Leksyon 11
Si Jesukristo Nagtudlo mahitungod sa Pag-ampo
Katuyoan
Aron sa pagtabang sa matag bata nga makaangkon og tinguha sa pagbaton og pang-adlaw-adlaw nga kinaugalingon nga pag-ampo.
Pagpangandam
-
Sa mainampoon nga paagi pagtuon sa Mateo 6:5–13, 7:7–11, ug Alma 34:19–27. Dayon pagtuon sa leksyon ug paghukom unsaon nimo pagtudlo ang mga bata sa mga asoy sa kasulatan (tan-awa sa “Pagpangandam sa Imong mga Leksyon,” p. vii, ug “Pagtudlo gikan sa mga Kasulatan,” p. viii.)
-
Dugang mga basahonon: Mateo 4:2; 14:23; 26:36–46; Lucas 9:28–29; 11:2–4, 9–13; Juan 17; 3 Nephi 14:7–12; 17:14–21; 18:16.
-
Pilia ang mga pangutana sa panaghisgutan ug mga kalihokan sa pagpalambo nga maoy makapalakip sa mga bata sa imong klase ug labing makatabang kanila sa pagkab-ot sa katuyoan sa leksyon.
-
Mga materyal nga gikinahanglan:
-
Usa ka Biblia o usa ka Bag-ong Tugon alang sa matag bata.
-
Usa ka Basahon ni Mormon.
-
Lapis para imarka sa mga kasulatan.
-
Hulagway 7-12, ang Wali sa Bukid (Pakete sa mga Hulagway sa Ebanghelyo 212; 62166), ug 7-13, Usa ka nagpanuigon og Napulog Usa nga Nagluhod sa Pag-ampo (62218).
-
Gisugyot nga Kalamboan sa Leksyon
Pagdapit og usa ka bata nga mohatag sa pagsugod nga pag-ampo.
Pang-atensyon nga Kalihokan
Pagsulat sa laing mga piraso nga papel og pipila ka mga kahimtang, susama sa anaa sa mosunod nga lista, nga mahimong mahitabo sa mga bata (o ikaw mahimong mosulti nila sa maong mga kahimtang). Hangyoa ang mga bata sa pagduol sa atubangan ug papilia og usa ka piraso nga papel. Ipasulti nila kon unsa ang ilang bation kon anaa sa kahimtang ug kon unsa ang ilang buhaton.
Pang-atensyon nga Kalihokan
-
Ikaw nahulog sa bisiklita ug nasakitan ang imong bitiis. Walay laing tawo nga anaa sa duol ug ikaw wala masayud kon makalakaw pa pauli sa balay.
-
Ikaw gihilantan ug naglain ang imong tiyan. Gibuhat na ang tanan sa imong mga ginikanan aron magmaayo ang imong paminaw, apan ikaw nagluya pa sa gihapon.
-
Ikaw adunay buluhaton sa tulunghaan nga itagal ugma. Ikaw nagbuhat pag-ayo niini, apan kini dili sama ka maayo sa imong buot mahitabo ug ikaw wala masayud unsaon kini nga momaayo pa.
-
Ikaw didto sa gawas nagdula ug sa imong pagpauli walay tawo didto. Ikaw nahadlok tungod kay ikaw wala nasayud asa niadto ang imong banay.
-
Ang imong mga apohan mihatag nimo og kwarta alang sa imong adlaw nga natawhan, ug karon kini wala na sa imong gituohan nga imong gibutangan.
-
Ikaw naglingkod didto sa gawas pagsugod sa kangitngit ug ikaw nakamatikod sa katahum sa mga bitoon.
-
Ikaw nagtabang sa imong banay pagpalambo sa hardin, ug ikaw nakamatikod nga ang mga tanom nagkadagko ug ang mga utanon ug mga prutas nangahinog na.
Ipasabut nga kita mahimong mag-ampo sa Langitnong Amahan alang sa panabang sa bisan unsa nga problema nga nagsamok kanato, sa pagpakig-ambit sa atong mga pagbati ngadto kaniya, o sa pagpadayag sa atong pagpasalamat. Ang Langitnong Amahan sa kanunay maminaw sa atong tinud-anay nga mga pag-ampo.
Asoy sa Kasulatan
Itudlo sa mga bata nga si Jesus mipakita sa iyang mga tinun-an unsaon sa pag-ampo didto sa Wali sa Bukid (tan-awa sa Mateo 6:9–13). (Alang sa gisugyot nga mga paagi sa pagtudlo sa asoy sa kasulatan, tan-awa sa “Pagtudlo gikan sa mga Kasulatan,” p. viii.) Ikaw mahimong mopabanosbanos sa mga bata sa pagbasa niining mga bersikulo. Ikaw mahimo usab nga mohatag nila og higayon sa pagmarka sa bisan unsa o sa tanang mga bersikulo sa ilang kaugalingong mga kasulatan. Hisguti ang mga ideya nga nagpaluyo sa matag bersikulo ug ipasabut ang bisan unsa nga malisod nga mga pulong. Ipakita ang mga huiagway sa tukma nga mga higayon.
Mga Pangutana sa Panaghisgutan ug Paggamit
Pagtuon sa mosunod nga mga pangutana ug sa mga pakisayran sa kasulatan samtang ikaw nag-andam sa imong leksyon. Paggamit sa mga pangutana nga ikaw nagtuo nga maoy labing makatabang sa mga bata nga makasabut sa mga kasulatan ug sa paggamit sa mga baruganan diha sa ilang mga kinabuhi. Ang pagbasa sa mga pakisayran uban sa mga bata diha sa klase makatabang kanila nga makasabut sa mga kasulatan.
Mga Pangutana sa Panaghisgutan ug Paggamit
-
Unsa ang gipasabut ni Jesus sa dihang siya miingon, “Kon kamo mag-ampo dili kamo magbuhat ingon sa mga maut”? (Mateo 6:5.) Unsaon nato sa pag-ampo nga kinasingkasing aron kita dili maingon sa mga maut? (Ang maut usa ka tawo nga nagpakaaron-ingnon nga maayo bisan og siya dili maayo o siya maayo apan nagpakaaron-ingnon nga dili.)
-
Giunsa ni Jesus pag-ingon nga kita kinahanglan nga lahi kaysa mga maut kon kita mohalad sa kinaugalingon nga pag-ampo? (Mateo 6:6.)
-
Unsa ang gipasabut ni Jesus sa dihang siya miingon, “Kon kamo mag-ampo, ayaw paggamit sa kawang nga pagbalikbalik, sama sa pagano”? (Mateo 6:7.) (Ang pagano dinhi nagpasabut nga mga katawhan nga nagsimba og daghang mga dios-dios o kinsa dili nga Kristiyanos. Ang kawang nga pagbalikbalik mao nga kon kita magbalikbalik sa sama nga mga pulong ug hugpong sa mga pulong nga wala gihunahuna ug dili tinud-anay.) Unsaon nato sa paglikay sa “kawang nga pagbalikbalik” sa panahon nga kita mag-ampo?
-
Unsa ang gipasabut ni Jesus sa dihang siya miingon nato nga pangayo, pangita, ug panuktok? (Mateo 7:7–11.) Unsa ang saad sa Langitnong Amahan alang niadtong kinsa mangayo, mangita, ug motuktok? (Mateo 7:7–8.) Sa unsang paagi nga ang pag-ampo ngadto sa Langitnong Amahan nakatabang kanimo?
-
Ang Langitnong Amahan ba sa kanunay nagtubag sa atong mga pag-ampo? Tabangi ang mga bata nga makasabut nga bisan og kita dili siguro diha dayon makadawat og tubag sa atong mga pag-ampo o wala makadawat og tubag nga atong gidahum, ang Langitnong Amahan nagtubag sa matag tinud-anay nga pag-ampo. Usahay ang iyang tubag “dili” o “dili una.”
-
Ngano man kaha nga ang Langitnong Amahan motubag og “dili” o “dili una” sa usa ka pag-ampo? Paghatag og sanglitanan gikan sa imong kaugalingon nga kasinatian, kon mahimo. Tabangi ang mga bata nga makasabut nga tungod kay ang Langitnong Amahan nasayud sa tanang mga butang, siya nasayud unsa ang labing maayo alang nato.
-
Asa ug kapila kita angayan nga maghalad sa atong kinaugalingon nga mga pag-ampo? (Alma 34:19–27.)Unsa ang atong angay nga iampo? Unsa ang gipanghatag sa Langitnong Amahan nato nga kita angay nga magpasalamat?
-
Ngano sa inyong hunahuna nga ang Langitnong Amahan buot nga kita mag-ampo ngadto kaniya?
-
Ngano nga kini mahinungdanon nga magbaton og kinaugalingon nga pagampo matag buntag ug gabii? (Alma 37:37.)
-
Unsa ang imong gibati sa dihang ikaw mihaiad og usa ka mapainubsanon ug tinud-anay nga kinaugalingon nga pag-ampo? Unsaon nato nga mahimong labaw ka duol sa Langitnong Amahan pinaagi sa pag-ampo? Unsaon nato sa pagbaton kanunay og usa ka pag-ampo sa atong kasingkasing? Ngano nga kita kinahanglan nga maningkamot sa pagbuhat niini?
Mga Kalihokan sa Pagpalambo
Ikaw mahimong mogamit og usa o labaw pa sa mosunod nga mga kalihokan sa bisan unsang higayon sulod sa leksyon o ingon nga usa ka pagribyu, katingbanan, o hagit.
-
Bahina ang klase ngadto sa gagmay nga mga pundok ug ipapangita sa matag pundok ang mosunod nga mga pakisayran sa kasulatan. Dayon ipasulti sa pundok ngadto sa tibuok klase ang bahin sa kasulatan. Sa matag hitabo hisguti ngano nga si Jesus nag-ampo ug paghukom sa unsang paagi nga ang iyang ehemplo makatabang nato sa atong mga pag-ampo.
-
Sultihi ang mga bata sa higayon sa dihang ang imong mga pag-ampo gitubag, o paghangyo sa mga bata sa pagpaambit sa ilang linain nga mga kasinatian sa pag-ampo. Ikaw siguro buot nga mosaysay sa mosunod nga sugilanon:
“Usa ka talagsaon nga batan-ong pangulo nga misyonaryo…misaysay og usa ka makapadasig nga kasinatian sa dihang siya nawala didto sa Petropolis (Brazil), dili makasulti sa lumad nga pinulongan ug walay address sa kapilya o sa mga misyonaryo. Human sa usa ka matinguhaon nga pag-ampo diin siya nangamuyo sa Ginoo nga siya kinahanglan gayud og panabang sa pagtuman sa iyang misyon, siya nakadungog og tingog nga nagsulti kaniya sa makaduha sa pagsunod sa lalaki didto sa eskina. Masulundon siyang misunod sa lalaki ingon nga gigiyahan ug gitultolan ngadto sa kapilya nga wala maglisud” (L. Brent Goates, Harold B. Lee, Prophet and Seer, p. 282).
-
Sultihi ang mga bata nga kon kita mag-ampo kinahanglan nga kita maggamit og mga pulong nga nagpakita og pagtahud ug gugma alang sa atong Langitnong Amahan. Kita kinahanglan nga magsulay sa pagsulti sa matinahuron nga paagi sama nga kita nakigsulti ngadto sa usa ka magulang nga tawo kinsa atong gitahud ug gihigugma pag-ayo.
-
Pag-andam og tsart sa mosunod nga pahayag ni Elder Boyd K. Packer o isulat kini diha sa pisara, pagbilin og mga blanko alang sa pipila ka mga pulong. Isulat ang mga pulong nga wala giapii diha sa ginunting nga mga pulong o sa usa ka kolum diha sa pisara. Pasulaya ang mga bata sa pagpasulat sa mga pulong diha sa mga blanko sa mga ginunting nga mga pulong.
Ang uban nga (b) modangat gikan sa pagbasa sa (d) , ang uban gikan sa pagpaminaw sa (c) . Ug, panagsa, kon kini mahinungdanon, ang uban modangat pinaagi sa direkta kaayo ug (e). Ang mga pag-aghat (a) ug walay pagkasayop” (Conference Report, Okt. 1979, p. 30; o Ensign, Nob. 1979, p. 20).
-
Tin-aw
-
Mga tubag
-
Mga mamumulong
-
Mga kasulatan
-
Gamhanan nga pagdasig
-
-
Tabangi ang mga bata sa pagsag-ulo sa usa sa mosunod nga mga kasulatan mahitungod sa pag-ampo: Mateo 7:7, Santiago 1:5, 3 Nephi 18:20, o ang unang katunga sa Doktrina ug mga Pakigsaad 19:38.
-
Dapita ang mga bata sa pag-awit o sa pagbasa sa mga pulong sa “Ikaw Naghunahuna ba sa Pag-ampo?” (Mga Baruganan sa Ebanghelyo, p. 390.)
Panapos
Pagpamatuod
Ipamatuod nga ang Langitnong Amahan maminaw gayud ug motubag sa atong kinaugalingon nga mga pag-ampo. Ipamatuod ang kamahinungdanon sa paghimo sa atong mga pag-ampo matag buntag ug matag gabii, ug awhaga ang mga bata sa pagbuhat niini sa mosunod nga semana.
Gisugyot nga Basahonon sa Panimalay
Isugyot nga ang mga bata magtuon sa Mateo 6:5–8 sa panimalay ingon nga usa ka pagribyu niini nga leksyon.
Pagdapit og usa ka bata nga mohatag sa panapos nga pag-ampo.