Leksyon 34

Kita Makaampo ngadto sa Langitnong Amahan

Katuyoan

Aron sa paglig-on sa tinguha sa matag bata sa pag-ampo ngadto sa Langitnong Amahan sama sa gibuhat ni Jesukristo.

Pagpangandam

1. Sa mainampuon nga paagi pagtuon sa 3 Nephi 17 hangtud sa 19.

2. Pangandam sa pag-awit o pagsulti sa mga pulong sa “Ako Nagpasalamat Kanimo, Mahal nga Amahan [I Thank Thee, Dear Father]” (Mga Himno ug mga Awit sa mga Bata, o Children’s Songbook, p. 7).

3. Pag-andam og usa ka palid nga papel alang sa matag bata ingon sa mosunod:

   Ako Nagpasalamat Kanimo

   Ako Nangayo Kanimo

4. Mga kagamitan nga gikinahanglan:

   1. Usa ka Basahon ni Mormon

   2. Usa ka lapis o krayola alang sa matag bata.

   3. Hulagway 3-60, Bata nga Babaye Nag-ampo (62310); ug hulagway 3-61, Jesus Nag-ampo uban sa mga Nephite (62542).

5. Paghimo sa gikinahanglan nga pagpangandam alang sa bisan unsa nga pagpalambo nga mga kalihokan nga imong pagagamiton.

Gisugyot nga Pagpalambo sa Leksyon

Pagdapit og usa ka bata sa paghatag sa pagsugod nga pag-ampo.

Tinoa ang mga bata kon ikaw nag-awhag kanila sa pagbuhat og usa ka butang sulod sa semana.

Kita Makasulti ngadto sa Atong Langitnong Amahan

Pang-atensyon nga kalihokan

Pagpakita og hulagway 3-60, Bata nga Babaye Nag-ampo.

Pang-atensyon nga kalihokan

• Sa unsa nga paagi kita makasulti ngadto sa atong Langitnong Amahan?

• Ngano nga kita mag-ampo ngadto sa atong Langitnong Amahan?

• Kanus-a kita mahimo nga mag-ampo ngadto sa atong Langitnong Amahan?

Tungod kay ang Langitnong Amahan naghigugma kanato pag-ayo, siya mihimo niini nga kini mahimo alang kanato sa pagpakigsulti ngadto kaniya. Siya buot kanato nga mopasalamat kaniya alang sa atong mga panalangin. Siya usab bout kanato nga mohangyo alang sa iyang panabang sa panahon nga kita nagkinahanglan niini.

Kita Makapasalamat sa Atong Langitnong Amahan

Panaghisgutan

Ipasabut nga kon kita mag-ampo, kita kinahanglan nga mopasalamat sa Langitnong Amahan alang sa atong mga panalangin.

Panaghisgutan

• Unsa ang pipila ka mga panalangin ang Langitnong Amahan naghatag kanato nga kita makapasalamat kaniya? (Mga tubag mahimo nga maglakip sa atong mga panimalay, atong mga banay, ang matahum nga kalibutan, pagkaon, ug panaput.)

Kon kita makigsulti ngadto sa Langitnong Amahan, kita mogamit og talagsaon nga mga pulong. Kon kita mopasalamat kaniya, kita moingon, “Kami nagpasalamat kanimo.”

Tugoti ang mga bata sa pagsaysay ngadto sa klase sa unsa nga paagi sila mopasalamat sa Langitnong Amahan alang sa usa ka piho nga panalangin. Hangyoa ang matag bata sa paghunahuna og usa ka butang nga mapasalamatan ang Langitnong Amahan, ginamit ang mga pulong ako nagpasalamat kanimo.

Sugilanon

Papaminawa ang mga bata samtang ikaw mosaysay sa imong kaugalingon nga mga pulong sa mosunod nga sugilanon mahitungod ni Jean ug sa unsa nga paagi siya nahinumdom sa pagpasalamat sa Langitnong Amahan:

Kini panahon sa gubat didto sa Englatera. Kini ngitngit og si Jean nahadlok. Ang iyang apohan nga babaye nagpuyo sa usa ka gamay nga balangay duol sa London, ug si Jean nagpaingon ngadto sa pagduaw kaniya. Siya kinahanglan nga mosikad sa iyang biseklita sulod sa duha ka mga milya aron nga makaabut sa dakong dalan. Si Jean nag-ampo uban sa iyang tibuok kasingkasing nga unta siya walay kadaot nga moabut.

Samtang siya misikad sa iyang bisekleta ug nag-ampo, usa ka tugnaw ug makusog nga hangin hapit mopahunong sa iyang gininhawa. Si Jean nag-ampo pag-usab alang sa iyang kaluwasan ug sa kahanas sa pagnanaw sa agianan.

Sa kalit usa ka hayag mitunga ibabaw sa bungtod. Si Jean misikad paingon sa hayag. Ang kahayag mipabilin diha sa iyang atubangan diha sa tibuok nga panaw.

Si Jean mapasalamaton kaayo. Siya nakahibalo nga ang Langitnong Amahan mitubag sa iyang pag-ampo. Sa matag panahon nga siya mahinumdom niini, siya magpasalamat og usab sa Langitnong Amahan. (Tan-awa Lucile C. Reading, “The Light,” Children”s Friends, Aug. 1965, p. 45.)

Hatagi og gibug-aton nga ingon nga si Jean nakahinumdom sa pagpasalamat sa Langitnong Amahan, ang matag usa kanato kinahanglan mahinumdom sa pagpasalamat kaniya alang sa tanan nga iyang gihatag kanato ug alang sa tabang nga atong nadawat.

Awit ug panaghisgutan

Isulti uban sa mga bata ang mga pulong sa unang garay sa “Ako Nagpasalamat Kanimo, Mahal nga Amahan.”

Ako nagpasalamat kanimo,

Mahal nga Amahan sa imong kaayo.

Salamat kanimo, sa’mong panimalay,

Ginikanan ug sa kahigalaan.

Hangyoa ang mga bata sa pagpakigbahin og uban nga mga panalangin alang diin sila nagpasalamat sa Langitnong Amahan.

Kita Makahangyo sa Langitnong Amahan alang sa Panabang

Hulagway ug pagpamatuod

Tudlo ngadto sa hulagway 3-60, Bata nga Babaye Nag-ampo.

Pagpamatuod nga bisan unsa nga matang sa suliran nga kita aduna, kita makahangyo sa Langitnong Amahan alang sa panabang sa panahon nga kita nagkinahanglan niini.

Hulagway ug pagpamatuod

• Unsa ang pipila ka mga butang nga kita makahangyo sa Langitnong Amahan sa pagtabang kanato? (Tugoti og panahon aron ang mga bata makahunahuna. Ang mga tubag mahimo nga maglakip og tabang sa paghatag og pakigpulong o pagbuhat sa buluhaton sa eskwelahan, tabang sa pagsabut ug pagkat-on sa pagsunod sa mga sugo, talagsaon nga panalipod, ug tabang nga mamaayo sa sakit.)

Ipasaysay sa mga bata ang mga higayon sa diha nga sila nag-ampo alang sa lain nga tawo, sama sa mga sakop sa banay, mga higala, o mga silingan.

Talagsaon nga mga pulong nga atong gamiton kon kita mohangyo sa Langitnong Amahan alang sa panabang mao ang ako naghangyo kanimo. Ipasulti og balik sa mga bata kini nga mga pulong.

Awit

Isulti ang mga pulong sa ikaduhang garay sa “Ako Nagpasalamat Kanimo, Mahal nga Amahan.” Hangyoa ang mga bata sa pagpaminaw sa mga pulong ug pagpasulti unsa ang mahimo nga ilang ihangyo sa Langitnong Amahan.

Tabangi ko nga mabuotan karon,

Mosunod kanunay sa ‘kong ginikanan.

Sa mapinanggaon nga ngalan ni Jesus,

Naghangyo nimo panalangini ko.

Kita Kinahanglan Mag-ampo Kanunay, Sama sa Gihimo ni Jesukristo

Pagtudlo sa magtutudlo

Itudlo nga si Jesukristo nag-ampo ngadto sa Langitnong Amahan sa makadaghan nga higayon sa diha nga siya nagpuyo pa dinhi sa yuta. Human sa iyang pagkabanhaw, siya usab nag-ampo ngadto sa Langitnong Amahan. Sa diha nga si Jesus miduaw sa Nephite nga mga katawhan, siya mitudlo kanila ug mipanalangin kanila. Siya usab miampo alang sa mga katawhan ug mitudlo kanila nga sila kinahanglan usab mag-ampo.

Hulagway

Ipakita ang hulagway 3-61, Jesus Nag-ampo uban sa mga Nephite.

Ipasabut nga ang Basahon ni Mormon nagsaysay kanato nga si Jesukristo mipundok sa mga tawo libut kaniya ug mipaluhod kanila. Sa diha nga sila nakaluhod na sa yuta, siya usab miluhod ug nag-ampo ngadto sa Langitnong Amahan. Siya mihatag og usa ka matahum kaayo nga pag-ampo nga ang mga tawo napuno sa hingpit nga kalipay sa diha nga ilang nadungog ang iyang mga pulong.

Human si Jesus makatudlo kanila og daghan nga maanindot nga mga butang, siya mitudlo kanila nga sila kinahanglan mag-ampo sama nga siya nag-ampo.

Balaan nga kasulatan nga panaghisgutan

Basaha ang 3 Nephi 18:16

Balaan nga kasulatan nga panaghisgutan

• Unsa ang gisulti niini nga bersikulo sa balaan nga kasulatan nga gitudlo ni Jesus sa Nephite nga mga katawhan? (Siya mitudlo kanila sa pag-ampo.)

Ipasabut nga si Jesus mibiya sa Nephite nga mga katawhan, apan siya mibalik sa ikaduhang higayon. Sa diha nga siya mibalik, siya nag-ampo pag-usab sa Langitnong Amahan aron sa pagpasalamat kaniya alang sa pagtabang sa iyang mga tinun-an nga Nephite. Siya usab mihangyo sa Langitnong Amahan sa pagpanalangin sa mga katawhan. Si Jesukristo nag-ampo sa makadaghan nga mga higayon samtang siya kauban sa mga Nephite. Pipila sa iyang mga pag-ampo gitala diha sa Basahon ni Mormon. Ang Basahon ni Mormon nagsaysay kanato nga pipila sa mga pag-ampo nga iyang gihatag hilabihan ka matahum nga sila dili ikasulat.

Ipasabut nga matag usa kanato kinahanglan mobuhat ingon sa gitudlo ni Jesukristo ngadto sa mga Nephite ug sa pag-ampo kanunay ngadto sa Langitnong Amahan.

Balaan nga kasulatan nga panaghisgutan

• Kanus-a kita makaampo ngadto sa Langitnong Amahan? (Tugoti ang mga tubag, ug paghisgot sa nagkalain-lain nga mga higayon nga ang mga bata makahimo sa pag-ampo, lakip sa matag buntag ug gabii, diha sa panahon sa tingkaon, uban sa ilang mga banay, o bisan kanus-a sila adunay suliran o panginahanglan sa talagsaon nga panabang.)

• Unsa nga talagsaon nga mga pulong ang atong gamiton kon kita makigsulti ngadto sa Langitnong Amahan?

Ipasulti og balik sa mga bata “Ako nagpasalamat kanimo” og “Ako naghangyo kanimo.” Awhaga ang mga bata sa paggamit og lain nga angay nga pinulongan alang sa pag-ampo. Sila mahimo nga magbansay paggamit sa “kanimo”.

Katingbanan

Kalihokan

Ihatag sa mga bata ang mga papel nga inyong giandam ug ang mga lapis o krayola. Hangyoa ang matag bata sa pagdibuho og usa ka hulagway diha sa matag katunga sa papel nga nagpakita og alang sa unsa siya mapasalamaton ug alang sa unsa siya mag-ampo.

Pagpamatuod sa magtutudlo

Pakigbahin sa imong pagpamatuod mahitungod sa pag-ampo ngadto sa mga bata. Hatagi og gibug-aton nga kini usa ka dako nga panalangin nga makahimo sa pag-ampo ngadto sa Langitnong Amahan aron sa pagpasalamat kaniya ug paghangyo kaniya alang sa panabang. Dapita ang mga bata sa pagampo matag adlaw, ug pahinumdumi sila nga sila makahimo sa pag-ampo bisan kanus-a ug sa bisan diin nga dapit nga sila buot.

Agi og pagpangandam alang sa panapos nga pag-ampo, pasugyota ang mga bata og mga butang nga ang tawo nga mohatag sa pag-ampo mahimo nga mopasalamat sa Langitnong Amahan. Usab pasugyota sila og mga butang nga sila mahimong mohangyo.

Ihatag ang panapos nga pag-ampo sa inyong kaugalingon, maghinumdom sa paggamit sa mga ideya nga gisugyot sa klase.

Pagpalambo nga mga Kalihokan

Pagpili gikan sa mosunod nga mga kalihokan kadto nga labing moangay alang sa imong mga bata. Ikaw makagamit kanila diha sa leksyon gayud o ingon og usa ka balik-pagtuon o katingbanan. Alang sa dugang paggiya, tan-awa ang “Panahon sa Klase” diha sa “Mga Tabang alang sa Magtutudlo.”

1. Isulti ang mosunod nga balak, himoa ang mga lihok. Unya isulti kini pagbalik uban sa mga bata, himoa ang mga lihok.

   Kami nagpasalamat kanimo, Dios, alang sa kahayag sa adlaw, (mga bukton ipataas, mga tudlo mag-abut aron mahimo nga adlaw)

   Sa mga langgam nga nanag-awit sa kahayag sa kabuntagon, (mga bukton idupa ingon og mga langgam nga naglupad)

   Alang sa mga bata sa bisan diin nalingaw, (pahiyom)

   Ug alang sa pag-amuma sa Langitnong Amahan nga mahigugmaon. (ulo iduko, bukton nagkyugpos, ingon og nag-ampo)

2. Isaysay sa inyong kaugalingon nga mga pulong ang mosunod nga sugilanon mahitungod sa unsa nga paagi ang pag-ampo sa batang lalaki gitubag.

   Usa ka bata nga walo-ka-tuig ang edad diha naghigda sa lamesa nga operahanan sa usa ka ospital. Ang iyang mga ginikanan namatay, apan siya nakakat-on sa pag-ampo. Siya nakahibalo nga ang operasyon malisud. Siya nangutana sa doktor kinsa mao ang mo-opera kaniya, “Doktor, sa dili pa ikaw mosugod sa pag-opera, dili ba ikaw mag-ampo alang kanako?” Ang doktor mitan-aw sa batang lalaki natingala ug miingon, “Ngano, ako dili makaampo alang kanimo.”

   Unya ang gamay nga bata nangutana sa uban nga mga doktor kinsa motabang, ug matag usa kanila mitubag sa sama nga paagi. Unya ang batang lalaki miingon, “Kon kamo dili mag-ampo alang kanako, mahimo ba palihug paghulat samtang ako mag-ampo alang sa akong kaugalingon?” Siya mibangon diha sa lamesa nga operahanan nga nagluhod, mikyugpos sa iyang mga bukton ug miingon, “Langitnong Amahan, ako usa lamang ka bata nga wala nay mga ginikanan, apan ako hilabihan ka masakiton ug kini nga mga doktor mo-opera kanako. Palihug tabangi sila nga mobuhat niini og tarung. Ug karon, Langitnong Amahan, kon ikaw moayo kanako, ako magbinuotan nga batang lalaki. Salamat alang sa paghimo kanako nga maayo.

   Sa diha nga siya nahuman na sa pag-ampo, dihay mga luha sa mga mata sa mga doktor ug mga nars. Ang batang lalaki mihigda diha sa lamesa ug miingon, “Karon ako andam na.” (Gipahiangay gikan ni George Albert Smith, Sharing the Gospel with Others, sel. Preston Nibley (Salt Lake City: Deseret Book Co., 1948), pp. 144-45.)

3. Paghimo og usa ka semana nga tsart sa pag-ampo alang sa matag bata diha sa katunga nga piraso sa papel aron siya makabutang og timaan niini buntag ug gabii sa panahon nga siya mohatag sa iyang mga pag-ampo. Sa lain nga katunga sa papel, padibuhoa ang matag bata og usa ka hulagway sa iyang kaugalingon nga nag-ampo. Dapita ang matag bata sa pagbutang sa iyang tsart sa pag-ampo diha sa iyang panimalay diin siya makakita niini ug makahinumdom sa pagbutang og timaan niini buntag og gabii.

4. Balika pagtuon uban sa mga bata ang unang artikulo sa hugot nga pagtuo.