Leksyon 5

Ang Unang Panan-awon

Katuyoan

Aron sa pagtabang sa matag bata nga makahibalo nga si Joseph Smith nakakita sa Langitnong Amahan ug ni Jesukristo.

Pagpangandam

1. Sa mainampuon nga paagi pagtuon sa Santiago 1:5 ug Joseph Smith—Kasaysayan 1:7–20.

2. Kon kini anaa, pag-andam sa pagpasalida sa Ang Unang Panan-awon (15 ka mga gutlo), Phase 1 video o videocassette sa Moments from Church History (53145).

3. Pag-andam sa pag-awit o pagsulti sa mga pulong sa “Ang Unang Pag-ampo ni Joseph Smith [Joseph Smith’s First Prayer]” (Mga Himno ug mga Awit sa mga Bata o Hymns, no. 26); ang mga pulong gilakip diha sa luyo niining tamdanan nga basahon.

4. Mga kagamitan nga gikinahanglan:

   1. Usa ka Biblia ug usa ka Perlas nga Labing Bililhon.

   2. Mga krayola ug papel.

   3. Hulagway 3-8, Joseph Smith Nagsiksik og Kaalam diha sa Biblia (Sudlanan sa Hulagway sa Ebanghelyo 402); ug hulagway 3-10, Ang Unang Panan-awon (62470; Sudlanan sa Hulagway sa Ebanghelyo 403).

5. Paghimo sa gikinahanglan nga mga pangandam alang sa bisan unsa nga pag-uswag nga mga kalihokan nga imong pagagamiton.

Gisugyot nga Pagpalambo sa Leksyon

Si Joseph Smith Nakakita sa Langitnong Amahan ug ni Jesukristo

Pagdapit og usa ka bata sa paghatag sa pagsugod nga pag-ampo.

Tinoa ang mga bata kon kamo nag-awhag kanila sa pagbuhat og usa ka butang sulod sa semana.

Pang-atensyon nga kalihokan

Ipakita ang hulagway 3-8, Joseph Smith Nagsiksik og Kaalam diha sa Biblia.

Pang-atensyon nga kalihokan

• Kinsa kini? (Joseph Smith.)

• Unsa ang iyang gibuhat?

• Ngano sa inyong hunahuna siya nagbasa sa Biblia?

Ipasabut ngadto sa mga bata nga sa diha nga si Joseph Smith napulog upat ka tuig ang panuigon, siya mipuyo uban sa iyang banay sa usa ka umahan. Niana nga panahon ang mga tawo nga nagpuyo sa duol naikag sa relihiyon. Ang mga ministro sa nagkalainlain nga mga simbahan nagpasiugda og daghan nga mga tigum aron sa pagpasabut sa ilang mga pagtuo. Matag ministro miingon nga ang iyang simbahan mao ang husto ug naningkamot sa pagdani sa mga tawo sa pagpasakop. Tungod kay si Joseph Smith buot nga masayud hain nga simbahan gayud ang tinuod, siya mitambong og daghan nga mga tigum sa nagkalainlain nga mga relihiyon. Siya nakakita nga matag ministro adunay lahi nga mga ideya mahitungod sa Dios ug sa balaan nga mga kasulatan.

Pang-atensyon nga kalihokan

• Sa inyong hunahuna unsa kaha ang gibati ni Joseph Smith mahitungod niining tanan nga nagkalain-lain nga mga pagtuo? (Naglibug.)

Paghisgot sa balaan nga kasulatan

Kon usa ka bata kinsa anaa sa klase makabasa, tabangi siya sa pagbasa sa Joseph Smith—Kasaysayan 1:10 o basaha kini og kusog sa imong kaugalingon. Pagsugod niini nga mga pulong “Ako sa kasagaran miingon sa akong kaugalingon…”

Hatagi og gibug-aton nga ang daghan nga mga ideya ug mga opinyon milibug ni Joseph. Siya naghunahuna hain niini nga mga simbahan ang husto o kon silang tanan ba sayop. Ang inahan ni Joseph, duha sa iyang igsoon nga mga lalaki, ug usa ka igsoon nga babaye mipasakop sa Simbahan sa Presbyterian, apan si Joseph wala magpasakop sa bisan hain niini nga mga simbahan.

Pagpakita sa mga bata og Biblia ug ipasabut nga si Joseph sa kasagaran nagbasa sa Biblia. Usa ka adlaw siya nagbasa og usa ka balaan nga kasulatan nga mituhop kaniya og pag-ayo.

Ipabasa sa hingkod nga bata ang Santiago 1:5 og kusog o basaha kini og kusog sa imong kaugalingon.

Paghisgot sa balaan nga kasulatan

• Unsa sa inyong hunahuna ang gipasabut sa kulang og kaalam? (Siguroha nga ang mga bata nakahibalo nga ang pagkakulang og kaalam nagpasabut nga wala makahibalo o makasabut sa usa ka butang.)

• Unsa ang gipasabut sa pagpangayo sa Dios? (Pag-ampo ngadto sa Langitnong Amahan.)

Basaha pag-usab ang balaan nga kasulatan. Ipasabut nga kining balaan nga kasulatan nagpasabut nga kita makaampo ngadto sa Langitnong Amahan ug makahangyo kaniya sa pagtabang kanato sa pagsabut ug pagkat-on mahitungod sa usa ka butang.

Si Joseph nakahibalo nga siya nagkulang og kaalam. Siya naglibug. Siya wala makahibalo hain nga simbahan ang tinuod, busa siya mihukom sa pagbuhat unsa ang gisulti sa Biblia—pag-ampo ngadto sa Langitnong Amahan.

Videocassette o sugilanon sa balaan nga kasulatan

Isalida Ang Unang Panan-awon, o iasoy ang mosunod:

Usa ka sayo sa buntag nga tingpamulak, si Joseph milakaw ngadto sa kakahoyan duol sa iyang panimalay. Human motan-aw sa palibut aron sa pagsiguro nga siya nag-insura, si Joseph miluhod aron sa pag-ampo.

Samtang siya nag-ampo, siya nakakita og usa ka mahayag kaayo nga kahayag diha ibabaw sa iyang ulo. Si Joseph mihulagway unsa ang iyang nakit-an niini nga paagi: “Sa diha nga ang kahayag midapat ngari kanako ako nakakita og duha ka mga Personahe, kansang kahayag ug himaya milabaw sa tanan nga paghulagway, nagbarug ibabaw kanako diha sa hangin” (Joseph Smith—Kasaysayan 1:17).

Hulagway ug panaghisgutan

Ipakita ang hulagway 3-10, Unang Panang-awon.

Usa sa mga personahe mitawag ni Joseph pinaagi sa ngalan ug, nagtudlo ngadto sa usa, miingon, “Kini mao ang Akong Hinigugma nga Anak. Paminaw Kaniya!” (Joseph Smith—Kasaysayan 1:17).

Hulagway ug panaghisgutan

• Kinsa kining duha ka mga personahe? (Langitnong Amahan ug Jesus.)

Si Joseph nangutana sa Langitnong Amahan ug ni Jesus hain nga simbahan ang husto ug hain siya kinahanglan magpasakop. Siya gisultihan nga siya kinahanglan dili magpasakop sa bisan hain nga mga simbahan tungod kay silang tanan sayop. Si Joseph nakakat-on nga ang kang Jesus nga tinuod nga simbahan wala na sa yuta.

Ang dapit diin si Joseph Smith nakakita sa Langitnong Amahan ug ni Jesus sa karon gitawag og ang Sagrado nga Kakahoyan.

Hulagway ug panaghisgutan

• Sa inyong hunahuna unsa ang gibati ni Joseph Smith human makakita sa Langitnong Amahan ug ni Jesus?

Si Joseph Smith Nakakat-on og Daghan nga mga Butang gikan sa Iyang Panan-awon

Pangutan-a ang mga bata unsa ang nakat-unan ni Joseph Smith gikan sa iyang panan-awon. Paghisgot sa mosunod nga mga punto:

1. Si Joseph Smith nakakita sa Langitnong Amahan ug ni Jesus. Siya nakakaton nga sila adunay mga lawas nga unod ug bukog.

2. Siya nakakat-on nga ang kang Jesus nga tinuod nga simbahan wala na sa yuta.

3. Siya nakakat-on nga siya dili magpasakop sa bisan hain sa mga simbahan. Hatagi og gibug-aton nga walay usa sa mga simbahan ang tinuod. (Kamo mahimo nga mosulti sa mga bata nga ang sunod nga leksyon mopasabut giunsa ni Joseph Smith pagtabang sa pagpabalik sa tinuod nga Simbahan ni Jesus dinhi sa yuta.)

4. Siya nakakat-on nga ang Langitnong Amahan ug si Jesus nag-amuma kanato ug motubag sa mga pag-ampo.

Awit

Awita o isulti ang mga pulong sa “Ang Unang Pag-ampo ni Joseph Smith.” O kamo mahimo nga modapit og usa ka dinapit sa pag-awit niini nga awit alang sa mga bata.

Artikulo sa hugot nga pagtuo

Si Joseph Smith kanhiay misulat ngadto sa usa ka tawo ug mipasabut unsa ang gitudlo sa Simbahan. Kabahin niana nga sulat nahimo nga nabantug nga ang mga Artikulo sa Hugot nga Pagtuo.

Tabangi ang mga bata sa pagsulti og balik sa unang artikulo sa hugot nga pagtuo, diin nagpahayag nga kita nagtuo diha sa Langitnong Amahan, Jesukristo, ug sa Espiritu Santo.

Katingbanan

Pagpamatuod

Pagpamatuod nga si Joseph Smith nakakita sa Amahan ug sa Anak, ug ipahayag ang imong pagpasalamat alang kang Joseph Smith.

Ipamatuod nga si Joseph Smith nakakat-on nga ang saad diha sa Santiago 1:5 tinuod. Kon kita magkulang og kaalam, kita makapangayo sa Langitnong Amahan ug makadawat og tubag.

Ipamatuod nga ang Langitnong Amahan ug si Jesus naghigugma kanatong tanan. Sila motabang kanato sa pagpangita sa mga tubag sa atong mga pangutana ingon lamang nga sila mitabang ni Joseph Smith. Mga anghel tingali dili mopakita kanato; apan kon kita mangayo sa kinasingkasing, ang Langitnong Amahan motubag sa atong mga pag-ampo diha sa paagi nga labing maayo alang kanato.

Pagdapit og usa ka bata sa paghatag sa panapos nga pag-ampo. Hangyoa siya sa pagpasalamat sa Langitnong Amahan alang kang Joseph Smith ug alang sa iyang panan-awon sa Langitnong Amahan ug Jesus.

Pagpalambo nga mga Kalihokan

Pagpili gikan sa mosunod nga mga kalihokan kadto nga labing moangay alang sa imong mga bata. Kamo makagamit kanila diha sa leksyon gayud o ingon nga usa ka balik-pagtuon o katingbanan. Alang sa dugang nga paggiya, tanawa ang “Panahon sa Klase” diha sa “Mga Tabang alang sa Magtutudlo.”

1. Ipapiyong sa mga bata ang ilang mga mata samtang inyong basahon ang mga pulong sa awit “Ang Sagrado nga Kakahoyan [The Sacred Grove]” (Children’s Songbook, p. 87). Hangyoa sila sa paghunahuna og maayo mahitungod sa kasinatian ni Joseph aron sila makadibuho og hulagway niini.

   Ang Sagradong Kakahoyan,

   Berde ug limpyo kaayo,

   Didto si Joseph miluhod,

   Nag-ampo’s kinasingkasing

   Sa sagradong yuta.

   Ang Amahan ug ang Anak,

   Nagpakita’g nakigsulti.

   Ilang mensahe mitubag

   Sa ta-nan’g kahadlok niya

   Ug nalipay siya.

   Ipadibuho sa matag bata ang usa ka hulagway ni Joseph Smith nga diha sa Sagrado nga Kakahoyan ug butangi kini og ngalan “Joseph Smith diha sa Sagrado nga Kakahoyan.”

2. Basaha pagbalik ang Santiago 1:5 og kusog ngadto sa mga bata ug ipasabut giunsa niini pagtudlo kanato sa pagpangita sa mga tubag sa atong mga suliran. Hatagi ang mga bata og mga sitwasyon diin sila tingali “kulang sa kaalam” ug nagkinahanglan nga “mangayo sa Dios.” Tabangi sila sa paghunahuna og mga paagi nga ang Langitnong Amahan makatabang kanila sa mga suliran kon sila mangayo kaniya. Kamo mahimo nga mogamit og mga sitwasyon ingon sa mosunod:

   • Kamo masulub-on tungod kay kamo ug ang inyong labing suod nga higala nag-away sa dili pa dugay. Kamo wala masayud unsaon nga mamaayo ang kahimtang.

   • Kamo mibati og kamingaw ug kahadlok sa inyong higdaanan magabii.

   • Ang inyong inahan nagdaot ug ingon og siya naguol. Kamo buot nga motabang kaniya nga magmalipayon pag-usab.

   Siguroha sa paghatag og gibug-aton nga ang Langitnong Amahan ug si Jesus sa kasagaran motubag og mga pag-ampo pina-agi sa paghatag kanato og usa ka malinawon nga pagbati, diin ang mga bata makakat-on og labaw mahitungod niini diha sa lain nga leksyon. Ang mga bata kinahanglan dili magdahum nga ang Langitnong Amahan ug si Jesus magpakita kanila aron sa pagtubag sa ilang mga pag-ampo.