Ang Wali sa Bukid

Katuyoan

Aron sa pagtabang sa mga bata nga maningkamot nga labaw nga mahimong sama ni Jesus pinaagi sa pagsunod sa iyang mga pagtulun-an sa Wali sa Bukid.

Pagpangandam

Sa mainampoon nga paagi pagtuon sa Mateo 5:1–6:4 ug 7:12. Dayon pagtuon sa leksyon ug paghukom unsaon nimo pagtudlo ang mga bata sa asoy sa kasulatan (tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.)
Dugang mga basahonon: Lucas 6:17–36 ug 3 Nephi 12.
Pilia ang mga pangutana sa panaghisgutan ug mga kalihokan sa pagpalambo nga makapaapil sa mga bata ug makatabang nila sa pagkab-ot sa katuyoan sa leksyon.
Mga materyal nga gikinahanglan:
1. Usa ka Biblia o usa ka Bag-ong Tugon alang sa matag bata.
2. Mga piraso nga papel nga adunay mga kahimtang nga mahimong atubangon sa mga bata (tan-awa ang pang-atensyon nga kalihokan).
3. Hulagway 7-12, ang Wali sa Bukid (Pakete sa mga Hulagway sa Ebanghelyo 212; 62166).

Gisugyot nga Kalamboan sa Leksyon

Pagdapit og usa ka bata nga mohatag sa pagsugod nga pag-ampo.

Pang-atensyon nga Kalihokan

Paanha ang matag bata sa atubangan sa klase, tagsatagsa, ug pakuhaa og usa ka piraso nga papel diin imong gisulat ang usa ka malisud nga sitwasyon nga tingali iyang atubangon. Gamita ang mga sitwasyon sama sa mosunod nga mga ehemplo:

Pang-atensyon nga Kalihokan

Ang imong igsoon nga lalaki o babaye nanaway nimo.
Adunay usa ka tawo nga nagminaldito nimo sa tulunghaan.
Ang ubang mga bata nagbiaybiay nimo sa imong pagbalibad nga mosulay sa usa ka sigarilyo.
Ang ubang mga bata nagbiaybiay kanimo tungod kay ikaw dili mamalikas.

Pasultiha ang matag bata kon unsay ilang buhaton sa maong kahimtang. Tuguti ang ubang mga sakop sa klase sa pagdugang sa ilang mga hunahuna. Ipasabut nga sila maghisgot sa pipila ka mga pagtulun-an ni Jesus sa Wali sa Bukid nga maoy makatabang kanila nga masayud unsa ang angayan nga buhaton niining mao nga kahimtang. Kining mga pagtulun-an makatabang nato nga mahimong labawng sama kang Jesus tungod kay kini nagtudlo nato kon sa unsa nga paagi siya buot nga kita magpuyo.

Asoy sa Kasulatan

Ipakita ang hulagway sa Wali sa Bukid. Ginamit ang mga kasulatan nga gilista sa “Pagpangandam” nga seksyon, tudloi ang mga bata mahitungod ni Jesus nga naghatag sa Wali sa Bukid. (Alang sa gisugyot nga mga paagi sa pagtudlo sa asoy sa kasulatan, tan-awa sa “Pagtudlo gikan sa mga Kasulatan,” p. viii.) Hatagi og gibug-aton ang mosunod nga mga punto:

Asoy sa Kasulatan

Ang mga Kabulahanan
Paghigugma sa inyong mga kaaway
Pagkahimo nga hingpit
Ang Bulawanon nga Lagda (Buhata ngadto sa uban ang imong buot buhaton sa uban nganha kanimo.)

Mga Pangutana sa Panaghisgutan ug Paggamit

Pagtuon sa mosunod nga mga pangutana ug mga pakisayran sa kasulatan samtang ikaw nag-andam sa imong leksyon. Gamita ang mga pangutana nga sa imong pagtuo labing makatabang sa mga bata nga makasabut sa mga kasulatan ug mogamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata makatabang nila nga makasabut sa mga kasulatan.

Mga Pangutana sa Panaghisgutan ug Paggamit

Ipasabut nga ang mga pagtulun-an sa Mateo 5:3–11 sa kasagaran gitawag og mga Kabulahanan. (Itudlo nga sa dihang si Jesus mihatag sa mga Kabulahanan ngadto sa mga Nephite, siya milakip sa hugpong sa pulong “kinsa moduol kanako.” Itandi ang Mateo 5:3 uban sa 3 Nephi 12:3.) Sa unsang paagi nga ang Kabulahanan makatabang nato nga mahimong labaw nga sama ni Jesus?
Unsa ang gipasabut sa giuhaw ug gigutom sa pagkamatarung? (Mateo 5:6.) Unsaon nato pagbuhat niini? Unsa nga mga panalangin ang atong madawat sa panahon nga kita mobuhat?
Unsa ang putli nga kasingkasing? (Mateo 5:8.) Unsa ang gisaad ngadto sa putli og kasingkasing? Unsaon nato sa pagpalambo og putli nga mga kasingkasing?
Ngano nga mahinungdanon nga mahimong tigpasiugda sa kalinaw? (Mateo 5:9.) Unsaon nato nga mahimong mga tigpasiugda sa kalinaw?
Unsa ang gipasabut nga mahimong “asin sa yuta”? (Mateo 5:13.) Sa unsang paagi nga kita mahisama sa asin? (Tan-awa sa kalihokan sa pagpalambo 2.) Unsa ang gipasabut nga mahimong “kahayag ngadto sa kaiibutan”? (Mateo 5:14–16.) Sa unsang paagi kita mahimong kahayag ngadto sa uban?
Unsa ang atong angay nga buhaton kon adunay suliran tali nato ug sa laing tawo? (Mateo 5:23–24.) Unsaon nato sa pagtagad ang atong mga kaaway o niadtong kinsa wala makagusto nato (Mateo 5:43–47.)
Sa unsa nga paagi kita mahimong hingpit? (Mateo 5:48.)

Hisguti kining pahayag gikan ni Elder Joseph Fielding Smith mahitungod sa pagkahingpit: “Ang [pagkahingpit] dili moabut dihadiha dayon, apan pagtulun-an human sa usa ka pagtulun-an, lagda human sa usa ka lagda, panig-ingnan ngadto sa panig-ingnan, ug bisan pa niana kini dili moabut samtang kita nagpuyo pa dinhi niining mortal nga kinabuhi…. Apan dinhi kita nagtukod sa katukuran…sa pag-andam sa atong kaugalingon alang nianang pagkahingpit. Kini atong katungdanan nga mahimong labaw ka buotan karon kaysa kita kagahapon, ug labaw nga buotan ugma kaysa kita karon” (Doctrines of Salvation, 2:18).

Mga Pangutana sa Panaghisgutan ug Paggamit

Unsaon gayud nato pagbuhat og mga buhat sa pag-alagad? (Mateo 6:1–4.) Unsa nga mga tinago nga buhat sa pag-alagad ang atong mabuhat alang sa uban?
Ang Mateo 7:12 sa kasagaran gitawag og Bulawanon nga Kalagdaan. Unsa ang gihangyo ni Jesus nga atong buhaton? Unsaon kanato sa pagbuhat niini?

Tabangi ang mga bata nga makasabut nga kon siia magtinguha sa pagbuhat sa mga pagtulun-an nga gitudlo ni Jesus sa Wali sa Bukid, sila anaa sa dalan ngadto sa pagkahingpit. Hatagi og gibug-aton nga ang pagkahingpit usa ka inanay nga butang nga dili mahuman dinhi niini nga kinabuhi. Ang kinahanglan nga atong buhaton karon mao ang pagpaninguha nga mahimong labawng sama kang Jesus matag adlaw.

Iparibyu sa mga bata ang mga sitwasyon gikan sa Pang-atensyon nga Kalihokan. Ipasulti nila unsa ang ilang nakat-unan mahitungod sa unsay gusto ni Jesus nga atong buhaton sa usa ka sitwasyon. Hangyoa ang mga bata sa paghunahuna mahitungod kon unsay mahitabo kon kitang tanan motuman sa mga pagtulun-an ni Jesus sa Wali sa Bukid.

Mga Kalihokan sa Pagpalambo

Ikaw mahimong mogamit og usa o labaw pa sa mosunod nga mga kalihokan sa bisan sa unsa nga higayon sa panahon sa leksyon o ingon nga usa ka pagribyu, katingbanan, o hagit.

Isulat diha sa mga kard ang unang bahin sa matag Kabulahanan, sama sa “Bulahan ang kabus sa espiritu kinsa moduol kanako,” ug isulat sa lain nga kard ang ikaduhang bahin sa Kabulahanan, sama sa “kay ila ang gingharian sa langit.” Sagula ang mga kard ug ibutang kini nga nagkulob nga naglaray sa lamesa o sa salog. Paduola ang mga sakop sa klase nga binagsa ug ipa-suway sa pagparisparis pinaagi sa paghayang sa duha ka mga kard. (Ang mga bata mahimong mogamit sa ilang mga kasulatan aron sa pagtabang kanila.) Kon ang mga kard magkaparis, ang mga nagkaparis nga mga kard ipabilin nga naghayang. Kon ang mga kard wala nagkaparis, kini kulbon pag-usab. Kon ang tanan dili makatukma sa unang higayon, sagula ang mga kard, baliha kini, ug ipaparisparis kini pag-usab sa mga bata.
Gawas kon kini nga leksyon naatol sa Domingo sa puasa, pag-andam og pagkaon nga sa kasagaran giandam nga adunay asin, sama sa popcorn, kan-on, pasta, ug uban pa. Ayaw iapil ang asin ug hangyoa ang matag bata sa pagtilaw sa pagkaon. (Pakisusi sa mga ginikanan kabahin sa mga allergy.) Dugangi og dyutay nga asin ug patilawa pag-usab ang mga bata. Ipaila nga ang dyutay nga asin makahimo og dako nga kalainan. Ang gamay nga panon sa matarung nga mga katawhan makahimo usab og dako nga kalainan. Pahisguti sa mga bata unsaon nga sila makahimo og kalainan pinaagi sa pagpuyo nga matarung. Basaha ang Mateo 5:13.
Pasundayag og kahimtang sa kasamok, sama sa duha ka mga bata nga nag-ilugay sa pareho nga lingkuranan, pipila ka mga bata nga masuk-anon nga nagsinultiay sa usag usa, ug uban pa. Ipadula kining maong mga kahimtang ug ipadala sa usa ka bata ang tigpasiugda og kalinaw. Ipahunahuna sa mga bata ang mga sitwasyon nga sila mahimong masakitan, sama sa usa ka tawo nga nagsulti og dautan ngadto kanila, usa ka tawo nga nagkuha og usa ka butang nga ilang gipanag-iya, usa ka higala nga nasuko kanila, usa ka tawo nga nagtamay kanila sa ilang pagkasakop sa Simbahan, ug uban pa. Pangutana kon unsaon nila sa pagtubag kining mao nga mga sitwasyon pinasikad sa Mateo 5:44.
Ipadula nga inamang sa usa ka bata ang usa ka pag-alagad nga iyang nabuhat o mabuhat. Ipatag-an sa uban nga mga bata kon unsa ang gibuhat sa bata. Hisguti ang kamahinungdanon sa pag-alagad sa uban. Hangyoa ang mga bata sa pagsulti mahitungod kon unsa ang ilang gibati sa dihang sila nagtabang sa ubang mga tawo, ug hangyoa sila sa paghunahuna mahitungod sa tanang maayong sangputanan nga mahitabo pinaagi sa pagtabang sa katawhan.
Tabangi ang mga bata sa pagsag-ulo sa Mateo 5:16 o sa unang bahin sa Mateo 7:12.
Pag-andam og kopya sa mga Kabulahanan nga madala sa matag bata sa panimalay, o pamarkahi nila ang ilang kaugalingong mga kasulatan.
Pag-andam og mga piraso nga papel o isulat ang mosunod nga mga pakisayran sa pisara:
- Mateo 5:3 ug 3 Nephi 12:3
- Mateo 5:6 ug 3 Nephi 12:6
- Mateo 5:10 ug 3 Nephi 12:10
- Mateo 5:48 ug 3 Nephi 12:48
Ipabasa sa mga bata ang duha ka mga pakisayran ug pahisguti kon sa unsa nga paagi kini nagkalahi. Tabangi ang mga bata nga makasabut nga si Jesus mitudlo sa sama nga mga butang ngadto sa mga Judeo ug sa mga Nephite ug nga kini mas klaro diha sa Basahon ni Mormon.

Panapos

Pagpamatuod

lhatag ang imong pagpamatuod nga kon kita motuman sa mga pagtulun-an ni Jesus sa Wali sa Bukid, kita anaa sa dalan padulong sa kahingpitan.

Gisugyot nga Basahonon sa Panimalay

Isugyot nga ang mga bata magtuon sa Mateo 5:3–11 sa panimalay ingon nga ribyu niini nga leksyon.

Pagdapit og usa ka bata nga mohatag sa panapos nga pag-ampo.