Leksyon 41

Pagpuasa Nagdala Kanato nga Labaw nga Maduol ngadto sa Langitnong Amahan ug ni Jesukristo

Katuyoan

Aron sa pagtabang sa mga bata sa pagsabut nga ang pagpuasa makadala kanila nga labaw nga maduol ngadto sa Langitnong Amahan ug ni Jesukristo ug nga sila makapuasa ug makaampo alang sa talagsaon nga mga panalangin.

Pagpangandam

1. Sa mainampuon nga paagi pagtuon sa Marcos 9:17–29 ug sa Doktrina ug mga Pakigsaad 88:76.

2. Labing maayo nga itudlo ang leksyon sa usa ka Domingo sa dili pa ang Domingo sa puasa.

3. Kon anaa sa inyong dapit, pangandam sa pagpakita sa “Ang Balaod sa Puasa [The Law of the Fast]” (4 ka mga gutlo, 10 ka mga gutling) sa Family Home Evening Video Supplement (53276).

4. Mga kagamitan nga gikinahanglan: andama ang mosunod nga mga pangutana diha sa mga gilis sa papel ug ibutang sila sa usa ka sudlanan:

   • Unsa ang gipasabut sa pagpuasa?

   • Kinsa ang gikinahanglan nga magpuasa?

   • Kon kita nagpuasa ug mohatag sa atong salapi ngadto sa obispo o presidente sa sanga, unsa ang itawag sa salapi?

   • Unsa ang buhaton sa obispo sa atong mga halad sa puasa?

   • Unsa ang pipila sa mga katarungan sa pagpuasa?

   • Sa unsa nga paagi ang pagpuasa makatabang kanato?

   • Kanus-a ang Domingo sa puasa?

   • Unsa ang gipakita sa pagpuasa ngadto sa Langitnong Amahan ug ni Jesukristo?

   • Kamo ba andam sa pagpuasa kon kamo o ang usa ka tawo nga inyong gihigugma nanginahanglan og tabang?

5. Paghimo sa gikinahanglan nga mga pagpangandam alang sa bisan unsa nga pagpalambo nga mga kalihokan nga imong pagagamiton.

Gisugyot nga Pagpalambo sa Leksyon

Pagdapit og usa ka bata sa paghatag sa pagsugod nga pag-ampo.

Tinoa ang mga bata kon ikaw nag-awhag kanila sa pagbuhat og usa ka butang sulod sa semana.

Pagpuasa Nagpasabut nga Dili Mokaon ug Moinom alang sa usa ka Matarung nga Katuyoan

Pang-atensyon nga kalihokan

Ipakita sa mga bata “Ang Balaod sa Puasa.”

Isaysay ang mosunod nga hitabo sa imong kaugalingon nga mga pulong:

Usa ka Domingo sa buntag si Phillip midali ngadto sa kusina diin ang iyang inahan nagkapuliki sa pagtuon sa balaan nga mga kasulatan.

“Unsa ang pamahaw?” siya nangutana. “Ako gigutom.”

Ang inahan ni Phillip mitan-aw kaniya nga masulub-on ug miingon, “Ang imong amahan dili kaayo maayo ang pamati sa lawas.”

Ang amahan ni Phillip nadaot sa usa ka aksidente, ug siya naghigda sa ospital, dili makalihok.

“Gipakaingon ko og siya nagkaayo,” si Phillip mitubag samtang ang iyang mga mata puno sa mga luha.

“Ang imong amahan nanginahanglan sa atong hugot nga pagtuo ug mga pag-ampo karon, Phillip,” ang iyang inahan misulti sa hinay. “Kita kinahanglan nga magpaduol ngadto sa Langitnong Amahan ug ni Jesukristo karon samtang kita mag-ampo alang sa imong amahan nga mamaayo.”

“Sa paghimo niini,” mipadayon ang inahan ni Phillip, “kita dili mokaon sa pipila ka mga panahon sa tingkaon karon. Kita dili mokaon ug moinom. Ikaw andam ba sa pagbuhat niana alang sa imong amahan?”

“O, ako mobuhat,” si Phillip mitubag.

Pang-atensyon nga kalihokan

• Unsa ang atong itawag sa dili pagkaon ug pag-inom alang sa matarung nga katuyoan? (Pagpuasa)

Ipasabut nga pinaagi sa pagpuasa, kita nagpakita sa Langitnong Amahan ug ni Jesukristo nga kita nahigugma kanila ug nagsalig kanila sa pagtabang kanato ug sa pagtubag sa atong mga pag-ampo.

Ang Langitnong Amahan ug si Jesukristo nakahibalo nga kini malisud alang kanato sa pagpuasa. Sila nakahibalo nga kon kita magpuasa, ang atong mga pag-ampo kinasingkasing ug sa tinuod kita nanginahanglan sa ilang panabang.

Panaghisgutan

Ipasabut nga ang gagmay nga mga bata ug mga tawo kinsa may sakit wala paabuta nga mopuasa. Kita magsugod sa pagpuasa human kita mabunyagi. Ipasabut nga tungod kay kini usa ka panginahanglan alang niadto kinsa gibunyagan, sila kinahanglan mosugod na sa paghunahuna sa pagpuasa mahitungod sa panahon nga sila igo na sa kahingkod nga bunyagan.

Ipasabut ngadto sa mga bata nga dili mokubos sa usa ka Domingo matag bulan ang mga sakop sa Simbahan gihangyo sa pagpuasa sulod sa duha ka panahon sa tingkaon. Sulod niini nga panahon, kita dili mokaon o moinom. Kita nagtawag niini nga linain nga adlaw matag bulan og Domingo sa puasa.

Ipasabut nga ang atong mga propeta sa ulahing adlaw mihangyo usab kanato sa paghatag niadto kinsa nanginahanglan. Sila mihangyo kanato sa paghatag ngadto sa Simbahan sa labing kubos nga kantidad sa salapi nga atong natigum pinaagi sa dili pagkaon o pag-inom samtang kita nagpuasa. Ang salapi nga atong gihatag maoy gitawag og halad sa puasa, ug kini gigamit sa pagtabang sa pagpalit og pagkaon ug panaput alang sa mga kabus ug timawa.

Panaghisgutan

• Unsa ang mga halad sa puasa? (Salapi nga gihatag ngadto sa Simbahan aron sa pagtabang sa mga kabus.)

• Alang sa unsa kini nga salapi gigamit? (Aron sa pagpalit og pagkaon, panaput, ug uban nga mga panginahanglan alang sa kabus ug timawa.)

Ipasabut nga kita makapuasa ug makaampo alang sa panabang bisan kanus-a, sama lamang sa gibuhat ni Phillip ug sa iyang banay alang sa amahan ni Phillip. Kita ug kadto kinsa atong gihigugma nagkinahanglan sa panabang sa Langitnong Amahan sa tanan nga panahon, apan adunay mga higayon nga kita adunay usa ka tino nga malisud nga suliran nga sulbaron, o kon ang usa ka tawo diha sa atong banay nasakit pag-ayo. Kana ang panahon nga kita mopuasa gawas sa Domingo sa puasa.

Sugilanon sa balaan nga kasulatan

Itudlo nga si Jesukristo nakahibalo unsa gayud ka matinabangon ang pagpuasa ug pag-ampo. Isaysay ang mosunod nga sugilanon gikan sa Marcos 9:17–29 sa imong kaugalingon nga mga pulong. Human sa pagsaysay sa sugilanon, ikaw tingali buot nga ipadula kini sa mga bata.

Usa ka adlaw si Jesukristo ug ang iyang mga tinun-an nagkuyog, ug usa ka dako nga pundok sa mga katawhan naglibut kanila. Usa ka tawo misuot sa pundok sa mga katawhan ngadto ni Jesus. Kini nga tawo misulti ni Jesus sa usa ka subo nga sugilanon mahitungod sa iyang anak nga lalaki kinsa dugay na nga nasakit pag-ayo sulod sa daghan nga mga tuig. Kini nga tawo mihangyo sa mga tinun-an ni Kristo sa pagpanalangin sa batang lalaki, apan ang ilang mga panalangin wala moayo kaniya. Uban sa mga luha diha sa iyang mga mata, ang amahan mihangyo ni Jesus sa pag-ayo sa iyang anak nga lalaki. Siya nakahibalo nga ang iyang anak nga lalaki mamaayo. Si Jesus mipanalangin sa masakiton nga batang lalaki, migunit sa iyang kamot, ug mipabarug kaniya. Ang batang lalaki naayo.

Ang mga tinun-an nahingangha. Human ang tawo mikuha sa iyang anak nga lalaki, ang mga tinun-an nangutana ni Jesus ngano nga ang ilang panalangin wala moayo sa batang lalaki. Siya mitubag kanila nga aron sa pag-ayo niining bata nga lalaki, sila nanginahanglan pa og labaw kay sa pag-ampo. Sila usab nagkinahanglan sa pagpuasa.

Sultihi ang mga bata nga ang Langitnong Amahan sa kanunay maminaw sa atong mga pag-ampo, apan kon kita andam sa pagpuasa, kita nagpakita sa Langitnong Amahan ug ni Jesukristo nga kita sa tinuod nagbaton og hugot nga pagtuo diha kanila.

Pagpuasa Makatabang Kanato nga Mobati og Labaw ka Duol ngadto sa Langitnong Amahan ug ni Jesukristo

Pagtudlo sa magtutudlo

Itudlo nga kon kita andam sa pag-ampo ug pagpuasa, kita nagpakita sa Langitnong Amahan ug ni Jesukristo nga kita nahigugma kanila ug nga kita naninguha sa pagpaduol ngadto kanila aron kita makadawat sa ilang panabang.

Mga sugilanon ug panaghisgutan

Aron sa pagtabang sa mga bata sa pag-ampo sa unsa nga paagi ang pagpuasa ug pag-ampo makadala kanila nga labaw nga maduol ngadto sa Langitnong Amahan ug ni Jesukristo, hangyoa sila sa pagpaminaw ngadto sa mosunod nga mga sugilanon.

Isulti ang mosunod nga sugilanon sa imong kaugalingon nga mga pulong:

Kini tingpamulak ug ang mga mag-uuma diha sa walog naguol. Ang tingtugnaw walay ulan, ug sila nagkinahanglan og ulan aron sila makatanom sa ilang mga tanom.

Ang presidente sa istaka mihukom sa paghimo og usa ka linain nga puasa, ug siya mihangyo sa obispo sa pagpahibalo niini ngadto sa mga sakop diha sa ilang purok. Siya nakahibalo nga ang mga tawo kinahanglan labaw nga mopaduol ngadto sa Langitnong Amahan ug ni Jesus sa dili pa sila makadawat sa talagsaon nga panabang nga ilang gikinahanglan. Mga katawhan gikan sa bisan diin nga dapit sa istaka mitambong sa tigum aron sa pagduyog sa pag-ampo ug pagpuasa. Sila nag-ampo alang sa ulan o yelo aron sila makatanom sa ilang mga tanom ug sila motubo. Sila mihulat ug mihulat, apan ang kaumog nga ilang gikinahanglan wala moabut.

Mga bulan milabay. Ang mga katawhan mipadayon sa pagpuasa ug sa pag-ampo. Sa katapusan, ang presidente sa istaka mitawag og lain nga tigum. “Itanom ang inyong mga tanom,” siya misugo sa mga katawhan. “Ang Langitnong Amahan mitubag sa atong mga pag-ampo.”

Bisan tuod og ang mga mag-uuma wala makakita og mga timaan sa ulan, sila mibuhat ingon nga sila gisugo. Sulod sa pipila ka mga semana, ang tubag sa Langitnong Amahan miabut. Matag adlaw miulan, naghatag sa mga tanom sa kaumog nga ilang gikinahanglan. Niana nga tuig ang mga mag-uuma nakabaton og usa ka labing maayo nga mga tanom nga sila sukad nakakita. (Tan-awa David Carl Danielson, “Rain in Due Season,” Ensign, July 1978, pp. 68–69.)

Mga sugilanon ug panaghisgutan

• Ngano nga ang lokal nga mga pangulo sa Simbahan mihangyo sa mga katawhan sa pagpuasa sa pag-ampo?

• Sa unsa nga paagi nga ang pagpuasa ug pag-ampo nagtabang kanila? (Kini nagdala kanila nga labaw nga maduol ngadto sa Langitnong Amahan ug ni Jesukristo. Sila nakadawat sa ulan nga ilang gikinahanglan alang sa ilang mga tanom nga motubo.)

Karon isaysay ang ikaduha nga sugilanon:

Si Rhonda, usa ka batang babaye, nadaot sa usa ka aksidente sa sakyanan. Sa diha nga ang iyang banay nakadungog sa ngil-ad nga balita, sila midali og adto kaniya sa ospital. Siya walay panimuot, diin nagpasabut nga siya dili makasulti o makalihok.

Matag adlaw ang iyang banay nagpaabut diha sa ospital, naglaum ug nag-ampo nga siya mamaayo pag-usab. Apan bisan pa niana, ang ilang mga pag-ampo ingon og dili igo. Sila buot pa nga maduol ngadto sa Langitnong Amahan ug ni Jesukristo, aron sa pagpakita kanila sa ilang gugma ug paghangyo kanila sa pag-ayo sa ilang anak nga babaye.

Ang banay mihukom sa pagpuasa ug sa pag-ampo. Ang ilang tanan nga mga kabanay, mga silingan, ug mga hilaga buot moapil kanila sa pagpuasa. Ang obispo mipahibalo sa puasa diha sa Simbahan ug daghan diha sa purok mipuasa uban kanila. Sila mibati og ka duol ngadto sa Langitnong Amahan ug ni Jesukristo ug nakahibalo nga ang Langitnong Amahan motabang kanila kon kini labing maayo alang ni Rhonda.

Wala madugay, samtang nagluhod diha sa pag-ampo, ang mga ginikanan ni Rhonda adunay usa ka pagbati nga ang ilang anak nga babaye mamaayo. Samtang sila misulod sa lawak sa ospital niana nga buntag, siya mihangad ug misulti ngadto kanila. Sa wala madugay siya nakahimo na sa paglingkod diha sa higdaanan ug sa pagkaon. Si Rhonda namaayo. Ang obipo usab misulti sa banay nga tungod sa puasa, ang mga tawo sa purok labaw nga nagkasuod ug nagpakita og labaw nga gugma alang sa usag usa kay sa kaniadto.

Mga sugilanon ug panaghisgutan

• Unsa ang nahitabo agi og sangputanan niining talagsaon nga puasa? (Ang batang babaye napanalanginan ug namaayo. Ang mga tawo sa purok labaw nga nagkasuod ug nagpakita og labaw nga paghigugma alang sa usa’g usa.)

Pahinumdumi ang mga bata nga usahay ang Langitnong Amahan adunay lain nga mga laraw alang niadto kinsa mga masakiton o may kadaot. Kon sila dili mamaayo human sa pagpuasa ug sa pag-ampo, kita kinahanglan nga modawat sa kabubut-on sa Langitnong Amahan, nakahibalo nga ang iyang kahibalo labaw kaayo kay sa atong kaugalingon.

Pagpamatuod sa magtutudlo

Pagpamatuod sa ka mahinungdanon sa pagpuasa pinaagi sa pagpakigbahin og usa ka kasinatian nga moawhag sa mga bata nga motinguha sa pagpuasa. Kini mahimo nga usa ka kinaugalingon nga kasinatian o usa ka butang nga nahitabo ngadto sa usa ka tawo nga imong kaila. Ipasabut nga ang pagpuasa ug pag-ampo sa kinabubut-on mao ang usa sa labing mahinungdanon nga mga paagi sa pagpakita sa Langitnong Amahan ug ni Jesukristo nga kita buot nga mobati og labaw ka duol ngadto kanila ug modawat sa ilang panabang.

Pasultiha ang mga bata sa bisan unsa nga mga kasinatian nga ilang nahibaloan mahitungod sa pagpuasa.

Katingbanan

Panaghisgutan

Tabangi ang mga bata sa pagbalik-pagtuon unsa ang ilang nakat-unan mahitungod sa pagpuasa ug pag-ampo. Pakuhaa ang matag bata og pangutana gikan sa sudlanan nga imong giandam ug pasulayi ang pagpatubag niini.

Panaghisgutan

• Unsa ang gipasabut sa pagpuasa? (Ang dili pagkaon o pag-inom alang sa usa ka matarung nga katuyoan.)

• Kinsa ang kinahanglan nga mopuasa? (Ang tanan kinsa makahimo.)

• Kon kita mopuasa ug mohatag sa atong salapi ngadto sa obispo o presidente sa sanga, unsa ang itawag sa salapi? (Mga halad sa puasa.)

• Unsa ang buhaton sa obispo sa atong mga halad sa puasa? (Siya naggamit kanila aron sa pagtabang sa mga kabus ug timawa.)

• Unsa ang pipila sa mga katarungan ngano nga magpuasa? (Aron labaw nga maduol ngadto sa Langitnong Amahan. Aron makadawat og panabang gikan sa Langitnong Amahan. Aron sa pagtabang sa uban. Kini usa ka sugo.)

• Sa unsa nga paagi nga ang pagpuasa nagtabang kanato? (Kini nagtabang kanato nga mobati og labaw ka duol ngadto sa Langitnong Amahan ug ni Jesukristo.)

• Kanus-a ang Domingo sa puasa? (Kini sa kasagaran ang unang Domingo sa buwan.)

• Unsa ang gipakita sa pagpuasa ngadto sa Langitnong Amahan ug ni Jesukristo? (Nga ang atong mga pag-ampo kinasingkasing ug nga kita adunay hugot nga pagtuo diha kanila.)

• Kamo andam ba sa pagpuasa kon kamo o ang usa ka tawo nga inyong gihigugma nagkinahanglan og panabang?

Pagdapit og mga bata sa pagsulti ngadto sa ilang mga ginikanan mahitungod sa pagpuasa ug sa paghukom kanus-a ug unsa ang gidugayon sila kinahanglan nga mag puasa.

Pagdapit og usa ka bata sa paghatag sa panapos nga pag-ampo.

Pagpalambo nga mga Kalihokan

Pagpili gikan sa mosunod nga mga kalihokan nga labing moangay alang sa imong mga bata. Kamo makagamit kanila diha sa leksyon gayud o ingon og usa ka balik-pagtuon o katingbanan. Alang sa dugang nga paggiya, tan-awa ang “Panahon sa Klase” diha sa “Mga Tabang alang sa Magtutudlo.”

1. Alang sa labaw ka gagmay nga mga bata, ang mosunod nga sugilanon ug panaghisgutan tingali mapuslanon:

   Ang amahan ni JoAnn gikan sa layo nga biyahe. Sa diha nga siya mibalik, si JoAnn nalipay nga nakakita kaniya. Siya migakus ug mihalok kaniya, ug ang amahan mitunol kaniya og gamay nga bag sa talagsaon nga karmelitos gikan sa dakbayan diin siya gikan.

   Si JoAnn midawat sa bag ug midagan ngadto sa luyo nga nataran, diin ang iyang gamay nga silingan nga si Danny nagdula. Ang iyang inahan nag-amuma ni Danny samtang ang inahan ni Danny nagdaot.

   “Tan-awa!” misinggit si JoAnn. “Tan-awa unsay gidala ni daddy kanako.”

   Si Danny mitan-aw sulod sa bag.

   • Unsa sa inyong hunahuna ang sunod nga gibuhat ni JoAnn?

   Sa inyong hunahuna siya miingon ba “Dili ko ikaw hatagan bisan usa,” o sa inyong hunahuna siya miingon ba, “Ako mohatag kanimo og pipila ka karmelitos”?

   Unsa ang bation ni Danny kon siya miingon, “Ikaw dili ko hatagan bisan usa”? Unsa ang hunahunaon sa iyang daddy kon siya miingon niana? Siya ba malipay o maguol?

   Kon siya miingon, “Ako mohatag kanimo og pipila ka karmelitos,” si Danny malipay ba? Ang iyang amahan malipay ba? Ang atong Langitnong Amahan malipay ba? Si JoAnn malipay ba?

   Si JoAnn miingon, “Ako mohatag kanimo og pipila ka karmelitos,” ug ang tanan nalipay.

   Sa Domingo sa puasa ikaw mahimo nga makigbahin sama lamang sa gibuhat ni JoAnn. Kamo makahimo nga walay pamahaw, ug ang dili pagkaon (paghingalan og mga pagkaon nga kasagaran gikan sa mga bata), kamo makadaginot og salapi alang sa inyong mga ginikanan. Unya sila makahatag niini nga kantidad ngadto sa obispo, ug siya mohatag niini ngadto sa usa ka tawo kinsa gigutom.

   • Kini makahimo ba sa mga tawo kinsa nanginahanglan og pagkaon nga malipay?

   • Kini makahimo ba kaninyo nga malipay?

2. Padibuhoa ang mga bata og usa ka tawo nga tingali ilang buot pahinungdan sa puasa.