Leksyon 37

Ako Moalagad ni Jesukristo pinaagi sa Pag-alagad sa Uban

Katuyoan

Aron sa pagtabang sa mga bata sa pagsabut nga sila makapakita og gugma alang ni Jesukristo pinaagi sa pag-alagad sa uban.

Pagpangandam

1. Sa mainampuon nga paagi pagtuon sa Mosiah 2:17 ug Lucas 10:30–37, ug pangandam sa pagpasabut niining balaan nga mga kasulatan ngadto sa mga bata.

2. Pangandam sa paghagunghong (hum) “Kon Kita Motabang [When We’re Helping]” (Children’s Songbook, p. 198) ug “ ‘Hatag,’ Miingon ang Sapa [‘Give,’ Said the Little Stream]” (Children’s Songbook, p. 236).

3. Pangandam sa pag-awit o pagsulti sa mga pulong sa “Among Obispo [Our Bishop]” (Children’s Songbook, p. 135).

4. Pakigsulti ngadto sa imong obispo o presidente sa sanga mahitungod sa iyang pagkabata. Hangyoa siya sa pagsaysay kanimo og pipila ka mga paagi diha diin siya mialagad sa uban samtang nga gamay pa. Pag-andam og mubo nga pasundayag mahitungod kaniya aron ang mga bata makatagna kinsa ang imong gihulagway. Kon mahimo, paghulam og usa ka hulagway sa imong obispo o presidente sa sanga nga bata pa. (Ikaw makahimo usab sa pag-andam niini nga pasundayag mahitungod sa presidente sa Primarya o lain nga pangulo.)

5. Paghimo og usa ka bulak gikan sa usa ka papel alang sa matag bata nga susama sa panig-ingnan nga gipakita sa ubos. Himoa kini nga igo ang gidak-on sa pagsulat og usa ka mubo nga mensahe diha sa luyo.

   

6. Mga kagamitan nga gikinahanglan:

   1. Usa ka Basahon ni Mormon ug usa ka Biblia.

   2. Usa ka straw o tukog alang sa matag bata, kon anaa.

   3. Sihag nga tape, kon anaa.

   4. Usa ka lapis o krayola alang sa matag bata.

   5. Usa ka plorera o botelya.

   6. Tisas, pisara, ug papas.

   7. Hulagway 3-63, Ang Maayo nga Samaritano (62156; Sudlanan sa Hulagway sa Ebanghelyo 218).

7. Paghimo sa gikinahanglan nga mga pagpangandam alang sa bisan unsa nga pagpalambo nga mga kalihokan nga imong pagagamiton.

Gisugyot nga pagpalambo sa Leksyon

Pagdapit og usa ka bata sa paghatag sa pagsugod nga pag-ampo.

Kita Makapakita og Gugma alang ni Jesukristo Pinaagi sa Pag-alagad sa Uban

Pang-atensyon nga kalihokan

Hangyoa ang mga bata sa pagtaho og usa ka paagi nga sila nakapakita og gugma alang ni Jesukristo sulod sa miaging semana (tan-awa ang leksyon 36). Ipasabut nga ikaw buot kanila nga maminaw pa og daghan mahitungod sa usa ka paagi nga sila makapakita og gugma alang ni Jesukristo.

Ipasabut ngadto sa mga bata nga ang dula nga ilang dulaon motabang kanila sa pagsabut og usa ka mahinungdanon nga paagi nga kita magpakita og gugma alang ni Jesukristo. Ipasabut nga ikaw mohagunghong og usa ka awit. Kon sila naghunahuna nga sila nakahibalo sa ngalan sa awit, sila mahimo nga mopataas sa ilang mga kamot. Ikaw mahimo nga mohunong sa imong paghagunghong ug mohangyo sa usa ka bata sa pagtagna unsa ang awit o hulata ang pagpangutana hangtud ikaw makahuman na sa paghagunghong sa tibuok awit.

Hagunghong “Kon Kamo Magtabang.” Human nga ang usa ka bata nakatagna sa ngalan sa awit, pangutana niini nga pangutana:

Pang-atensyon nga kalihokan

• Mahitungod sa unsa ang awit? (Pagtabang.)

Isulat ang Pagtabang diha sa pisara.

Ihagunghong ang “ ‘Hatag,’ Miingon ang Sapa[‘Give,’ Said the Little Stream].” Human ang mga bata makatagna sa ngalan sa awit, pangutan-a sila niini nga pangutana:

Pang-atensyon nga kalihokan

• Mahitungod sa unsa ang awit? (Paghatag.)

Isulat ang Paghatag ubos sa Pagtabang.

Pang-atensyon nga kalihokan

• Kamo ba makahunahuna og lain nga pulong nga nagpasabut og pagtabang ug paghatag? (Pag-alagad. Hatagi sila og dugang nga mga timaan kutob sa panginahanglan hangtud sila makatagna niini.)

Ipasabut nga ang pag-alagad sa uban makalakip og paghatag ug pagtabang. Kita sa kasagaran nag-alagad pinaagi sa pagtabang ug paghatag ngadto sa uban.

Artikulo sa hugot nga pagtuo

Tabangi ang mga bata sa pagdungan og sulti og balik sa mosunod nga bahin sa ikanapulog tulo nga artikulo sa hugot nga pagtuo: “Kami nagtuo … sa pagbuhat og maayo ngadto sa tanan nga mga tawo.”

Balaan nga kasulatan

Basaha ang Mosiah 2:17. Ipasabut nga kini nagpasabut nga kon kita andam sa pag-alagad sa uban, kita nag-alagad usab sa Langitong Amahan ug ni Jesukristo. Kita makapakita sa Langitnong Amahan ug ni Jesukristo nga kita nahigugma kanila pinaagi sa pag-alagad sa usag usa.

Sugilanon ug hulagway

Ipakita ang hulagway 3-63, Ang Maayo nga Samaritano, kon angay samtang ikaw mosaysay sa mosunod nga sugilanon sa imong kaugalingon nga mga pulong:

Si Jesukristo nagtudlo mahitungod sa pag-alagad sa usag usa diha sa sugilanon sa maayo nga Samaritano. Siya misulti mahitungod sa usa ka tawo kinsa nagpanaw gikan sa Jerusalem ngadto sa Jericho. Sa agianan, siya gihasmagan og mga tulisan kinsa mikuha sa iyang mga saput, mibunal kaniya, ug mibiya kaniya nga hapit usa ka patay. Usa ka pari miabut ug, nagtan-aw sa samdan nga tawo, miagi sa lain nga bahin sa dalan. Unya usa ka Levite, usa ka tawo kinsa mitabang sa mga pari sa ilang mga katungdanan, miabut, apan siya usab miagi sa lain nga bahin sa dalan aron sa paglikay sa tawo.

Sa katapusan, usa ka Samaritano, usa ka pundok sa mga tawo kinsa gikasilagan sa mga Judeo, miabut ug mihunong aron sa pagtabang sa samdan nga tawo, naghunad ug nagputos sa iyang mga samad. Ang Samaritano mibutang sa tawo diha sa iyang kaugalingon nga hayop, midala kaniya ngadto sa usa ka balay-abutanan, ug mipabilin uban kaniya hangtud sa sunod buntag. Sa sunod adlaw, ang Samaritano mibayad ngadto sa tinugyanan sa balay-abutanan ug misulti kaniya nga kon ang samdan nga tawo nagkinahanglan og dugang nga pag-amuma labaw pa kay sa salapi nga gibayad, siya mobalik ug modugang og bayad.

Sugilanon ug hulagway

• Ngano sa inyong hunahuna ang pari ug ang Levite milabay sa samdan nga tawo nga wala siya tabangi? (Mga tubag mahimo nga maglakip sa mosunod: Tingali sila nagdali. Tingali sila nahadlok sa samdan nga tawo. Tingali sila dili buot mahasol sa suliran sa laing tawo.)

• Ngano nga kita usahay molabay og mga tawo kinsa nagkinahanglan sa atong tabang?

Ipasabut nga ang mga bata mahimo nga maayo nga mga Samaritano pinaagi sa pagtabang sa mga tawo nga nagkinahanglan og tabang. Isulti kanila ang pipila ka mga sitwasyon diin ang usa ka tawo nagkinahanglan og tabang, ug ipadula sa mga bata sa unsa nga paagi sila motabang. Ikaw mahimo nga mogamit og mga sitwasyon ingon sa mosunod:

Sugilanon ug hulagway

• Adunay daghan nga mga dulaan nga nagkatag sa tibuok sawog, ang bata naghilak, ug ang inyong inahan naninguha sa pag-andam og panihapon.

• Usa ka batang babaye bag-o nga mibalhin sunod sa inyong balay. Siya gikan sa laing nasud ug dili makasulti pag-ayo sa inyong pinulongan. Kon siya mogula sa pagpakigdula, siya ingon og nag-inusara.

• Si Sister Castro mosimba matag semana, apan ingon og walay usa nga nakamatikud kaniya. Siya tigulang, kanunay naglingkod nga nag-inusara, ug ingon og masulub-on.

• Ang inyong gamay nga igsoong babaye naguol tungod kay ang iyang paborito nga dulaan naguba.

Ipasabut nga si Jesus mahimuot kon kita andam sa pag-alagad sa uban. Isugyot ngadto sa mga bata nga sila makahatag og pag-alagad ngadto sa ubang mga tawo.

Kita Makapakita og Gugma alang ni Jesukristo pinaagi sa Pag-alagad diha sa Iyang Simbahan

Pagpakita sa hulagway

Ipasabut nga adunay daghan nga mga tawo diha sa Simbahan kinsa nag-alagad ni Jesukristo pinaagi sa pagtabang sa uban matag semana, ingon sa mga magtutudlo sa Primarya, mga tigpangulo sa pag-awit, tigduyog sa pag-awit, mga pari ug mga deakono kinsa nangalagad sa sakramento, ug daghan pa.

Kon mahimo, ipakita ang hulagway sa obispo o presidente sa sanga sa bata pa, apan ayaw sultihi ang mga bata kinsa siya.

Ipasabut nga kini usa ka hulagway sa usa ka batang lalaki kinsa mitubo ngadto sa usa ka tawo nga mahinungdanon sa inyong purok o sanga. Ipahayag nga kini usa ka tawo kinsa sa malipayon nga paagi nag-alagad sa mga tawo diha sa inyong purok o sanga matag semana.

Pagtudlo sa magtutudlo

Sultihi ang mga bata nga ang kasayuran nga imong nakuha mahitungod sa usa ka tawo kinsa ilang nailhan kaayo. Ipasabut nga siya mialagad sa uban samtang bata pa. Patagnaa ang mga bata kinsa kaha kini. Kon gikinahanglan, paghatag pa og mga timaan hangtud sila makatagna og husto. (Sama pananglit: siya nagtabang kanato sa pagpili og matarung; siya nagtabang kanato kon kita adunay mga suliran; kita mohatag sa atong ikapulo ngadto kaniya.)

Ipasabut nga ang obispo naghatag og daghan nga mga oras sa pag-alagad ngadto sa mga sakop sa purok matag semana. Siya nagtabang kanato dili lamang ma-Domingo apan usab sa uban nga mga adlaw sa semana.

Pagtudlo sa magtutudlo

• Pinaagi sa pag-alagad sa mga tawo diha sa iyang purok, si kinsa pa ang gialagaran sa obispo? (Dios.)

• Ngadto kang kinsa ang obispo nagpakita og gugma samtang siya nag-alagad? (Jesukristo ug sa mga tawo sa iyang purok.)

Awit

Ipaawit o ipasulti ang mga pulong sa “Among Obispo.”

Daghan og buluhaton,

‘Mong obispo.

Kanako may panahon;

‘Mong obispo.

Pulong mabination

Namo matag panahon.

Buluhaton tabangan;

‘Mong obispo.

Dios siya nag-alagad,

‘Mong obispo.

Amahan sa ‘mong purok;

‘Mong obispo.

Sa buhat nga matarung

Namo magpahimatngon.

Namo mapinanggaon;

‘Mong obispo.

Katingbanan

Kalihokan

Ipasabut nga ikaw buot sa mga bata nga adunay usa ka pasalamat nga gasa alang sa obispo alang sa mga oras sa pag-alagad nga iyang gihatag kanila. Panghatag og usa ka bulak, usa ka lapis, ug usa ka straw o tukog ngadto sa matag bata. Hangyoa ang mga bata sa pagsulat o pagdibuho og usa ka paagi nga sila makapakita og gugma alang ni Jesukristo sa usa ka bahin sa bulak ug sa pagpirma sa ilang mga ngalan. Sa katapusan, ipapilit ang straw o tukog aron mahimo nga mga punoan.

Inig ka human sa tanan, kuhaa ang mga butang ug ipabutang sa matag bata ang bulak diha sa plorera o botelya nga imong gidala. Uban sa mga bata, pagpili og usa ka sakop sa klase nga mohatud sa mga bulak nga papel ngadto sa obispo human sa klase.

Pagdapit og usa ka bata sa paghatag sa panapos nga pag-ampo.

Pagpalambo nga mga Kalihokan

Pagpili gikan sa mosunod nga mga kalihokan kadto nga labing moangay alang sa imong mga bata. Ikaw makagamit kanila diha sa leksyon gayud o ingon og usa ka balik-pagtuon o katingbanan. Alang sa dugang nga paggiya, tan-awa ang “Panahon sa Klase” diha sa “Mga Tabang alang sa Magtutudlo.”

1. Isaysay ang mosunod nga sugilanon mahitungod ni Heber J. Grant, ang ikapito nga Presidente sa Simbahan, ug paghisgot sa unsa nga paagi siya mialagad sa uban.

   Ang amahan ni Heber namatay samtang siya siyam ka adlaw pa lamang ang edad. Ang iyang inahan hilabihan kaayo ka kabus ug nagkalisud sa pagsangkap sa iyang kaugalingon ug sa gamay nga Heber. Siya mibuhi kanila pinaagi sa pagpanahi alang sa uban nga mga tawo ug pagdawat og mga kasera. Usahay siya manahi sulod sa daghan nga mga oras sa walay pagpahulay nga siya hapit dili na makasikad sa tindakanan sa iyang karaan nga makinang igtatahi. Si Heber sa kasagaran mokamang ilawom sa makinang igtatahi ug moduot sa tindakanan alang kaniya. Ang mga panahon sa tingtugnaw hilabihan ka tugnaw sa Dakbayan sa Salt Lake, ug si Heber adunay usa lamang ka manipis, daan nga kupo nga mohatag niya og kainit. Siya nangandoy nga makangkon og usa ka baga nga kupo apan nakahibalo nga sila adunay hapit dili igo nga salapi alang sa pagkaon. Si Heber nalipay sa iyang adlaw nga natawhan sa diha nga ang iyang inahan mihatag kaniya og usa ka baga nga kupo sa tingtugnaw nga iyang gihimo alang kaniya. Ang iyang bag-o nga kupo mao ang iyang labing gihambin nga butang. Pipila ka semana wala madugay, samtang si Heber nagdali nga gisugo, siya nakakita og usa ka batang lalaki nga ingon-ingon niya og gidak-on nga nagkurog sa katugnaw. Ang batang lalaki nagsul-ob og manipis nga switer, ug si Heber nakahinumdom unsa ang bation nga walay baga nga kupo. Si Heber mihubo sa iyang bag-o nga kupo ug namugos sa bata sa pagsul-ob niini. Siya misulti sa batang lalaki sa pagdawat niini tungod kay siya adunay lain nga kupo didto sa balay.

   Ikaw mahimo nga mopadula sa mga bata sa sugilanon ug unya ipasabut unsa ang gibati sa lain-lain nga mga tigdula.

2. Palingkura ang mga bata diha sa lingin ug ipasa paglibut ang bola o humok nga butang samtang ikaw naghagonghong “Kon Kita Motabang [When We’re Helping].” Kon ikaw mohunong sa paghagonghong, bisan kinsa ang naggunit sa bola o sa humok nga butang mosulti og usa ka paagi nga siya mahimong makatabang og usa ka tawo.

3. I-arpiril o ipapilit ang nagkulob nga nagpahiyom nga nawong sa matag bata sa dili pa sila mobiya sa ilang klase. Sultihi sila nga kon sila mobuhat og mabination nga pag-alagad alang sa usa ka tawo, sila mahimo nga mohayag sa nagpahiyom nga nawong.