Pagsinati sa Bag-ong Tugon

Katuyoan

Aron sa pagpasinati sa mga bata sa Bag-ong Tugon ug pag-awhag kanila sa pagtuon sa mga kasulatan.

Pagpangandam

Sa mainampoon nga paagi pagtuon sa 2 Timoteo 3:1–7, 13–17. Dayon pagtuon sa leksyon ug paghukom unsaon nimo pagtudlo ang mga bata sa mahinungdanong katuyoan sa leksyon. (Tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.)
Dugang basahonon: Mga Baruganan sa Ebanghelyo, kapitulo 10.
Pilia ang mga pangutana sa panaghisgutan ug mga kalihokan sa pagpalambo nga maoy makaapil sa mga bata ug labing makatabang kanila sa pagkab-ot sa katuyoan sa leksyon.
Andama ang mosunod nga walo ka mga ginunting nga mga pulong: Mga Kasulatan, Sumbanan nga mga Kasulatan, Biblia, Daang Tugon, Bag-ong Tugon, Basahon ni Mormon, Doktrina ug mga Pakigsaad, Perlas nga Labing Bililhon. (Ikaw mahimong mogamit sa pisara imbis sa mga ginunting nga mga pulong.)
Mga materyal nga gikinahanglan:
1. Usa ka Biblia o usa ka Bag-ong Tugon alang sa matag bata.
2. Sumbanan nga mga kasulatan.

Pahinumdom: Mahimong adunay mga bata sa imong klase kinsa dili kaayo maayong mobasa. Pangita og mga paagi sa pagtabang kanila nga makasalmot nga dili mobati nga kiwaw. Ang tanang mga bata kinahanglan gayud nga adunay positibo nga kasinatian uban sa mga kasulatan matag semana. Ang imong kadasig alang sa mga kasulatan makatabang nila nga gustong magtuon ug magkat-on sa ilang mga kaugalingon.

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Ihatag sa mga bata sa mosunod nga mga timailhan ug ipaisa ang ilang mga kamot kon sila nagtuo nga sila nasayud sa pulong nga matukma sa mga timailhan.

Pang-atensyon nga Kalihokan

Adunay upat niini.
(Ngalan sa usa ka bata diha sa klase o usa ka tawo nga sila nakaila kinsa aduna sa tanang upat ka mga basahon sa kasulatan) nga anaa niini.
Sila gitawag og sumbanan nga mga kasulatan.
Sila naglangkob sa pulong sa Dios.
Sila mga basahon.

Sa higayon nga ang mga bata makatag-an sa pulong Mga Kasulatan, ipasabut nga kining leksyon magtudlo kanila mahitungod sa mga kasulatan ug ipasabut ang kamahinungdanon niini sa atong mga kinabuhi.

Mga Pangutana sa Panaghisgutan ug Paggamit

Pagtuon sa mosunod nga mga pangutana ug sa mga pakisayran sa kasulatan samtang ikaw mag-andam sa imong leksyon. Pilia ang mga pangutana nga sa imong pagtuo labing makatabang sa mga bata nga makasabut sa mga kasulatan ug sa paggamit sa mga baruganan sa ilang mga kinabuhi. Ang pagbasa sa mga pakisayran uban sa mga bata diha sa klase makatabang nila nga makasabut sa mga kasulatan.

Mga Pangutana sa Panaghisgutan ug Paggamit

Unsa ang mga kasulatan? Sa unsang paagi nga ang kasulatan lahi kaysa ubang mga sinulat? (2 Timoteo 3:16.)
Ngano nga kita kinahanglan nga magtuon sa mga kasulatan? Kanus-a kita angay nga magsugod pagtuon sa mga kasulatan? (2 Timoteo 3:14–15.) Ngano nga mahinungdanon nga magsugod pagtuon sa kasulatan samtang kita bata pa?

Ipakita ang imong mga kopya sa mga kasulatan, ug ipakita ang ginunting nga mga pulong “Sumbanan nga mga Kasulatan.” Ipasabut nga kita nagtawag sa mga kasulatan nga sumbanan nga mga kasulatan tungod kay kini opisyal nga mga kasulatan nga atong gigamit sa Simbahan.

Dapita ang mga bata sa pagpakigbahin uban sa klase unsa ang ilang nahibaloan mahitungod sa mga kasulatan. Samtang ikaw naghisgot sa matag basahon sa kasulatan, ipakita ang tukma nga mga ginunting nga mga pulong o isulat ang mga pulong diha sa pisara. (Tan-awa sa Mga Baruganan sa Ebanghelyo, kapitulo 10.)

Mga Pangutana sa Panaghisgutan ug Paggamit

Hain sa sumbanan nga mga kasulatan nga atong mabasa ang mahitungod kang Jesukristo? Basaha o dapita ang usa ka bata nga mobasa sa mosunod nga mga bersikulo: Moises 8:24 (hangtud sa mga pulong Espiritu Santo), Doktrina ug mga Pakigsaad 20:29, 2 Nephi 25:26, ug Salmo 83:18 (ipasabut nga ang Jehova laing ngalan alang sa Jesukristo). Tabangi ang mga bata nga makasabut nga ang tanang upat ka sumbanan nga mga kasulatan nagpamatuod kang Jesukristo.
Ipaabli sa mga bata ang ilang mga Biblia ngadto sa pahina sa mga sulod (listahan sa mga basahon sa Daan ug Bag-o nga mga Tugon). Unsa ang duha ka labing dakong mga seksyon nga nagbahin sa Biblia? Unsa ang listahan nga anaa sa ubos sa matag seksyon? Ipasabut nga ang gamay nga mga basahon sa Daan ug Bag-ong mga Tugon gisulat sa nagkalainlaing mga propeta o mga pangulo sa Simbahan. (Kon adunay tsart sa mga minubo, ipasabut kini ngadto sa mga bata.) Asa kita makakita sa asoy sa mortal nga kinabuhi ug pagpangalagad ni Jesus? (Sa Bag-ong Tugon.) Ipatan-aw sa mga bata ang lista sa Bag-ong Tugon, ug ipasabut nga ang mga leksyon karon nga tuig nagpukos sa mga pagtulun-an gikan sa Bag-ong Tugon.
Kinsa sila si Mateo, Marcos, Lucas, ug Juan? Unsa ang ilang gisulat? (Tabangi ang mga bata nga makasabut nga ang matag usa niining upat ka mga lalaki misulat og asoy sa kinabuhi ni Jesus, sa kasagaran nagsulat mahitungod sa managsama nga mga panghitabo, ug mipamatuod nga siya mao ang Manluluwas.) Dapita ang mga bata sa pagpakigbahin sa ilang paborito nga mga sugilanon ug mga pagtulun-an gikan sa kinabuhi ni Jesus.
Ipaabli sa mga bata ang Mga Buhat, kapitulo 1. Ipasabut nga ang Mga Buhat nagsaysay mahitungod sa mga Apostoles nga nagtudlo sa ebanghelyo human sa pagkamatay ug pagkabanhaw ni Jesus. Unsa nga matang sa mga butang sa inyong pagtuo ang gibuhat sa mga Apostoles sa panahon ni Jesus? Unsa ang gibuhat sa mga Apostoles karon?
Ipaabli sa mga bata pag-usab ang pahina sa mga sulod. Ipasabut nga kadaghanan sa nahibiling mga basahon sa Bag-ong Tugon mga sulat nga gisulat sa mga Apostoles ni Jesus o sa ubang mga pangulo sa Simbahan ngadto sa mga sakop sa Simbahan. Ngano sa inyong pagtuo nga sila misulat niini? Ipasabut nga kini nga mga sulat nakatabang sa unang mga sakop sa Simbahan nga makasabut sa ebanghelyo ug mitambag kanila nga magmatinud-anon. Unsa ang anaa kanato sa Simbahan karon nga susama niini nga mga sulat? (Mga artikulo sa mga General Authority diha sa Liahona, mga sibya sa satellite, ug sa kinatibuk-an nga komperensya ug komperensya sa stake.)

Ipasabut nga ang matag basahon diha sa Bag-ong Tugon gibahin ngadto sa mga kapitulo ug mga bersikulo aron kita dali nga makakita sa hugpong sa mga pulong diha sa mga kasulatan.

Mga Pangutana sa Panaghisgutan ug Paggamit

Isulat ang Mateo 28:2–9 diha sa pisara. Asa sa sumbanan nga mga kasulatan nato makita kini nga kasulatan? Unsa nga numero ang nagsulti kanato sa kapitulo? Unsa nga mga numero ang nagsulti kanato sa mga bersikulo? Basaha kini nga mga bersikulo uban sa mga bata. Bahin sa unsa man kini nga asoy sa kasulatan? Ngano nga mahinungdanon nga kini nga panghitabo masulat diha sa mga kasulatan?

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan sa bisan unsang higayon sa panahon sa leksyon o ingon nga ribyu, katingbanan, o hagit.

Tabangi ang mga bata sa pagsag-ulo sa mga basahon sa Bag-ong Tugon nga magsunodsunod. Ribyuha ang mga basahon sa mosunod nga mga semana.
Hisguti ang ikawalo nga artikulo sa hugot nga pagtuo uban sa mga bata, ug tabangi sila nga makasag-ulo niini (tan-awa sa “Pagtabang sa mga Bata sa Pagsag-ulo sa mga Kasulatan,” p. xii). Pagpahinumdom sa mga bata nga ang atong Biblia gihubad gikan sa karaang mga dokumento nga gikopya ug gikopya pag-usab pinaagi sa kamot ug nga ang mga sayop tungod sa paghubad ug sa pagkopya og usab. Bisan tuod kon ang kadaghanan sa Biblia tukma, si propeta Nephi misulat nga daghan nga “yano ug mga bililhon nga mga butang” (1 Nephi 13:28) ang gikuha. Si Propeta Joseph Smith mituon pag-usab sa Biblia pinaagi sa inspirasyon sa Dios ug midugang sa mga bahin nga gitangtang o giilisan. Ipasabut nga kining mga bahin makatabang nato nga makasabut og labaw pa nga mga butang mahitungod sa ebanghelyo. Kon ang Giya ngadto sa mga Kasulatan (diha sa tulo ka kombinasyon) anaa, tan-awa sa HJS nga mga pakisayran sa katapusan sa tulo ka kombinasyon. Itandi ang Mateo 6:13 diha sa Biblia ngadto sa Mateo 6:14 sa hubad ni Joseph Smith ug hisguti sa unsa nga paagi ang hubad ni Joseph Smith makatabang nato nga makasabut sa bersikulo.
Kon ang Giya ngadto sa mga Kasulatan diha sa tulo ka kombinasyon anaa, ipasabut sa mubo nga paagi ang mosunod nga mga seksyon: mga sinulat sa ubos sa panid, ang Giya ngadto sa mga Kasulatan, Mga Mapa ug Indeks sa Dapit-mga ngalan, ug mga hulagway sa mga dapit sa kasulatan ug sa masaysayon nga mga dapit.
Basaha ug hisguti ang Lucas 24:27. Tabangi ang mga bata nga makasabut nga si Jesus mituon ug mitudlo gikan sa mga kasulatan sa kasagaran. Unsa nga kasulatan kaha ang gitun-an ni Jesus? (Ang Daang Tugon.)
Tangtanga ang mga ginunting nga mga pulong, sagula kini, ug ibutang kini diha sa salog o sa lamesa. Pangutana sa mga bata og mga pangutana pareho sa mosunod:
- Unsa nga duha ka mga ginunting nga mga pulong ang nagpasabut og sama nga butang? (“Mga Kasulatan” ug “Sumbanan nga mga Kasulatan.”)
- Unsa nga duha ka mga ginunting nga mga pulong nga ginganlan og mga basahon nga bahin sa ikatulo nga basahon? (“Bag-ong Tugon” ug “Daang Tugon,” nga mga bahin sa Biblia.)
- Unsa nga mga basahon ang gilakip sa sumbanan nga mga kasulatan? (Ang Biblia, Basahon ni Mormon, Doktrina ug mga Pakigsaad, ug Perlas nga Labing Bililhon.)
Sa panahon nga ang usa ka bata makatubag sa pangutana, paanhaa siya sa atubangan ug ipakita ang tukma nga mga ginunting nga mga pulong.
Kantaha o basaha ang mga pulong sa “Samtang Nagbasa Anang Sugilanong Matahum” (Mga Baruganan sa Ebanghelyo, p. 400).

Panapos

Pagpamatuod

Ipamatuod ang kamatuoran sa mga kasulatan ug ang kamahinungdanon niini sa atong mga kinabuhi. Ipakigbahin ngadto sa mga bata ang panahon sa imong kinabuhi diin ang pagbasa sa mga kasulatan nakatabang kanimo. Awhaga ang mga bata sa pagbasa gikan sa mga kasulatan matag adlaw.

Gisugyot nga Basahonon sa Panimalay

Isugyot nga ang mga bata magtuon sa 2 Timoteo 3:14–17 sa panimalay isip ribyu niini nga leksyon.

Dapita ang usa ka bata nga mohatag sa panapos nga pag-ampo.