sa paril sa dakbayan samtang siya mikamang hangtud ngadto sa balay ni Laban. Si Nephi nakakita ni Laban nga nagbuy-od nga hubog diha sa yuta. Ang Espiritu Santo misugo kang Nephi sa pagpatay ni Laban. Si Nephi miukon-ukon tungod kay siya dili buot nga mopatay ni bisan kinsa.

Si Nephi nahinumdum sa pagkamahinungdanon kaayo sa balaan nga mga kasulatan, ug siya nakahibalo nga siya dili makakuha sa tumbaga nga mga palid gawas kon iyang patyon si Laban. Busa iyang gibuhat unsay gisugo sa Espiritu Santo nga iyang buhaton. Iyang gipatay si Laban ug gisul-ob ang saput ni Laban.

Unya siya nagpakaaron ingnon nga si Laban.

Ipakita ang hulagway 3-43, Nephi ug Zoram.

Si Nephi misugo sa sulugoon ni Laban, nga si Zoram, sa pagdala sa tumbaga nga mga palid ngadto kaniya ug sa pagsunod kaniya. Si Zoram misunod, naghunahuna nga si Nephi mao si Laban. Sa wala madugay, si Nephi mipasabut ngadto ni Zoram nga ang Ginoo misugo kaniya ug sa iyang igsoon nga mga lalaki sa pagkuha sa tumbaga nga mga palid. Si Zoram mituo kaniya. Siya usab buot nga mosunod. Siya mikuyog uban ni Nephi ug sa iyang igsoon nga mga lalaki balik ngadto ni Lehi sa kamingawan.

Ipakita ang hulagway 3-44, Lehi ug ang Tumbaga nga mga Palid.

Si Lehi mibasa sa tumbaga nga mga palid. Ang mga palid naglangkob sa mga sugo ug pipila ka mga sugilanon mahitungod ni Moses ug uban nga mga propeta. Sila usab naglangkob sa kasaysayan sa kagikanan sa banay ni Lehi. Si Lehi gisugo sa pagkuha sa tumbaga nga mga palid uban kaniya ngadto sa gisaad nga yuta.

Mga hulagway, sugilanon sa balaan nga kasulatan, ug panaghisgutan

• Kang kinsa nga mga sinulat ang diha sa tumbaga nga mga palid?

• Unsa ang gisulat diha sa tumbaga nga mga palid?

• Ngano sa inyong hunahuna nga si Lehi ug ang iyang banay nagkinahanglan sa tumbaga nga mga palid?

Kalihokan

Pagdula sa mosunod nga dula aron sa pagtabang sa mga bata nga makasabut ngano nga kini mahinungdanon alang sa banay ni Lehi ang pagdala sa tumbaga nga mga palid, nga naglangkob og usa ka sinulat nga talaan sa mga sugo, uban kanila ngadto sa gisaad nga yuta.

Ang tuyo sa dula mao ang pagpakita sa unsa nga paagi ang mga pulong sa balaan nga mga kasulatan makalibug kon sila dili isulat.

Palingkura ang mga bata nga magliyok. Hagawhaw ngadto sa bata diha sa inyong tuo, “Ako mosunod sa mga sugo sa Langitnong Amahan.” Unya ipahagawhaw sa bata unsa ang iyang nadungog sa tawo nga anaa sa iyang tuo. Padayon sa pagpasa sa mensahe hangtud nga ang tanan diha nga nagliyok nakadungog niini. Patindoga ang katapusan nga bata ug ipausab og sulti ang mga pulong nga iyang nadungog. Ang bata tingali dili mousab pagsulti sa husto nga orihinal nga mensahe. (Kon ang mensahe mao gihapon, kamo mahimo nga modayeg sa mga bata mahitungod sa unsa ka maayo sa ilang pagbuhat. Unya pagsulay og lain nga mensahe nga duha o tulo ka hugpong sa mga pulong.) Sultihi ang mga bata sa mensahe nga inyong sugdan.

Ipasabut nga kini sayon sa pagkalimot o pagkalibug sa mga sugilanon o mga mensahe nga dili isulat. Ang mga propeta misulat sa mga pagtulun-an sa Langitnong Amahan ug ni Jesukristo aron sila dili mahikalimtan. Kini nga mga pagtulun-an anaa sa atong balaan nga mga kasulatan.

Ang banay ni Lehi nagkinahanglan sa tumbaga nga mga palid aron sila makahinumdum sa mga sugo ug mosunod kanila.

Ang Balaan nga mga Kasulatan Nagtabang Kanato sa Pagsunod

Balaan nga kasulatan nga kalihokan

Ipasabut nga kita kinahanglan nga makahibalo sa mga sugo sama sa banay ni Lehi. Ang balaan nga mga kasulatan makatabang kanato sa pagsunod sa Langitnong Amahan ug ni Jesukristo tungod kay sila naglangkob sa daghan nila nga mga sugo.

Hangyoa ang mga bata sa pagpaminaw og maayo samtang kamo nagbasa og duha ka balaan nga mga kasulatan. Hangyoa sila sa pagpataas sa ilang mga kamot kon sila nakahibalo unsa nga sugo ang balaan nga kasulatan nagtudlo. Basaha ang 3 Nephi 18:19 ug Mosiah 23:15 ug paghisgot kanila uban sa mga bata.

Pahinumdumi ang mga bata nga kon kita wala makabaton sa balaan nga mga kasulatan, kita tingali makalimot sa mga sugo ug dili mosunod kanila. Niana kita dili makadawat sa mga panalangin nga modangat gikan sa pagsunod sa mga sugo.

Artikulo sa hugot nga pagtuo ug awit

Ipaawit o ipasulti ang mga pulong sa awit “Ang Ikawalo nga Artikulo sa Hugot nga Pagtuo.” Ipasabut nga kini nga artikulo sa hugot nga pagtuo nagsulti kanato nga ang Biblia ug ang Basahon ni Mormon naglangkob sa pulong sa Dios, diin nagpasabut nga sila naglangkob sa tinuod nga mga pagtulun-an. Ang Langitnong Amahan ug si Jesukristo misugo sa mga propeta sa pagsulat niini nga mga pagtulun-an alang sa umaabut nga mga kaliwatan.

Ipausab og sulti ang ikawalo nga artikulo sa hugot nga pagtuo uban kaninyo. Ikaw mahimo nga motabang sa labaw ka hingkod nga mga bata sa pagsag-ulo niini. Pahinumdumi ang mga bata nga kita adunay balaan nga mga kasulatan aron kita makakat-on sa mga sugo nga motabang kanato sa pagpili sa matarung ug sa paghupot sa atong mga pakigsaad sa bunyag.

Katingbanan

Panaghisgutan

Ipahisgot sa klase ang mosunod:

Panaghisgutan

• Unsa ang atong kinahanglan nga pasalamatan sa atong Langitnong Amahan diha sa atong mga pag-ampo? (Dawata ang tanan nga mga tubag, apan tagai og gibug-aton ang balaan nga mga kasulatan.)

• Unsa ang atong pangayoon kaniya diha sa atong mga pag-ampo? (Tabang diha sa pagsunod sa mga sugo.)

Pagdapit og usa ka bata sa paghatag sa panapos nga pag-ampo.

Pagpalambo nga mga Kalihokan

Pagpili gikan sa mosunod nga mga kalihokan kadto nga labing moangay sa imong mga bata. Kamo makagamit kanila diha sa leksyon gayud o ingon nga usa ka balik-pagtuon o katingbanan. Alang sa dugang nga paggiya, tan-awa ang “Panahon sa Klase” diha sa “Mga Tabang alang sa Magtutudlo.”

1. Sugod sa pagsaysay sa sugilanon ni Nephi ug sa iyang igsoon nga mga lalaki nga mibalik ngadto sa Jerusalem aron sa pagkuha sa tumbaga nga mga palid gikan ni Laban. Padugangi sa mga bata og usa ka hugpong sa mga pulong ang sugilanon, nagsaysay unsa ang sunod nga mahitabo. Awhaga sila sa paghatag og mga detalya kutob sa ilang mahinumduman. Gamita ang mga hulagway aron sa pagtabang kanila sa paghinumdum sa sugilanon. (Kon ang mga bata mohatag og sayop nga mga tubag o mosaysay og balik sa sugilanon nga dili husto ang pagkasunod-sunod, tabangi lamang sila sa paghan-ay og tarung kutob sa mahimo. Dawata ug awhaga ang tanan nga mga tubag.)

2. Ipadibuho sa usa ka bata ang usa ka hulagway diha sa pisara o piraso sa papel ang paagi unsaon niya paghupot sa mga sugo sulod sa semana ug unya sultihi ang uban nga mga bata unsa ang iyang gilaraw nga buhaton. Pagpuli-puli sa pagbuhat niini aron ang matag bata adunay higayon sa pagdibuho og usa ka hulagway ug sa pagpasabut niini. Ang mga bata mahimo nga modibuho sa ingon nga mga butang sama sa pagsimba, pagampo, pagtabang sa ilang mga banay, ug pakigbahin sa ilang mga dulaan.

3. Ipaawit o ipasulti ang mga pulong sa “Kaisug ni Nephi [Nephi’s Courage]” (Children’s Songbook, p. 120); ang mga pulong gilakip diha sa luyo niining tamdanan nga basahon. Kamo mahimo nga mobuhat sa pipila ka mga lihok o modula sa mga pulong.

4. Alang sa mga bata kinsa makabasa, paghimo og usa ka kopya sa “Akong Pakigsaad sa Bunyag” gikan sa ighahatag nga basahonon diha sa katapusan sa leksyon 13. Guntinga ang ighahatag nga basahonon ngadto sa upat ka mga piraso pinaagi sa paggunting niini ubos sa mga pulong “Ako, _______________________ , nagsaad,” ubos sa mga pulong “sa pagsunod sa mga sugo sa Langitnong Amahan,” ug ubos sa mga pulong “Langitnong Amahan nagsaad sa.” Sagula ang mga piraso ug hangyoa ang mga bata sa pagtipon kanila sa ilang husto nga pagkahan-ay. Human ang mga bata makatipon sa mga piraso, basaha ang pakigsaad sa bunyag og kusog uban sa klase. Ipasabut nga ang Langitnong Amahan buot kanato nga mohupot sa atong pakigsaad nga atong gihimo sa bunyag nga mosunod sa mga sugo. Siya misugo sa mga propeta sa pagsulat sa iyang mga pulong aron kita makahibalo sa iyang mga pagtulun-an ug mga sugo.