Leksyon 28

Atong mga Ginikanan Nagtabang Kanato nga Makakat-on

Katuyoan

Aron sa pagtabang sa mga bata nga makasabut sa unsa nga paagi ang ilang mga ginikanan o mga magbalantay makatabang kanila nga makakat-on sa pagsunod sa mga sugo.

Pagpangandam

1. Sa mainampuon nga paagi pagtuon sa Alma 53:10–22; 56:3–10, 46–48, 55–56; 57:24–25; Doktrina ug mga Pakigsaad 93:40; ug Moses 6:58.

2. Pangandam sa pag-awit o pagsulti sa mga pulong “Tudloi ‘Ko Paglakaw sa Kahayag [Teach Me to Walk in the Light]” (Mga Himno ug mga Awit sa mga Bata o Children’s Songbook, p. 177). Kamo mahimo nga mohangyo sa usa ka bata sa pag-awit sa unang garay kon angay alang sa inyong klase.

3. Pagdapit og usa ka inahan sa pagdala sa iyang masuso sa unang bahin sa klase. (Kon kini dili mahimo, kamo mahimo nga mogamit og hulagway sa usa ka inahan og masuso.)

4. Sa tibuok niini nga leksyon, paniid ngadto sa mga bata kinsa tingali wala magpuyo uban sa duha ka mga ginikanan o kinsang mga ginikanan wala magtudlo kanila sa pagsunod sa mga sugo.

5. Mga kagamitan nga gikinahanglan:

   1. Ang sumbanan nga mga basahon.

   2. Usa ka bulsita, gamay nga bag, o uban nga humok nga butang.

   3. Hulagway 3-38, Duha ka Libo nga Batan-on nga mga Manggugubat (62050; Sudlanan sa Hulagway sa Ebanghelyo 313); Hulagway 3-5, Adan ug Eva Nagtudlo sa Ilang mga anak.

6. Paghimo sa gikinahanglan nga mga pagpangandam alang sa bisan unsa nga pagpalambo nga mga kalihokan nga imong pagagamiton.

Gisugyot nga pagpalambo sa Leksyon

Pagdapit og usa ka bata sa paghatag sa pagsugod nga pag-ampo.

Tinoa ang mga bata kon ikaw nag-awhag kanila sa pagbuhat og usa ka butang sulod sa semana.

Kita Adunay mga Ginikanan aron sa Pagtabang Kanato nga Makakat-on

Pang-atensyon nga kalihokan

Ipaila ang inahan ug ang masuso ngadto sa mga bata. Pabantayi sa mga bata ang masuso sa makadiyot ug unya pangutana:

Pang-atensyon nga kalihokan

• Unsa ang mabuhat sa masuso alang sa iyang kaugalingon?

• Unsa ang mabuhat sa inahan alang sa masuso?

• Sa unsa nga paagi ang masuso makakat-on sa pagsulti?

• Sa unsa nga paagi ang masuso makakat-on sa paglakaw?

Ipasabut nga usa ka tawo kinahanglan nga moamuma sa masuso. Siya nagagad sa iyang mga ginikanan alang sa tanan. Sila nahigugma sa masuso, ug sila naggahin sa ilang mga adlaw ug usahay sa ilang mga gabii sa pagbantay kaniya.

Pang-atensyon nga kalihokan

• Unsa ang pipila ka mga butang nga inyong makat-unan sukad sa inyong pagkabata?

• Kinsa ang nagtudlo kaninyo ug nag-amuma kaninyo?

Pasalamati ang inahan alang sa pag-anha diha sa klase uban sa iyang masuso, ug mahimo na siya nga pagawason.

Ang Atong mga Ginikanan Nagtabang Kanato sa Pagsunod sa mga Sugo

Hulagway ug sugilanon

Ipakita ang hulagway 3-5, Adan ug Eva Nagtudlo sa Ilang mga Anak.

Si Adan ug si Eva, ang unang lalaki ug babaye dinhi sa yuta, gitudloan sa ebanghelyo ni Jesukristo ug gisugo sa pagtudlo niini ngadto sa ilang mga anak. Basaha og kusog ang Moses 6:58, ayaw iapil ang katapusan nga pulong.

Hulagway ug sugilanon

• Unsa nga sugo ang gihatag ni Jesukristo ngadto sa mga ginikanan? (Sa pagtudlo sa ilang mga anak. Ang mga butang nga ang mga ginikanan kinahanglan motudlo mao ang mga kamatuoran sa ebanghelyo, tan-awa sa Doktrina ug mga Pakigsaad 93:40.)

Awit

Awita o isulti ang mga pulong sa “Tudloi ‘Ko Paglakaw sa Kahayag [Teach Me to Walk in the Light].” Hangyoa ang mga bata sa pagpaminaw aron pagtan-aw kon sila makahunahuna ba unsa ang gipasabut sa “paglakaw sa kahayag.”

Tudloi ‘ko paglakaw sa hayag;

Pag-ampo sa Amahan itudlo;

Itudlo ang butang nga matarung;

Ug sa paglakaw sa kahayag.

Dali akong anak atong tun-an,

Iyang sugo nga kita mabut-an.

Aron kita mahibalik Kan’ya,

Maglakaw sa iyang kahayag.

Amahan ta sa langit salamat,

Pag-agak kanamo nga naglakat

Amo kang daygon bisan sa awit

Kita maglakaw sa kahingpit.

Awit

• Unsa ang gipasabut sa “paglakaw sa kahayag”? (Ang pagsunod sa atong Langitnong Amahan.)

Ipasabut nga kita natawo dinhi sa yuta aron makakat-on, ug ang Langitnong Amahan mibutang kanato diha sa mga banay aron kita makakat-on gikan sa atong mga ginikanan. Ang mga ginikanan gisugo sa pagtabang sa pag-andam kanato aron kita sa umaabut nga adlaw makabalik sa pagpuyo uban sa atong Langitnong Amahan.

Balaan nga kasulatan nga sugilanon ug hulagway

Ipasabut nga ang Basahon ni Mormon nagsaysay og usa ka sugilanon mahitungod sa pipila ka batan-on nga mga lalaki kinsang mga ginikanan nagtudlo kanila sa pagsunod sa mga sugo. Isaysay ang mosunod sa inyong kaugalingon nga mga pulong:

Pahinumdumi ang mga bata nga ang mga Lamanite kinsa nakabig ngadto sa Simbahan mitawag sa ilang mga kaugalingon og mga Anti-Nephi-Lehi aron dili sila masaypan sa nahibiling uban nga mga Lamanite. Sa diha nga ang mga Anti-Nephi-Lehi nakabig, sila mihimo og saad o pakigsaad uban sa Langitnong Amahan nga sila dili mogamit sa ilang mga hinagiban aron sa pagpakig-away. Sila milubong sa ilang mga hinagiban aron sa pagpakita nga sila mohupot sa ilang pakigsaad.

Ang mga Nephite mihatag og yuta alang sa mga Anti-Nephi-Lehi aron kapuy-an ug mipanalipod kanila gikan sa mga Lamanite. Ang mga Anti-Nephi-Lehi nahimong bantugan tungod sa ilang pagkamatarung ug pakamatinuoron. Sila mihatag og pagkaon ug panapot aron sa pagtabang sa mga kasundalohan sa mga Nephite.

Daghan nga mga tuig ang milabay. Ang dautan nga mga Lamanite misugod sa pagsulong sa mga yuta sa Nephite pag-usab ug miagaw sa pipila ka mga dakbayan sa mga Nephite. Ang mga Nephite may kalisud sa pagpanalipod sa ilang mga dakbayan. Sa diha nga ang mga Anti-Nephi-Lehi nakakita unsa ka lisud ang mga Nephite sa pagpakig-away aron sa pagpanalipod sa ilang mga dakbayan ug sa mga Anti-Nephi-Lehi, sila hilabihan sa kaguol. Ang mga Anti-Nephi-Lehi nagduhaduha kon sila kinahanglan ba nga molapas sa ilang pakigsaad ug motabang sa mga Nephite sa pakig-away.

Usa ka isug nga pangulo sa Nephite nga ginganlan og Helaman misulti kanila sa dili paglapas sa ilang pakigsaad. Siya nasayud nga kini mahinungdanon sa paghupot sa mga pakigsaad. Siya usab nakahibalo nga kining matarung nga mga tawo adunay daghan nga anak nga mga lalaki kinsa mga batan-on kaayo sa panahon nga ang pakigsaad gihimo. Kining batan-on nga mga lalaki wala makahimo og pakigsaad uban sa Langitnong Amahan, busa sila makatabang sa mga Nephite sa pagpanalipod sa mga dakbayan ug sa ilang mga ginikanan. Duha ka libo niining kusgan nga batan-on nga mga lalaki miboluntaryo sa pagpakig-away uban ni Helaman.

Ipakita ang hulagway 3-38, Duha Ka Libo nga Batan-on nga mga Manggugubat. Unya ipadayon ang sugilanon.

Ipasabut nga kining batan-on nga mga lalaki mga matinuoron ug mahimong kasaligan. Ang ilang mga inahan nagtudlo kanila sa pagsalig sa Langitnong Amahan ug sa pagsunod sa iyang mga sugo. Kining batan-on nga mga manggugubat nakahibalo nga kon sila mobuhat sa mao, ang Langitnong Amahan mopanalipod kanila. Tungod kay sila mituo ug misunod sa mga pagtulun-an sa ilang mga inahan, sila wala mahadlok sa pagsunod ni Helaman. Sila nakig-away og daghan nga mga gubat alang sa mga Nephite. Sila nakigaway sa maisug nga paagi ug dako kaayo nga tabang ngadto sa mga kasundalohan sa Nephite.

Basaha og kusog alang sa mga bata ang Alma 56:47, magsugod sa “sila gitudloan sa ilang mga ginikanan” ug magpadayon ngadto sa bersikulo 48.

Ipasabut nga si Helaman nahigugma niining batan-on nga mga lalaki ingon usab nga ang mga ginikanan nahigugma sa ilang mga anak. Human sa usa ka dako nga gubat, daghan nga mga tawo ang namatay. Si Helaman naguol nga pipila niining batan-on nga mga lalaki tingali namatay. Sa diha nga sila giihap siya nalipay sa pagkakita nga walay usa kanila ang namatay. Tungod kay ang batan-on nga mga lalaki misalig sa Langitnong Amahan ug misunod sa mga pagtulun-an sa ilang mga inahan, ang Langitnong Amahan mipanalipod kanila gikan sa mga Lamanite.

Panaghisgutan

Itudlo nga kita makakat-on sa mga sugo gikan sa atong mga ginikanan sama lamang niining batan-on nga mga lalaki nga nakakat-on. Busa kita kinahanglan nga mosunod unsay gitudlo kanato. Pinaagi sa pagtudlo kanato mahitungod sa mga sugo sa Langitnong Amahan, ang atong mga ginikanan nagtabang kanato nga makahibalo unsay atong kinahanglan gayud nga buhaton aron sa paghupot sa mga pakigsaad nga atong gihimo sa diha nga kita gibunyagan.

Panaghisgutan

• Unsa ang pipila sa mga sugo nga kita gitudloan sa atong mga ginikanan ug sa uban? (Patubaga ang mga bata. Sa inyong panaghisgutan, hatagi og gibug-aton ang paghigugma sa Langitnong Amahan ug ni Jesukristo, paghigugma sa usag usa, pagtahud sa mga ginikanan, pagpasaylo sa uban, pagpabunyag, pag-ampo, pagbayad sa ikapulo, pagpuasa, pagsunod sa Pulong sa Kaalam, pagmatinuoron, pagbalaan sa Igpapahulay nga adlaw, pagtambong sa mga tigum sa Simbahan, ug pagtuon sa balaan nga mga kasulatan.)

Katingbanan

Hangyoa ang mga bata sa pagpaminaw kon ang ilang mga ginikanan magtudlo kanila ug sa pagsunod sa mga sugo. Awhaga ang mga bata sa pagpasalamat sa ilang mga ginikanan kon sila magtudlo mahitungod sa mga sugo.

Pagpamatuod sa magtutudlo

Pagpamatuod nga ang Langitnong Amahan naghigugma matag usa kanato. Tungod niini nga gugma, siya nagsugo sa atong yutan-on nga mga ginikanan sa pagbantay kanato, pag-amuma kanato, ug sa pagtudlo kanato sa matarung nga paagi sa pagpuyo. Samtang ang atong mga ginikanan naninguha sa pagpuyo sa paagi nga ang Langitnong Amahan buot kanila nga magpuyo, kita makakat-on gikan kanila sa pagpili kanunay sa matarung nga paagi.

Pagdapit og usa ka bata sa paghatag sa panapos nga pag-ampo.

Pagpalambo nga mga Kalihokan

Pagpili gikan sa mosunod nga mga kalihokan kadto nga labing moangay alang sa imong mga bata. Ikaw makagamit kanila diha sa leksyon gayud o ingon nga usa ka balik-pagtuon o katingbanan. Alang sa dugang nga paggiya, tan-awa ang “Panahon sa Klase” diha sa “Mga Tabang alang sa Magtutudlo.”

1. Pahunahunaa ang mga bata og pipila ka mga butang nga ang ilang mga ginikanan nagtudlo kanila nga buhaton. Dayon pakigdula uban kanila sa mosunod nga dula:

   Sulti, “Ang akong (inahan, amahan, o mga ginikanan) mitudlo kanako sa (pananglit: paghimo og cake).” Unya tawga ang bata pinaagi sa ngalan, pag-itsa og bag ngadto kaniya, ug pangutana, “Unsay natudlo sa imong mga ginikanan nga imong buhaton?”

   Ang bata motubag pinaagi sa pagsulti, “Ang akong (inahan, amahan o mga ginikanan) mitudlo kanako sa (pananglit: pagsulat sa akong ngalan.) Dayon ang bata mobalik og itsa sa bag balik diha kanimo.

   Balika ang dula hangtud ang matag bata nakahimo na og usa o duha ka pagdula.

2. Basaha ang mosunod nga balak ngadto sa mga bata. Patindoga ang mga bata, ug dayon basaha pagbalik ang balak ngadto kanila, ipabutang kanila ang ilang mga kamot diha sa ilang mga ulo matag panahon nga sila makadungog sa mga pulong langit o panimalay.

   Ako Dihay usa ka Panimalay sa Langit

   Ako dihay usa ka panimalay sa langit:

   Ang akong inahan misulti sa mao;

   Ako mipuyo uban sa Langitnong Amahan

   Sa dili pa dugay kaayo.

   Ako kanhiay nagpuyo sa langit;

   Kini tinuod miingon ang papa ko

   Nga ang Langitnong Amahan mipadala kanako dinhi

   Aron motubo, ug makakat-on ug motrabaho.

   Ako gusto sa akong panimalay didto sa langit,

   Apan karon nga ako ania dinhi ako malipayon

   nga nagpuyo uban sa akong banay,

   Ug mga higala ug mga silingan nga mapinanggaon.

3. Awita o isulti uban sa mga bata ang mga pulong sa “Malipayong Banay [A Happy Family]” (Children’s Songbook, p. 198); ang mga pulong gilakip sa luyo niining tamdanan nga basahon.

   Pagpili og usa ka bata nga maoy inahan ug usa nga maoy papa. Kon kamo moawit o mosulti og “inahan” ang bata nga maoy gihimo nga inahan mobarug. Kon kamo moawit o mosulti og “kanako,” matag bata motudlo sa iyang kaugalingon. Kon kamo moawit o mosulti og “papa,” ang bata nga maoy gihimo nga papa mobarug.