Leksyon 2

Langitnong Amahan Misalig Kanato nga Mosunod sa Iyang Laraw

Katuyoan

Aron sa pagtabang sa matag bata sa pagsabut nga ang Langitnong Amahan misalig kanila sa paghimo og matarung nga mga pagpili.

Pagpangandam

1. Pagtuon sa Abraham 3:22–28.

2. Paghimo og usa ka tsapa alang sa matag bata ug usa alang sa imong kaugalingon ingon sa gipakita:

   

   Akong Langitnong Amahan Misalig Kanakosa—

   Sa tunga sa inyong tsapa, isulat ang mga titik PAM.

3. Pangandam sa pagtudlo sa ikaduha nga bersikulo sa “Pilia ang Matarung nga Paagi [Choose the Right Way]” (Children’s Songbook, p. 160); ang mga pulong gilakip diha sa luyo sa tamdanan nga basahon.

4. Mga kagamitan nga gikinahanglan:

   1. Krayola o lapis alang sa matag bata.

   2. Alpirel o usa ka tape alang sa matag tsapa.

   3. Ang PAM nga taming (shield) nga anaa sa atubangan sa tamdanan nga basahon.

   4. Tisas, pisara, ug papas (o uban nga mahimo nga kasulatan).

   5. Hulagway 3-2, Langitnong Amahan Mihatag Kanato sa Iyang Laraw.

5. Himoa ang gikinahanglan nga mga pagpangandam alang sa bisan unsa nga mga kalihokan sa pagpalambo nga imong gamiton.

Gisugyot nga Pagpalambo sa Leksyon

Pagdapit og usa ka bata sa paghatag sa pagsugod nga pag-ampo.

Tinoa ang mga bata kon kamo nag-awhag kanila sa paghimo og usa ka butang sulod sa semana.

Kita Mga Anak sa usa ka Gamhanan nga Hari

Pang-atensyon nga kalihokan

Isaysay ang mosunod nga sugilanon mahitungod sa anak nga lalaki sa usa ka gamhanan nga hari:

Kaniadto dihay usa ka hari kansang anak nga lalaki, ang prinsipe, gidakup ug gidala ngadto sa layo kaayo gikan sa iyang panimalay.

Ang iyang mananakup naninguha sa pagpugos sa prinsipe sa paghimo og dili maayo. Sila naninguha sa pagtudlo kaniya sa dili pagmabination ngadto sa mga tawo nga naglibut kaniya. Sila migamit og ngil-ad nga mga pinulongan ug naninguha sa paghimo kaniya nga manumpa. Sila naninguha sa pagpugos kaniya sa pagpamakak, pagpanikas, ug pagpangawat. Gani sila naninguha sa pagpugos kaniya sa pagkaon ug pag-inom niana nga dili maayo alang sa iyang panglawas. Apan ni kausa ang prinsipe nagbuhat sa bisan hain niining ngil-ad nga mga butang. Sa katapusan, human sa unom ka mga bulan sa mapintas nga pagtagad, ang mga mananakup nangutana sa prinsipe, “Ngano nga ikaw dili mobuhat sa unsay among ipabuhat kanimo?”

Siya mitubag, “Ako dili makabuhat sa unsay inyong gipahimo kanako, tungod kay ako anak sa usa ka hari, ug ang akong amahan nagtudlo kanako sa pagbuhat unsa ang matarung. Ako gipakatawo nga mahimo nga usa ka hari.”

Panaghisgutan

Ipasabut nga ang prinsipe nakahibalo nga siya anak nga lalaki sa usa ka hari ug gipaabut nga mahimo nga usa ka hari sa iyang kaugalingon sa panahon nga siya dako na.

Sultihi ang mga bata nga ang anak sa usa ka hari anaa sa lawak klasehanan karon.

Balak

Hangyoa ang mga bata sa pagpaminaw sa usa ka balak aron sa pag-ila kinsa kining bata sa gamhanan nga hari. Basaha o tabangi ang usa sa mga bata sa pagbasa sa mosunod nga balak:

“Ako usa ka bata nga gikan sa harianon nga pagkatawo.

Hari sa langit ug sa yuta ang Amahan ko.

Natawo sa mga palasyo sa kahitas-an ang akong espiritu.

Usa ka bata nga hinigugma, usa ka prinsesa (o prinsipe) ako”

Anna Johnson, “I Am a Child of Royal Birth,” Children’s Friend, Oct. 1959, p. 29).

Balak

• Kinsa ang harianon nga bata? (Matag usa kanato.)

• Kinsa ang hari? (Langitnong Amahan.)

Tabangi ang mga bata sa pagsabut nga matag usa nga tawo diha sa klase usa ka prinsipe o prinsesa. Kitang tanan mga anak sa labing gamhanan sa tanan nga mga hari, ang atong mahigugmaon nga Langitnong Amahan. Siya buot kanato nga mobuhat sa unsay matarung, sama sa gibuhat sa prinsipe diha sa sugilanon.

Langitnong Amahan Misalig Kanato

Pang-pisara nga kalihokan

Isulat ang pulong salig diha sa pisara.

Pang-pisara nga kalihokan

• Unsa ang kahulugan sa salig?

Tuguti ang mga bata sa pagtubag.

Sugilanon

Sugilanon

• Nakangadto na ba kamo diin ngitngit kaayo?

Isaysay ang mosunod nga sugilanon:

Sa diha nga si Susan siyam na ka tuig ang panuigon, ang iyang amahan midala kaniya sa pagsusi sa usa ka langub duol sa ilang panimalay. Samtang sila misulod sa langub, si Susan nahadlok tungod kay kini ngitngit ug katingadan. Ang iyang amahan mitabang paghupay sa iyang kahadlok pinaagi sa paggunit sa iyang kamot ug pakigsulti kaniya samtang sila milakaw paingon sa sulod. Siya mitudlo kaniya sa paghinol pinaagi sa iyang mga kamot sa mga bongbong ug sa pagdailos sa iyang mga tiil subay sa gansangon nga yuta.

Sa hinay sila miaginod paglakaw sa langub diha sa kangitngit. Si Susan nahadlok ug usahay buot nga mobalik sa agi, apan ang iyang amahan sa kanunay anaa sa duol ug miawhag kaniya sa pagpadayon.

Sa wala madugay si Susan nakakita og kahayag sa unahan. Kini usa ka lutsanan sa lain nga tumoy sa langub. Napuno sa kaisug, siya midali paglakang ngadto sa lutsanan ug mibati og dako nga garbo mahitungod sa unsay iyang nabuhat. Ang iyang amahan mipahiyom. Unya siya nangutana ni Susan kon siya naghunahuna ba nga siya nakahimo sa paglakaw balik ngadto sa langub nga mag-inusara. Si Susan nahadlok og gamay sa hunahuna nga moadto nga maginusara apan andam nga moadto. Ang amahan ni Susan misulti kaniya nga siya walay angay kabalak-an diha sa agianan sa langub ug mipahayag og dako nga pagsalig sa iyang kahanas sa paghimo niini nga mag-inusara. Siya usab mipasalig kaniya nga siya maghulat kaniya sa pikas tumoy sa agianan.

Si Susan mibalik sa sulod sa langub uban sa hinay nga mabinantayon nga mga lakang, naghinol sa mga bongbong uban sa iyang mga kamot ug sa yuta uban sa iyang mga tiil, ingon nga ang iyang amahan mitudlo kaniya. Si Susan mibati og bag-o nga kakulba hinam samtang siya sa hinay nagpaingon og labaw ka duol ngadto sa pikas tumoy sa langub. Siya nalipay kaayo sa diha nga siya migula sa pikas tumoy sa langub ngadto sa kahayag sa adlaw ug sa mga bukton sa naghulat nga amahan.

Sultihi ang mga bata nga sama nga ang amahan ni Susan mitudlo kaniya unsaon pagpangita sa iyang agianan diha sa langub, ang atong Langitnong Amahan nagtudlo kanato unsaon sa pagpangita sa atong agianan sa kinabuhi ug balik ngadto kaniya. Sa diha nga ang amahan ni Susan mipabalik kaniya sa langub nga nag-inusara, siya misalig kaniya nga mohinol sa mga bongbong ug sa yuta aron makadumdom sa iyang agianan pagguwa. Ang atong Langitnong Amahan misalig kanato sa paghimo og matarung nga mga pagpili aron kita makadumdom sa atong agianan balik ngadto kaniya. Siya naghulat kanato nga mobalik ngadto kaniya.

Panaghisgutan

Panaghisgutan

• Diin kita sa wala pa kita moanhi sa yuta? (Kita mipuyo uban sa atong Langitnong Amahan; tan-awa sa Abraham 3:22–23.)

Ipasabut nga kita nahigugma sa Langitnong Amahan, ug kita nakahibalo nga siya naghigugma kanato. Kita mga malipayon didto. Ang Langitnong Amahan misulti kanato nga siya buot kanato nga masama kaniya ug nga siya adunay usa ka laraw nga makatabang kanato sa pagkab-ut niini nga katuyoan.

Hulagway

Ipakita ang hulagway 3-2, Langitnong Amahan Naghatag Kanato sa Iyang Laraw, ug itudlo nga si Jesus didto uban kanato. Kitang tanan didto naghiusa.

Ang laraw sa Langitnong Amahan naglakip sa paglalang sa yuta alang kanato. Sa yuta kita makakat-on sa kalainan tali sa matarung ug sa sayop ug magpili alang sa atong mga kaugalingon unsa ang atong buot buhaton. Ang atong Langitnong Amahan nakahibalo nga kita makahimo og mga kasaypanan. Apan siya mopadala ni Jesukristo aron sa pagtabang kanato sa pagbuntog kanila. (Tan-awa sa Abraham 3:24–27.)

Ipasabut nga ang Langitnong Amahan mipili ni Jesus sa pagtabang kanato tungod kay siya masulundon ug buot mosunod sa laraw sa Langitnong Amahan. Ang Langitnong Amahan usab mipili kaniya sa paglalang niini nga yuta alang kanato.

Kita adunay lain nga igsoon nga lalaki nga ginganlan og Lucifer. Siya buot kanato nga mosunod kaniya kay sa Langitnong Amahan. Apan ang pagsunod ni Lucifer dili unta makaayo alang kanato. Ang Langitnong Amahan nasayud niana ug mipili ni Jesus sa pagpahinabo sa iyang laraw. Kana mihimo ni Lucifer sa hilabihan nga pagkasuko. (Tan-awa sa Abraham 3:27–28.)

Hulagway

• Unsa ang gibuhat ni Lucifer (Siya mihaylo sa daghan nga mga tawo sa pagsunod kaniya kay sa Langitnong Amahan.)

• Kinsa ang atong gipili nga sundon? (Ang Langitnong Amahan ug si Jesus. Ipasabut nga kadto lamang kinsa mipili sa pagsunod sa Langitnong Amahan ug ni Jesus ang makadawat og mga lawas. Kadto kinsa mipili sa pagsunod ni Lucifer wala makadawat og mga lawas.)

• Unsa ang nahitabo ni Lucifer? (Siya gisalikway gikan sa langit ug nabantug ingon nga si Satanas o ang yawa. Siya naninguha sa pagtintal kanato sa pagbuhat og sayop. Ipasabut nga siya sa gihapon naninguha sa pagkuha kanato aron sa pagsunod kaniya kay sa Langitnong Amahan ug ni Jesus, sama nga siya naninguha samtang kitang tanan nagpuyo uban sa Langitnong Amahan.)

Isulti sa mga bata nga ang pagpili sa pagsunod sa Langitnong Amahan ug ni Jesus mao ang matarung nga pagpili ug nga ang Langitnong Amahan ug si Jesus nahimuot sa atong hukom. Ang Langitnong Amahan buot kanato nga mopili sa pagsunod sa iyang laraw dinhi sa yuta aron kita makabalik sa pagpuyo uban kaniya.

Kita Makasunod sa Laraw sa Langitnong Amahan pinaagi sa Pagpili sa Matarung

Dula

Ipasabut ngadto sa mga bata nga adunay daghan nga mga paagi sa pagpili sa matarung matag adlaw. Tabang kanila sa pagdula sa dula nga “Unsa ang Buot sa Langitnong Amahan nga Akong Buhaton?”

Hatagi ang matag bata og higayon sa pagtubag og usa sa mosunod nga mga pangutana. Dugangi pa ang mga pangutana kon gikinahanglan aron ang matag bata adunay kahigayunan sa pagpili unsa ang iyang buhaton. Himoa ang mga pangutana nga angay sa inyong klase.

Dula

1. Unsa ang buot sa Langitnong Amahan nga akong buhaton kon ako kapoy kaayo usa ka gabii niana nga ako buot matulog nga walay mga pag-ampo?

2. Unsa ang buot sa Langitnong Amahan nga akong buhaton kon ako mosaad sa akong inahan nga ako motabang kaniya, apan usa ka higala miabut ug mihangyo kanako nga magdula hinoon?

3. Unsa ang buot sa Langitnong Amahan nga akong buhaton kon ako makakita og usa ka butang nga iya sa lain nga tawo?

4. Unsa ang buot sa Langitnong Amahan nga akong buhaton kon ako sa wala tuyoa nakabuak sa paborito nga dulaan sa akong higala?

5. Unsa ang buot sa Langitnong Amahan nga akong buhaton kon ako mosaad sa akong inahan nga ako mopauli niana nga takna?

Awit ug panaghisgutan

Isulti sa mga bata nga ang ikaduha nga garay sa “Pilia ang Matarung nga Paagi [Choose the Right Way]” nagpasabut og pipila ka mga paagi nga kita makapili og matarung ug ipakita nga kita mga takus sa pagsalig sa Langitnong Amahan kanato. Ipapaminaw kanila samtang kamo mosulti pag-usab sa mga pulong sa ikaduhang garay.

Awit ug panaghisgutan

• Unsa ang gisulti kanato sa awit nga atong mahimo aron makapili sa matarung? (Pag-ampo, pagbaton og hugot nga pagtuo, paghinulsol, ug pagsunod.)

Isulat kini nga mga pulong diha sa pisara. Alang sa labaw ka gagmay nga mga bata, isulti ang mga pulong og kusog ug ipabalik og sulti kanila ang mga pulong uban kaninyo. Pangutan-a ang mga bata unsa ang gipasabut niini nga mga pulong. Dugangi ang ilang mga ideya ingon sa panginahanglan.

Awit ug panaghisgutan

1. Pag-ampo nagpasabut og pagpakigsulti ngadto sa Langitnong Amahan. Pagpasalamat kaniya alang sa iyang tanan nga mga panalangin kaninyo, ug paghangyo kaniya sa pagtabang kaninyo sa pagpili sa matarung.

2. Pagbaton og hugot nga pagtuo nagpasabut sa pagtuo nga ang Langitnong Amahan ug si Jesukristo naghigugma kaninyo ug motabang kaninyo.

3. Paghinulsol mao ang pagbati og kasubo alang sa bisan unsay inyong nabuhat nga sayop, paghangyo sa Langitnong Amahan sa pagpasaylo kaninyo ug sa dili na pag-usab niini.

4. Pagsunod nagpasabut sa pagbuhat unsay gipabuhat kanato sa Langitnong Amahan.

Awit ug panaghisgutan

• Unsa ang gisulti sa awit nga mahitabo kon kita magpuyo sa mga pagtulunan ni Jesus? (Kita magmalipayon.)

Tabangi ang mga bata sa pagkat-on sa mga pulong pinaagi sa pagbalik pagusab kanila sa makadaghan nga mga higayon. Unya awita ang tibuok awit uban sa mga bata. Mahimo nga imong papason ang mga pulong diha sa pisara samtang ang mga bata nagkat-on kanila.

Katingbanan

Tsapa

Hatagi ang matag bata og usa ka papel nga tsapa ug krayola o lapis kon sila makasulat. Basaha og kusog ang mga pulong “Akong Langitnong Amahan Misalig Kanako sa—”.

Tsapa

• Unsa ang gisalig sa Langitnong Amahan nga atong buhaton? (Pagpili sa matarung.)

Tabangi ang mga bata sa pagsabut nga kon sila walo ka tuig na ang panuigon, sila makapili sa pagpabunyag tungod kay sila may igo na nga panuigon nga makahibalo sa matarung gikan sa sayop. Ang Langitnong Amahan misalig kanila sa pagpili sa matarung.

Ipakita sa mga bata ang PAM nga taming (shield) nga makita diha sa atubangan sa tamdanan nga basahon. Kamo mahimo usab nga mopahinumdom kanila sa mga titik sa PAM diha sa ilang mga singsing.

Ipasulat sa usa ka labaw og panuigon nga bata diha sa pisara ang mga titik nga nagbarug alang sa “pilia ang matarung.” Ipakita sa mga bata ang tsapa nga ang mga titik anaa sa tunga. Ipasulat kanila ang mga titik sa ilang kaugalingon nga mga tsapa kon sila makahimo ug tabangi sila sa pagtaod sa ilang mga tsapa diha sa ilang saput.

Pagpamatuod

Paghatag og pagpamatuod nga ang tanan nga mga bata diha sa klase mga anak sa Langitnong Amahan. Siya labaw nga makagagahum kay ni bisan kinsa nga hari sa yuta. Ang Langitnong Amahan misalig sa matag usa kanila nga mobuhat unsa ang matarung aron sila makabalik sa pagpuyo uban kaniya pag-usab.

Isugyot nga ang bata nga naghatag sa panapos nga pag-ampo mohatag og pasalamat alang sa usa ka mahigugmaon nga Langitnong Amahan kinsa misalig kanato sa pagbuhat og matarung.

Pagpalambo nga mga kalihokan

Pagpili gikan sa mosunod nga mga kalihokan kadto nga labing moangay alang sa inyong mga bata. Kamo makagamit kanila diha sa leksyon gayud o ingon nga usa ka balik-pagtuon o katingbanan. Alang sa dugang nga paggiya, tanawa ang “Panahon sa Klase” diha sa “Mga Tabang alang sa Matutudlo.”

1. Sultihi ang mga bata nga ikaw mogula sa lawak sa makadiyut, apan sa dili pa ikaw mobuhat niini, ikaw mohagawhaw og pipila ka mga panudlo sa dunggan sa matag bata. Ipahibalo sa mga bata nga kini nga mga panudlo mosulti kanila og usa ka butang nga makapahimuot sa ilang Langitnong Amahan. Isulti kanila nga kon sila nagkinahanglan kanimo, ikaw anaa sa duol. Ipasabut nga ikaw malipay kon sila mosunod sa imong mga panudlo.

   Paghagawhaw og managsama nga mga panudlo ngadto sa matag bata, “Ikyugpos ang imong mga bukton, piyonga ang imong mga mata, ug paghunahuna mahitungod sa Langitnong Amahan ug ni Jesukristo.”

   Biyai ang lawak ug tindog sa may pultahan. Pagpabilin diha sa pipila ka mga gutling. Samtang ikaw mobalik pagsulod sa lawak, pasalamati ang mga bata kinsa misunod sa imong mga panudlo. Ipasabut nga ang atong Langitnong Amahan ug si Jesus naghatag kanato og mga panudlo, ug sila buot kanato nga mosunod kanila. Kon kita mobuhat, kita mobalik nga malampuson ngadto kanila sa umaabot nga adlaw.

2. Ipahimo sa matag bata ang pagdibuho ug pagkolor sa hulagway sa usa ka butang nga ilang mabuhat sa pagsunod sa laraw sa Langitnong Amahan.