Mga Manwal sa Primary ug Panahon sa Pagpakigbahin

Leksyon 39: Pagpakita og Gugma alang sa Atong mga Ginikanan

Leksyon 39

Pagpakita og Gugma alang sa Atong mga Ginikanan

Katuyoan

Aron sa pagtabang sa mga bata sa pagpakita sa ilang gugma alang sa ilang mga amahan ug mga inahan pinaagi sa pagkamasulundon ug pagkamatinabangon.

Pagpangandam

Sa mainampuon nga paagi pagtuon sa Exodo 20:12 ug Mormon 8:1.
Pangandam sa pagpaawit sa klase sa “Malipayong Banay [A Happy Family]” (Children’s Songbook, p. 198); ang mga pulong gilakip diha sa luyo sa tamdanan nga basahon.
Pagmabination ngadto sa mga bata kinsa wala ang duha ka mga ginikanan diha sa panimalay o kinsang mga ginikanan adunay dili kasagaran nga mga kahimtang.
Mga kagamitan nga gikinahanglan:
1. Usa ka Basahon ni Mormon.
2. Usa ka gamay nga bulsita o bola.
3. Usa ka kopya sa kahoy sa banay sa matag bata (tan-awa ang panig-ingnan nga gilakip diha sa katapusan niini nga leksyon).
4. Hulagway 3-34, Mormon Nagmubo sa mga Palid (62520; Sudlanan sa Hulagway sa Ebanghelyo 306); hulagway 3-35, Moroni Nagtago sa mga Palid didto sa Bungtod sa Cumorah (62462; Sudlanan sa Hulagway sa Ebanghelyo 320); ug hulagway 3-5, Adan ug Eva Nagtudlo sa Ilang mga Anak.
Paghimo sa gikinahanglan nga mga pagpangandam alang sa bisan unsa nga pagpalambo nga mga kalihokan nga imong pagagamiton.

Gisugyot nga Pagpalambo sa Leksyon

Pagdapit og usa ka bata sa paghatag sa pagsugod nga pag-ampo.

Tinoa ang mga bata kon ikaw nag-awhag kanila sa paghimo og usa ka butang sulod sa semana.

Langitnong Amahan Mihatag sa Atong mga Ginikanan sa Kapangakohan alang Kanato

Pang-atensyon nga kalihokan

Ipakita ang hulagway 3-5, Adan ug Eva Nagtudlo sa Ilang mga Anak.

Pang-atensyon nga kalihokan

Kang kinsa kini naghulagway? (Adan, Eva ug ilang mga anak.)
Unsa ang buot sa Langitnong Amahan nga itudlo ni Adan ug Eva ngadto sa ilang mga anak? (Ang ebanghelyo. Pahinumdumi ang mga bata nga sila naghisgot niini sa bag-o pa lamang diha sa klase; tan-awa sa leksyon 35.)

Ipasabut nga ang Langitnong Amahan mihatag sa atong mga ginikanan og mga anak aron amumahon ug higugmaon hangtud sila mobalik ngadto kaniya pipila ka adlaw. Siya buot kanatong tanan nga makakat-on sa unsa nga paagi kita takus nga mopuyo uban kaniya human niini nga kinabuhi. Ang Langitnong Amahan nagpaabut sa mga ginikanan sa pagtudlo sa ilang mga anak sa mga sugo ug sa pag-amuma sa mga panginahanglan sa ilang mga anak. Kini usa ka dako nga kapangakohan alang sa atong mga ginikanan.

Ihatag ngadto sa matag bata ang usa ka kopya sa kahoy sa banay. Ipasulat o tabangi ang matag bata sa pagsulat sa mga ngalan o ipadibuho ang mga nawong sa iyang mga ginikanan diha sa punoan sa kahoy ug ang unang mga ngalan o mga nawong sa iyang kaugalingon ug bisan kinsa nga igsoon nga mga lalaki ug igsoon nga babaye diha sa mga sanga.

Panaghisgutan

Ngano nga ang Langitnong Amahan naghatag kanato og mga ginikanan? (Aron sa paghigugma ug pag-amuma kanato ug sa pagtudlo kanato sa iyang mga sugo.)

Ipasabut nga ang Langitnong Amahan nakahibalo nga ang mga bata makapakita og gugma ngadto sa ilang mga ginikanan. Ang Langitnong Amahan nagsugo kanato nga kita kinahanglan nga mobuhat niini (tan-awa sa Exodo 20:12). Adunay daghan nga mga paagi sa pagpakita og gugma alang sa atong mga ginikanan.

Kita Nagpakita og Gugma alang sa Atong mga Ginikanan pinaagi sa Pagkamatinabangon

Sugilanon

Ipasabut ngadto sa klase nga ang pagkamatinabangon usa ka paagi sa pagpakita og gugma alang sa atong mga ginikanan. Ibalik og saysay ang mosunod nga sugilanon sa imong kaugalingon nga mga pulong:

Si Emma nakasabut nga ang iyang Mama dili maayo ang gipamati. Si Mama gikapoy nga tan-awon ug sa kanunay molingkod aron sa pagpahulay. Bisan gani ang tingog ni Mama kapoy nga paminawon kon siya mosulti ngadto ni David ug ni John, ang manghud nga igsoon nga mga lalaki ni Emma. Si Emma mihunahuna sa tanan nga mga butang nga gihimo sa iyang inahan alang kaniya ug nangandoy nga siya makatabang ni Mama nga mobati og kaarang-arang.

Sugilanon

Unsa ang pipila ka mga butang si Emma makahimo aron sa pagtabang sa iyang inahan?

Si Emma milingkod uban sa iyang manghud nga mga lalaki ug nakigdula kanila. Siya mitabang kanila sa pagdula sa hilum ug malipayon nga paagi. Unya siya mitabang kanila sa paghigda aron si Mama makatagpilaw. Sa wala madugay si Emma mitabang kanila sa paghipos sa ilang mga dulaan.

Sa diha nga si Mama natapos sa pag-andam og paniudto, si Emma mitabang ni David ug John sa paghugas sa ilang mga kamot ug sa pag-andam alang sa pag-ampo. Si Mama mipahiyom ug migakus kaniya.

“Salamat sa pagkamaayo nga katabang karong adlawa,” si Mama mihagawhaw diha sa dunggan ni Emma.

Panaghisgutan

Sa unsa nga paagi si Emma nagpakita sa iyang gugma sa iyang inahan?
Unsa sa inyong hunahuna ang gibati ni Emma human motabang sa iyang inahan?
Unsa sa inyong hunahuna ang gibati sa iyang inahan?

Kalihokan

Iitsa ang bulsita ngadto sa matag bata ug pangutana sa mosunod nga mga pangutana. Human ang bata motubag, ipaitsa ang bulsita balik nganha kanimo. Hatagi ang matag bata sa kahigayunan sa pagtubag sa duha ka mga pangutana.

Kalihokan

Unsa ang gibuhat sa akong inahan ug sa akong amahan aron sa pagpakita kanako sa ilang gugma?
Unsa ang akong mabuhat aron sa pagpakita og gugma alang sa akong inahan o amahan?

Kita Nagpakita og Gugma alang sa Atong mga Ginikanan Pinaagi sa Pagkamasulundon

Panaghisgutan

Ipasabut nga ang pagkamasulundon lain nga mahinungdanon nga paagi nga kita makapakita og gugma alang sa atong mga ginikanan.

Sugilanon

Isaysay sa imong kaugalingon nga mga pulong ang mosunod nga sugilanon mahitungod ni Annand ug sa iyang amahan:

Sa katapusan si Annand gihimo nga tagabantay sa mga kanding. Sa katapusan siya igo na ka hingkod sa pagpabilin uban sa mga kanding samtang sila misibsib diha sa bukid. Si Annand walo ka tuig ang edad ug sa kahinam mihulat sa kapangakohan sa pagbantay sa panon sa kanding.

Si Annand naghunahuna og unsaon matag buntag siya ug ang iyang iro, si Numie, pagpundok sa mga kanding ug pagsunod sa ubang tagabantay samtang ilang dad-on ang mga kanding ibabaw sa gamay nga agianan sa bukid ngadto sa tag-as nga mga sagbut. Sa gabii ang iyang amahan moapas ngadto sa bukid ug motabang ni Annand ug Numie pag-abug sa mga kanding pauli sa balay.

Ang iyang amahan nag-ingon, “Ayaw gayud pagbiya sa gamay nga agianan sa bukid, Annand. Kon ikaw mawad-an og usa ka kanding, tawga siya, apan ayaw gayud pagbiya sa gamay nga agianan. Ang bukid batoon ug makuyaw kaayo. Akong anak, ikaw kinahanglan gayud mobuhat unsay akong gisulti. Ayaw gayud pagbiya sa gamay nga agianan sa bukid.”

Matag adlaw ang bag-ong kapangakohan ni Annand nahimong labaw nga kasayon, ug siya misugod sa paghigugma sa mga oras nga iyang gigahin diha sa bukid.

Usa kahapon, si Annand nakaamgo nga ang iyang amahan madugay sa pag-abut aron sa pagtabang kaniya. Siya mihukom nga iyang pundukon ang mga kanding ug mosugod sa pagkanaog sa gamay nga agianan aron sa pagsugat sa iyang amahan. Uban sa tabang ni Numie, siya sa wala madugay nakaliyok sa mga kanding. Siya naguol sa pagkakita nga dihay tulo ka mga kanding nga nawala—Summa, ang tiguwang nga babaye nga kanding, ug ang iyang duha ka nating mga kanding. Unsa ang iyang buhaton? Si Annand mihukom nga si Summa tingali misaka pa sa ibabaw sa gamay nga agianan diin sila midala kaniya sa makadaghan nga mga higayon kaniadto. Siya kinahanglan gayud nga mangita kaniya.

Nagbiya ni Numie nga nagbantay sa uban nga mga kanding, siya misugod sa pagsaka ibabaw pa sa gamay nga agianan sa bukid. Sa wala madugay iyang nakit-an si Summa ug ang iyang gagmay nga mga anak layo sa gamay nga agianan sa bukid diha sa usa ka gagmay nga pat-ak pat-ak sa sagbut. Dihay daghan nga mga kalibunan ug dagko nga mga bato, ug si Annand dili makakita unsa ang taliwala kaniya ug ni Summa. Si Annand nakahibalo nga siya kinahanglan gayud nga magpabilin diha sa dalan, busa siya mitawag, apan si Summa misamot paglakaw sa layo.

Kini misugod sa pagngitngit ug sa dili madugay sa Annand dili na gayud makakita sa tulo ka mga kanding. Siya nakahibalo nga adunay usa ka butang nga kinahanglan buhaton, busa siya mihukom sa pagsunod kanila. Sa tinuod siya makakuha kanila ug mobalik sa gamay nga agianan.

Samtang siya misugod sa pagbiya sa gamay nga agianan, siya nakahinundom unsa ang gisulti sa iyang amahan, “Annand, ikaw kinahanglan dili gayud mobiya sa gamay nga agianan sa bukid.”

Si Annand nakahibalo nga siya kinahanglan gayud mosunod sa iyang amahan, busa siya milingkod ug sa makausa misugod sa pagtawag ni Summa. Sa kalit, siya nakadungog og kanaas diha sa kasagbutan. Siya mihangad aron makita ang babaye nga kanding ug ang iyang duha ka gagmay nga mga anak. Sila miduol ra gayud kaniya.

Si Annand mipundok kanila balik og kanaog ngadto sa ubos nga gamay nga agianan, diin iyang hisugatan ang iyang amahan nga miapas kaniya. Nagkuyog ilang gidala ang mga kanding pagpauli nga si Numie diha sa pangunahan.

Sa sunod adlaw si Annand midala sa iyang amahan balik ngadto sa dapit diin siya mihulat ni Summa. Ang amahan ni Annand milibut kaniya sa duol nga kabugangan ug mipakita kaniya og usa ka pangpang. Si Annand unta tingali mahulog sa pangpang kon siya misunod pa ni Summa. Si Annand mapasalamaton diha sa iyang kasingkasing nga siya misunod ug mitahud sa iyang amahan.

Panaghisgutan

Unsa sa inyong hunahuna ang gibati ni Annand mahitungod sa iyang amahan? (Siya mihigugma kaniya.)
Sa unsa nga paagi si Annand nagpakita og gugma alang sa iyang amahan? (Siya misunod kaniya pinaagi sa wala pagbiya sa gamay nga agianan.)
Sa unsa nga paagi nga ang pagsunod sa iyang amahan nagtabang ni Annand? (Siya mipabilin diha sa gamay nga agianan ug walay kadautan.)

Ipasabut nga usahay kita dili makasabut ngano nga ang atong mga ginikanan nagsugo kanato sa pagbuhat og pipila ka mga butang. Matarung nga mga ginikanan nahigugma sa ilang mga anak ug buot unsay labing maayo alang kanila. Mga bata kinahanglan mosunod sa ilang mga ginikanan ug mobuhat unsay ilang gisugo kanila nga buhaton. Kon kita mosunod sa atong mga ginikanan, kita nagpakita sa atong gugma alang kanila.

Awit

Awita o isulti ang mga pulong sa “Malipayong Banay [A Happy Family].”

Moroni Nagpakita og Gugma alang sa Iyang Amahan, si Mormon

Sugilanon ug mga hulagway sa balaan nga kasulatan

Sultihi ang mga bata nga ang Basahon ni Mormon adunay daghan nga mga sugilanon mahitungod sa mga tawo kinsa mipakita og gugma alang sa ilang mga ginikanan pinaagi sa pagkamasulundon ug pagkamatinabangon. Usa nga sugilanon mao ang mahitungod sa propeta Moroni.

Ipakita ang hulagway 3-35, Moroni Nagtago sa mga Palid didto sa Bungtod sa Cumorah. Pangutan-a ang mga bata unsa ang ilang nahibaloan mahitungod sa hulagway. Sultihi sila nga si Moroni milubong sa bulawan nga mga palid. Milabay ang mga tuig, siya mibalik ingon nga usa ka anghel ngadto ni Joseph Smith aron sa pagpakita kaniya hain kini sila. Ang amahan ni Moroni mao ang propeta nga si Mormon. Sunod sa hulagway ni Moroni, ipakita ang hulagway 3-34, Mormon Nagmubo sa mga Palid.

Ipasabut nga si Mormon gipili sa Langitnong Amahan sa pagpundok og tingub sa mga kasaysayan ug pagtala kanila diha sa mga palid. Siya sa kanunay nagpakita sa iyang gugma alang sa Langitnong Amahan pinaagi sa pagbuhat bisan unsa ang gisugo kaniya nga buhaton. Siya mitudlo sa iyang anak nga lalaki, si Moroni, sa pagbuhat sa susama. Si Mormon mihigugma ni Moroni ug buot kaniya nga magmalipayon. Siya nakahibalo nga ang paghigugma ug pagsunod sa Langitnong Amahan motabang ni Moroni nga magmalipayon.

Gani bisan si Moroni hingkod na nga lalaki, si Mormon mipadayon sa pagtudlo sa iyang anak sa paghigugma sa Langitnong Amahan. Si Moroni mihigugma sa iyang amahan ug buot nga mosunod sa iyang panig-ingnan.

Tungod sa dakong gugma nga siya aduna alang sa iyang amahan, si Moroni misunod sa mga pagtulun-an sa iyang amahan. Siya misulat unsa ang gitudlo sa iyang amahan kaniya aron nga ang tibuok kalibutan masayud sa mga pagtulun-an sa iyang amahan. Si Mormon namatay sa wala pa mahuman ang bulawan nga palid, busa si Moroni mikuha sa talaan ug mihuman niini.

Balaan nga kasulatan ug panaghisgutan

Basaha ang Mormon 8:1 ngadto sa klase.

Balaan nga kasulatan ug panaghisgutan

Ngano nga si Moroni misunod ni Mormon? (Tungod kay siya mihigugma kaniya.)
Sa unsa nga paagi si Moroni nagpakita og gugma alang sa iyang amahan? (Pinaagi sa pagkamasulundon ug pagkamatinabangon.)

Katingbanan

Panaghisgutan

Ngano nga ang Langitnong Amahan naghatag kanato og mga ginikanan? (Aron sa paghigugma kanato, pagtudlo kanato sa mga sugo, ug sa pag-amuma kanato.)
Sa unsa nga paagi kita makapakita sa atong mga ginikanan nga kita nahigugma kanila? (Pinaagi sa pagkamasulundon og pagkamatinabangon.)
Sa unsa nga mga paagi nga ang mga sugilanon ni Annand, Emma, ug Moroni susama? (Sa tanan niini nga mga sugilanon, ang mga tawo mipakita og gugma alang sa ilang mga ginikanan pinaagi sa pagkamasulundon ug pagkamatinabangon.)

Pagpamatuod sa magtutudlo

Pagpamatuod mahitungod sa kamahinungdanon sa mga ginikanan ug ang mga panalangin nga moabut kon kita mopakita ug gugma alang kanila. Pagdapit og mga bata sa pagpili og usa ka paagi diin sila makapakita sa ilang gugma alang sa ilang mga ginikanan sulod sa sunod nga semana.

Pagdapit og usa ka bata sa paghatag sa panapos nga pag-ampo.

Pagpalambo nga mga Kalihokan

Pagpili gikan sa mosunod nga mga kalihokan kadto nga labing moangay alang sa imong mga bata. Ikaw makagamit kanila diha sa leksyon gayud o ingon og usa ka balik-pagtuon o katingbanan. Alang sa dugang nga paggiya, tan-awa ang “Panahon sa Klase” diha sa “Mga Tabang alang sa Magtutudlo.”

Awita ingon og usa ka klase ang “Mga Banay Mahimo’ng Mag-uban sa Kahangturan [Families Can Be Together Forever]” (Children’s Songbook, p. 188:) ang mga pulong gilakip diha sa luyo niini nga tamdanan nga basahon.
Ipadibuho sa mga bata ang usa ka hulagway mahitungod sa unsa nga paagi sila makapakita og gugma alang sa ilang mga ginikanan.
Pagdula “Ma’am, Mahimo ba nga Ako” uban sa mga bata. Patindoga silang tanan sa usa ka linya nga nag-atubang kanimo. Paghimo og mga pahayag ingon sa “(ngalan sa bata), tabangi ang imong inahan sa paghugas sa mga pinggan.” Ang bata kinahanglan gayud nga mosulti, “Ma’am, mahimo ba nga ako motabang sa akong inahan sa paghugas sa mga pinggan?” o bisan unsa nga maingon-ingon. Kon ang usa ka bata mosulti niini, kamo moingon, “Lakang og dako sa unahan,” ug ang bata molakang padulong nganha kanimo. Kon ang bata molakang sa unahan nga dili una mangutana sa pangutana, niana siya mobalik og lakang padulong sa luyo, o palayo gikan kanimo. Ang una nga bata nga makahikap sa imong kamot modaug.