Leksyon 21

Kita Makadawat og Mahinungdanon nga mga Panalangin Ingon nga mga Sakop sa Simbahan ni Jesukristo

Katuyoan

Aron sa pagtabang sa mga bata nga makasabut nga ang mahinungdanon nga mga panalangin mosangput gikan sa pagkasakop sa Simbahan.

Pagpangandam

1. Sa mainampuon nga paagi pagtuon sa Mosiah 18 ug Enos 1, ug pangandam sa pagsaysay sa sugilanon niining duha ka mga kapitulo.

2. Pangandam sa pagtabang sa mga bata sa pag-awit o pagsulti sa mga pulong sa “Ang Espiritu Santo [The Holy Ghost]” (Children’s Songbook, p. 105) ug “Tabangi ‘Ko, Mahal nga Amahan [Help Me, Dear Father]” (Children’s Songbook, p. 99); ang mga pulong niini nga mga awit gilakip diha sa luyo niining tamdanan nga basahon.

3. Sa dili pa magsugod ang klase, ikatag ang mga butang nga imong nakolekta—lakip ang mga hulagway 3-13, 3-14, 3-48 ug 3-49 (tan-awa ang 4d sa ubos)—diha sa usa ka lamesa o diha sa sawog, ug tabuni sila og panapton.

4. Mga kagamitan nga gikinahanglan:

   1. Ang mosunod nga mga gilis sa pulong:

      Ang mga Panalangin sa Bunyag

      Kita Mahimo nga mga Sakop sa Simbahan ni Jesukristo

      Gasa sa Espiritu Santo

      Langitnong Amahan Nagpasaylo Kanato

   2. Kolektaha ang mosunod nga mga butang kon mahimo: usa ka Basahon ni Mormon, usa ka Biblia, usa ka gamay nga hulagway ni Jesukristo, ug usa ka PAM nga singsing.

   3. Usa ka panapton nga igo ang gidak-on sa pagtabon sa mga butang nga imong nakolekta.

   4. Hulagway 3-48, Alma Nagbunyag diha sa mga Katubigan sa Mormon (62332; Sudlanan sa Hulagway sa Ebanghelyo 309); hulagway 3-13, Bata nga Lalaki Gibunyagan (62018); hulagway 3-14, Bata nga Babaye Gikumpirmahan (62020); ug hulagway 3-49, Enos Nag-ampo (62604; Sudlanan sa Hulagway sa Ebanghelyo 305).

5. Paghimo sa mga gikinahanglan nga mga pagpangandam alang sa bisan unsa nga pagpalambo nga mga kalihokan nga imong pagagamiton.

Gisugyot nga Pagpalambo sa Leksyon

Pagdapit og usa ka bata sa paghatag sa pagsugod nga pag-ampo.

Tinoa ang mga bata kon ikaw nag-awhag kanila sa pagbuhat og usa ka butang sulod sa semana.

Kita Mahimo nga Magpasakop sa Simbahan ni Jesukristo

Pang-atensyon nga kalihokan

Sultihi ang mga bata nga ilawon sa panapton diha sa ibabaw sa lamesa adunay pipila ka mga butang. Ipasabut nga imong kuhaon ang panapton sulod sa napulo ka mga gutling. Ang mga bata gikinahanglan nga motan-aw pag-ayo ug maningkamot sa paghinumdom sa mga butang kutob sa ilang mahimo.

Papundoka ang mga bata liyok sa lamesa. Kuhai og tabon ang mga butang sulod sa napulo ka mga gutling. Unya taboni pagbalik ang mga butang. Pabalika ang mga bata ngadto sa ilang mga lingkuranan.

Papuli-puliha ang mga bata sa paghingalan sa tanan nga mga butang diha sa lamesa. Human makatubag kadto kinsa buot mosulay, kuhaa ang panapton aron makita unsa sila ka maayo. Ipasabut nga matag usa niini nga mga butang makapahinumdom kanato sa mga panalangin nga atong madawat gikan sa Langitnong Amahan kon kita bunyagan.

Gilis sa pulong

Ipapilit sa bata ang gilis sa pulong nga “Ang mga Panalangin sa Bunyag” diha sa pisara.

Hulagway ug balaan nga kasulatan nga sugilanon

Ipakita ang hulagway 3-48, Alma Nagbunyag diha sa mga Katubigan sa Mormon.

Sa lakbit balika pagtuon ang sugilanon ni Alma nga anaa sa leksyon 20. Pahinumdumi ang mga bata nga human si Alma milayas gikan sa mga sulugoon sa dautan nga Hari Noah, siya mitago diha sa kamingawan. Didto siya misulat sa mga pagtulun-an nga gipamulong ni Hari Abinadi.

Human sa daghan nga mga adlaw, si Alma miipon sa mga katawhan ug sa tago misugod sa pagtudlo kanila mahitungod ni Jesukristo. Daghan kanila naminaw ngadto ni Alma ug mituo kaniya. Kadto kinsa mituo miadto sa usa ka dapit nga gitawag og Mormon. Dinhi niini nga dapit may usa ka tuburan sa lunsay nga tubig ug kalibunan sa gagmay nga mga kahoy diin si Alma mitago sa iyang kaugalingon panahon sa adlaw gikan sa mga tigpangita sa hari.

Daghan nga mga tawo ang magpundok aron sa pagpaminaw ni Alma. Siya mitudlo kanila mahitungod sa hugot nga pagtuo ug paghinulsol. Si Alma mibunyag sa tanan niadto kinsa buot nga magpabunyag, ug sila nahimo nga mga sakop sa tinuod nga Simbahan ni Jeuskristo.

Gilis sa pulong

Ipapilit sa usa ka bata ang gilis sa pulong nga “Kita Mahimo nga mga Sakop sa Simbahan ni Jesukristo.”

Kita Makabaton sa Gasa sa Espiritu Santo

Gilis sa pulong ug panaghisgutan

Gilis sa pulong ug panaghisgutan

• Unsa nga gasa mahimo nga atong madawat human kita mabunyagi? (Ang gasa sa Espiritu Santo.)

Ipapilit sa usa ka bata ang gilis sa pulong “Gasa sa Espiritu Santo” ubos sa nag-una nga gilis sa pulong.

Ipasabut nga human kita mabunyagi, kita modawat sa gasa sa Espiritu Santo pinaagi sa pagpandong sa mga kamot. Kini usab usa ka maanindot nga gasa gikan sa atong Langitnong Amahan. Kon kita mobuhat unsa ang matarung, ang Espiritu Santo mopuyo kanato kanunay ug mosulti kanato sa matarung nga mga butang nga buhaton.

Awit

Awita o isulti uban sa mga bata ang mga pulong sa “Ang Espiritu Santo.”

Artikulo sa hugot nga pagtuo

Balika pagtuon uban sa mga bata ang ikaupat nga artikulo sa hugot nga pagtuo. Ipasabut nga ang gasa sa Espiritu Santo mahimo nga usa ka panalangin ngari kanato sa atong tibuok kinabuhi—kon kita magpuyo nga takus.

Sugilanon

Sa imong kaugalingon nga mga pulong, isaysay ang sugilanon mahitungod sa unsa nga paagi nga ang Espiritu Santo mitabang ni Tim:

Si Tim nakakita nga ang iyang inahan nabalaka. Ang iyang amahan ingon og gikapoy ug naguol. Kini dugay na nga panahon sukad sila nakadawat og sulat gikan sa iyang igsoon nga lalaki, si Wally, kinsa nag-alagad og usa ka misyon.

Si Tim milingkod diha sa sopa sa lawak-dawatanan og bisita. Siya makadungog sa iyang inahan ug amahan samtang sila nagsinultihanay diha sa kusina.

“Unsa ka makalilisang nga hitabo nga adunay usa ka linog,” miingon ang iyang amahan, “ug duol kaayo sa dapit diin si Wally nagtrabaho. Ako nanghinaut nga kita sa dili madugay makahibalo kon naunsa na siya.”

Si Tim naminaw pag-ayo. “Linog… Wally ?” siya naghunahuna sa iyang kaugalingon. Siya mibati og bugon sa iyang tutunlan. Siya ingon og nakakita sa iyang igsoon nga lalaki nga nasamdan o nalubong ilawom sa daghang dagko nga mga bato. Siya mipasiplat sa hulagway ni Wally diha sa lamesa, ug mga luha mipuno sa iyang mga mata. Siya sa dali misulod sa iyang lawak ug gisirhan ang pultahan. Si Tim naghunahuna sa tanang matang sa makalilisang nga mga butang ug nabalaka tibuok niana nga gabii ug tibuok sunod nga adlaw. Sa matag higayon nga siya mosulay sa pagpakigsulti ngadto sa iyang mga ginikanan mahitungod ni Wally, usa ka bugon mobabag sa iyang tutunlan ug dili siya makahimo sa pagpagula sa mga pulong.

Ang mga kahadlok ni Tim nag-anam kadako. Siya mibati nga siya kinahanglan makigsulti niining mga butanga ngadto sa usa ka tawo. Siya nakahibalo nga ang iyang amahan nagtrabaho diha sa silong, busa si Tim nanaog sa silong.

Si Tim miabli sa iyang ba-ba aron sa pagsugod unsa ang iyang gilaraw nga isulti. Apan kini dili sayon sa pagsulti mahitungod ni Wally. Siya miduko sa iyang ulo, ug ang iyang mga mata napuno sa luha.

“Ikaw nabalaka mahitungod ni Wally dili ba, Tim?” ang iyang amahan nangutana. “Sa diha nga kami nakadungog mahitungod sa linog, kami nabalaka. Ang imong inahan ug ako nag-ampo alang sa kang Wally nga mapalayo sa kadaut. Kami nakadawat og paghupay gikan sa Espiritu Santo nga ang tanan maayo ra ug nga kami dili kinahanglan nga mabalaka. Ikaw mahimo nga makabaton sa sama nga paghupay, Tim.”

“Sa unsa nga paagi?” nangutana si Tim.

“Pag-ampo ngadto sa Langitnong Amahan. Sultihi siya sa imong mga kahadlok. Hangyoa siya sa pagtabang kanimo nga makahibalo kon si Wally wala bay kadaut. Ako nakasiguro nga ikaw makadawat og paghupay.”

Si Tim mibuhat unsa ang gisugo sa iyang amahan nga buhaton. Siya nag-ampo nga walay kadaut nga moabut ni Wally. Siya naghangyo sa iyang Langitnong Amahan sa pagtabang kaniya nga makahibalo nga si Wally buhi ug maayo. Sa diha nga si Tim nahuman sa iyang pag-ampo, usa ka dako nga pagbati sa kalinaw ug paghupay miabut diha kaniya. Siya wala na mabalaka mahitungod ni Wally. Siya nakahibalo ang tanan maayo ra.

Sa katapusan usa ka sulat miabut nagpasalig sa banay nga si Wally walay kadaut. Si Tim wala gayud mahibulong. Siya daan na nga nakahibalo nga si Wally walay kadaut. Si Tim gihupay sa Espiritu Santo.

Sugilanon

• Giunsa pagtabang sa Espiritu Santo si Tim? (Siya mihatag kaniya og malinawon nga pagbati—usa ka pagbati nga si Wally walay kadaut.)

Sultihi ang mga bata nga ang gasa sa Espiritu Santo usa ka mahinungdanon nga panalangin ngadto ni Tim ug sa iyang banay. Kini mahimo nga mahinungdanon nga panalangin ngari kanato, usab.

Human Kita Bunyagi, ang Langitnong Amahan Mopasaylo Kanato

Gilis sa pulong

Ipapilit sa usa ka bata ang gilis sa pulong “Langitnong Amahan Nagpasaylo Kanato” diha sa pisara.

Ipasabut nga laing mahinungdanon nga panalangin sa bunyag mao nga kita mapasaylo kon kita makahimo og mga sayop ug mobuhat og dili matarung. Ang atong Langitnong Amahan nakahibalo nga iyang tanan nga mga anak makahimo og mga sayop. Siya misugo sa matag usa sa paghinusol sa ilang binuhatan nga mga sayop. Kon kita maghinulsol, siya nagsaad nga siya mopasaylo kanato ug mohatag kanato sa uban nga mga panalangin. Pahinumdumi ang mga bata nga kabahin sa paghinulsol mao ang pagbaton og hugot nga pagtuo ni Jesukristo. Lain nga bahin mao ang labaw nga pagpuyo sama nga si Jesus buot kanato nga mopuyo, nga mao ang maayo nga pagsunod sa iyang mga sugo. Kita makakat-on og labaw ka daghan kaayo mahitungod ni Jesus ug sa iyang mga sugo pinaagi sa pagtuon sa balaan nga mga kasulatan.

Hulagway ug balaan nga kasulatan nga sugilanon

Ipakita ang hulagway 3-49, Enos Nag-ampo.

Ipasabut nga si Enos usa ka propeta kinsa atong mabasa diha sa Basahon ni Mormon. Ang amahan ni Enos naghangyo kaniya sa pagtipig sa mga talaan nga naglakip sa balaan nga mga kasulatan ug usa ka kasaysayan sa iyang katawhan. Ang kasaysayan gisulat diha sa metal nga mga palid. Ang amahan ni Enos nagtudlo ni Enos sa ebanghelyo ingon nga gilangkob dinhi niini nga mga talaan, busa si Enos nasayud unsaon niya pagpuyo. Usa ka adlaw niana si Enos miadto sa lasang ug nag-ampo ngadto sa Langitnong Amahan sa tibuok adlaw ug ngadto sa lawom sa kagabhion. Siya naghangyo nga mapasaylo sa mga sayop nga iyang nabuhat. Unya dihay usa ka maanindot nga nahitabo.

Ipasabut nga ang Langitnong Amahan mipasaylo ni Enos ug misaad sa pagpanalangin kaniya. Usa ka tingog miabut ngadto kaniya nga nag-ingon “Enos, ang imong mga sala gipasaylo na, ug ikaw panalanginan” (Enos 1:5). Si Enos gipasaylo tungod kay siya dihay hugot nga pagtuo ni Jesukristo, kinsa iyang nabasa diha sa mga talaan. Siya napasaylo tungod kay siya mituo sa pag-ula nga sakripisyo ni Jesukristo. Ang Langitnong Amahan misaad usab ni Enos nga kadtong mga talaan pagapanalipdan ug nga ang mga Lamanite usa ka adlaw niana makahimo sa pagbasa sa mga pulong. Ang mga talaan motabang kanila sa pagkat-on mahitungod ni Jesus, paghupot sa mga sugo, ug pagbaton og kapasayloan kon sila magbuhat og dili matarung.

Ipasabut nga kita nakahibalo nga ang Langitnong Amahan mituman sa iyang saad ngadto ni Enos tungod kay atong mabasa diha sa Basahon ni Mormon ang mga butang nga gisulat diha sa mga palid.

Hulagway ug balaan nga kasulatan nga sugilanon

• Unsa nga panalangin ang nadawat ni Enos sa diha nga siya naghinulsol? (Dawata ang bisan unsa nga tubag, apan hatagi og gibug-aton nga ang Langitnong Amahan mipasaylo kaniya.)

Ipahayag ang imong pasalamat alang sa kahibalo nga ang matag usa kinsa sa tinud-anay naghinulsol mapasaylo. Hatagi og gibug-aton nga ang balaan nga mga kasulatan mahimo nga usa ka mahinungdanon nga panalangin sa pagtabang kanato sa pagpalambo og hugot nga pagtuo diha ni Jesukristo ug pagkat-on sa iyang mga pagtulun-an.

Awit

Tabangi ang mga bata sa pag-awit o pagsulti sa mga pulong sa “Tabangi ‘Ko, Mahal nga Amahan [Help Me, Dear Father].”

Katingbanan

Balika pagtuon ang mga panalangin sa pagkasakop sa Simbahan ingon nga gilista diha sa mga gilis sa pulong. Pahinumdumi ang mga bata nga ang Langitnong Amahan nagsaad sa paghatag kanato og mahinungdanon nga mga panalangin kon kita mabunyagan ug maghupot sa mga sugo.

Dapita ang mga bata sa paghunahuna sa mga panalangin nga gihatag sa Langitnong Amahan kanila sa sunod nga higayon nga sila moambit sa sakramento. Awhaga sila sa paghatag og talagsaon nga pagtagad ngadto sa mga pag-ampo sa sakramento ug sa paghunahuna sa mga saad nga ilang buhaton kon sila bunyagan. Kadto kinsa nabunyagan na mahimo nga mopalandong sa ilang bag-ohay nga bunyag.

Pagpamatuod

Ipamatuod nga ang Langitnong Amahan sa kanunay motuman sa iyang mga saad ngari kanato kon kita mosuod kaniya. Ikaw mahimo nga makigbahin sa mga bata og usa ka kasinatian mahitungod sa panahon nga ikaw mibati nga ikaw sa piho napanalanginan tungod sa imong pagkasakop diha sa iyang simbahan.

Pagdapit og usa ka bata sa paghatag sa panapos nga pag-ampo.

Pagpalambo nga mga Kalihokan

Pagpili gikan sa mosunod nga mga kalihokan kadto nga labing moangay alang sa imong mga bata. Ikaw makagamit kanila diha sa leksyon gayud o ingon nga usa ka balik-pagtuon o katingbanan. Alang sa dugang nga paggiya, tan-awa ang “Panahon sa Klase” diha sa “Mga Tabang alang sa Magtutudlo.”

1. Pag-andam og tsart uban sa mga pulong sa 3 Nephi 11:33 diha niini. Paggunting og lain nga papel nga sama og gidak-on sa tsart, ug isulat diha niini “Ang mga Panalangin sa Bunyag.” Guntinga kining piraso sama sa usa ka tanghaga. Ipapilit ang matag piraso ibabaw sa tsart aron nga ang tanan nga mga piraso motabon sa balaan nga kasulatan. Pagmatngon nga ang matag piraso sayon nga makuha aron dili madaot ang sinulat nga balaan nga kasulatan.

   Ipakita sa mga bata “Ang mga Panalangin sa Bunyag” nga tanghaga, ug ipabasa kanila ang ulohan. Ipasabut nga ikaw mobasa og pipila ka mga pangutana mahitungod sa leksyon. Bisan kinsa ang makatubag og usa ka pangutana sa husto mahimo nga molaksi og usa ka piraso sa tabon sa tanghaga. Sa kadugayan ang mga bata mopadayag sa balaan nga kasulatan sa ilawom. Ang mosunod mao ang pipila ka gisugyot nga mga pangutana:

   • Unsa nga mga pakigsaad ang atong gihimo diha sa bunyag? (Sa kanunay paghinumdom ni Jesukristo, sa pagdala sa iyang ngalan diha kanato, ug sa paghupot sa iyang mga sugo.)

   • Unsa ang gibuhat ni Alma diha sa mga katubigan sa Mormon? (Siya mibunyag sa mga tawo kinsa buot magpabunyag.)

   • Si Alma ug ang iyang mga sumusunod nahisakop sa unsa nga simbahan? (Ang Simbahan ni Jesukristo.)

   • Sa unsa nga paagi ang pag-ampo ni Tim natubag? (Ang Espiritu Santo mitabang kaniya paghibalo nga si Wally walay kadaut.)

   • Ngano nga si Enos nag-ampo? (Siya buot nga mapasaylo ang iyang mga sala.)

   • Unsa ang gihubad gikan sa bulawan nga mga palid? (Ang Basahon ni Mormon.)

   • Kanus-a kamo hingkod na nga igong bunyagan? (Kon kami walo na ka tuig ang panuigon.)

   Human ang mga piraso sa tanghaga makuha, pabasaha sa balaan nga kasulatan ang klase uban kaninyo. Ipasabut nga ang “pagpasunod sa gingharian sa Dios” nagpasabut sa pagpuyo uban sa Langitnong Amahan sa kahangturan.

2. Awita o isulti ang mga pulong sa himno “Ipha ang Inyong mga Panalangin [Count Your Blessings]” (Mga Himno ug mga Awit sa mga Bata o Hymns, no. 241).

   Ipha ninyo ang panalangin;

   Tagsa-tagsa inyong hinganlan.

   Ipha ninyo ang panalangin;

   Tan-awa unsa ang nabuhat sa Dios.

3. Isulat sa krayola ug sa piraso nga papel ang ngalan “Mga Panalangin sa Pagkasakop” alang sa matag bata. Ipadibuho ug pabutangi og kolor sa matag bata ang usa ka hulagway sa usa ka panalangin nga mahimo nga ilang madawat human sila mabunyagi ug makumpirmahi nga mga sakop sa Ang Simbahan ni Jesukristo sa mga Santos sa Ulahing Adlaw.