Mga Manwal sa Primary ug Panahon sa Pagpakigbahin

Leksyon 27: Ang Edad sa Pagkamay Tulubagon

Leksyon 27

Ang Edad sa Pagkamay Tulubagon

Katuyoan

Aron sa pagtabang sa mga bata sa pagsabut nga sa edad nga walo sila magsugod nga mahimong may tulubagon sa ilang mga lihok.

Pagpangandam

Sa mainampuon nga paagi pagtuon sa Alma 23 ug 24.
Pagdala og pipila ka salapi nga pagagamiton sa dula, o paghimo og dulaan nga salapi.
Pangandam sa pag-awit o pagsulti uban sa mga bata sa mga pulong sa “Pangahas Pagbuhat sa Matarung [Dare to Do Right]” (Mga Himno ug mga Awit sa mga Bata o Children’s Songbook, p. 158); ang mga pulong gilakip diha sa luyo sa tamdanan nga basahon.
Mga kagamitan nga gikinahanglan:
1. Usa ka Basahon ni Mormon alang sa matag bata kinsa makabasa.
2. Usa ka butang nga panaput sa masuso, ingon sa sapatos, kalo, o switer.
3. Mahimong gamiton o dili (gamita lamang kini nga kalihokan kon kamo mobati nga kini makatabang ug kamo makahimo sa pagkuha niining mga butanga nga dili kaayo dako og gasto): Usa ka basahon, usa ka bag sa karmelitos o uban nga angay nga pagkaon.
4. Tisas, pisara, ug papas.
5. Hulagway 3-54, Ang mga Anti-Nephi-Lehi Naglubong sa Ilang mga Espada (62565; Sudlanan sa Hulagway sa Ebanghelyo 311).
Paghimo sa gikinahanglan nga mga pagpangandam alang sa bisan unsa nga mga kalihokan nga imong pagagamiton.

Gisugyot nga Pagpalambo sa Leksyon

Pagdapit og usa ka bata sa paghatag sa pagsugod nga pag-ampo.

Tinoa ang mga bata kon ikaw nag-awhag kanila sa pagbuhat og usa ka butang sulod sa semana.

Kon Kita Mag-edad og Walo, Kita May Tulubagon

Pang-atensyon nga kalihokan

Ipataas ang butang nga panapot sa masuso nga imong gidala.

Pang-atensyon nga kalihokan

Kini ba moarang kaninyo? (Ikaw mahimo nga mosulay sa pipila ka mga bata sa papasukod sa sinina; sila dayon motubag nga kini dili moarang.)
Ngano nga dili? (Tungod kay kini hilabihan ka gamay.)

Paghisgot uban sa mga bata nga kaniadto sila mga gagmay nga igong moarang ngadto sa gamay nga mga sinina ingon niini, apan ang ilang lawas mitubo og labaw ka dako. Ipasabut nga sama lamang nga sila nagtubo sa gidak-on sa lawas, sila usab nagtubo sa uban nga mga paagi, ingon sa ilang kahanas sa pagbuhat og mga butang sama sa pagsinina sa ilang mga kaugalingon.

Pang-atensyon nga kalihokan

Unsa ang inyong mabuhat karon nga dili ninyo mabuhat sa diha nga kamo mga masuso pa?

Ipasabut nga kining mga butanga nagpakita nga ang mga bata nagtubo sa ka hingkod ug nagkat-on og daghan. Ang usa ka tawo kinsa nakakat-on sa pagbuhat niining mga butanga sa kasagaran igo na ang kahingkod nga makahibalo sa matarung gikan sa sayop.

Panaghisgutan

Pahinumdumi ang mga bata nga ang Langitnong Amahan maalamon. Siya nakahibalo nga kita kinahanglan gayud nga makakat-on unsa ang matarung ug sayop. Kon kita mitubo na sa husto ug nakakat-on na sa husto mahitungod sa unsa ang matarung ug sayop, kita mahimo nga may tulubagon alang sa unsay atong gibuhat. Ang pagkamay tulubagon nagpasabut nga kita kinahanglan moangkon sa kapangakohan alang sa unsay sayop nga atong nabuhat, ug kita napanalanginan alang sa unsay atong nahimo nga matarung.

Panaghisgutan

Sa unsa nga edad kita magsugod sa pagkamay tulubagon ngadto sa Langitnong Amahan alang sa unsay atong nabuhat? (Walo.)

Ipasabut nga tungod kay ang Langitnong Amahan nakahibalo nga kita igo na ang kahingkod nga manubag alang sa atong mga lihok, siya nagtugot og usa ka mahinugndanon nga butang nga mahitabo kon kita walo na ka tuig.
Unsa nga mahinungdanon nga hitabo ang mahinabo kon kita walo na ka tuig? (Kita bunyagan; tan-awa sa Doktrina ug mga Pakigsaad 68:27.)
Ngano nga ang bunyag mahinungdanon? (Tungod kay kon kita bunyagan ug kumpirmahan, kita makadawat sa gasa sa Espiritu Santo ug maghimo og pakigsaad sa Langitnong Amahan sa pagsunod sa iyang mga sugo.)

Ipasabut nga ang pagpabunyag wala magpasabut nga kita dili na gayud makahimo pag-usab og sayop. Kini nagpasabut nga kita igo na kahingkod sa pagpanubag sa atong mga pagpili. Kita igo na ka hingkod nga makahibalo sa kalainan tali sa matarung ug sayop.

Artikulo sa hugot nga pagtuo

Hain nga artikulo sa hugot nga pagtuo ang nagsulti kanato nga kita may tulubagon alang sa atong kaugalingon nga mga sala? (ang ikaduha nga artikulo sa hugot nga pagtuo. Kamo mahimo nga nagkinahanglan nga mopasabut sa bisan unsa nga pulong nga ang mga bata wala makasabut.)

Ipasulti og balik sa mga bata ang ikaduha nga artikulo sa hugot nga pagtuo og dungan. Tugoti ang bisan kinsa nga mga bata kinsa makahimo sa pagsulti og balik niini sa ilang mga kaugalingon.

Kita May Kapangakohan sa Pagpili sa Matarung

Singsing sa klase

Unsay gipasabut sa mga titik sa singsing sa atong klase?

Ipasulti og balik sa mga bata ang mga pulong “Pilia ang matarung.” Ipasabut nga ang ilang mga singsing makatabang sa mga bata sa pag-amgo nga sila nagtubo sa ka hingkod igo nga makakat-on sa pagkamay kapangakohan sa pagpili sa matarung.

Pagtudlo sa magtutudlo

Ipasabut nga ang pagkat-on sa pagpili sa matarung gikan sa sayop maoy usa ka dako nga lakang diha sa pagtubo. Ang atong Langitnong Amahan wala magpugos kanato sa pagbuhat og matarung. Siya naghatag kanato og kagawasan sa pagpili alang sa atong mga kaugalingon tali sa matarung ug sayop ug sa pagkamay kapangakohan alang sa paghupot sa mga saad nga atong gihimo. Siya nakahibalo nga pinaagi lamang sa pagbaton og kagawasan sa pagpili alang sa atong mga kaugalingon nga kita motubo ug makakat-on.

Isulat ang PAM sa pisara. Ipasulti pag-usab sa mga bata nganha kanimo kon unsa ang gipaila niini nga mga titik. Ipakita ang imong pagsalig nga ang mga bata makakat-on unsa ang matarung ug sayop ug mahimong may tulubagon alang sa ilang mga buhat.

Kalihokan

Hatagi ang usa o duha sa mga bata sa basahon nga imong gidala. Isulti kanila nga sila may tulubagon sa pag-amping niini. Ipasabut nganha sa klase nga kining mga bata may tulubagon alang niana nga basahon sa panahon sa klase. Kon kini mawala, magisi, o dili ba madaot, sila kinahanglan manubag diha kaninyo. Sila may tulubagon diha kaninyo alang sa basahon.

Ihatag sa lain nga bata ang bola. Ipasabut nga kini nga bata mao ang may kapangakohan alang sa bola sama lamang nga ang uban nga mga bata may kapangakohan alang sa basahon.

Ihatag sa ikatulo nga bata ang bag sa karmelitos o pipila sa uban nga angay nga pagkaon. Siguroha ang pagpili og usa ka bata kinsa makaamping niini pag-ayo. Sultihi ang bata sa pagpakigbahin sa karmelitos o pagkaon ngadto sa tibuok klase human sa panapos nga pag-ampo. Ang bata mao ang may kapangakohan alang sa pagtipig sa pagkaon nga walay kadaot hangtud nga kini panahon na sa pagpakigbahin niini.

Kalihokan

Makahimo ba si (ngalan sa bata) sa pagpili nga iyang kan-on ang tanan nga karmelitos nga mag-inusara? (Oo, ang bata makapili sa dili pagsunod sa magtutudlo ug sa pagkaon niini kay sa magsalin niini aron makigbahin.)

Hatagi og gibug-aton nga kini nga bata adunay kagawasan sa pagpili unsa ang buhaton, apan ang bata adunay tulubagon alang niana nga pagpili.

Ipasabut nga kini sama sa kinabuhi. Ang laraw sa Langitnong Amahan naghatag kanato og mga pagpili. Kita mohimo nga mopili og matarung o sayop, sa maalamon nga paagi o sa binuang nga paagi, apan kita may kapangakohan alang sa atong mga pagpili ug sa mga sangputanan.

Balaan nga kasulatan nga sugilanon

Ipakita ang Basahon ni Mormon. Isulti sa mga bata nga usa ka pundok sa mga tawo diha sa Basahon ni Mormon dihay usa ka malisud nga pagpili nga himoon, ug sila mihukom sa pagpili sa matarung. Isulti ang mosunod nga sugilanon sa imong kaugalingon nga mga pulong:

Si Ammon usa ka misyonaryo kinsa mipasabut sa mga pagtulun-an ni Jesukristo ngadto ni Hari Lamoni, ang hari sa usa ka pundok sa mga Lamanite. Si Hari Lamoni mituo niini nga mga pagtulun-an ug nahimo nga nakabig ngadto sa ebanghelyo. Siya naghangyo sa iyang mga katawhan sa pagpaminaw ngadto ni Ammon ug sa iyang igsoon nga mga lalaki. Si Hari Lamoni nakahibalo nga kini nga mga tawo nagsulti sa kamatuoran.

Si Ammon ug ang iyang igsoon nga mga lalaki miadto gikan sa usa ka dakbayan ngadto sa lain nga dakbayan ug gikan sa usa ka balay ngadto sa lain nga balay nagtudlo sa mga Lamanite. Ang mga Lamanite wala makahibalo sa ebanghelyo, ug sila hilabihan sa kadautan. Daghan sa mga tawo mituo sa mga pagtulun-an ni Ammon ug sa iyang igsoon nga mga lalaki ug nakabig. Sila nakahibalo nga ang mga pulong ni Jesukristo mga tinuod, ug sila mihinulsol sa ilang dautan nga mga paagi.

Kini nga mga tawo mihukom sa pag-ilis sa ilang ngalan gikan sa mga Lamanite ngadto sa mga Anti-Nephi-Lehi. Sila mibuhat niini aron sa paglain sa ilang mga kaugalingon gikan sa dautan nga mga Lamanite kinsa wala magsunod sa mga pagtulun-an ni Jesukristo.

Sa wala pa kini nga mga tawo maghinulsol, sila nakapatay og daghan nga mga tawo uban sa ilang mga espada. Sila naguol tungod sa sayop nga mga butang nga ilang nabuhat ug buot nga maghinulsol. Sila mipili sa pagsaad sa Langitnong Amahan nga dili na gayud makig-away o mopataas sa ilang mga espada pag-usab batok ni bisan kinsa nga mga tawo.

Balaan nga kasulatan

Ipasabut nga kining mao nga mga tawo mihimo og lain nga mga paghukom usab. Pasunda ang mga bata samtang imong basahon ang Alma 24:17–18.

Balaan nga kasulatan

Unsa nga pagpili ang gihimo sa mga Anti-Nephi-Lehi? (Sila mipili sa paglubong sa ilang mga espada sa yuta.)
Ngano nga sila mihimo niini? (Tungod kay sila mihimo og usa ka pakigsaad o saad sa dili na gayud pagpatay pag-usab.)

Hulagway ug sugilanon

Ipakita ang hulagway 3-54, Ang mga Anti-Nephi-Lehi Naglubong sa ilang mga Espada.

Ipadayon ang sugilanon:

Human ang mga Anti-Nephi-Lehi milubong sa ilang mga espada, ang dautan nga mga Lamanite miabut aron sa pagpakig-away kanila. Ang mga Anti-Nephi-Lehi dihay usa ka paghukom nga malisud himoon. Sila makalapas sa ilang saad ngadto sa Langitnong Amahan ug mogamit sa ilang mga espada aron sa pagpakig-away, o sila mohukom sa dili pagpakig-away ug mahimo nga mapatay. Sila mihukom sa paghupot sa ilang saad sa dili paggamit sa ilang mga espada batok sa uban nga mga tawo. Daghan kanila gipatay sa mga Lamanite. Sa diha nga ang mga Lamanite nakakita nga kining mga tawo walay mga hinagiban ug dili makig-away, sila nahibulong. Daghan kanila mibutang sa ilang mga espada tungod kay sila usab nakaila nga sila nagbuhat og dako nga kasaypanan sa pagpatay og mga tawo. Daghan nga mga Lamanite mihinulsol ug miipon sa mga Anti-Nephi-Lehi diha sa pagkamatarung.

Ang mga Anti-Nephi-Lehi mga matinud-anon ngadto sa ilang saad bisan og ang uban nga mga tawo naninguha sa pagpatay kanila.

Hulagway ug sugilanon

Sa unsa nga paagi ang mga Anti-Nephi-Lehi manubag alang sa unsay ilang gibuhat?
Unsa ang inyong nakat-unan gikan sa mga Anti-Nephi-Lehi mahitungod sa pagpili sa matarung?

Sa Edad nga Walo Kita Mahimo nga May Tulubagon ngadto sa Langitnong Amahan

Pang-pisara nga panaghisgutan

Pahinumdumi ang mga bata nga ang pagkamay tulubagon nagpasabut nga sila may kapangakohan alang sa unsay ilang nabuhat.

Isulat ang pulong may tulubagon diha sa pisara, ug isulti ang pulong og kusog. Ipasulti kini og balik sa mga bata. Ipasabut nga kon sila walo ka tuig ang edad, ang Langitnong Amahan nagtan-aw kanila nga igo na ka hingkod pagsugod sa pagkamay tulubagon alang sa ilang mga lihok.

Awit

Awita o isulti uban sa mga bata ang mga pulong sa “Pangahas Pagbuhat sa Matarung [Dare to Do Right].”

Sitwasyon

Ipasabut ngadto sa mga bata nga kon sila mahimo nga walo ka tuig sila may tulubagon, apan kadto kinsa wala pay walo ka tuig makabansay sa pagkamay tulubagon karon pinaagi sa pagtabang sa mga ginikanan ug sa paghupot sa ilang mga saad ngadto sa uban. isaysay ang mosunod nga sitwasyon (Kamo mahimo nga adunay usa ka bata nga mopakita sa mga lihok):

Pagpakaaron-ingnon nga ang inyong inahan nasakit ug naghangyo kaninyo sa paglimpyo og usa ka bahin sa balay. Kamo buot modula, busa kamo midagan sa gawas aron makig-uban sa inyong mga higala.

Sa diha nga kamo mibalik sa sulod, ang inyong inahan nagtawag kaninyo gikan sa iyang higdaanan ug nangutana, “Gilimpyohan ba ninyo ang bahin sa balay nga akong gisugo kaninyo sa paglimpyo?”

Ang inyong tubag oo, ug sa dali giayo ang diyutay nga mga butang diha sa mga dapit nga inyo untang nahuman na sa paglimpyo.

Panaghisgutan

Ipasabut ngadto sa mga bata nga kon ang ilang mga ginikanan maghatag kanila og buhat nga buhaton, kini nagpasabut nga sila igo na ka hingkod sa pagkamay kapangakohan ug igo na sa pagkamay tulubagon sa pagbuhat niana nga buluhaton.

Panaghisgutan

Kamo ba sukad nakapauli gikan sa Primarya, gikan sa balay sa usa ka higala, o gikan sa tulunghaan ug giingnan sa usa sa inyong mga ginikanan, “Sultihi ako unsay inyong gibuhat karon?”

Itudlo nga kon ang mga bata motaho ngadto sa ilang mga ginikanan ug mosulti kanila unsay ilang nabuhat, ang mga bata nagsubay sa ilang mga lihok. Ang mga ginikanan nahigugma sa ilang mga anak. Kini mao ngano nga ang mga ginikanan buot makahibalo unsay gibuhat sa ilang mga anak diha sa panimalay, sa tulunghaan, ug sa pagdula.

Artikulo sa hugot nga pagtuo

Ang atong Langitnong Amahan naghigugma usab kanato, ug, sama sa atong mga ginikanan, siya buot kanato nga motaho ug mahimong may tulubagon ngadto kaniya alang sa maayo nga mga butang ug sa dautan nga mga butang nga atong gibuhat. Kon kita mobuhat og dautan nga mga butang— sama sa pagpangawat, pagpamakak, o pagpasakit og usa ka tawo— human kita mahimo nga walo ka tuig ang edad, sila gitawag og mga sala. Ipasulti og balik sa klase ang ikaduha nga mga artikulo sa hugot nga pagtuo og dungan.

Itudlo ang pulong nga may tulubagon diha sa pisara, ug hangyoa ang mga bata sa pagsulti og kusog sa pulong. Sultihi sila nga sila nangandam sa pagkamay tulubagon ngadto sa Langitnong Amahan, tungod kay kon sila mahimo nga walo ka tuig ang edad sila igo na ka hingkod sa pagpakita og kapangakohan ug makahibalo sa matarung gikan sa sayop.

Katingbanan

Kalihokan

Pangutana og pipila ka mga pangutana aron sa pagtabang sa mga bata sa pagpiho sa unsa sila may tulubagon ug alang sa unsa ang uban kinahanglan gayud nga motubag. Ipatubag kanila ang mga pangutana og dungan.

Kalihokan

Kinsa ang may tulubagon alang sa pagtudlo kaninyo sa pag-ampo?
Kinsa ang may tulubagon alang sa inyong mga pag-ampo?
Kinsa ang may tulubagon alang sa pagtudlo kaninyo sa mga leksyon sa Primarya?
Kinsa ang may tulubagon alang sa pagkat-on unsa ang gitudlo sa inyong magtutudlo sa Primarya?
Kinsa ang may tulubagon sa inyong panlihok diha sa Primarya?
Kinsa ang may tulubagon alang sa pagbuhat unsa ang buot sa Langitnong Amahan ug ni Jesukristo nga inyong buhaton?
Kinsa ang may tulubagon alang sa paghupot sa inyong mga pakigsaad sa bunyag?

Panaghisgutan

Pasultiha ang mga bata og daghan nga mga paagi nga sila may tulubagon o mahimong may tulubagon. Kini mahimo nga maglakip sa pagkamabination ngadto sa mga higala; pagsulti sa kamatuoran; sa pagkadili malaw-ay; pagtambong og mga tigum sa Simbahan; paglikay sa alkohol, mga drugas, ug tabako; o paghupot sa mga saad nga ilang gihimo.

Kalihokan ug pagpamatuod sa magtutudlo

Papanubaga ang mga bata nga may basahon ug bola sa ilang mga lihok uban niadto nga mga butang nganha kaninyo. Ipauli kanila ang mga butang nganha kaninyo, ug dayga sila kon sila nakabuhat og maayo.

Tapusa pinaagi sa pagsulti sa klase nga kini usa ka mahinungdanon nga panahon sa ilang mga kinabuhi, apan sila wala mag-inusara. Sila adunay mga ginikanan ug mga pangulo nga naggiya ug nagtabang kanila. Sila usab adunay Langitnong Amahan ug Jesukristo nga naghigugma kanila ug naggiya kanila. Human sa bunyag, sila makabaton sa Espiritu Santo sa pag-aghat kanila sa kanunay. Awhaga ang mga bata sa pagpakita og dugang ug dugang pa nga sila nagkat-on sa pagkamay kapangakohan ug sa pagpanubag alang sa unsay ilang nabuhat. Tabangi sila sa pagsabut nga sila makahimo og mga sayop. Ang tanan makahimo og sayop. Apan sila makahinulsol ug makabuhat og labaw ka maayo matag adlaw uban sa panabang sa Espiritu Santo.

Ipamatuod nga ang Langitnong Amahan naghigugma sa iyang tanan nga mga anak. Tungod niini nga katarungan, siya naglaraw og usa ka paagi alang kanato nga motubo ug mahimo nga labaw nga sama kaniya. Ipahayag pag-usab ang imong pagsalig sa matag usa ka bata nga labaw nga mahimong may kapangakohan alang sa unsay iyang himoon.

Pagdapit og usa ka bata sa paghatag sa panapos nga pag-ampo.

Human sa panapos nga pag-ampo, papanubaga ang bata nga may karmelitos nganha kaninyo. Unya pahataga ang bata og tagsa ka karmelitos ngadto sa matag sakop sa klase.

Pagpalambo nga mga Kalihokan

Pagpili gikan sa mosunod nga mga kalihokan kadto nga labing moangay alang sa imong mga bata. Ikaw makagamit kanila diha sa leksyon gayud o ingon nga usa ka balik-pagtuon o katingbanan. Alang sa dugang nga paggiya, tan-awa ang “Panahon sa Klase” diha sa “Mga Tabang alang sa Magtutudlo.”

Hatagi ang matag bata og higayon sa paghuman og usa sa mosunod nga mga sitwasyon sa paagi nga nagpakita nga ang bata nagpakamay kapangakohan. (Kamo mahimong mogamit sa mosunod nga mga sitwasyon o paghimo og inyong kaugalingon.)
1. Kamo magdula sa gawas. Kini tugnaw kaayo. Si Mama nagsulti kaninyo sa pagsul-ob og kupo.
2. Si Papa nagsulti kaninyo nga kon kamo mahinumdom sa paglimpyo og bahin sa balay sa buntag sa Sabado, kamo makaadto sa usa ka dula sa bola uban kaniya nianang pagkagabii.
3. Ang inyong mga higala buot kaninyo nga makigbahin sa inyong mga dulaan ngadto kanila. Sila makigbahin nganha kaninyo.
4. Ang inyong inahan nagsugo kaninyo sa pagbantay sa inyong gamay nga igsoong babaye.
5. Kamo nagtabang ni Mama sa pagluto og mga biskwit. Siya nagpahinumdom kaninyo sa dili paghikap sa gilutuan hangtud kini mabugnaw.
6. Ang inyong higala o ang inyong magulang nga igsoong lalaki naghagad kaninyo sa pag-inom og beer.
7. Kamo wala magsinina og tarung ug kamo buot moguwa sa gawas.
8. Si Papa naghangyo kaninyo sa pagtabang kaniya diha sa tanaman, kamo misinggit ngadto kaniya ug midagan aron makig-uban sa inyong mga higala.
9. Ang inyong magtutudlo sa Primarya naghangyo kaninyo sa paglingkod sa paagi nga may balaan nga pagtahud ug sa pag-awit sa mga awit. Kamo dili buot mobuhat niini.
Ipadibuho sa mga bata ang mga hulagway sa mga butang nga sila may tulubagon sa pagbuhat. Butangi og ngalan ang mga hulagway “Ako nagkat-on sa pagkamay tulubagon.”