Mga Manwal sa Primary ug Panahon sa Pagpakigbahin
Leksyon 43: Pagtahud sa mga Ngalan sa Langitnong Amahan ug ni Jesukristo

Leksyon 43

Pagtahud sa mga Ngalan sa Langitnong Amahan ug ni Jesukristo

Katuyoan

Aron sa pagtabang sa matag bata sa pagpasidungog ug sa pagtahud sa mga ngalan sa Langitnong Amahan ug ni Jesukristo.

Pagpangandam

  1. Sa mainampuon nga paagi pagtuon ug pagpangandam sa pagbasa sa Mosiah 13:15, nagtapos sa pulong nga kawang sa unang higayon nga kini mogula, ug 1 Samuel 3:1–10, 19–20.

  2. Pagdala og monyeka nga giputos sa usa ka gamay nga habol (o gamit og linukot nga habol o tuwalya) nga aron ingnon og usa ka gamay nga bata.

  3. Mga kagamitan nga gikinahanglan:

    1. Usa ka Basahon ni Mormon.

    2. Tisas, pisara, ug papas.

    3. Hulagway 3-47, Abinadi sa Atubangan ni Hari Noah (62042; Sudlanan sa Hulagway sa Ebanghelyo 308); hulagway 3-67, Presidente Spencer W. Kimball; hulagway 3-70, Batang Lalaki nga si Samuel Gitawag sa Ginoo (62498; Sudlanan sa Hulagway sa Ebanghelyo 111).

  4. Paghimo sa gikinahanglan nga mga pagpangandam alang sa bisan unsa nga pagpalambo nga mga kalihokan nga imong pagagamiton.

Gisugyot nga Pagpalambo sa Leksyon

Pagdapit og usa ka bata sa paghatag sa pagsugod nga pag-ampo.

Tinoa ang mga bata kon ikaw nag-awhag kanila sa pagbuhat og usa ka butang sulod sa semana.

Mga Ngalan Mahinungdanon

Pang-atensyon nga kalihokan

Pagpakaaron-ingon nga nagpahiyom ug duyana ang usa ka gamay nga bata (monyeka o habol) diha sa imong mga bukton. Tan-awa ug sultihi ang mga bata: “Sa diha nga kamo gagmay pa nga bag-ong mga masuso, ang inyong mga ginikanan mipili og usa ka ngalan alang kaninyo. Kini usa ka ngalan nga ilang gihigugma ug buot kaninyo nga moangkon.”

Pang-atensyon nga kalihokan

  • Kamo nasayud ba ngano nga ang inyong mga ginikanan mihatag kaninyo sa inyong piho nga ngalan? (Tugoti ang matag bata sa pagtubag. Ang uban mahimo nga ginganlan tungod sa mga kabanay o mga katigulangan o tungod sa pipila ka uban nga talagsaon nga katarungan. Tabangi ang tanan nga mga bata sa pagbati og kamaayo mahitungod sa ilang mga ngalan, kon ang mga bata nahibalo ba ngano sila nakadawat niadto nga mga ngalan o wala.)

  • Unsay inyong bation kon ang tawo mosulti sa inyong ngalan sa kasuko nga paagi, magbugal-bugal niini, o mosulti niini sa sayop nga paagi?

Ipasabut nga ang mga ngalan hilabihan ka mahinungdanon. Ang mga tawo nakaila kanato pinaagi sa atong mga ngalan. Ang usa ka ngalan nagpaila sa usa ka tawo.

Panaghisgutan

Pahinumdumi ang mga bata nga ang Langitnong Amahan ug si Jesukristo nakaila sa atong mga ngalan. Pahinumdumi sila nga ang pulong gayud nga gisulti sa Langitnong Amahan ngadto sa batang lalaki nga si Joseph Smith didto sa Sagrado nga Kakahoyan mao ang usa ka ngalan nga “Joseph.” Ang Langitnong Amahan mitawag kaniya pinaagi sa ngalan. Kamo mahimo usab nga mopakita og hulagway 3-70, Batang Lalaki nga si Samuel Gitawag sa Ginoo, ug isaysay ang sugilanon sa Biblia mahitungod sa batang lalaki nga si Samuel (tan-awa sa 1 Samuel 3:1–10, 19–20), diha diin ang Ginoo mitawag ni Samuel pinaagi sa ngalan.

Ipasabut nga ang usa ka ngalan nagpaila sa usa ka tawo. Diha-diha nga kamo makadungog sa ngalan sa usa ka tawo nga inyong nailhan, kamo maghunahuna mahitungod niana nga tawo. Kini usa ka mahinungdanon nga hitabo sa panahon nga ang usa ka masuso gihatagan og usa ka ngalan. Ang bata liyokan sa mga tighupot sa Melchizedek nga Pagkapari ug hatagan og usa ka ngalan ug panalangin.

Panaghisgutan

  • Kon kamo makadungog sa ngalan sa atong obispo (isulti ang ngalan sa inyong obispo o presidente sa sanga), unsa nga matang sa tawo ang inyong mahunahuna? (Tugoti ang mga tubag, mag-awhag sa mga bata sa paghunahuna og maayo nga mga butang.)

Ikaw mahimo nga mobalik niini nga kalihokan kaduha o katulo ka mga higayon, naggamit sa mga ngalan sa maayo nga mga tawo kinsa ang mga bata nakaila.

Pang-pisara nga panaghisgutan

Isulat ang ngalan nga Jesukristo diha sa pisara, o sultihi ang mga bata nga ikaw mosulti og usa gayud ka linain nga ngalan. Isulti ang “Jesukristo” sa balaan nga pagtahud ug matinahuron nga paagi. Unya pasultiha ang mga bata sa ngalan uban kanimo.

Pang-pisara nga panaghisgutan

  • Unsa nga matang sa tawo ang inyong mahunahuna kon kamo makadungog o makakita niini nga ngalan?

Isulat ang ngalan Langitnong Amahan diha sa pisara, o isulti kini og kusog sama sa imong gibuhat sa ngalan sa Manluluwas. Pasultiha ang mga bata niini uban kanimo.

Pang-pisara nga panaghisgutan

  • Unsa nga matang sa tawo ang inyong mahunahuna kon kamo makadungog o makakita niini nga ngalan? (Ang usa ka tawo kinsa mahigugmaon ug naghatag kanato og daghan nga mga butang.)

Ipasabut nga ang Langitnong Amahan ug si Jesukristo nakabuhat og daghan nga mga butang alang kanato. Kita nahigugma kanila. Kon kita makadungog sa ilang mga ngalan, kita sa kasagaran mohunahuna sa daghan nga maayo nga mga butang nga ilang nabuhat. Kita mobati og gugma ug pasalamat kon kita mohunahuna kanila.

Kita mopasidungog ug motahud niadto nga atong gihigugma. Kita nagpakita og pagpasidungog ug pagtahud alang kanila pinaagi sa paggamit sa ilang mga ngalan sa usa ka mabination ug mahigugmaon nga paagi.

Artikulo sa hugot nga pagtuo

Tabangi ang mga bata sa pagsulti og dungan sa unang artikulo sa hugot nga pagtuo.

Kita Gisugo sa Pagtahud sa mga Ngalan sa Langitnong Amahan ug ni Jesukristo

Hulagway nga Panaghisgutan

Ipakita ang hulagway 3-47, Abinadi sa atubangan ni Hari Noah.

Hulagway nga Panaghisgutan

  • Unsa ang nahitabo dinhi niini nga hulagway?

Ipasabut nga sa diha nga si propeta Abinadi nagtudlo sa mga katawhan, siya misulti kanila mahitungod sa Napulo ka mga Sugo, diin nagagikan sa Dios.

Ang Napulo ka mga Sugo mao ang mga giya aron sa pagtabang kanato sa pagpuyo sa matarung nga paagi. Ang ikatulo nga sugo nagsulti kanato nga kita kinahanglan mopasidungog ug motahud sa mga ngalan sa Langitnong Amahan ug ni Jesukristo.

Panaghisgutan sa balaan nga kasulatan

Papaminawa ang mga bata samtang imong basahon ang ikatulo nga sugo. Basaha ang Mosiah 13:15, mohunong human sa pulong kawang sa unang higayon niini nga mogula diha sa bersikulo.

Ipasabut nga “sa kawang” nagpasabut sa paggamit sa mga ngalan sa Langitnong Amahan ug ni Jesukristo sa paagi nga walay pagtahud o sa panahon nga sila sa tinuod wala gayud maghunahuna sa Langitnong Amahan ug ni Jesukristo.

Ipabalik og sulti sa mga bata ang pulong sa balaan nga kasulatan uban kanimo.

Panaghisgutan sa balaan nga kasulatan

  • Unsa ang pipila ka mga ngalan nga atong gamiton kon kita nagpasabut sa Langitnong Amahan o ni Jesus? (Dios, Amahan sa Langit, Jehovah, ang Ginoo, Kristo, ang Manluluwas.)

Tabangi ang mga bata sa pagsabut nga bisan kanus-a kita mogamit sa bisan hain niini nga mga ngalan, kinahanglan atong isulti sa matinahuron nga paagi. Kini nga mga ngalan dili gayud isulti diha sa kasuko o sa tiaw-tiaw nga paagi. Ang usa ka tawo kinsa naggamit niini nga ngalan sa niini nga paagi nanumpa. Kini nga mga ngalan dili gayud pagagamiton ingon nga mga pulong sa panumpa. Kita kinahanglan mogamit sa mga ngalan sa Langitnong Amahan ug ni Jesukristo sa panahon lamang nga kita nag-ampo o nagsulti mahitungod kanila diha sa usa ka matinahuron nga paagi.

Kon ang imong klase makabasa, pagdapit og usa ka bata sa pagduol ug pagsulat sa mga pulong pasidungog ug pagtahud diha sa pisara. Dugangi paglig-on ang ideya nga kon kita nahigugma sa Langitnong Amahan ug ni Jesus, kita mopakita og pasidungog ug pagtahud alang sa ilang mga ngalan pinaagi sa paggamit lamang kanila diha sa mabination ug mahigugmaon nga paagi.

Paggamit sa mga Ngalan sa Langitnong Amahan ug ni Jesukristo sa Matarung nga Paagi

  • Kanus-a matarung ang paggamit sa ngalan sa Langitnong Amahan? (Kon kita mosulti nga may balaan nga pagtahud ug kon kita mag-ampo.)

Sugilanon

Usa ka inahan misulti sa iyang anak nga lalaki niini nga sugilanon mahitungod sa panahon nga siya gamay pa nga bata. Isaysay kini og balik sa inyong kaugalingon nga mga pulong.

“ ‘Ingon nga usa ka bata nga babaye, ako naglakaw pauli sa panimalay gikan sa eskwelahan kuyog sa akong igsoon nga lalaki. Kami sa kanunay manlaktud pag-agi sa usa ka dako nga itum nga iro nga mogukod kanamo samtang kami nagdagan agi sa iyang balay. Kon kami modagan lamang sa husto nga panahon, kami mahimo nga makaabut ngadto sa usa ka koral ug ngadto sa walay kuyaw. Ang akong igsoon nga lalaki mosulti kanako kanus-a modagan.

“ ‘Usa ka adlaw ako nag-inusara ug wala modagan sa husto nga panahon. Ang iro mihulga kanako, ug ako migahi diha sa daplin sa dalan sa kahadlok. Samtang siya mihasmag ngari kanako (sa kahadlok) ako misinggit og kusog kutob sa akong mahimo: “Langitnong Amahan tabangi ko!” ’

“Ang iyang anak nga lalaki mitaho: ‘Sa kalit, ang akong inahan nahinumdom, ang iro nahunong ingon og ang iyang agianan gialihan, ug siya mikamang sa koral ngadto sa walay kuyaw. Siya nasayud nga ang iyang pag-ampo gitubag’ ” (S. Michael Wilcox, “No Other Gods before Me,” Ensign, Jan. 1994, pp. 22-23).

Hatagi og gibug-aton unsa ka mahinungdanon nga kita mogamit lamang sa ngalan sa Langitnong Amahan ug ni Jesukristo kon kita nag-ampo o nagsulti mahitungod kanila sa matinahuron nga paagi.

Hulagway nga sugilanon

Ipakita ang hulagway 3-67, Presidente Spencer W. Kimball, ug sultihi ang mga bata nga siya usa ka pinalangga nga propreta ug ikanapulog duha nga Presidente sa Simbahan.

Isaysay ang mosunod nga sugilanon:

Usa ka adlaw human sa usa ka operasyon, Si Presidente Kimball gipagawas gikan sa lawak-operahanan sa ospital sa diha nga ang tigtabang sa mga nars natakilpo ug natumba. Ang tigtabang sa mga nars misugod sa pagpamalikas ug sa paggamit sa ngalan sa Ginoo sa kawang. Bisan tuod si Presidente Kimball may sakit, siya nangalyupo sa tigtabang sa mga nars, “Intawon! Intawon! Kana mao ang akong Ginoo kansang mga ngalan imong (gigamit sa ngil-ad nga paagi).”

Ang tigtabang nahilum. Unya siya mihagawhaw, “Pasayloa ako” (tan-awa “President Kimball Speaks Out on Profanity,” Ensign, Feb. 1981, p. 3).

Panaghisgutan

Panaghisgutan

  • Unsa nga sugo ang wala masunod sa tigtabang sa nars?

  • Ngano nga si Presidente Kimball dili buot nga makadungog niini?

  • Kanus-a kita kinahanglan mogamit sa mga ngalan sa Langitnong Amahan ug ni Jesukristo?

  • Unsa ang inyong mabuhat kon diha sa tulunghaan o diha sa kasilinganan kamo makadungog sa mga tawo nga maggamit sa mga ngalan sa Langitnong Amahan ug ni Jesus sa kawang?

Katingbanan

Awhaga ang mga bata sa paggamit sa mga ngalan ni Jesukristo ug sa Langitnong Amahan uban ang balaan nga pagtahud?

Pagdapit og usa ka bata sa paghatag og sa panapos nga pag-ampo.

Pagpalambo nga mga Kalihokan

Pagpili gikan sa mosunod nga mga kalihokan kadto nga labing moangay sa imong mga bata. Ikaw makagamit kanila diha sa leksyon gayud o ingon nga usa ka balik-pagtuon o katingbanan. Alang sa dugang nga paggiya, tan-awa ang “Panahon sa Klase” diha sa “Mga Tabang alang sa Magtutudlo.”

  1. Isulti ang mosunod nga garay nga may lihok uban sa mga bata:

    Sa kaaghup pagsulti mahitungod ni Jesus;

    Palihug hinaya ang inyong tingog. (ibutang ang igtutudlo nga tudlo ngadto sa mga ngabil)

    Tahura ang iyang ngalan diha sa inyong matag matarung nga pagpili.

    Ang ngalan sa atong Langitnong Amahan,

    Sama sa usa ka pag-ampo (ikyugpos ang mga bukton ug iduko ang ulo)

    Kinahanglan isulti uban ang dako nga gugma ug pag-amping.

  2. Pagtawag og usa ka bata sa sayop nga ngalan, ug hangyoa siya sa pagbuhat og usa ka butang alang kanimo. Hangyoa siya sa pagpasabut sa nahibilin nga sakop sa klase unsa ang iyang gibati nga gitawag pinaagi sa sayop nga ngalan. Gamita kini nga kasinatian aron sa paghulagway giunsa niini paghasol kanimo kon ang usa ka tawo masayop sa paglitok, makalimot, o mogamit sa dili husto sa atong mga ngalan. Ipasabut nga kita dili buot nga makadungog sa atong ngalan nga gisinggit sa kasuko. Kini makapaguol kanato nga makadungog sa atong mga ngalan nga gigamit sa ngil-ad nga paagi. Ang Langitnong Amahan ug si Jesukristo dili usab buot niini. Sila nagtudlo kanato sa paggamit lamang sa ilang mga ngalan uban ang pagtahud, kon kita nag-ampo o nagsulti sa paagi nga may balaan nga pagtahud.

  3. Kon ang mga bata makasulat sa ilang kaugalingon nga mga ngalan, ipasulat ang ilang unang ngalan diha sa taliwala sa usa ka blangko nga palid sa papel, unya pasubayi og liyok sa usa ka kolor unya sa lain usab nga kolor, ug lain na usab, hangtud makahimo og lingin nga “bangaw” liyok sa mga ngalan. Kon ang mga bata dili makasulat sa ilang kaugalingon nga unang mga ngalan, ikaw kinahanglan mosulat sa ilang mga ngalan diha sa taliwala sa mga papel ug pabutangi og dayandayan ang mga ngalan uban sa bangaw nga mga linatid o sa uban nga mga paagi.

  4. Balika ang Abinadi nga dula gikan sa leksyon 20, ug ipabalik og sulti sa bata nga nagpakaaron ingnon nga si Abinadi misulti og balik sa sugo “Dili kamo magpasipala sa ngalan sa Ginoo nga inyong Dios sa kawang” ngadto sa dautan nga Hari Noah.

  5. Uban sa mga bata, awita o isulti ang mga pulong sa “Unang Pag-ampo ni Joseph Smith [Joseph Smith’s First Prayer]” (Mga Himno ug mga Awit sa mga Bata o Hymns, no. 26); ang mga pulong gilakip diha sa luyo niining tamdanan nga basahon.

  6. Pag-andam og usa ka dako nga gilis sa pulong nga tanghaga alang sa klase nga susama niini:

    puzzle

    Dili kamo

    magpasipala sa ngalan

    sa Ginoo

    nga inyong

    Dios sa kawang.

    Isulti sa mga bata nga ikaw buot makahibalo kon sila nakahinumdom ba sa mahinungdanon nga sugo nga gihisgutan diha sa leksyon. Hatagi ang lima ka mga bata og tagsa-tagsa nga piraso sa dako nga gilis sa pulong nga tanghaga nga imong naandam. Tabangi sila sa paghan-ay sa mga pulong sa balaan nga kasulatan sa husto nga pagkasunod-sunod. Unya ipabasa sa klase og dungan ang sugo.

    Pagdapit og bisan kinsa sa mga bata kinsa buot mosulti niini nga balaan nga kasulatan.