Ang Simbahan ni Jesukristo Adunay mga Propeta aron sa Pagtudlo Kanato

Katuyoan

Aron sa pagtabang sa mga bata sa pagsabut sa kamahinungdanon sa pagpaminaw ug sa pagsunod sa mga pagtulun-an sa mga propeta.

Pagpangandam

Sa mainampuon nga paagi pagtuon sa Lucas 1:70.
Hangyoa ang usa ka tighupot sa Melchizedek nga Pagkapari gikan sa imong purok o sanga sa pag-anha sa imong klase ug pagsulti sa mga bata nga siya nagpakaaron ingnon nga si Hari Benjamin. (Siya mahimo nga magsul-ob og bata de banyo o usa ka susama niini ibabaw sa iyang mga saput aron sa pagtimaan sa saput sa usa ka hari.) Hangyoa siya sa pagpaila sa iyang kaugalingon ingon nga si Hari Benjamin. Himoa nga siya mopasabut ngadto sa mga bata nga siya kanhiay usa ka matarung nga hari kinsa mitrabaho uban sa iyang kaugalingon nga mga kamot aron sa pagbuhi sa iyang kaugalingon nga siya dili mahimo nga palas-anon ngadto sa iyang mga katawhan. Hangyoa siya sa pagpasabut sa daklit nga siya nagpatukod og usa ka tore ug nga ang mga tawo gikan sa duol ug sa layo mianha aron sa pagpaminaw sa iyang mensahe. Hangyoa siya nga sa daklit motudlo sa mga bata sa usa sa mga baruganan nga gitudlo ni Hari Benjamin (tan-awa Mosiah 2-5).
Isulat ang matag usa sa mosunod nga mga pagtulun-an gikan sa mga propeta ug mga Presidente sa Simbahan sa lain nga mga piraso sa papel o pagkuha og hulagway nga nagtimaan sa matag usa. Ibutang ang mga papel diha sa usa ka sudlanan (o ibutang ang mga hulagway nga gikulob diha sa lamesa). Dugangi ang mga pagtulun-an kon gikinahanglan aron ang matag bata adunay higayon.

“Paghimo og gabii sa banay.”

“Pagtuon sa balaan nga mga kasulatan.”

“Simba matag Domingo.”

“Pag-ampo matag adlaw.”

“Ayaw panguha og mga butang nga gipanag-iya sa uban.”

“Tahura ang inyong mga ginikanan pinagi sa pagtabang kanila sa panimalay.”

“Bayad sa ikapulo.”

“Paghinigugmaay sa usag usa.”
Pagpakita og usa ka kopya sa usa ka magasin sa Simbahan nga may mensahe gikan sa propeta diha sa lamesa o sa usa ka dapit atubangan sa klase. Sa dili pa ang klase, pagtago og mga piraso sa papel nga may tultulanan mahitungod sa nahimutangan sa magasin nga gisulat diha niini diha sa paglibut sa lawak, sama pananglit sa ilawom sa lingkuranan, diha sa bintana, ug diha sa pisara. Matag tultulanan kinahanglan mosulti sa mga bata asa mangita alang sa sunod nga tultulanan. Ang katapusan nga tultulanan kinahanglan mogiya kanila pagbalik ngadto sa magasin nga gipakita. Diha sa magasin, linyahe o markahi sa bisan unsa nga paagi ang usa ka mubo nga mensahe gikan sa propeta nga ang mga bata makasabut.
Mga kagamitan nga gikinahanglan:
1. Usa ka Biblia.
2. Usa ka hulagway sa propeta karon.
3. Mga hulagway 3-19, Presidente David O. McKay.
Himoa ang gikinahanglan nga mga pagpangandam alang sa bisan unsa nga mga kalihokan nga inyong pagagamiton.

Gisugyot nga Pagpalambo sa Leksyon

Pagdapit og usa ka bata sa paghatag sa pagsugod nga pag-ampo.

Tinoa ang mga bata kon ikaw nag-awhag kanila sa paghimo og usa ka butang sulod sa semana.

Kang Jesukristo nga Simabahan Gipangulohan sa usa ka Propeta

Pang-atensyon nga kalihokan

Sultihi ang mga bata nga sila adunay mahinungdanon nga bisita sa klase karon. Hangyoa sila sa pagpaminaw og maayo sa iyang mensahe tungod kay siya mosulti kanila mahitungod sa usa ka matarung nga hari ug propeta. Human ang inyong bisita makahuman sa pagsulti, dapita ang mga bata sa pakiglamano kaniya ug pagpasalamat kaniya sa pag-anha sa klase.

Paghisgot sa balaan nga kasulatan

Hangyoa ang mga bata sa pagpaminaw sa usa ka balaan nga kasulatan ug tan-awa kon sila makakat-on ba og usa ka butang mahitungod sa mga propeta. Basaha ang Lucas 1:70. Tabangi sila sa pagsabut nga usahay ang Ginoo nagtudlo kanato pinaagi sa pagsulti sa iyang mga propeta unsa ang kinahanglan nga atong mahibaloan, ug ang Simbahan sa kanunay adunay usa ka propeta nga naggiya niini.

Paghisgot sa balaan nga kasulatan

Kinsa ang unang propeta dinhi sa yuta? (Adan.)
Kinsa ang unang propeta sa ulahing adlaw? (Joseph Smith.)
Kinsa ang atong propeta ug Presidente sa Simbahan karon? (Ipakita ang iyang hulagway ug ipabansay sa mga bata ang pagsulti sa iyang ngalan.)
Kinsa nga mga propeta sa Biblia ug sa Basahon ni Mormon nga inyong mahinganlan?
Makahimo ba ni bisan kinsa sa pagpili nga mahimong usa ka propeta? (Tan-awa sa Juan 15:16.)

Ipasabut nga dili bisan kinsa ang tawagon nga mahimong usa ka propeta. Si Jesukristo sa iyang kaugalingon nagpili kinsa ang iyang himoon nga propeta. Kon si Jesukristo magpili og usa ka propeta, siya mohatag kaniya sa tanan nga pagtugot nga iyang gikinahanglan sa pagdumala sa iyang Simbahan. Kini nga propeta mao usab ang Presidente sa Simbahan.

Ang Langitnong Amahan Naghatag Kanato og mga Propeta aron sa Paggiya ug Pagpanalangin Kanato

Kalihokan

Hangyoa ang mga bata sa pagpaminaw og maayo sa mosunod nga mga pahayag. Kon sila mouyon sa pahayag, sila kinahanglan motindog. Kon sila dili mouyon, sila kinahanglan molingkod. Hatag og panahon sa pagpasabut ang bisan hain nga mga pahayag nga ang mga bata dili makasabut. (Tungod kay ang tanan nga mga tubag sa mosunod nga mga pahayag “uyon” ipahimo sa mga bata ang pagpalingkod tali sa matag pahayag. Ang kalihokan gilaraw aron sa paghatag og kalihokan ug paugnat diha sa lawak klasehan.)

Kalihokan

Kita makadawat og mga mensahe gikan sa atong propeta diha sa kinatibukan nga komperensya. (Uyon. Ipasabut nga ang mga magtatambag sa propeta ug ang Napulog Duha ka mga Apostoles mga propeta usab.)
Ang atong propeta dili gayud mosulti kanato sa pagbuhat og sayop nga mga butang. (Uyon. Ipasabut nga kita nagtuo nga unsa ang isulti sa propeta kanato mao ang kanunay nga matarung mga butang nga buhaton.)
Presidente (nganli ang propeta karon) mao ang propeta ug Presidente sa Simbahan. (Uyon.)
Ang atong propeta nagsulti kanato sa mga butang nga ang Langitnong Amahan ug si Jesukristo buot nga atong buhaton aron kita magmalipayon ug makahimo sa pagpuyo uban kaniya pag-usab. (Uyon.)

Pagtudlo sa magtutudlo

Ipasabut nga ang propeta naghatag kanato og mga mensahe diha sa mga magasin sa Simbahan, namulong diha sa mga tigum, ug nangulo ug nagtudlo sa uban nga mga pangulo sa Simbahan.

Ipasabut nga si Jesukristo mao ang labing bantugan nga propeta kinsa nakapuyo dinhi sa yuta. Siya mitudlo sa ebanghelyo ug mihimo og daghan nga mga milagro.

Hulagway ug sugilanon

Sultihi ang mga bata nga ikaw mosaysay kanila og usa ka sugilanon mahitungod ni President David O. McKay, usa sa ulahing adlaw nga mga propeta. Ipasabut nga ang ulahing adlaw nga mga propeta mao kadto kinsa buhi sukad ni Joseph Smith, o duol sa panahon nga kita buhi. Ipakita ang hulagway 3-19, Presidente David O. McKay, samtang imong gisaysay ang mosunod nga sugilanon:

Samtang si Presidente David O. McKay mao ang propeta, siya mibyahe hapit sa tibuok kalibutan aron sa pagpakigkita ug paggiya sa mga sakop sa Simbahan. Kausa sa diha nga siya didto sa Alemanya, siya nakadungog mahitungod sa usa ka inahan kinsa nahimong paralitiko (siya dili makalihok sa mga bahin sa iyang lawas) ug dili makatambong sa komperensya aron sa pagpaminaw kaniya nga namulong.

Kini nga inahan adunay duha ka mga anak, ug siya buot kanila nga motambong sa komperensya ug motan-aw ug maminaw sa buhing propeta. Uban sa dakong hugot nga pagtuo siya miingon, “Ako nakahibalo nga kon ako mopaadto sa akong mga anak sa pakiglamano ni Presidente McKay, ug unya sila mopauli sa panimalay ug mokuha sa akong kamot—kon ako makagunit sa ilang gagmay nga mga kamot diha sa akong mga kamot—ako nasayud nga ako maarang-arang.”

Ang pagpahigayon gihimo aron ang iyang duha ka mga anak makaadto sa komperensya. Ang mga bata naghinam-hinam ug nakulbaan samtang sila mibyahe aron sa pagtan-aw sa propeta.

Sa katapusan sa komperensya, si Presidente David O. McKay milamano sa daghan nga mga tawo kinsa didto. Siya nakahibalo nga kining duha ka mga bata ania, ug sa diha nga siya nakakita kanila, siya milamano kanila ug miingon, “Mahimo ba nga dad-on ninyo kining panyo ngadto sa inyong inahan uban sa akong panalangin?”

Gidala sa mga bata ang panyo ngadto sa ilang inahan. Siya hilabihan sa kalipay ug mipasalamat sa Ginoo matag adlaw alang sa panyo ug sa panalangin nga gipadala ni Presidente McKay pinaagi sa iyang duha ka mga anak. Dihadiha sa pag-abut sa mga bata sa panimalay, siya nagsugod sa pagkaarang-arang, ug sa wala madugay makalihok na sa iyang lawas ug nagamuma sa iyang mga anak. (Tan-awa sa Cherished Experiences from the Writings of President David O. McKay, gitigum ni Clare Middlemiss [Salt Lake City: Deseret Book Co., 1955], pp. 149–51.)

Kita Makasunod sa Propeta

Dula nga pagpangita sa bahandi

Paghimo og usa ka yano nga mauswagong dula nga pagpangita sa bahandi. Pagsugod pinaagi sa pagpahayag: :Ania niini nga lawak, mao ang usa ka mensahe gikan sa propeta sa Simbahan ngadto sa mga sakop niini nga klase. Tan-awa kon kamo makakita ba niini.” Unya sultihi ang mga bata sa unang tultulanan. Samtang ang matag tultulanan makit-an, basaha kini og kusog o ipabasa sa usa ka bata nga makabasa. Ang katapusan nga tultulanan mahimo nga mopahayag og sama niini, “Kini gisulat sa papel. Kini kauban sa ubang pahina nga papel. Kini adunay mabulukon nga hapin.” Kon ang mga bata makakaplag sa magasin, basaha o ipabasa sa usa ka bata gikan sa magasin ang gimarkahan nga mensahe gikan sa propeta. Unya ipasabut unsa ka mahal ang mga pulong sa usa ka propeta. Ang mga propeta makasulti kanato unsaon sa pagpuyo aron kita makabalik ngadto sa Langitnong Amahan.

Katingbanan

Pagpamatuod mahitungod sa mga panalangin nga miabut kanimo pinaagi sa pagtuon sa mga pagtulun-an sa mga propeta diha sa balaan nga mga kasulatan ug ang pagsunod sa buhi nga propeta. Kamo mahimo nga buot nga makigbahin og usa ka kinaugalingon nga kasinatian mahitungod sa unsa nga paagi nga ang usa ka pagtulun-an gikan sa usa ka propeta nakaimpluwensya sa inyong kinabuhi.

Pagdapit og usa ka bata sa paghatag sa panapos nga pag-ampo.

Pagpalambo nga mga Kalihokan

Pagpili gikan sa mosunod nga mga kalihokan kadto nga labing moangay sa imong mga bata. Ikaw makagamit kanila diha sa leksyon gayud o ingon nga usa ka balik-pagtuon o katingbanan. Alang sa dugang nga paggiya, tan-awa ang “Panahon sa Klase” diha sa “Mga Tabang alang sa Magtutudlo.”

Patindoga ang mga bata nga maglinya ug magmartsa sa hilom liyok sa lawak samtang nagsulti o nag-awit sa mga pulong sa koro sa “Sunda ang Propeta [Follow the Prophet]” (Children’s Songbook, pp. 110–11). Matag human sa koro, ang bata sa atubangan sa linya kinahanglan nga mosulti giunsa niya pagsunod ang mga pagtulun-an sa propeta ug unya moadto sa katapusan sa linya. Siguroha nga ang matag bata makapuli nga moanha sa unahan sa linya.

Sunda’ng propeta, sunda’ng propeta,

Sunda’ng propeta; ayaw’g kasaag.

Sunda’ng propeta, sunda’ng propeta,

Sa agianan nasayud s’ya.
Ipasabut nga kon kita mosunod sa propeta pinaagi sa pagbuhat unsa ang iyang gisugo nga atong buhaton, kita mapanalanginan ug makahimo sa pagbalik og puyo uban sa Langitnong Amahan ug ni Jesukristo. Panghatag og usa ka kopya sa dula nga liku-liko (makita diha sa sunod nga pahina) ngadto sa matag bata ug hangyoa sila sa pag-kolor sa matarung nga dalan aron makabalik ngadto sa Langitnong Amahan ug ni Jesus. Ang mga bata nga dili makabasa mahimo nga nanginahanglan og pipila ka tabang.
Pakigbahin og mga kamatuoran ug mga sugilanon mahitungod sa bag-o nga propeta samtang imong ipakita ang iyang hulagway.
Tabangi ang mga bata sa pagkat-on kutob sa mahimo sa ikalima nga artikulo sa hugot nga pagtuo.