Leksyon 29

Pagbaton og Hugot nga Pagtuo diha sa Ginoong Jesukristo

Katuyoan

Aron sa paglig-on sa hugot nga pagtuo sa mga bata diha ni Jesukristo

Pagpangandam

1. Sa mainampuon nga paagi pagtuon sa Mosiah 4:21; Alma 32; Ether 2–3; ug Doktrina ug mga Pakigsaad 29:6. Pangandam sa pagbasa sa Ether 2:17, 23; 3:6; ug Doktrina ug mga Pakigsaad 29:6 sa panahon sa klase.

2. Pagkuha og pipila ka gagmay nga limpyong mga bato, o paggunting og mga lingin gikan sa baga nga papel aron ingnon nga mga bato. Isulat ang “Hugot nga Pagtuo diha sa Ginoong Jesukristo” sa ubos sa mga bato o sa mga papel pinaagi sa pagbutang og usa ka titik sa matag bato, ingon sa gipakita diha sa ubos.

   

   Han-aya ang mga bato o mga papel nga ang mga titik gikulob diha sa usa ka lamesa o sawog sa wala pa ang klase.

3. Mga kagamitan nga gikinahanglan:

   1. Usa ka Basahon ni Mormon ug Doktrina ug mga Pakigsaad alang sa matag bata, kon mahimo.

   2. Usa ka papel ug lapis (o krayola) alang sa matag bata.

   3. Usa ka makapahinam nga butang (kon mahimo, usa ka butang nga may kalabutan ngadto sa leksyon), nga gitabonan sa usa ka pirasong panapton aron matago.

   4. Hulagway 3-55, Ang Igsoon nga Lalaki ni Jared Nakakita sa Tudlo sa Ginoo (62478; Sudlanan sa Hulagway sa Ebanghelyo 318).

4. Paghimo sa tanan nga mga gikinahanglan nga mga pagpangandam alang sa bisan unsa nga pagpalambo nga mga kalihokan nga imong pagagamiton.

Gisugyot nga Pagpalambo sa Leksyon

Pagdapit og usa ka bata aron sa paghatag sa pagsugod nga pag-ampo.

Tinoa ang mga bata kon ikaw nag-awhag kanila sa pagbuhat og usa ka butang sulod sa semana.

Kita Makabaton og Hugot nga Pagtuo diha ni Jesukristo

Pang-atensyon nga kalihokan

Sa imong kaugalingon nga mga pulong, isaysay ang mosunod nga sugilanon.

Usa ka gamay nga batang babaye mihatod sa paniudto ngadto sa iyang amahan samtang siya nagtrabaho ilawom sa usa ka tabay. Bisan tuod siya dili makakita sa iyang amahan didto sa ubos sa kangitngit sa tabay, sa diha nga siya mitawag kaniya siya mitubag, busa siya nakahibalo nga siya anaa. Ang amahan misugo kaniya sa paghulog sa gisudlan sa paniudto ngadto sa lungag, ug iya kining saw-on. Iya kining gisawo, ug sa wala madugay mitawag ngadto sa iyang anak nga siya daghan ra kaayo og paniudto alang sa usa ka tawo, ug midapit sa iyang anak sa pakigsalo kaniya. “Lukso” siya miingon, “ug ako kang saw-on. Ikaw dili makakita kanako, apan ako makakita kanimo, ug ako dili makaako nga ikaw mahulog.” Siya milukso ngadto sa mangitngit nga tabay ug nahulog diha sa kusgan nga mga bukton sa iyang amahan nga walay kadaot. Silang duha malipayon nga nagsalo sa paniudto.

Ipasabut ngadto sa mga bata nga ang gamay nga batang babaye misalig sa iyang amahan sa pagsawo kaniya, bisan tuod siya dili makakita kaniya. Kini nga pagsalig sama sa hugot nga pagtuo. Ang hugot nga pagtuo mao ang pagtuo sa usa ka butang nga dili ninyo makita, apan kamo adunay dako nga paglaum nga kini tinuod (tan-awa sa Ether 12:6).

Leksyon nga may butang nga gamiton

Ipakita sa mga bata ang butang nga gitabunan sa usa ka pirasong panapton.

Leksyon nga may butang nga gamiton

• Kamo ba motuo nga adunay usa ka butang ilawom niini? Ngano?

Patag-ana ang mga bata unsa kaha kining butanga. Unya kuhai sa tabon ang butang. Itudlo nga bisan tuod sila wala makakita sa butang, sila mituo nga kini anaa.

Ipasabut nga bisan tuod og kita wala makakita ni Jesukristo, kita nagtuo nga siya anaa. Kita nakakita og mga kamatuoran sa iyang pagkaanaa bisan asa nga dapit kita motan-aw sa kalibutan nga iyang gilalang, ingon nga atong makita ang mga bitoon sa mga langit, ug ilabi na samtang atong basahon ang balaan nga mga kasulatan. Kita usab adunay mga propeta kinsa nagsulti kanato nga sila nakakita kaniya. Sultihi ang mga bata nga karon sila makahibalo mahitungod sa usa ka tawo gikan sa Basahon ni Mormon kinsa adunay ingon ka dako nga hugot nga pagtuo nga siya gayud nakakita ni Jesukristo.

Ang Igsoon nga lalaki ni Jared ug ang mga Jaredite Adunay Hugot nga Pagtuo

Balaan nga kasulatan nga sugilanon ug panaghisgutan

Pahinumdumi ang mga bata nga sila sa kanunay nagkat-on mahitungod sa mga Nephite ug sa mga Lamanite diha sa Basahon ni Mormon. Ipasabut ngadto kanila nga lain nga pundok sa mga katawhan miabut ngadto sa sama nga dako nga kayutaan. Sila miabut mga labaw ka una kay sa banay ni Lehi. Sila gitawag og mga Jaredite. Ang ilang pangulo mao ang usa ka lalaki nga ginganlan og Jared. Si Jared adunay usa ka igsoon nga lalaki kinsa adunay dako nga hugot nga pagtuo. Si Jesukristo mitubag sa mga pag-ampo sa igsoon nga lalaki ni Jared ug mipanalangin sa mga katawhan.

Ipasabut nga si Jesukristo misugo sa mga Jaredite sa pagpundok sa ilang tanan nga mga banay ug sa ilang mga kabtangan, lakip sa ilang panon sa mga kahayupan ug mga liso sa matag matang. Siya misulti kanila nga human sila makapundok sa tanang butang, siya moggiya kanila ngadto sa usa ka pinili nga yuta.

Ang mga Jaredite matinud-anon ug misunod ni Jesus. Siya nakigsulti sa igsoon nga lalaki ni Jared gikan sa panganod ug migiya sa mga Jaredite ngadto sa kamingawan. Sila mitabok og daghan nga mga katubigan ug mipanaw ngadto sa dako nga dagat.

Pahinumdumi ang mga bata nga ang igsoon nga lalaki ni Jared gipanalanginan tungod kay siya adunay dako nga hugot nga pagtuo. Siya mipakita sa iyang hugot nga pagtuo pinaagi sa paghangyo sa Langitnong Amahan sa pagtabang sa iyang mga katawhan ug unya pinaagi sa pagbuhat unsay gisugo sa Langitnong Amahan.

Ipadayon ang sugilanon sa igsoon nga lalaki ni Jared:

Si Jesukristo mitudlo sa igsoon nga lalaki ni Jared sa pagtukod og walo ka mga kasko, sama sa dagko nga mga sakayan o mga barko, aron sa pagdala sa mga Jaredite tabok sa lawod ngadto sa gisaad nga yuta. Ang mga Jaredite misunod sa iyang mga panudlo ug mitukod og mga kasko.

Ang Manluluwas misulti sa igsoon nga lalaki ni Jared nga ang mga kasko mabutang sa ilawom sa tubig usahay, busa sila pagahimoon nga ang tubig dili mosulod.

Pagbasa sa balaan nga kasulatan

Tabangi ang mga bata kinsa makabasa sa pagpangita sa Ether 2:17 diha sa ilang mga kopya sa Basahon ni Mormon. Basaha ang bersikulo 17 og dungan, nga naghulagway sa mga kasko sa mga Jaredite.

Dapita ang mga bata sa pagbutang sa ilang gisawod nga mga kamot og tingub sama sa usa ka barko, ug unya takilira ngadto sa usa ka kilid, unya sa lain, aron sa pagpakita sa unsa nga mga paagi ang mga kasko mahimo nga moligid ngadto sa bisan hain nga kilid sama sa usa ka pinggan nga gibutang og maayo ibabaw sa lain.

Pagdibuho nga kalihokan

Panghatag og mga lapis o mga krayola ug papel ngadto sa matag bata. Hangyoa ang mga bata sa pagdibuho unsa sa ilang hunahuna ang hitsura sa mga kasko gikan sa paghulagway diha sa balaan nga kasulatan nga inyo pa lamang nga nabasa. Basaha kini pag-usab ingon sa panginahanglan samtang ang mga bata nagdibuho.

Ipapakita sa mga bata ngadto sa klase ang ilang mga hulagway; unya kuhaa ang mga dibuho ug ang mga kopya sa Basahon ni Mormon. Sultihi sila nga imong ibalik ang ilang mga dibuho inig kahuman sa klase sa Primarya. Ipasabut nga kita wala sa tinuod makahibalo unsa gayud ang hitsura sa mga kasko.

Ang Igsoon nga Lalaki ni Jared Nakakita ni Jesukristo

Ipasabut nga tungod sa pagkahugot sa kasko, walay bisan unsa nga kahayag sa sulod, ni ang presko nga hangin makasulod sa mga tawo ug mga hayop sulod sa kasko. Ang mga tawo naglibug unsaon nila pagkakita o pagginhawa samtang sila magtabok sa lawod. Si Jesukristo mitudlo kanila sa paglungag diha sa ibabaw ug diha sa ubos sa matag kasko. Kini nga mga lungag mahimo nga kasampungan. Unya, kon ang mga kasko anaa ibabaw sa tubig, ang mga Jaredite makahimo sa pag-abli sa ibabaw nga lungag aron sa pagpasulod sa presko nga hangin. Kon ang tubig magsugod sa pagsulod, sila makasampong sa lungag pagbalik.

Ang igsoon nga lalaki ni Jared nakahibalo nga sila sa gihapon manginahanglan og kahayag sa sulod sa mga barko. Siya nag-ampo ug nangutana unsa ang ilang buhaton aron mahayagan.

Balaan nga kasulatan nga panaghisgutan

Basaha ang Ether 2:23 og kusog ug ipasabut unsa ang gisulti ni Jesukristo ngadto sa igsoon nga lalaki ni Jared. Ipasabut nga si Jesus wala mohatag sa igsoon nga lalaki ni Jared og tubag apan nangutana hinoon unsa nga tabang ang iyang gikinahanglan.

Balaan nga kasulatan nga panaghisgutan

• Unsa ang pipila ka mga kasulbaran nga tingali inyong gihunahuna kon kamo pa ang igsoon nga lalaki ni Jared?

Balaan nga kasulatan nga sugilanon ug mga butang

Ipasabut nga ang igsoon nga lalaki ni Jared miadto sa usa ka bukid ug mitunaw og napulog unom ka gagmay, tin-aw nga mga bato gikan sa usa ka dako kaayo nga bato.

Patan-awa ngadto sa mga bato (o bato nga hinimo sa papel) nga inyong gipahimutang aron makit-an. Ipasabut nga ang mga bato nga iyang gihimo mga puti ug tin-aw, sama sa baso.

Ang igsoon nga lalaki ni Jared midala sa mga bato ngadto sa ibabaw sa usa ka bukid ug nag-ampo. Sa iyang pag-ampo siya miingon nga siya nakahibalo nga kon ang Ginoo mohikap sa mga bato, sila mohatag og kahayag. Niini nga paagi sila makabaton og kahayag sulod sa ilang mga barko samtang sila naglawig tabok sa dagat. Human sa iyang pag-ampo, usa ka kahibulongan nga butang ang nahitabo.

Pagbasa sa balaan nga kasulatan

Basaha ang Ether 3:6 ngadto sa klase (hunong human sa unang paggula sa pulong nga tudlo).

Pagbasa sa balaan nga kasulatan

• Unsa ang gibuhat ni Jesukristo ngadto sa mga bato? (Siya mihikap kanila sa iyang tudlo.)

Hulagway ug balaan nga kasulatan nga sugilanon

Ipakita ang hulagway 3-55, Ang Igsoon nga Lalaki ni Jared Nakakita sa Tudlo sa Ginoo.

Sa diha nga ang igsoon nga lalaki ni Jared nakakita sa tudlo ni Jesukristo nga naghikap sa mga bato, siya nahibulong kaayo nga siya nalup-og ngadto sa yuta. Sa diha nga ang Ginoo nangutana kaniya ngano nga siya nalup-og ngadto sa yuta, ang igsoon nga lalaki ni Jared miingon nga siya wala makahibalo nga ang ginoo adunay tudlo sama sa usa ka tawo. Unya si Jesus nangutana sa igsoon nga lalaki ni Jared kon siya mituo ba sa tanang pulong nga ang Ginoo namulong. Sa diha nga ang igsoon nga lalaki ni Jared miingon og oo, ang Ginoo misulti kaniya nga tungod sa iyang dakong hugot nga pagtuo, ang Ginoo makapakita sa iyang kaugalingon ngadto kaniya. Unya si Jesus mipakita sa iyang kaugalingon ngadto sa igsooon nga lalaki ni Jared ug misulti kaniya nga walay usa ka tawo sukad nga nakapakita og ingon ka dako nga hugot nga pagtuo sama sa iyang gipakita.

Hulagway ug balaan nga kasulatan nga sugilanon

• Ngano nga si Jesukristo nagpakita sa iyang kaugalingon ngadto sa igsoon nga lalaki ni Jared? (Tungod kay ang igsoon nga lalaki ni Jared adunay dako nga hugot nga pagtuo.)

Ipasabut nga ang igsoon nga lalaki ni Jared nakahibalo nga kon si Jesus mohikap sa mga bato, sila mohatag og kahayag sa sulod sa walo ka mga kasko, ug sa tinuod sila mihatag.

Ang mga Jaredite usab adunay dako nga hugot nga pagtuo diha ni Jesukristo. Sa wala madugay ang mga Jaredite misakay sa ilang mga barko. Tungod sa ilang hugot nga pagtuo diha kaniya, sila gigiyahan nga walay kadautan ngadto sa gisaad nga yuta.

Kita Makabaton og Hugot nga Pagtuo sama sa Igsoon nga Lalaki ni Jared

Pagtudlo sa magtutudlo

Ipasabut nga ang mga tawo karon makabaton og hugot nga pagtuo sama sa igsoon nga lalaki ni Jared. Ang hugot nga pagtuo mao ang pagtuo ug pagsalig sa Langitnong Amahan ug ni Jesukristo. Kita makapakita sa atong hugot nga pagtuo pinaagi sa pagmasulundon ug sa pagmainampuon. Kita gisaaran nga kita matubag sa atong mga pag-ampo kon kita mohangyo diha sa hugot nga pagtuo alang sa unsa ang matarung (tan-awa sa Mosiah 4:21).

Artikulo sa hugot nga pagtuo

Tabangi ang mga bata sa pagsulti kutob sa ilang mahimo sa ikaupat nga artikulo sa hugot nga pagtuo.

Balaan nga kasulatan nga panaghisgutan

Basaha ang Doktrina ug mga Pakigsaad 29:6 ngadto sa klase.

Ipasabut nga kita nagkinahanglan og hugot nga pagtuo kon kita mag-ampo ngadto sa atong Langitnong Amahan. Ang Langitnong Amahan nagsaad sa pagtubag sa atong mga pag-ampo kon kita mangayo kaniya diha sa hugot nga pagtuo. Kini dili igo alang kanato sa pagsulti lamang sa atong mga pag-ampo. Kita kinahanglan nga motuo nga siya motubag sa paagi nga labing maayo alang kanato.

Mga sitwasyon ug panaghisgutan

Basaha ang mosunod nga hinunahuna nga mga sitwasyon ngadto sa klase. Ipasulti sa mga bata nganha kanimo sa unsa nga paagi sa nag-una nga magdudula sa matag sitwasyon nagpakita og hugot nga pagtuo.

Mga sitwasyon ug panaghisgutan

1. Si Bart nawad-an sa iyang PAM nga singsing diha sa natad-dulaanan sa tulunghaan. Ang iyang labing suod nga higala, si Jim, misulti kaniya nga wala nay paglaum nga iya kining makit-an diha sa tanang mga graba ug balas. Si Bart nasayud nga siya nanginahanglan og dugang nga tabang. Siya buot nga makit-an ang iyang singsing. Nianang gabii siya nag-ampo ug naghangyo sa Langitnong Amahan alang sa panabang. Sa diha nga siya nakahuman sa iyang pag-ampo, siya dihay maayo nga pagbati sa ilawom ug mibati nga siya makakuha og tabang gikan sa Langitnong Amahan, ni Jesukristo, ug sa Espiritu Santo aron makit-an ang iyang singsing. Sa sunod nga adlaw iyang nakit-an ang singsing.

   • Unsa ang gibuhat ni Bart aron sa pagpakita sa iyang hugot nga pagtuo diha ni Jesukristo?

   • Sa unsa nga paagi ang hugot nga pagtuo ni Bart gigantihan?

2. Si Sally gihangyo sa pagpamulong diha sa Primarya sa sunod domingo. Siya sukad wala pa gayud makahimo niini kaniadto, ug siya gikulbaan pag-ayo. Sulod sa semana si Sally naninguha pag-ayo sa pag-andam sa iyang pakigpulong. Sa diha nga miabut ang Domingo, siya sa gihapon mibati og ka kulba ug nagpanuko paghatag sa iyang pakigpulong. Sa wala pa siya mobiya sa panimalay, siya miluhod sa may kilid sa iyang higdaanan ug mihangyo sa Langitnong Amahan sa pagtabang kaniya nga mahupay. Siya nasayud nga siya nangandam pag-ayo sa pakigpulong, ug siya mibati nga ang Langitnong Amahan motabang kaniya.

   • Unsa ang gibuhat ni Sally aron sa pagpakita og hugot nga pagtuo?

   • Sa unsa nga paagi sa inyong hunahuna ang iyang hugot nga pagtuo nagantihan?

Pahinumdumi ang mga bata nga sila makahimo sa ilang mga pag-ampo nga matubag kon sila maghangyo diha sa hugot nga pagtuo. Usahay ang atong mga pag-ampo dili tubagon sa paagi nga kita buot kanila nga matubag. Kon kita adunay hugot nga pagtuo diha sa Langitnong Amahan ug ni Jesukristo, kita makahibalo nga kita pagahatagan sa mga tubag nga labing maayo alang kanato.

Katingbanan

Dula

Pagdula sa mosunod nga dula ginamit ang mga bato o mga papel nga inyong gipakita sa panahon sa leksyon. Papulipuliha ang mga bata sa pagtagna sa mga titik sa alpabeto. Kon ang usa ka bata makatagna sa usa sa mga titik diha sa mga bato, baliha ang bato aron sa pagpakita sa titik. Kon ang usa ka bata mopili og usa ka titik nga katulo mogula sa dula (sama sa O), baliha ang tulo ka bato. Pagpadayon sa pagdula hangtud ang tibuok hugpong sa mga pulong “Hugot nga Pagtuo diha ni Jesukristo” makita. Basaha ang hugpong sa mga pulong uban sa klase; unya pangutana sa mosunod nga pangutana:

Dula

• Unsa ang pipila ka mga paagi nga kita makapakita sa atong hugot nga pagtuo diha sa Langitnong Amahan ug ni Jesukristo?

Pagpamatuod sa magtutudlo

Tapusa ang leksyon pinaagi sa pagpamatuod nga ang Langitnong Amahan mamati ug motubag sa atong mga pag-ampo kon kita mohangyo diha sa hugot nga pagtuo. Ikaw mahimo nga makigbahin og usa ka kinaugalingon nga kasinatian mahitungod sa pag-ampo nga gitubag. Awhaga ang mga bata sa paglig-on sa ilang hugot nga pagtuo.

Pagpamatuod sa magtutudlo

• Sa unsa nga paagi ang igsoon nga lalaki ni Jared milig-on sa iyang hugot nga pagtuo? (Mahimong mga tubag naglakip sa: siya nag-ampo alang sa panabang; siya namati ngadto ni Jesukristo; siya mituo ug misunod sa mga sugo nga siya gihatagan.)

Sa katapusan sa klase sa Primarya, ihatag ang mga hulagway sa kasko og balik ngadto sa mga bata aron ilang dad-on sa panimalay.

Pagdapit og usa ka bata sa paghatag sa panapos nga pag-ampo.

Pagpalambo nga mga kalihokan

Pagpili gikan sa mosunod nga mga kalihokan kadto nga labing moangay alang sa imong mga bata. Ikaw makagamit kanila diha sa leksyon gayud o ingon og usa ka balik-pagtuon o katingbanan. Alang sa dugang paggiya, tan-awa ang “Panahon sa Klase” diha sa “Mga Tabang alang sa Magtutudlo.”

1. Hatagi ang matag bata og usa sa mga bato nga gigamit diha sa leksyon agi og pahinumdom nga sila makabaton og hugot nga pagtuo sama sa igsoon nga lalaki ni Jared. Mahimo nga ang matag bata imong pasulaton sa pulong nga hugot nga pagtuo diha sa bato.

2. Ipasulti og balik sa mga bata ang unang bahin sa ikaupat nga artikulo sa hugot nga pagtuo: “Kami nagtuo nga ang unang mga baruganan ug mga ordinansa sa Ebanghelyo mao: una, Hugot nga Pagtuo diha sa Ginoong Jesukristo.”

3. Barug uban sa mga bata aron sa pag-awit o sa pagsulti sa mga pulong sa “Hugot nga Pagtuo [Faith]” uban sa mga lihok (Children’s Songbook, p. 96):

   Hugot nga pagtuo mao ang pagkahibalo,

   Nga ang Ginoo motubag (ibutang ang gisawod nga kamot luyo sa dunggan)

   Matag pag-ampo ko. (ipahimutang ang mga kamot ingon og nag-ampo)

   Kini sama sa liso: (isawod ang wala nga kamot ug pagpakaaron ingon nga nagtanom og usa ka liso diha niini uban sa tuo nga kamot)

   Itanom, motubo. (tuo nga kamot mosumaysumay sa usa ka tanom nga nagtubo gikan sa gisawod nga wala nga kamot)

   Magtubo sa kasingkasing ko. (ibutang ang mga kamot ibabaw sa kasingkasing)

   Kon buotan ako. (itudlo ang igtutudlo nga tudlo sa imong kaugalingon)

4. Pagpakita sa mga bata og usa ka liso. Pangutan-a ang mga bata unsa ang mahitabo kon kini itanom ug amumahon. Ikaw mahimo nga motabang sa matag bata sa pagtanom og liso diha sa usa ka lata nga puno sa yuta. Awhaga ang mga bata sa pag-amuma sa ilang mga tanom sulod sa sunod duha ka mga semana samtang ang mga tanom mogitib.

   • Unsa ang kinahanglan gayud nga atong buhaton niining liso aron matabangan kini sa pagtubo?

   Ipasabut nga kita adunay hugot nga pagtuo nga ang mga liso motubo kon sila giamumahan sa tukma nga paagi. Sa sama nga paagi, kita adunay hugot nga pagtuo nga ang Langitnong Amahan motubag sa atong mga pag-ampo kon kita mohupot sa iyang mga sugo ug mag-ampo diha sa hugot nga pagtuo.