Leksyon 26

Ang Espiritu Santo Makatabang Kanato

Katuyoan

Aron sa pagtabang sa mga bata sa pagsabut nga ang Espiritu Santo makatabang kanato sa pagbuhat unsa ang matarung. Siya usab nagpahimangno kanato sa kuyaw.

Pagpangandam

1. Sa mainampuon nga paagi pagtuon sa 1 Nephi 4:1–6; 2 Nephi 32:5; Doktrina ug mga Pakigsaad 8:2.

2. Pag-andam og siyam ka mga pangutana diha sa gagmay nga mga papel alang sa dula diha sa leksyon. Ibutang ang mga pangutana diha sa bag.

3. Pangandam sa pag-awit o pagsulti sa mga pulong sa “Pilia ang Matarung nga Paagi [Choose the Right Way]” (Children’s Songbook, p. 160) ug “Ang Espiritu Santo [The Holy Ghost]” (Children’s Songbook, p. 105); ang mga pulong niini nga mga awit gilakip diha sa luyo niining tamdanan nga basahon.

4. Mga kagamitan nga gikinahanglan:

   1. Usa ka Basahon ni Mormon ug usa ka Doktrina ug mga Pakigsaad.

   2. Usa ka panyo o piraso nga panapton nga pagagamiton ingon nga usa ka taptap.

   3. Tisas, pisara, ug papas.

   4. Hulagway 3-52, Usa ka Amahan Nagpugong sa Kabayo ug Nagluwas sa Iyang Anak nga Lalaki; ug hulagway 3-53, Pag-ampo ni Karolina.

5. Paghimo sa gikinahanglan nga mga pangandam alang sa bisan unsa nga pagpalambo nga mga kalihokan nga imong pagagamiton.

Gisugyot nga Pagpalambo sa Leksyon

Pagdapit og usa ka bata sa paghatag sa pagsugod nga pag-ampo.

Tinoa ang mga bata kon ikaw nag-awhag kanila sa pagbuhat og usa ka butang sulod sa semana.

Ang Espiritu Santo Nag-aghat Kanato

Pang-atensyon nga kalihokan

Pagpili og usa ka bata sa pagtabang kanimo sa mosunod nga kalihokan:

Patindoga ang usa ka bata sa may pultahan. Taptapi siya ug sugoa siya sa papangita sa iyang lingkuranan ug sa pagpalingkod. Ayaw siya hatagi og bisan unsa nga panabang. (Hinoon, siguroha nga siya dili makapasakit sa iyang kaugalingon o sa uban.)

Balika ang paagi, apan niini nga higayona pagkuha og lain nga bata nga motabang sa gitaptapan nga bata pinaagi sa paghatag og mga direksyon.

Kuhaa ang taptap, ug palingkura ang bata.

Pang-atensyon nga kalihokan

• Ngano nga labaw nga masayon alang ni (ngalan sa bata) sa pagpangita sa lingkuranan sa ikaduhang higayon?

Pang-pisara nga panaghisgutan

Isulat ang pulong tabang diha sa pisara. Basaha ang pulong ngadto sa mga bata, ug ipasabut nga kon ang usa ka tawo makadawat og tabang, ang tawo sa kasagaran makadawat og mga direksyon o sultihan unsa ang buhaton o isulti.

Ipasabut nga ang Langitnong Amahan ug si Jesukristo nakahibalo nga kita nagkinahanglan sa ilang linain nga tabang ug direksyon. Sila misaad sa pagdala og usa ka tawo sa pag-aghat kanato.

Balaan nga kasulatan, hulagway, ug sugilanon

Basaha ang Doktrina ug mga Pagkigsaad 8:2 ngadto sa mga bata. Unya ipakita ang hulagway 3-53, Pag-ampo ni Karolina, ug isaysay ang mosunod nga sugilanon sa imong kaugalingon nga mga pulong:

Si Karolina usa ka gamay nga batang babaye kinsa nagpuyo sa Sweden. Siya ug ang iyang gamay ng igsoong lalaki nga si Erik kanunay nga magkuyog. Si Karolina miamuma sa iyang gamay nga igsoong lalaki tungod kay siya nahigugma kaniya. Si Erik upat ka tuig ang panuigon. Daghan nga mga bapor midunggo sa pantalan diin sila nagpuyo tungod kay ang ilang panimalay dili layo gikan sa lawod. Usahay ang bapor nagdala og kargamento sa mga pagkaon o makinarya. Ang amahan ni Karolina ug ni Erik nagtrabaho niini nga mga bapor.

Usa ka adlaw niana ang mga bata nagbarug diha sa usa ka bungtod nagtan-aw og usa ka dako nga bapor nga nagdagan og hinay diha sa tubig. Si Karolina miingon, “Erik, tana modulhog na kita ug motan-aw sa mga tawo nga nagpakanaog sa karga sa bapor. Kini hilabihan sa kadako; atong tan-awon unsa ang anaa niini. Si papa dili manumbaling kanato nga nagtan-aw sa mga tawo nga nagtrabaho kon kita dili mag-ali sa ilang agianan. Kita manlingkod lamang diha sa usa ka dako nga kahon, ug dayon kita makakita sa tanan.”

Si Erik malipayon nga migunit sa kamot ni Karolina, ug sila midagan paingon sa ubos sa bungtod. Apan sa diha nga sila miabut sa ubos sa bungtod, sila naghunahuna nga kini labaw nga makalingaw kon sila maglakaw subay sa riles. Kini labaw pa kaayo ka dali ngadto paingon sa tubig.

Samtang sila naglakaw subay sa riles, si Karolina nakakita og pipila sa nindot nga ihalas nga mga bulak. Iyang gibuhian si Erik aron siya makapangutlo og pipila kanila.

Si Erik naglukso-lukso nga mipadayon og una kaniya, mabinantayon nga nagtunob sa taliwala sa mga babag sa relis. Siya gusto nga modula niini nga dula. Sa kalit, si Karolina nakadungog og siyagit sa kasakit, Igo lamang nga siya milingi aron sa pagtan-aw unsa ang nahitabo, si Erik misinggit ngadto sa iyang igsoon nga babaye, “Karolina! Karolina! Ang akong usa ka tiil nalusong. Ako dili makahulbot niini!”

Gihulog ni Karolina ang mga bulak ug midagan aron sa pagtabang kaniya. Niini nga higayon si Erik naghilak sa kasakit ug sa kahadlok. Si Karolina mibitad ug mibitad sa iyang bukton, naningkamot sa pagbitad sa iyang usa ka tiil gikan sa lungag. Apan siya dili makalihok niini. Iyang gigakus ang iyang mga bukton sa hawak ni Erik aron iyang alsahon siya. Ang iyang gamay nga igsoong lalaki misinggit sa kasakit tungod kay ang iyang usa ka tiil nagsakit. Sa sige og alsa ug bitad ni Karolina, labaw pa nga si Erik mihilak. Sa katapusan si Karolina miingon, “Erik, ako dili makabitad sa imong usa ka tiil; ako kinahanglan nga mokuha og usa ka tawo aron motabang sa pagbitad sa imong usa ka tiil. Ako mobalik dayon.”

Siya misugod sa pagdagan diha sa riles, apan sa diha nga siya miabut sa may likuanan, siya nakakita og tren nga layo pa. Si Karolina nasayud nga siya wala nay panahon sa pagkuha og tabang tungod kay sa pipila ka mga gutlo ang tren maanaa na diha, ug ang inhenyero tingali og dili makakita sa iyang gamay nga igsoong lalaki igo sa pagpahinay.

Balaan nga kasulatan, hulagway, ug sugilanon

• Unsa ang mabuhat ni Karolina?

Si Karolina mibalik ug midagan ngadto ni Erik. Siya nahadlok sa hilabihan, ug samtang siya mibitad pag-usab sa usa ka tiil ni Erik, siya misulti og diyutay nga pag-ampo alang sa panabang: “Among Langitnong Amahan, tabangi ako. Ako wala masayud unsay buhaton. Intawon tabangi ako!”

Sa kalit si Karolina naghunahuna nga siya nakadungog og usa ka hinay nga tingog nga nag-ingon, “Badbara ang liston sa sapatos,” Uban sa nagkurog nga kamot siya mitangtang sa liston sa sapatos. Bisan tuod ang iyang sapatos sa gihapon nabitik ilawom sa babag sa riles, sa diha nga si Karolina mibitad pag-ayo, ang usa ka tiil ni Erik nahulbot dayon gikan niini. Siya natumba ngadto kaniya, ug silang duha natumba ngadto sa yuta. Sila milukso gikan sa riles, ug ang tren miasoaso liyok sa likoanan ug misirit labay kanila.

Human milabay ang tren, si Erik misugod sa paghilak, “O, tan-awa ang akong sapatos!” Ang sapatos nagasgas pag-ayo, apan si Karolina nakahimo niini paglisoliso nga mahulbot. Si Karolina miagbay ni Erik ug miingon, “Ayaw panumbalinga ang imong sapatos. Pagpasalamat hinoon nga ang Langitnong Amahan mitubag sa akong pag-ampo. Ako dili gayud unta makahibalo unsa ang buhaton kon siya wala pa motabang kanako.

Si Karolina migakos sa iyang gamay nga igsoong lalaki, nalipay nga siya nakaluwas sa iyang kinabuhi. Unya, hugot nga naggunitay, sila nagkuyog og lakaw aron sultihan ang ilang amahan giunsa sa Langitnong Amahan, pinaagi sa gahum sa Espiritu Santo, pagtubag ang pag-ampo ni Karolina alang sa panabang.

Panaghisgutan

Panaghisgutan

• Kinsa ang mitabang ni Karolina?

• Giunsa sa Espiritu Santo pagtabang si Karolina sa pagluwas sa iyang igsoon nga lalaki?

Itudlo nga ang Espiritu Santo nagtabang sa mga tawo sa daghan nga mga paagi. Sa kasagaran siya nagsulti ngadto sa atong mga hunahuna. Kon siya maghimo niini, kita mahimo nga makabaton og pagbati o hunahuna nga makatabang kanato nga makahibalo unsa ang buhaton. Usahay, hinoon, ang mga tawo makabati gayud og tingog nga nagsulti ngadto kanila ug naghatag kanila og tabang.

Awit

Awita o isulti uban sa mga bata ang mga pulong sa “Ang Espiritu Santo.”

Ang Espiritu Santo Motabang Kanato sa Pagbuhat Unsa ang Matarung

Hangyoa ang mga bata sa pagpaminaw sa mosunod nga mga sugilanon ni Anita ug George aron makita sa unsa nga paagi ang Espiritu Santo mitabang kanila sa pagbuhat unsa ang matarung.

Sugilanon ug panaghisgutan

Sayo sa usa ka ting-init, usa sa mga higala ni Anita midapit kaniya sa pagpangaligo uban kaniya. Sa wala pa siya molakaw, gisukod ni Anita ang iyang igkakaligo nga kaniadto pa sa unang tuig. Siya nahibulong unsa ka dako ang iyang pagtubo. Ingon og sangputanan, ang igkakaligo dili na paarang kaniya sama kaniadto ug karon malaw-ay nga tan-awon.

Si Anita nakahibalo nga ang iyang higala naghulat kaniya nga moabut, ug si Anita buot modagan og dali ngadto sa iyang balay. Bisan pa niana, usa ka hunahuna miabut sa iyang ulo nga mitabang kaniya unsa ang buhaton. Siya gipahinumduman nga ang Langitnong Amahan ug si Jesukristo buot kaniya nga dili magmalaw-ay. Kon siya moadto sa balay sa iyang higala nga nagsul-ob sa iyang igkakaligo, siya dili mahimutang diha sa banay sa iyang higala. Siya nakahibalo nga siya kinahanglan nga magsinina sa lahi nga paagi.

Sa dali nakit-an ni Anita ang iyang magulang nga babaye ug nangutana kon siya aduna bay igkakaligo nga maarang ug nga iyang mahulaman. Sila naguban sa pagpangita ug nakakita og usa ka daan nga igkakaligo nga miarang gayud ni Anita. Si Anita mipasalamat sa iyang igsoon nga babaye, miilis dayon, ug midagan paingon ngadto sa balay sa iyang higala, nalipay nga siya mipili sa matarung nga butang nga buhaton.

Sugilanon ug panaghisgutan

• Sa unsa nga paagi ang Espiritu Santo nagtabang ni Anita sa pagbuhat unsa ang matarung?

Sugilanon ug panaghisgutan

Si George ug ang iyang higala gusto og potbol. Sila nagdula niini sa eskwelahan, nagtan-aw niini sa telehisyon, ug gani nagpalit og magasin ug nagbasa mahitungod sa ilang kinaham nga mga pundok sa magdudula. Sila nalingaw sa pagtan-aw sa mga dula ug sa pagsultihanay mahitungod sa makapaukyab nga mga dula.

Ang dula sa pagkakampeon umaabut. Si George nasayud nga kini mahimong usa ka makapaukyab nga dula, ug siya buot motan-aw niini. Apan ang dula sa telebisyon sa Domingo sa sama nga takna sa iyang mga tigum sa Simbahan.

Ang iyang mga higala mihukom sa pagpabilin sa panimalay ug sa pagtan-aw sa dula uban sa ilang mga amahan. Si George gidapit sa pagpatan-aw sa dula uban kanila apan mihunahuna nga siya kinahanglan dili mopalta sa iyang mga tigum sa Simbahan.

Unya siya misugod sa paghunahuna kon kini maayo ba nga magpabilin sa panimalay ug motan-aw sa dula. “Bisan pa”, siya naghunahuna, “Ako makasimba matag semana, apan ang dula sa pagkakampeon moabut lamang makausa sa tuig. Sa pagkatinuod kini dili igsapayan kon ako mopalta pagsimba bisan niini lamang.”

Siya hapit na makadani sa iyang kaugalingon sa pagpalta og simba sa diha nga usa ka hunahuna miabut sa iyang ulo: “Unsay buot sa Langitnong Amahan ug ni Jesukristo nga akong buhaton?”

Sa diha nga si George mitubag niini nga pangutana, siya nakahibalo unsa ang iyang pilion. Siya mosimba.

Sugilanon ug panaghisgutan

• Kinsa sa inyong hunahuna ang nagtabang ni George?

• Sa unsa nga paagi ang Espiritu Santo nagtabang ni George?

Ipasabut nga ang Espiritu Santo nag-aghat ni Anita sa pagdili magmalaw-ay ug ni George sa pagsimba. Ang duha ka mga bata misunod sa mga pag-aghat ug mihupot sa mga sugo. Itudlo nga ang Espiritu Santo moaghat kanato, ug kita kinahanglan mosunod kaniya pinaagi sa pagpili sa matarung.

PAM nga singsing

Pahinumdumi ang mga bata nga ang pagsul-ob sa PAM nga singsing makatabang kanila sa pagpili sa matarung.

Awit

Awita o isulti ang mga pulong sa “Pilia ang Matarung nga Paagi.”

Kita Mapanalanginan Kon Kita Mosunod sa mga Pag-aghat sa Espiritu Santo

Hulagway ug sugilanon

Ipasabut nga kita mapanalanginan pag-ayo kon kita mamati ug mosunod sa mga pag-aghat sa Espiritu Santo.

Ipakita ang hulagway 3-52, Usa ka Amahan Nagpugong sa Kabayo ug Nagluwas sa Iyang Anak nga Lalaki. Isulti giunsa sa Langitnong Amahan pagpanalangin si Bruce R. McConkie ug sa iyang amahan tungod kay ang iyang amahan misunod sa mga pag-aghat sa Espiritu Santo:

“Usa sa akong unang panumdoman sa pagkabata mao ang pagsakay og kabayo ngadto sa mansanasan. Ang kabayo anad ug maayo nga pagkamanso, ug ako mibati og kasayon diha sa montura.

“Apan usa ka adlaw niana usa ka butang nakapahadlok sa akong pagsakay, ug siya mikalit og dagan ngadto sa prutasan. Ako nalabyog gikan sa montura tungod sa nagbitay nga mga sanga, ug ang usa ka bitiis naligas ngadto sa tikanganan.”

Itudlo ang tikanganan diha sa hulagway.

“Ako naningkamot sa walay paglaum sa paggunit ngadto sa hapit maputol nga panit nga bakus nga gamiton sa usa ka cowboy sa paghigot og [pisi] ngadto sa iyang montura.”

“Ang akong gibug-aton makaputol unta sa bakus, apan sa usa ka paagi kini mikupot sa makadiyot. Lain nga hasmag o duha sa nagdagan tungod sa kahadlok nga kabayo makaputol sa bakus o makalabnut niini gikan sa akong mga kamot ug moguroy kanako ngadto sa kasakit o kamatayon uban sa akong tiil nga nasabud sa tikanganan.

“Sa kalit ang kabayo mihunong ug ako nakamatikod nga adunay nagkupot og hugot sa rinda ug naningkamot sa paghupay sa nagkurog nga hayop. Hapit diha-diha dayon ako gilabni ngadto sa mga bukton sa akong amahan.

“Unsa ang nahitabo? Unsa ang midala sa akong amahan ngadto sa akong kaluwasan sa usa ka pagpilok sa wala pa ako matuhog ilawom sa mga kuko sa nataranta nga kabayo?

“Ang akong amahan naglingkod diha sa balay nagbasa og pamantalaan sa diha nga ang Espiritu (ang Espiritu Santo) mihagawhaw kaniya, “Dagan ngadto sa prutasan!’

“Sa walay paglangan bisan og kadiyut, wala maghulat nga makahibalo og ngano o sa unsa nga katarungan, ang akong amahan midagan. Nakakita sa iyang kaugalingon nga diha na sa prutasan nga wala mahibalo og ngano nga siya atua didto, iyang nakita ang nagdagan nga naglukso nga kabayo ug naghunahuna, kinahanglan gayud nga akong hunongon kining kabayo.

“Iyang gibuhat ang mao ug ako nakit-an. Ug kana mao ang paagi giunsa ako pagluwas gikan sa grabe nga kadaot o posible nga kamatayon” (Bruce R. McConkie, “Hearken to the Spirit,” Friend, Sept. 1972, p. 10).

Panaghisgutan

Panaghisgutan

• Giunsa sa Espiritu Santo pagluwas ang bata nga si Bruce McConkie gikan sa grabe nga kadaot?

• Unsa kaha ang mahitabo kon ang Amahan ni Bruce wala mosunod og dali sa hagaw-haw sa Espiritu? (Ipasabut nga si Bruce R. McConkie sa kaulahian gitawag nga mahimong Kapitoan ug unya usa ka Apostol; kita unta wala niining maayo nga pangulo.)

• Sa unsa nga paagi nga ang usa ka kasinatian sama niini makapalig-on sa pagpamatuod sa usa ka tawo? Ngano?

Isulti sa mga bata nga usahay kita tingali dili dayon makakita sa mga panalangin nga moabut gikan sa pagpamati ngadto sa mga pag-aghat sa Espiritu Santo. Kita makasiguro, hinoon, nga kita pagapanalanginan kon kita mosunod sa mga pag-aghat nga moabut kanato.

Katingbanan

Pangutana nga dula

Dapita ang mga bata sa pagpuli-puli sa pagpili og usa ka pangutana gikan sa bag nga imong giandam ug unya sa pagtubag sa pangutana. Ikaw kinahanglan nga mobasa sa mga pangutana og kusog alang sa gagmay nga mga bata. Gamita ang mosunod nga mga pangutana. Pagsulat og pipila ka dugang nga mga pangutana sa imong kaugalingon kon gikinahanglan aron ang matag bata adunay higayon sa pagpili og usa ka pangutana gikan sa bag.

Pangutana nga dula

1. Unsa ang gipasabut sa pag-aghat og usa ka tawo? (Ang paghatag og mga direksyon o ang pagsulti sa usa ka tawo unsa ang buhaton.)

2. Kinsa ang mag-aghat kanato? (Ang Espiritu Santo.)

3. Sa unsa nga paagi ang Espiritu Santo nag-aghat kanato? (Siya nag-aghat kanato pinaagi sa paghatag kanato og mga hunahuna o mga pagbati o pinaagi sa pagpakigsulti kanato.)

4. Sa unsa nga paagi ang Espiritu Santo nagtabang kanato? (Siya nagtabang kanato nga makahibalo sa matarung nga mga butang nga buhaton.)

5. Sa unsa nga paagi ang Espiritu Santo nagtabang ni Anita? (Siya nag-aghat kaniya sa dili pagmalaw-ay.)

6. Sa unsa nga paagi ang Espiritu Santo nagtabang ni George? (Siya nag-aghat kaniya sa pagbuhat unsa ang buot sa Langitnong Amahan ug ni Jesukristo nga iyang buhaton—pagsimba.)

7. Unsa ang giaghat sa Espiritu Santo ni Karolina nga buhaton? (Sa pagbadbad sa liston sa sapatos sa iyang igsoon nga lalaki aron siya makahulbot sa iyang tiil gikan niini.)

8. Sa unsa nga paagi si Bruce R. McConkie napanalanginan tungod kay ang iyang amahan namati ug misunod sa mga pag-aghat sa Espiritu Santo? (Siya naluwas gikan sa kadaot o kamatayon.)

9. Unsa ang kinahanglan nga atong buhaton kon kita makadawat og pag-aghat gikan sa Espiritu Santo? (Mamati, mosunod, ug mopili sa matarung.)

Pagpamatuod

Ipahayag ang imong pagpasalamat alang sa mga pag-aghat sa Espiritu Santo diha sa imong kinabuhi. Ingon nga nagiyahan sa Espiritu, pakigbahin og usa ka kinaugalingon nga kasinatian mahitungod sa usa ka panahon sa diha nga ang Espiritu Santo nag-aghat kanimo o sa usa ka tawo nga imong kaila.

Ipasabut nga ang Espiritu Santo dili gayud moaghat kanato sa pagbuhat og bisan unsa nga sayop. Siya motabang kanato sa pagbuhat unsa ang buot sa Langitnong Amahan ug ni Jesukristo nga atong buhaton.

Artikulo sa hugot nga pagtuo

Ipasulti og balik sa mga bata ang unang artikulo sa hugot nga pagtuo.

Pahinumdumi ang mga bata nga ang gasa sa Espiritu Santo usa ka linain nga gasa nga atong madawat human kita mabunyagi ug makumpirmahi.

Hangyoa ang bata nga naghatag sa panapos nga pag-ampo sa pagpahayag og pasalamat alang sa mga pag-aghat sa Espiritu Santo. Isugyot nga siya mohangyo sa Langitnong Amahan sa pagtabang sa matag sakop sa klase sa pag-ila sa mga pag-aghat sa Espiritu Santo kon siya makadawat kanila.

Pagpalambo nga kalihokan

Pagpili gikan sa mosunod nga mga kalihokan kadto nga labing moangay alang sa imong mga bata. Ikaw makagamit kanila diha sa leksyon gayud o ingon nga usa ka balik-pagtuon o katingbanan. Alang sa dugang paggiya, tan-awa ang “Panahon sa Klase” diha sa “Mga Tabang alang sa Magtutudlo.”

1. Papaminawa ang mga bata sa mosunod nga sugilanon mahitungod ni Elder Thomas S. Monson.

   Pipila ka panahon ang milabay, si Elder Monson og ang iyang asawa gipadala sa propeta aron sa pagduaw sa mga isla sa Samoa.

   Samtang sila didto, sila miduaw sa usa ka klase sa mga bata kinsa nagpuyo sa baryo sa Sauniatu.

   Si Elder ug Sister Monson matag usa namulong ngadto sa klase. Human sila makahatag sa ilang mga pamulong ug samtang ang magtututdlo sa mga bata mipahibalo sa panapos nga awit, usa ka hunahuna miabut ngadto ni Elder Monson. Siya giaghat sa pagpangumusta sa kinaugalingon sa matag usa sa 247 ka mga bata.

   Bisan pa niana, sa diha nga siya mitan-aw sa iyang relo, siya nakaamgo nga kini udto na ug nga siya wala nay panahon sa pagpangumusta sa matag bata.

   Siya naninguha sa pagwagtang sa hunahuna, apan dili makahimo.

   Sa wala pa ang panapos nga pag-ampo, siya giaghat pag-usab sa paghatag og panahon sa pakiglamano sa matag bata.

   Sa katapusan siya milingi sa magtutudlo ug miingon, “Ako gusto kaayo nga makiglamano sa matag batang lalaki ug matag batang babaye. Kini mahimo ba?”

   Ang magtutudlo mipahiyom ug, sa pinulongan sa taga-Samoa, misulti ngadto sa mga bata. Sila miyango sa ilang mga ulo sa kahinam nga pagtugot. Siya misulti ni Elder Monson sa katarungan sa mga pahiyom sa mga bata. Sa diha nga ang magtutudlo nakahibalo nga ang Presidente sa Simbahan mihangyo sa usa sa Napulog Duha ka mga Apostoles sa pagduaw kanila diha sa Samoa ang magtutudlo misulti sa mga bata nga kon sila matag usa mag-ampo sa kinasingkasing ug magbaton og hugot nga pagtuo ingon sa mga tawo diha sa Basahon ni Mormon, ang Apostol mobisita sa ilang balangay. Siya usab pagaaghaton sa Espiritu Santo sa pakiglamano sa matag bata (tan-awa Thomas S. Monson, “Talofa Lava,” Friend, May 1972, pp. 12–13).

   • Kinsa ang nag-aghat ni Elder Monson?

   • Sa unsa nga paagi ang Espiritu Santo nag-aghat ni Elder Monson?

   Itudlo nga ang Espiritu Santo nag-aghat sa mga tawo sa nagkalain-lain nga mga paagi. Sa kasagaran siya magsulti sa atong mga hunahuna ingon nga siya mihimo ngadto ni Elder Monson.

   Ipasabut nga tungod kay si Elder Monson namati ngadto sa mga pag-aghat o mga panudlo sa Espiritu Santo, siya nakahimo sa pagbuhat unsa ang buot sa Langitnong Amahan ug ni Jesukristo nga iyang buhaton.

2. Ipasaysay sa mga bata ang mahitungod sa bisan unsa nga mga kasinatian sa ilang kaugalingon nga mga kinabuhi sa diha nga sila nagtuo nga sila nakadawat og paggiya gikan sa Espiritu Santo.