Mga Manwal sa Primary ug Panahon sa Pagpakigbahin

Leksyon 3: Ang mga Sugo Nagtabang Kanato sa Pagpili sa Matarung

Leksyon 3

Ang mga Sugo Nagtabang Kanato sa Pagpili sa Matarung

Katuyoan

Aron sa pagtabang sa matag bata sa pagsabut nga ang Langitnong Amahan naghatag kanato og mga sugo aron sa pagtabang kanato sa paghimo og matarung nga mga pagpili.

Pagpangandam

Sa mainampuon nga paagi pagtuon sa Mosiah 2:22.
Paghimo og kopya sa ighahatag nga basahon, “Mga Timaan sa Sugo Diha sa Dalan” alang sa matag bata (gi-imprinta diha sa katapusan sa leksyon). Paghimo og dugang nga kopya ug patindoga kini diha sa usa ka cardboard. Basaha ang balaan nga mga kasulatan nga gilista diha sa ighahatag nga basahon ug pangandam sa pagpasabut sa bisan unsa nga malisud nga mga pulong nga anaa niini.
Paglaraw og usa ka yano nga dula sa pagpangita sa bahandi nga motugot sa mga bata sa pagsunod sa mga ilhanan, mga timaan, o gagmay nga mga piraso sa papel nga nagtudlo sa dalan paingon sa bahandi. Ang bahandi mahimo nga usa ka kopya sa Basahon ni Mormon, usa ka hulagway, o usa ka PAM nga singsing.
Pangandam sa pag-awit sa “Pilia ang Matarung nga Paagi [Choose the Right Way]” (Children’s Songbook, p. 160); ang mga pulong gilakip diha sa luyo niining tamdanan nga basahon. Pangandam usab sa pag-awit “Sunod sa mga Sugo [Keep the Commandments]” (Children’s Songbook, 146).
Mga kagamitan nga gikinahanglan:
1. Usa ka kopya sa Basahon ni Mormon alang sa mga bata kinsa makabasa. Patabanga niini nga leksyon ang mga bata diha sa imong klase kinsa makabasa.
2. Pisara, tisas, ug papas (o lain nga mahimong kasulatan).
3. Hulagway 3-3, Kinabuhi nga Wala pa Dinhi sa Yuta; hulagway 3-4, Usa ka Bata nga Lalaki ug ang Iyang Bola sa Putbol.
Himoa ang gikinahanglan nga mga pagpangandam alang sa bisan unsa nga pagpalambo nga mga kalihokan nga imong pagagamiton.

Gisugyot nga Pagpalambo sa Leksyon

Pagdapit og usa ka bata sa paghatag sa pagsugod nga pag-ampo.

Tinoa ang mga bata kon kamo nag-awhag kanila sa pagbuhat og usa ka butang sulod sa semana.

Ang mga Sugo Nagtabang Kanato sa Pagpili sa Matarung

Pang-atensyon nga kalihokan

Tugoti ang mga bata sa pagpangita sa bahandi ginamit ang mga ilhanan nga imong giandam.

Pagtudlo sa magtutudlo

Ipahunahuna sa mga bata nga ikaw nagsugo kanila ngadto sa balay sa usa ka tawo aron sa pagkuha og pipila ka mahinungdanon nga mga papel nga dad-on diha kaninyo. Ipasabut nga ang tawo nagpuyo sa layo ug nga walay usa nga makauban sa mga bata sa pagtabang kanila sa pagpangita sa agianan.

Pagtudlo sa magtutudlo

Unsa ang makatabang kaninyo sa pagpangita sa inyong agianan ngadto sa balay?
Kon ang dalan gibutangan og mga timaan o mga punting, kamo ba makatultol sa agianan? Sultihi ang mga bata nga sa diha nga ang Langitnong Amahan mipadala kanato sa yuta, siya mipadala kanato sa usa ka mahinungdanon nga sugo. Siya buot kanato nga mangita sa atong agianan balik ngadto kaniya.

Hulagway

Ipakita ang hulagway 3-3, Kinabuhi nga Wala pa Dinhi sa Yuta, ngadto sa klase.

Hulagway

Diin kita magpuyo sa wala pa kita matawo? (Uban sa Langitnong Amahan.)
Ngano nga kita mibiya sa Langitnong Amahan aron sa pag-anhi sa yuta?

Pagtudlo sa magtutudlo

Ipasabut ngadto sa mga bata nga kita mibiya sa Langitnong Amahan aron kita makadawat og mga lawas, makabaton og mga kasinatian, ug makakat-on sa pagpili og matarung.

Ipasabut nga sa dihang ang Langitnong Amahan naglaraw alang kanato nga mobiya kaniya ug mopuyo dinhi niini nga yuta, siya buot kanatong tanan nga mobalik ug mopuyo uban kaniya pag-usab. Siya nasayud nga kita kinahanglan mohimo og matarung nga mga pagpili aron makabalik ngadto kaniya ug nga pagpili sa matarung makalipay kanato.

Siya mihatag kanato og mga sugo aron sa pagtabang kanato sa paghimo og matarung nga mga pagpili.

Pagtudlo sa magtutudlo

Unsa ang mga sugo? (Mga butang nga gisugo sa Langitnong Amahan kanato sa pagbuhat.)
Unsa ang pipila sa mga sugo?

Ipasabut nga ang mga sugo sama sa mga timaan sa dalan nga motabang kanato sa pagtultol sa agianan. Sila nagpakita kanato sa matarung nga dalan nga sundon aron makabalik ngadto sa Langitnong Amahan.

Awit

Awita o isulti ang mga pulong sa “Sunod sa mga Sugo [Keep the Commandments]”:

Sunod sa sugo; sunod sa sugo!
Dinhi may kaayohan ug kalinaw.
Siya magpadala og mga grasya.
Pu’ng sa propeta: Sunod sa sugo
Dinhi may kaayohan ‘ta.

Kalihokan

Ipakita ang tsart “Mga Timaan sa Sugo Diha sa Dalan” nga imong giandam. Sa daklit basaha o pagsaysay og usa ka butang mahitungod sa matag usa sa balaan nga mga kasulatan o mga panghulagway sa mga timaan diha sa dalan. Ipasabut nga kamo mohulagway og usa ka sitwasyon ug unya ang mga bata ang mohukom hain nga timaan sa sugo diha sa dalan ang makatabang kanila sa pagpili sa matarung. Ipasabut ang bisan hain nga mga pulong nga malisud alang sa mga bata sa pagsabut. Papuli-puliha ang mga bata sa pagtudlo ngadto sa nagkalainlain nga mga sugo nga nagpakita sa matarung nga paagi.

Ang mosunod mao ang mga gisugyot nga mga sitwasyon:

Kalihokan

Kamo padulong mopauli gikan sa balay sa usa ka higala sa diha nga lain nga higala nakakita kaninyo. Siya naghangyo kaninyo sa pag-adto sa ilang balay aron magdula. Apan ang inyong inahan nagsugo kaninyo sa pagpauli diretso sa panimalay, ug kamo misaad nga motuman niini. Ang inyong higala nagsulti kaninyo nga kini dili makadaot nga madugay og diyutay sa pagpauli. Unsa nga sugo ang motabang kaninyo sa pagpili sa matarung?
Kamo nangita og salapi aron makapalit og usa ka bola pinaagi sa pagbuhat og dugang nga mga buluhaton alang sa inyong mga ginikanan. Ang tindahan adunay baratilyo nga bola, apan kamo wala gihapon sa igo nga salapi gawas kon kamo mohulam gikan sa inyong ikapulo. Hain nga sugo ang motabang kaninyo sa pagpili sa matarung?
Gabii na ug ang inyong banay mao pa lamang ang paghiuli. Kamo gikapoy ug buot na matulog. Unya kamo nakahinumdom nga ang inyong banay nakalimot sa pag-ampo sa diha nga wala pa ang tanan matulog. Unsa nga sugo ang motabang kaninyo sa pagpili sa matarung?
Ang inyong labing suod nga higala nagdapit kaninyo sa pagpanan-aw og sine sa Domingo. Kamo nagpaabut og dugay nga makakita niana nga sine. Unsa nga sugo ang motabang kaninyo sa pagpili sa matarung?
Kamo nakigdula uban sa inyong mga higala. Usa ka batang lalaki kinsa nagtawag kaninyo og ngil-ad nga mga ngalan miabut ug buot usab nga modula. Unsa nga sugo ang motabang kaninyo sa pagpili sa matarung?
Kamo kuyog sa pipila ka mga higala ug uban kanila buot moinom og alak nga gidala sa usa kanila gikan sa panimalay. Ang inyong mga ginikanan nagtudlo kaninyo nga ang pag-inom og alak dili maayo. Unsa nga sugo ang motabang kaninyo sa pagpili sa matarung?

Dayega ang mga bata alang sa ilang maayo nga mga tubag.

Kon Kita Mopili sa Matarung, Kita Mobati og ka Maayo

Panaghisgutan

Sultihi ang mga bata nga ang pagpili sa matarung makahatag kanila og maayo nga pagbati.

Balika pagtuon ang mga sitwasyon pinaagi sa pagpangutana og daghan pa nga mga pangutana. Sama pananglit, ang mosunod nga mga pangutana ug mga panaghisgutan mahimo nga magagikan sa unang duha ka mga sitwasyon.

Panaghisgutan

Unsa kaha sa inyong hunahuna ang inyong bation kon kamo mopauli ingon sa gihangyo sa inyong inahan kay sa magdula uban sa inyong higala?

Kamo tingali malingaw nga makigdula uban sa inyong higala. Apan bisan samtang kamo nagdula, kamo tingali adunay dili malipayon nga pagbati mahitungod sa wala pagtuman sa inyong saad ngadto sa inyong inahan. Bisan kon kini malisud ang pagpili sa matarung ug sa pagbuhat unsa ang gisugo ni Jesukristo nga inyong buhaton, kon kamo mobuhat bisan pa niana, kamo mobati og ka maayo sa sulod. Kamo mobati og ka maayo mahitungod sa inyong kaugalingon tungod sa pagpili nga inyong gihimo.
Unsa kaha sa inyong hunahuna ang inyong bation kon inyong gipalit ang bag-o nga bola pinaagi sa paggamit og pipila sa inyong ikapulo nga salapi? Kamo mobati ba og ka maayo sa panahon nga kamo magdula sa bola?

Kamo tingali malingaw nga makigdula uban sa inyong mga higala, apan kamo dili mobati og ka maayo mahitungod sa inyong kaugalingon tungod kay kamo wala mopili sa pagbayad sa inyong ikapulo ingon sa gisugo sa Langitnong Amahan.

Balika pagtuon ang uban nga mga sitwasyon sa sama nga paagi. Hatagi og gibug-aton ang maayo nga pagbati nga ang mga bata aduna sa ilang kaugalingon sa panahon nga sila mosunod og usa ka sugo sa Ginoo—ilabi na kon kini ingon og malisud nga buhaton. Ipasabut nga kanang maayo nga pagbati mao ang Espiritu Santo nga nagsulti kanila nga ang Langitnong Amahan nahimuot sa ilang mga lihok.

Pahinumdumi ang mga bata mahitungod sa pagbati nga ilang bation sa panahon nga sila naghimo og usa ka sayop nga pagpili. Kini sa kasagaran usa ka haw-ang, dili malipayon nga pagbati. Kini nga pagbati mahimo usab nga ang Espiritu Santo nagsulti kanato sa paghinulsol ug sa paghimo og matarung nga pagpili.

Hulagway ug sugilanon

Ipakita ang hulagway 3-4, Usa ka Batang Lalaki ug ang Iyang Bola sa Putbol.

Ipapaminaw sa mga bata ang sugilanon aron pagsuta sa unsa nga paagi nga ang pagpili sa matarung nakahimo ni Julio sa pagbati og:

Sa diha nga ang Tiya Maria ni Julio mihatag kaniya og bola sa putbol, siya hapit dili makatuo nga kini iya. Siya nakahibalo nga ang iyang Tiya Maria walay daghan nga salapi. Apan si Julio nakahibalo nga siya masuko kon siya dili modawat sa bola.

“Salamat kanimo,” siya mihinay sa pagsulti. “Apan ngano nga ikaw naghatag niini ngari kanako?”

“Tungod kay ikaw nagtabang kanako pag-ayo,” miingon si Tiya Maria. “Ikaw akong masugo ug motabang kanako sa paglimpyo sa nataran. Ang ako lamang nga pangayoon mao nga ikaw kanunay mohinumdom ngano nga kini naimo. Karon lakaw og pagdula.

Samtang si Julio mipatid sa bola ngadto sa daplin sa agianan diha gayud sa iyang atubangan, siya natingala mahitungod sa unsay gisulti ni Tiya Maria. “Hinumdumi ngano kini nga naimo,” siya miingon.

Si Julio mahigugmaon nga modula og putbol, ug siya maayo niini. Sa umaabot nga adlaw siya naglaum nga makadula alang sa nasudnong pundok sa magdudula sa Brazil. Si Tiya Maria nakahibalo niana, siya naghunahuna. Tingali mao ngano nga siya mihatag kanako sa bola.

Sa wala madugay, si Antonio miabut aron makigdula ni Julio. Taudtaud, uban nga batang mga lalaki miipon kanila, ug sa wala madugay dihay igo nga makasugod og dula sa putbol.

Si Julio nakakita og usa ka batan-on nga batang lalaki nga nagtan-aw sa dula nga putbol diha sa daplin sa agianan. “Oy, dili,” si Antonio mihagawhaw ngadto ni Julio. Si Paulo umaabut. Ayaw siya paapila! Siya kanunay nga mogubot sa dula. Kita mapildi kon siya modula!”

Kini tinuod nga si Paulo dili maayo nga modula. Apan si Julio nakahibalo unsa ka gusto ni Paulo nga modula.

“Mahimo ba ako makadula?” si Paulo nangutana nga malaumon.

Hulagway ug sugilanon

Unsa ang imong isulti?

Si Julio wala dayon motubag. Siya mitan-aw sulod sa usa ka segundo sa kang Tiya Maria nga bintana, ug siya nakakita kaniya nga nagtan-aw kaniya. Siya may kahingawa samtang siya naghulat alang sa tubag ni Julio.

“Hinumdumi ngano kini nga naimo.” Ang iyang mga pulong misantop sa hunahuna ni Julio. Sa makausa pa siya mitan-aw ni Tiya Maria. Siya nakigbahin sa iyang panahon ug mga kahago aron sa pagtabang kaniya, ug siya naghunahuna kon siya naninguha ba sa pagsulti kaniya sa pagpadayon og pakigbahin.

Si Julio milingiw gikan kang Tiya Maria ug mitan-aw ngadto kang Paulo ug miingon, “Sigurado, ikaw makadula,” Unya siya midugang, “Ania si Antonio nga maayong magdudula, ug siya motabang kanimo sa pagkat-on og daghan mahitungod sa dula.

Si Antonio mitan-aw kang Julio ug mipahiyom. Tinuod, ako malipay nga motudlo! Kaming tanan motudlo kanimo aron mahimong usa ka bantugang magdudula sa putbol,” siya miingon ngadto ni Paulo. “Kaming tanan malipay nga motabang kanimo nga makakat-on.”

Ang tanan nga mga lalaki misugod sa pagdula pag-usab. Si Julio mihangad sa bintana ni Tiya Maria. Si Tiya Maria nagpahiyom. Niana si Julio nakahibalo ngano nga ang iyang iyaan naghatag kaniya og usa ka bag-o nga bola sa putbol. (Gipaangay gikan sa Sherrie Johnson, “The Soccer Ball,” Friend, Hunyo 1973, pp. 10–12.)

Panaghisgutan

Unsay gibati ni Julio human siya mipili nga makigbahin? (Siya mibati nga malipayon ug ka maayo sa sulod.)
Unsa kaha unta ang mahitabo kon siya wala makigbahin? (Siya tingali mobati og dili maayo tungod sa pagbalibad kang Paulo; si Paulo tingali mobati og dili maayo usab.)
Si Julio ba mibuhat unsay buot ipabuhat kaniya sa Langitnong Amahan ug ni Jesukristo?

Ipasabut nga kita mohimo og daghan nga mga pagpili sulod sa panahon sa atong kinabuhi. Kini nga mga pagpili mohimo kanato sa pagbati og maayo o dili maayo. Ang pagpili sa pagsunod sa mga sugo mohatag kanato kanunay og maayo nga pagbati.

Katingbanan

PAM nga taming (shield) ug singsing

Ipakita sa mga bata ang PAM nga taming (shield). Ipahinumdom kanila nga ang ilang PAM nga singsing motabang kanila sa paghinumdom sa pagpili sa matarung.

Ighahatag nga basahon ug panaghisgutan

Paghatag og kopya sa “Mga Timaan sa Sugo Diha sa Dalan” ngadto sa matag bata. Basaha pagdungan ang mga sugo nga gilista diha sa mga timailhan sa dalan. (Alang sa gagmay nga mga bata, ipasabut ang mga timailhan ug unsay ilang kahulugan.)

Sultihi ang mga bata nga ang pagbuhat og matarung nga mga pagpili dili sa kanunay masayon ug nga usahay kita tingali naglakaw sa sayop nga agianan. Ang mga sugo sa Langitnong Amahan makatabang kanato sa pagpangita sa matarung nga agianan nga pagalakton ug mohatag kanato og usa ka maayo nga pagbati aron nga kita makahibalo nga kita naghimo og matarung nga mga pagpili. Sila motabang kanato sa pagbalik ngadto sa atong Langitnong Amahan. Kita malipay mahitungod sa atong mga pagpili kon kita mopili sa matarung.

Isugyot nga ang mga bata modala sa ilang mga papel ngadto sa panimalay ug mobasa sa Basahon ni Mormon nga balaan nga mga kasulatan uban sa ilang mga banay. Sila mahimo nga motipig sa ilang mga papel aron sa pagpahinumdom kanila sa uban nga mga sugo.

Pagpamatuod sa Magtutudlo

Pagpamatuod mahitungod kon unsa ka mahinungdanon ang pagbasa sa Basahon ni Mormon. Ang pagtuon niini motabang sa mga bata sa pagpili kanunay sa matarung.

Awit

Awita ang “Pilia ang Matarung nga Paagi [Choose the Right Way]” uban sa mga bata.

Pagdapit og usa ka bata sa paghatag sa panapos nga pag-ampo ug pagpasalamat sa Langitnong Amahan alang sa paghatag kanato sa mga sugo aron sa pagtabang kanato sa paghimo og matarung nga mga pagpili.

Pagpalambo nga mga Kalihokan

Pagpili gikan sa mosunod nga mga kalihokan kadto nga labing moangay alang sa imong mga bata. Ikaw makagamit kanila diha sa leksyon gayud o ingon nga usa ka balik-pagtuon o katingbanan. Alang sa dugang nga paggiya, tan-awa ang “Panahon sa Klase” diha sa “Mga Tabang alang sa Magtutudlo.”

Paghigot og lubid, hilo, o pisi tali sa duha ka mga butang diha sa lawak klasehanan (ang pultahan ug ang lingkuranan sa pikas sa lawak, pananglitan). Tugoti ang mga bata sa pagpulipuli sa paggamit sa lubid aron sa pagtabang kanila sa pagpangita sa ilang agianan ngadto sa pikas bahin sa lawak nga ang ilang mga mata gipiyong. Kamo mahimo nga adunay pipila ka mga premyo alang sa matag bata sa katapusan sa lubid. Ipasabut nga ingon nga kining lubid naggiya kanato ngadto sa pikas nga bahin sa lawak, ang mga sugo naggiya kanato pagbalik ngadto sa Langitnong Amahan.
Sa daklit isaysay ang sugilanon mahitungod sa damgo ni Lehi ingon nga gitala diha sa 1 Nephi 8–11 (tan-awa ilabi na ang 1 Nephi 8:9–30; 11:1–25). Ipasabut nga ang gunitanan nga puthaw nagsimbolo sa pulong sa Dios. Ipasabut nga ang kahoy sa kinabuhi nagsimbolo sa gugma sa Dios, ug paghisgot sa unsa nga paagi nga ang mga sugo sa Dios nagtabang kanato sa pagbati sa iyang gugma.
Pag-andam og usa ka palid nga papel nga igo ang gidak-on nga makatabon sa hulagway 3-5, Adan ug Eba Nagtudlo sa Ilang mga Anak. Guntinga ang papel ngadto sa siyam ka managsama nga mga bahin ug unya ipapilit ang matag bahin sa dapit nga motabon sa hulagway. Ipasabut nga natago luyo sa mga papel mao ang usa ka mahinungdanon nga mensahe. Matag higayon ang mga bata mosulti og usa ka sugo nga sila makasunod tungod kay ang ilang mga ginikanan o lain nga hamtong nga tawo nagtudlo kanila, sila makakuha og usa ka bahin sa papel ug mosulay sa pagtagna sa mensahe. Kon ang tanan nga mga bahin nakuha na, paghisgot unsaon sa mga ginikanan, mga magtutudlo ug uban nga mga pangulo pagtabang sa mga bata pagkat-on sa pagsunod sa mga sugo.