Ako Mahimo nga usa ka Misyonaryo

Katuyoan

Aron sa pagtabang sa mga bata sa pag-ampo nga sila makabuhat og misyonaryo nga buhat karon.

Pagpangandam

Sa mainampuon nga paagi pagtuon sa Doktrina ug mga Pakigsaad 133:37.
Kopyaha (o pagpaluta og usa ka kopya) sa misyonaryo nga batang babaye o batang lalaki alang sa matag bata.
Papangandama ang klase sa pag-awit o pagsulti sa mga pulong sa “Ako Hinaut Matawag sa Misyon [I Hope They Call Me on a Mission]” (Children’s Songbook, p. 169); ang mga pulong gilakip diha sa luyo niining tamdanan nga basahon.
Mga kagamitan nga gikinahanglan:
1. Usa ka Doktrina ug mga Pakigsaad.
2. Papel, mga gunting, ug mga krayola.
3. Hulagway 3-51, Wali sa Bukid (62166; Sudlanan sa Hulagway sa Ebanghelyo 212).
Paghimo sa gikinahanglan nga mga pagpangandam alang sa bisan unsa nga pagpalambo nga mga kalihokan nga imong pagagamiton.

Gisugyot nga Pagpalambo sa Leksyon

Hangyoa ang bata nga gidapit sa paghatag sa pagsugod nga pag-ampo sa pag-ampo alang sa mga misyonaryo sa tibuok kalibutan.

Tinoa ang mga bata kon ikaw nag-awhag kanila sa pagbuhat og usa ka butang sulod sa semana.

Kita Makatabang sa Pagtudlo sa Ebanghelyo ni Jesukristo

Pang-atensyon nga kalihokan

Paghangyo og usa ka bata nga motabang kanimo. Hangyoa ang bata sa paghatag og usa ka piraso nga papel ngadto sa matag tawo diha sa lawak, magsugod kon ikaw moingon og “sugod.” Human ang matag bata makadawat og usa ka piraso nga papel, kolektaha ang tanan nga mga piraso. Pangutan-a ang mga bata kon ang bata nga naghatag sa mga piraso nga papel makahimo ba sa pagbuhat niini sa labaw ka dali kon adunay motabang. Paghangyo og lain nga bata nga motabang sa paghatag sa mga piraso nga papel. Matag bata nga naghatag sa mga piraso sa papel kinahanglan mohatag og mga piraso nga papel ngadto sa katunga sa klase. Itudlo nga ang mga bata kinsa mitabang sa paghatag sa mga piraso nga papel makahuman sa ilang buhat sa labaw ka dali kon sila adunay tabang. Pabalika ang mga bata nga mitabang sa paghatag sa mga piraso nga papel ngadto sa ilang lingkuranan samtang inyong gikolekta ang mga piraso nga papel pag-usab. (Alang sa gamay nga klase, kamo mahimo nga manginahanglan og mga bata nga mohatag sa mga piraso nga papel mohatag og labaw kay sa usa ka piraso nga papel ngadto sa matag bata.)

Hulagway

Ipakita ang hulagway 3-51, Wali sa Bukid.

Ipasabut nga si Jesukristo naghangyo kanato sa pagtabang kaniya sa pagtudlo sa ebanghelyo. Uban sa igo nga mga tigtabang, ang iyang mga pagtulun-an makadto sa tanan nga mga tawo dinhi sa yuta. Si Jesukristo buot sa tanan nga makakat-on sa iyang mga pagtulun-an.

Balaan nga kasulatan nga panaghisgutan

Basaha ang Doktrina ug mga Pakigsaad 133:37. Ipasabut nga ang ebanghelyo mao ang lain nga pulong alang sa mga pagtulun-an ni Jesukristo, kabanay mao ang usa ka pundok sa mga tawo kinsa may relasyon ngadto sa usag usa, dila mao ang lain nga pulong alang sa pinulongan, ug mga tawo nagpasabut niadto kinsa sakop sa usa ka piho nga nasud, kolor o kumunidad.

Balaan nga kasulatan nga panaghisgutan

Unsa ang gisulti sa balaan nga kasulatan nga mahitabo? (Ang ebanghelyo isangyaw ngadto sa tanan.)
Unsa ang atong itawag niadto kinsa gitawag sa Langitnong Amahan aron sa pagtabang sa pagtudlo sa ebanghelyo? (Mga misyonaryo.)

Isulti sa mga bata nga ang matag sakop sa Simbahan, dili igsapayan kon tigulang o batan-on, mahimo nga usa ka misyonaryo pinaagi sa pagsulti sa uban mahitungod sa ebanghelyo.

Sugilanon

Ipapaminaw sa mga bata ang mosunod nga sugilanon mahitungod sa usa ka bata nga lalaki nga ginganlan og Ryan kinsa nahimo nga usa ka misyonaryo:

Si Ryan nalingaw sa pag-eskwela. Siya nakagusto ilabi na sa iyang magtutudlo, nga si Miss Johnson.

Usa ka adlaw niana si Miss Johnson mihangyo sa mga bata sa pagdibuho og hulagway sa unsay ilang gusto kon sila modako na. Si Ryan walay kalisud paghukom unsa ang iyang idibuho. Siya midibuho og hulagway sa usa ka lalaki nga nagkurbata nga nagdala sa iyang balaan nga mga kasulatan ug naglakaw sa dalan. Si Ryan wala nay lain pang gusto kay sa mahimo nga usa ka misyonaryo kon siya modako na, sama lamang sa iyang magulang nga lalaki.

Sa diha nga ang magtutudlo ni Ryan mitan-aw sa iyang hulagway, siya dili makasabut unsa ang iyang gidibuho. Si Miss Johnson dili sakop sa Simbahan, busa wala siya makahibalo unsa ang gibuhat sa lalaki diha sa hulagway ni Ryan. Siya mihangyo ni Ryan sa pagpasabut sa iyang dibuho ngadto kaniya. Si Ryan misulti ngadto sa iyang magtutudlo nga siya buot nga mahimong usa ka misyonaryo alang sa Ang Simbahan ni Jesukristo sa mga Santos sa Ulahing Adlaw kon siya modako na. Si Miss Johnson nahibulong nga ang labing dako nga tinguha sa usa ka batang lalaki mao ang mahimo nga usa ka misyonaryo, kay sa usa ka pulis, usa ka doktor o uban nga trabaho.

Human sa klase, si Miss Johnson mihangyo ni Ryan sa pagsulti kaniya og daghan pa mahitungod ngano nga siya buot magmisyonaryo. Si Ryan misulti kaniya giunsa niya paghigugma ang Simbahan ug giunsa sa iyang igsoon nga lalaki nga atua sa lain nga nasud pagtudlo sa uban mahitungod sa Simbahan. Siya misulti kanila nga siya nakahibalo nga ang Simbahan tinuod tungod kay ang iyang mga pagtulun-an mao ang mga pagtulun-an ni Jesukristo.

Niana nga gabii si Ryan misulti sa iyang mga ginikanan mahitungod ni Miss Johnson ug ang hulagway nga iyang gidibuho. Siya mihangyo sa iyang mga ginikanan kon siya makadapit ba ni Miss Johnson nganha sa panihapon aron ang banay makaila kaniya ug makasulti kaniya mahitungod sa ebanghelyo.

Sa sunod nga adlaw, si Ryan nagdala og sulat ngadto ni Miss Johnson nagdapit kaniya ngadto sa iyang balay alang sa panihapon. Iyang gidawat ang pagdapit ug miadto sa panimalay ni Ryan pipila ka adlaw wala madugay. Si Miss Johnson nalingaw pag-ayo ni Ryan ug sa iyang banay nga siya miduaw kanila kanunay. Sila dihay daghan nga mga panaghisgutan mahitungod sa Simbahan ug unom ka mga bulan wala madugay si Miss Johnson gibunyagan. Siya sa kanunay mapasalamaton ngadto ni Ryan tungod sa pagpakigbahin sa iyang gugma alang sa Simbahan ngadto kaniya.

Adunay Daghan nga mga Paagi nga Mahimong mga Misyonaryo

Balik-pagtuon

Isulti sa mga bata nga adunay daghan nga mga paagi nga mahimong maayo nga mga misyonaryo. Ikaw mosusi kon sila nakahibalo ba sa pipila niini nga mga paagi. Hangyoa sila sa pagpaminaw og maayo sa pipila ka mga pahayag. Kon ang pahayag usa ka maayo nga paagi nga mahimong usa ka misyonaryo, sila kinahanglan nga mobarug. Kon kini dili usa ka maayo nga paagi nga mahimong usa ka misyonaryo, sila kinahanglan nga molingkod.

Balik-pagtuon

Kamo dili mosugot sa usa ka kauban sa klase nga makigdula uban kaninyo sa eskwelahan.
Kamo nagdapit og usa ka higala ngadto sa Primarya.
Kamo mosaysay ngadto sa usa ka dili sakop nga higala mahitungod sa Simbahan ni Jesukristo.
Kamo walay pamatasan ngadto sa inyong silingan.
Kamo nagtigum og pipila ka salapi alang sa inyong misyonaryo nga bangko.
Kamo may balaan nga pagtahud sulod sa inyong tigum sa sakramento.
Kamo nanikas sa panahon sa eksamen sa eskwelahan.
Sa walay pagpananghid, kamo nagkuha og usa ka butang nga dili inyo.
Kamo wala mosunod sa inyong mga ginikanan ug unya nanghambog mahitungod niini ngadto sa inyong mga higala.
Kamo nagdapit og usa ka higala ngadto sa inyong panimalay alang sa gabii sa banay.
Kamo nagdapit og usa ka tawo nga bag-o diha sa inyong kasilinganan sa pagpakigdula uban kaninyo.
Kamo nagsungog og usa ka kauban sa klase hangtud siya naghilak.
Kamo nag-ampo alang sa mga misyonaryo.

Ikaw tingali buot nga mosaysay sa klase mahitungod sa usa ka paagi diin ikaw nahimo nga usa ka misyonaryo. Dapita ang mga bata sa pagpakigbahin og mga kasinatian nga sila o ang ilang mga sakop sa banay nakabaton diha sa pagpakigbahin sa ebanghelyo.

Katingbanan

Ighahatag nga basahonon nga kalihokan

Hatagi ang matag bata og usa ka misyonaryo nga batang lalaki o batang babaye nga ighahatag nga basahonon, ug ipadibuho sa matag bata ang usa ka nawong diha sa ilang ighahatag nga basahonon. Tabangi sila sa pagbutang sa ilang mga ngalan diha sa mga tag sa ngalan ug sa pagsulat sa “Ang Basahon ni Mormon” diha sa basahon. Human nila na koloran ang mga hulagway, ipagunting kanila ang mga hulagway.

Awit

Awita o isulti ang mga pulong “Ako Hinaut Matawag sa Misyon.”

Hanyoa ang bata nga gidapit sa paghatag sa panapos nga pag-ampo sa pagpasalamat sa Langitnong Amahan alang sa mga kahigayunan nga sila aduna nga mahimo nga mga misyonaryo.

Pagpalambo nga mga Kalihokan

Pagpili gikan sa mosunod nga mga kalihokan kadto nga labing moangay sa imong mga bata. Ikaw makagamit kanila niini nga leksyon gayud o ingon nga usa ka katingbanan. Alang sa dugang nga paggiya, tan-awa amg “Panahon sa Klase” diha sa “Mga Tabang alang sa Magtutudlo.”

Pagdapit og usa ka kinabig sa Simbahan sa pag-adto sa klase ug pagsulti mahitungod sa mga tawo kinsa mitabang kaniya sa pagkat-on mahitungod sa Simbahan. (Siguroha ang pagkuha sa pagtugot gikan sa obispo o presidente sa sanga kon ang tawo gikan sa lain nga purok o sanga . Isulti sa pangulo sa primarya kon ang tawo nagagikan ba sa sulod sa purok o sanga.)
Ipahisgot sa mga bata, unya ipadula, ang mosunod nga mga sitwasyon:
1. Ang inyong mga higala kinsa dili mga sakop sa Simbahan nakadungog kaninyo nga nag-awit og “Ako Anak sa Dios” ug nangutana kaninyo unsa nga awit ang inyong giawit. Sa unsa nga paagi kamo makagamit niini nga kahigayunan sa pagsulti kanila mahitungod sa Simbahan ug sa pagdapit kanila ngadto sa Primarya?
2. Kamo nakamatikud og bag-o nga batang lalaki diha sa kasilinganan. Siya manggiulawon ug wala pay mga higala. Sa unsa nga paagi kamo mahimo nga usa ka maayo nga misyonaryo?
3. Ang inyong igsoon nga lalaki mibangon usa ka Domingo sa buntag ug dili buot nga mosimba. Unsa ang inyong mabuhat nga mahimong usa ka misyonaryo?
Ibalik og saysay ang sugilanon ni Ammon gikan sa leksyon 24, ginamit ang hulagway 3-50. Pag-itsa og bola o humok nga butang ngadto sa usa ka bata ug pangutan-a siya og mga pangutana mahitungod sa sugilanon. Kon siya makatubag sa husto nga paagi, patindoga siya ug ipaitsa ang bola balik kaninyo. Padayon sa pag-itsa sa bola ug sa pagpangutana og mga pangutana hangtud ang tanan nga mga bata nagtindog.